Matiu 20 - mzwDBL

Tom-ɛɛra baa bɔ ba paa sɛɡla

¹ Yeesu berɔ ŋɔ, “Korowii Kora la do kɛŋɔ paa bɛl ne o tom-ɛɛra bane wa. Paa la iro chɔmbibi dɛɛ nyin tom-ɛɛra bá ka ɛ toma o koo ta dɛ́ lɛ suuɡa.

² O ne ba di yoɡ, asɛ ba sɛh kɛ baa ɛ toma tɔpebir la bwaa, dɛ́ lɛ denaare beŋkpoŋ aa ɛ tɔpebir toma kembɔr, asɛ o ɡel paa tena la kaa koo la ta.

³ Dɛ́ɛ kaa koola nenyɔɔ saŋ la, o berɔ ka na bonɔɔna bane baa cheɡɛ fɔɡbaah pɛɛpɛɛ.

⁴ Anee o ŋɔ ba be ŋɔ, ‘Hé ɡe kaa n koo la ta ka ɛ toma, ásɛ n tɛ heyaa kembɔr aa chɛ heya.’

⁵ Asɛ ba no o be dɛ kaa. Gɛ saŋ wee aa baa che nyufala, ne wekee saŋ la, o berɔ na tom-ɛɛra la bane ɡe ja, dɛ bol ba ɡe be ɡɛ waa bol banɔ la be la, asɛ ba ɡe kaa koo la ta.

⁶ Aa baa ka tamaa ken wee jo la, o berɔ ka na nɛra bane kɛ ba ɡe aa cheɡɛ fɔɡbaah pɛɛpɛɛ. Anee o pɛɛ ba ŋɔ, ‘Ɛrɛ waa fini bwa he che bonɔ dɛɛ chɔɡ pɛɛpɛɛ nɔɔ?’

⁷ Belaa ba chaŋo ŋɔ, ‘Nomɛlbwa ta yaa o toma ta kpɔe.’ Anee baa la ŋɔ, ‘Gɛɛ te naa, hé ɡe kaa n koo ta bela ka ɛ toma.’

⁸ Wee aa baa swɛɛ bɔr jo name la, o yerɛ naate waa dɛ nyiŋi o koo la ta la dɛ ŋɔ o be ŋɔ, ‘Yerɛ tom-ɛɛra la, dɛ́ bɔ ba kem. Kɛ tɔ sie le banɔ la baa ka mun ba la nɛ, dɛ́ bɔ ba kem.’

⁹ Banɔ la baa ba toma la ta dɛ wee dɛ ba joe la bɛlbwa dɔ denaare beŋkpoŋ.

¹⁰ Anomanta, dɛ banɔ la baa tɔ sie ba toma la ta chɔmbibi ne la dɛ lii kɛ baa dɔ suuɡaa ɡwaa ba bala la, kɛ denaare beŋkpoŋaa o bɔ ba ɡe bwa.

¹¹ Baa lɛ ba kembɔr la dɛ ba berɔ dɛɛ naɡre paa la waa ŋɔ,

¹² ‘Banɔ te aa dena ba ta biɡre bɛlbwa wee den swɛɛ, asɛ ya te le chɔmbibi ne bwa wedamanta nɔ kpo yaa, ɡɛɛ he saah bɔ ya bwa kem kɛrɛdɛ aa?’

¹³ Anee paa la chaŋe ba bini nomoa la ŋɔ, ‘N dam, n ta heyaa faahrɛ. N ne he ta toma nɔ yoɡ dii, he sɛh denaare beŋkpoŋa mɔɔ dɛ ba ɛa?

¹⁴ Hé kpɔ he suuɡa le n sie kaa. Men dɛɛ nyin dɛ bɔ he bwa kem kɛrɛdɛ.

¹⁵ N ta ŋwɛnɛ dɔe kɛ ń kpɔ n ɡbaɡba suuɡa ɛ ɡɛ aa too n tea a? Kɛɛ ɡɛ maa ta tea dɛ ɛ laanee dɛɛ we he nɛ?’ ”

¹⁶ Yeesu aa bol ɡɛ waa nɔ tonɛ la, o ŋɔ, “Gɛɛ a do, muŋkaala ɛɛ ba tɔ siee, ásɛ sitɔɔla berɛ ba ka mun.”

Yeesu berɔ bol o seo waa toorotena

¹⁷ Yeesu aa dɛ kaa Jerusalam la, o kaa ŋɔ o habɔteŋra fi dɛ banɛ la ɡbo be ŋwɛnɛ la ta ŋɔ,

¹⁸ “Hɛ́ɛ no n be. Yaa dɛ kaa Jerusalam nɔ, baa ka le Men Nɛn Biee tɛ Sɔfonomonome ne Tɔnjerema la. Baa pa mɛ bolchɔɡee dɛ́ ŋɔ bá kpo mɛ.

¹⁹ Baa kpɔ mɛɛ do nɛra baa wola Juu tena ɛɛ la nɔn ta, bá di n loro, dɛ́ cha mɛ chweremi, dɛ́ kpaa mɛ pɛl daɡaɡre ta, dɛ́ kpo mɛ, ásɛ tɔpetooro wee la ń ir seo ta.”

Haah bɛl waa soŋa tɛ o bii

²⁰ Asɛ Sebedii haah ne o bii ba, dɛ ba ɡuŋi Yeesu sie dɛ soŋo ŋɔ, ó ɛ waane tɛɛ ba.

²¹ Anee Yeesu pɛɛ haah la ŋɔ, “Bɔkwaa hɛɛ nyin kɛ ń ɛ tɛɛ nɔ?” Belaa haah la chaŋo ŋɔ, “Baɡ mɛ nyoa kɛ dɛ he baa di kora aa, hɛɛ ɡeloo n bii banɛ nɔ bɛl so he diɡ ta, bɛl ɡe so he ɡal ta.”

²² Anee Yeesu ŋɔ bii la be ŋɔ, “Haa waa haa dɛ soŋe nɔ mun jemɛ. Hɛɛ wonoo nyɔ n tɛɡkpela nɔ maa dɛ ba nyɔe nɔ ane aa?” Anee ba sɛh ŋɔ, “Yaa wonoo.”

²³ Asɛ Yeesu berɛ ŋɔ, “A ɛ kasinteŋ kɛ hɛɛ nyɔ n tɛɡkpela nɔ dɔŋaa te, kɛ n ta kpeɡri dɔe dɛ́ kpɔ nɛn so n diɡ ne n ɡal ta. Banɔ la baa su n Mɛɛ siwi laanee dɛɛ ba bela dɔe dɛ́ so.”

²⁴ Yeesu habɔteŋra fi la aa kaa la, ba no waa Sebedii bii la aa ɛa la, ba baah di ba nɛɛ kɛrɛdɛ.

²⁵ Anomanta, Yeesu yerɛ ba bwa cheme dɛ ŋɔ, “He jemɔ kɛ harɛ nɔ ta nomonome ne ba nomonjena dɛ di kpeɡri ba nɛra nɛ, dɛ ɡel baa tom ba, dɛ ɛ ɡɛ baa dɛ nyin dɛɛ tɛɛ ba.

²⁶ Kɛ ɡɛ laa chɛ kɛŋɔ hé te do. He bini bɛl dɛ nyin kɛ ó ɛ nomoa aa, a chɛ kɛ ó kpɔ o te ɛ kɛ bechala dɛɛ tomɛ heya.

²⁷ Dɛ he bini bɛl dɛ nyin kɛ wɛɛ tɔ he sie naa, a chɛ kɛ ó berɛ o te kɛ he bwa bonɔɔ.”

²⁸ Dɛ ŋɔ, “Men Nɛn Bie ta balɛ kɛ nɛ́ra tom mɛ. N te balɔ dɛ́ ba tomɛ nɛra, dɛ́ ɡarɛ kpɔ n nyu charɛ nɛndamanta mkpa.”

Yeesu chah nyoŋa banɛ bane

²⁹ Yeesu ne o habɔteŋra la aa le Jeriko dɛɛ kaa la, nɛnlaa tenten teŋɛ ba nɛ.

³⁰ Dɛ nyoŋa banɛ bane soɡe ŋwɛnɛ nyoa dɛ no Yeesu ɡbɔɡa kɛ waa dɛ kaa, asɛ ba kpɔ takpeɡ dɛɛ yerɔ ŋɔ, “N Dɔɔ, Devid Naa, na ya sum!”

³¹ Dɛ nɛnlaa la dɛ kah ba ŋɔ bá tɔ nyoa. Kɛ dɛ namee ba taa dooɡe lɔŋɔre kohona dɛɛ yerɛ, “N Dɔɔ, Devid Naa, na ya sum!”

³² Anee Yeesu jaɡɛ che, dɛ yer ba dɛ pɛɛ ba ŋɔ, “Bɔkwaa hɛɛ nyin kɛ ń ɛ tɛ heya ɔ?”

³³ Asɛ ba chaŋo ŋɔ, “Nomoa, ya dɛ nyin he ɡel yá berɛ won dɛɛ na.”

³⁴ Yeesu dɔ tedoma tɛɛ ba, dɛ kpɔ o nɔn leɡe ba sibie. Buɡ la ta, dɛ ba sie pilo ba won dɛɛ na, dɛ teŋɛ Yeesu nɛ.