Matiu 18 - mzwDBL

Nɛn waa ɛ nomoa Korowii kora ta

¹ A ɡɛ saŋ la Yeesu habɔteŋra la bwa ba o be dɛ ba pɛɛro ŋɔ, “Ya bini umee ɡwaa ya bwa dɛ ɛ nomoa Korowii Kora la ta nɔ?”

² Asɛ Yeesu yerɛ bechajeɡa bɛl dɛ ɡel o ba che ba baah ta,

³ asɛ dɛ ŋɔ, “Kasinteŋ, he ta he liire charɛ dɛ do kɛŋɔ bechajeɡre aa, haa won ja Korowii Kora la ta bwa.

⁴ Naate waa won pwɛr o te, dɛ́ do kɛŋɔ bechajeɡa nɔ la, onee ɡwaa nomɛlbwa Korowii Kora la ta.

⁵ Nomɛlbwa waa koh n waa dɛ́ nyiŋi bie nɔ dɔŋ nɛɛ la, menee o nyiŋi la.

⁶ Kɛ nomɛlbwa waa neɡre bechajeɡre nɔ dɔŋ bɛlbwa waa dɛ yarada mɛ nɔ ásɛ o ɛ wechɔɡa la, dɛ ba fe vɔwɛ nambwe do o baŋa, dɛ kpɔɔ ka ta mpo vil ta kwaraa fe bɔ.

⁷ Harɛ nɔ ta nɛra, hé bwɛɛlɛ, he dɔŋa neɡra dɛɛ do wechɔɡa ta nomanta. A ɡɛ waa la ɛɛ bao te, kɛ naate waa ba a ne la, ó bwɛɛlɛ.

⁸ Dɛ he nɔn kɛɛ he nakpala ɛɛ neɡree he ɛ wechɔɡa aa, teŋo ta. Haa dɔ nɔmbeŋkpoŋ kɛɛ nakpabeŋkpoŋ, dɛ dɔ Korowii be kaa bɔ kɛŋɔ, haa dɔ nɔɔra anɛ kɛɛ nakpale anɛ, dɛ kaa Bɔnsam nii aa wola dime bwa la ta.

⁹ Dɛ he siwi ɡee neɡree he ɛ wechɔɡa aa, fomo ta. Haa dɔ siwi beŋkpoŋ, dɛ ba dɔ Korowii mkpa bɔ kɛŋɔ, haa dɔ sibie anɛ dɛ kaa Bɔnsam nii aa wola dime bwa la ta.”

Penyoɡre bɛl sɛɡla

¹⁰ Yeesu berɔ ŋɔ, “Hé nyiŋi kɛrɛdɛ dɛ bɛ n bechajeɡre nɔ bɛlbwa nyiŋi vah. N dɛ ŋɔ he be kɛŋɔ, nyundua toroma baa dɛ nyiŋi ba nɛɛ la won n Mɛɛ sie laŋa saŋ te bɛlbwa.

¹¹ Nɛra baa nyoɡra la waa Men Nɛn Bie koh ba.

¹² Dɛ nomɛl dɔ peera lafa asɛ beŋkpoŋ nyoɡre aa, ɛrɛɛ wɛɛ ba ɛɛ yɔ? Wɛɛ ɡel fifraanuanaarɛ dɛ anuanaarɛ la a dibɔr belaa tama, dɛ́ ka ɡaaɡe beŋkpoŋ waa nyoɡra la bɔr.

¹³ Dɛ o nao waa, kasinteŋ, o sie ɛɛ lɛ o nɛɛ ɡwaa fifraanuanaarɛ dɛ anuanaarɛ la aa wola nyoɡrɛ la.

¹⁴ Gɛɛ a do he Mɛɛ waa lɔ nyundua la aa wola nyin kɛŋɔ bechale nɔ bini bɛlbwa nyoɡre.”

He dɔŋ waa ɛɛ wechɔɡa wa

¹⁵ Anee Yeesu berɛ ŋɔ, “Dɛ he dɔŋ ɛɛ wechɔɡa ane aa, la o be he ne o le bokɛre bela nomɛlbwa aa wola toole, dɛ́ ka ɡel o jemɛ wechɔɡa waa kpɔa ɛɛ. Dɛ o na o wechɔɡa dɛ larawe naa, dɛ he berɔ dɔ he chamenate.

¹⁶ Kɛ dɛ o ŋɔ waa sɛh kɛ o ɛ wechɔɡa aa, ka nyin nɛmbeŋkpoŋ kɛɛ banɛ ja he nɛ, ásɛ he ne ba la o be, dɛkalkɛ nɛra banɛ kɛɛ batoro danseɛ ɛ kasinteŋ.

¹⁷ Dɛ he ne nɛra la laŋɔ o ŋɔ waa sɛh ja aa, kpɔ ka bil he bala bwa he ne ba aa dɛ cheme la sie. Dɛ o ŋɔ waa ba ɡe bee no aa, ɡel o waa tɛo kɛ nɛn waa wola Korowii tomɛ kɛɛ wechɔɡ-ɛɛ.

¹⁸ Kasinteŋ, wobɛlbwa haa wola sɛɛh harɛ nɔ ta la, nyundua ɡe Korowii aa sɛh, asɛ wobɛlbwa haa sɛh harɛ nɔ ta la, nyundua ɡe Korowii ɛɛ sɛoh.

¹⁹ N berɔ dɛɛ ŋɔ he be ja kɛ dɛ he bini banɛ ɡba nyoa pɛo harɛ nɔ ta hɛɛ nyin komɛl aa, n Mɛɛ waa lɔ nyundua la ɛɛ kpɔɔ tɛ heya,

²⁰ dɛkalkɛ bela nɛra banɛ kɛɛ batoro aa kpɔ nyopɛo cheme n sɔn ta la, dɛ n ja ba nɛ.”

Bonɔɔ waa wola waa kpɔe dɛɛ kɛ sɛɡla

²¹ Anee Pita ba bɔɔ Yeesu ŋɔ, “N Dɔɔ, kera aŋwɛnɛɛ chɛ kɛŋɔ dɛ n dɔŋ ɛɛ mɛ wechɔɡa aa, ń kpɔ kɛo wɔ? Kera anuanɛ kɛɛ?”

²² Yeesu chaŋo ŋɔ, “N ta ŋɔe kera anuanɛ, kɛ kera fifraanuanɛ bele anuanɛ.

²³ Anomanta, Korowii Kora waa la do kɛŋɔ kooro bɛl ne o bonɔɔna wa. Kooro la iro dɛ ŋɔ o bonɔɔna ba baɡle ba toma ɛɛ bini ó na.

²⁴ Waa pa mun dɛɛ nyiŋi ba toma ɛɛ bini la, a taa o na kɛ bonɔɔna la bɛl di o kem suuɡa aa wola nyoa dɔe.

²⁵ Waa naa kɛŋɔ bonɔɔ la aa won ɛ wobɛlbwa dɛ́ bɔ kem la la, o ŋɔ bá yoɡ o ne o haah ne bii ne o kondɔɔh bwa, dɛ́ kpɔ bɔ kem la.

²⁶ Anee bonɔɔ la ɡuŋi kooro la sie dɛ soŋo ŋɔ, ‘N poori, na n sum dɛ́ lawɛ bambile, kɛ mɛɛ bɔe he kem la bwaa.’

²⁷ Asɛ kooro la na o sum kohona dɛ ɡelo, dɛ kpɔ kem la kɛo.

²⁸ Bonɔɔ la aa dɔ bɔr le dɛɛ kaa la, o kaa pu o dɔŋ o ɡe aa di o kenjeɡaa bɛl. Waa na o dɔŋ la la, o den hamɛ o lobi dɛ ŋɔ, ‘Kpɔ n suuɡa tɛ mɛ!’

²⁹ Anee o bonɔndɔŋ la ɡuŋi o sie dɛ soŋo ŋɔ, ‘N poori, na n sum dɛ́ lawɛ bambile, kɛ mɛɛ bɔe he kemee.’

³⁰ Bonɔɔ la ta o dɔŋ la sum nae, dɛ ɡel ba ka doo dea dɛ ka tel saŋ waa bɔ kem la mɔɔ.

³¹ O bonɔndɔŋa la aa na waa aa chiɡa la, a we ba nɛɛ taeh, asɛ ba ka taa waa la baɡle ba bwa dɔɔ kooro la.

³² Kooro la yerɛ o bonɔɔ la dɛ ŋɔ, ‘Nyubinikpeɡ te kohona! N koh soŋa haa soŋ mɛ la waa dɛ kpɔ kendamanta la bwa kɛɛ.

³³ Amɔ a fe ta chɛɛ kɛŋɔ he ɡe fee na he dɔŋ nɔ sum, dɛ́ kpɔ kem nɔ kɛo wa aa?’

³⁴ Kooro la kpɔ bandia ŋɔ bá kpɔ bonɔɔ la ka do dea, dɛ́ ɛo weweele ká tel ɡɛ saŋ waa dɛ ba wona bɔ kem la bwa.”

³⁵ Yeesu aa bol a ɡɛ waa nɔ tonɛ la, anee o ŋɔ, “Dɛ he ɡe ta he bambile bini leɛ dɛ kpɔ he dɔŋa wechɔɡa kɛ ba aa, ɡɛɛ n Mɛɛ waa lɔ nyundua la ɡee ba heyaa ɛɛ.”