Matiu 19 - mzwDBL

Baa ne haah dɔŋa vɛɛh

¹ Yeesu aa bol a ɡɛ waa nɔ tonɛ la, o le Galilia harɛ dɛ kaa Juda harɛ, Jɔɔdan Moo la baŋ.

² Dɛ nɛnlaa tenten teŋɛ o nɛ, asɛ o chah weela tena bela.

³ Asɛ Farisii tena bane ba bela dɛ ba kpɔ webɔɔra dɛɛ haɡro bela dɛ́ fe dɔɔ lawɛ. Ba bɔɔro ŋɔ, “Mmara dɛ tɛ yaa ŋwɛnɛ kɛŋɔ baa won che wobɛlbwa ta vɛh o haah naa?”

⁴ Anee Yeesu chaŋ ba ŋɔ, “He ta Korowii Tɔn la kure no kɛɛ? Korowii waa ta kwaa bwa la, waa dɛ ba nɛwɛnyini tae la, baa ne haahnee o ta,

⁵ asɛ dɛ ŋɔ, ‘A waa baa ɛɛ ba o nya ne o mɛɛ jwɛɛh lee, dɛ́ kpɔ o te ka pɛl o haah, ásɛ ba nɛra banɛ la pɛ ɛ nɛmbeŋkpoŋ la.’

⁶ Anomanta, baa nɛra banɛ ɛɛ ba kpa, ba pɛo ɛ beŋkpoŋ. Dɛ Korowii lawɛ nɛra banɛ pɛ aa, ŋwɛnɛ toole kɛŋɔ nɛn berɛ pere ba baah kpa.”

⁷ Anee ba pɛɛro ŋɔ, “Aah ɛrɛ waa Mosis Mmara la tɛ yaa ŋwɛnɛ ŋɔ dɛ baa dɛ ba o haah vɛɛh yaa, ó chwerɛ tɔn tɛo dɛ́ baɡle kɛ o vɛoh nɔɔ?”

⁸ Yeesu chaŋ ba ŋɔ, “He bambikpeɡ waa Mosis tɛ heyaa ŋwɛnɛ ŋɔ hé chwerɛ tɔn tɛ he haah dɛ́ vɛoh la. Gɛ laa a faa do wubwa.

⁹ Nomɛlbwa waa vɛh o haah la, dɛ baala laa haah la nyin mɔɔ o vɛoh, dɛ ka mo hanfale aa, dɛ o ɛ o haah la wechɔɡa dɛ bɔ jwamane.”

¹⁰ Anee o habɔteŋra la ŋɔ o be ŋɔ, “Dɛ kenii waa nɔ chɔ tɛ baa o haah moe ta te naa, amɔ te a wer kɛ baa bɛ haah mo, ásɛ haah ɡe bɛ yalɛ kwara.”

¹¹ Asɛ Yeesu ŋɔ ba be ŋɔ, “Nɛra bwa laa dɛ́ won so ŋɔ baa haahnaa mo, nemenɛ banɔ la Korowii aa kpɔ ɡɛ tɛɛ ba la ɡbosoroo.

¹² Nɛra bane haahna bɛ moe la ne a ŋwɛnɛree. Bane le a ne Korowii doa ba. Asɛ bane ɡe, fɔɡaa ba fɔɡɛ ba lure, asɛ bane ɡe koh Korowii Kora la waa dɛ ɛ ba te ɡɛ. Naate waa won teŋɛ n waa maa baɡla nɔ ta la, ó takapɔ dɛ́ teŋɛ a ta.”

Yeesu swee bechale bane andɛɛɡa

¹³ Dɛ nɛra bane kpɔ ba bii ba Yeesu be ŋɔ ó kpɔ o nɔn dawɛ ba nɛ, dɛ́ swee ba andɛɛɡa. Asɛ o habɔteŋra la kɔɡre nɛra la ŋɔ bá kpɔ ba bii la le le.

¹⁴ Anee Yeesu ŋɔ, “He bɛ bechale la ŋwɛnɛ tɔ. Hé ɡel ba ba n be, dɛkalkɛ banɔ dɔŋa nɔɔ Korowii Kora koobii la.”

¹⁵ Yeesu aa kpɔ o nɔn dawɛ ba nɛɛ tonɛ la, o le ba be dɛ kaa.

Baa bɛl waa ɛ dɔɔh wa

¹⁶ Baa bɛl iro dɛ la Yeesu be dɛ ka pɛɛro ŋɔ, “Nomoa, wedɛɛɡa besoo chɛ kɛŋɔ ń ɛ dɛ́ dɔ Korowii mkpa aa wola jaɡa dɔe bwa nɔ?”

¹⁷ Anee Yeesu ɡe berɛ pɛɛro ŋɔ, “Ɛrɛ waa hɛɛ pɛɛ mɛ wedɛɛɡa ɛɛ waa nɔɔ? Korowii ɡbosoo ɛ nɛndɛɛɡe. Kɛ dɛ he dɛ nyin kɛŋɔ he dɔ mkpa aa wola jaɡa dɔe bwa te naa, dɛɛ ɛ waa Korowii Mmarare la aa dɛ chaɡle la.”

¹⁸ Anee o pɛɛ Yeesu ŋɔ, “A bini ameo?” Anee Yeesu ŋɔ, “Bɛ nɛn kpo, bɛ jwamane bɔ, bɛ ŋwɛ, bɛ nyosone teŋe dawɛ he dɔŋ nɛ.

¹⁹ Dɛɛ duu he nya ne mɛɛ, ásɛ dɛɛ nyin he dɔŋ kɛ he ɡbaɡba.”

²⁰ Baa la ŋɔ, “Waa nɔ te bwa, n dɛ teŋɛ a ta. Amee ka mɛ jaɔ?”

²¹ Anee Yeesu ŋɔ o be ŋɔ, “Dɛ he dɛ nyin kɛ he waa do kɛrɛdɛ ka tonaa, ka yoɡ he kwaa haa dɔa bwa, ásɛ dɛ kpɔ a suuɡa kɛ nyaara. Ka ɛ ɡɛ, ásɛ dɛ ba teŋɛ n nɛ. Hɛɛ dɔ kondɔɔh cheɡ Korowii doaa.”

²² Baa la aa no ɡɛ Yeesu aa bola la, o tea bini chɔɡɔ, o laa berɛ kaa, dɛkalkɛ dɛ o dɔ kondɔɔh taeh.

²³ Anee Yeesu ŋɔ o habɔteŋra la be ŋɔ, “Kasinteŋ, n dɛ ŋɔ he be, aa do kpeɡrii tɛ dɔɔh kɛ ó dɔ bɔr ja Korowii Kora la ta.

²⁴ N dɛ ŋɔ he be ja kɛŋɔ, aa do pwɛree tɛ nyoɡma kɛŋɔ ó won jo tɔɔɡe bɔɔ ta, ɡwaa kɛŋɔ dɔɔh naa wona ja Korowii Kora la ta.”

²⁵ Yeesu habɔteŋra la aa no ɡɛ la, ba nyoa kpoo, baa pɛɛ dɔŋa ŋɔ, “Amɔ te umee dɛɛ ba o nyu dɔe yɔ?”

²⁶ Yeesu ha sie nyiŋ ba dɛ ŋɔ, “Nɛwɛnyini bee a do kpeɡri, kɛ Korowii be te, wobɛlbwa aa kpeɡe.”

²⁷ Anee Pita chaŋe Yeesu ŋɔ, “Nyiŋi na, ya te ɡel komɛlbwa yaa dɔa dɛ ba teŋɛ he nɛ. Bɔkwaa yaa ba dɔe yɔ?”

²⁸ Anee Yeesu ŋɔ o be ŋɔ, “Kasinteŋ, n dɛ ŋɔ he be, ɡɛ saŋ Korowii aa ba beɡre kwaa bwa anfala, ásɛ Men Nɛn Bie nɔ ba so n kookarajen la ta la, he nɛra fi dɛ banɛ nɔ haa teŋɛ n nɛɛ nɔ ɡee so kookane fi dɛ anɛ taa, dɛ́ bol nɛra baa le Israel deene fi dɛ anɛ la bwa waa dɛ́ pa ba bole.

²⁹ Asɛ nomɛlbwa ɡe koh n waa dɛ ɡel o dem ne o nahaahnanar, ne o dɔɔranar ne nimanar, ne o nya ne o mɛɛ, ne o bii dɛ kooni aa, wɛɛ dɔ a dɔŋa bele lafaa, dɛ́ berɛ dɔ mkpa aa wola jaɡa dɔe bwa la ɡe.

³⁰ Nɛra baa tɔ sie ɡalɡa ɛɛ ba ka munii, ásɛ nɛra baa ka mun ɡe ɡalɡa ba tɔ sie.”