Matiu 16 - mzwDBL

Ba soŋe Yeesu ŋɔ ó ɛ nyokpowa ba na

¹ Farisii tena bane ne Saduki tena bane ba Yeesu be dɛ ba daahno na dɛɛ nyin ó ɛ nyokpowaane bá na ásɛ dɛ won jemɛ kɛ Korowii bee o le kpela.

² Asɛ Yeesu ŋɔ ba be ŋɔ, “Weswɛm saŋ he nyiŋi nyundua dɛ nyundua swɛɛraa, he yon ŋɔ bwaala aa tena ba.

³ Chɔmbibi ne ɡe he iro dɛ na kɛ nyundua swɛɛrɔ dɛ bibir aa, he yon ŋɔ nyundua aa swɛɛra dɛ bibir nɔ, bwaala ɛɛ nɛo. He won nyundua nyiŋa dɛ́ jemɛ waa aa dɛ ba chiɡa, aah ɛrɛ waa haa wola won jemɛ waa aa chiɡ taraken nɔ te mun nɔɔ?

⁴ Fini nɛra haa ɛ wechɔɡ-ɛɛra ɡbo haa wola Korowii ɔmɛ nɔ, heyaa ŋɔa ń ɛ nyokpowaa he na naa? Maa wobɛlbwaa ɛ hé na. Waa aa pu Korowii keame Jona la dɔŋa ɡboo dɛɛ ba n ɡe pui, ásɛ he che a ta dɛ́ jemɛ n nɛnsoo.” Anomanta, o ɡel ba bela dɛ kaa.

Farisii ne Saduki tena webaɡla aa do kɛŋɔ iisi wa

⁵ Yeesu habɔteŋra la aa ɡale moo la la, ba soɔh, ba ta paanoo kpɔe ja.

⁶ Anee Yeesu ŋɔ ba be ŋɔ, “Hɛ́ɛ nyiŋi he te kɛrɛdɛ Farisii tena ne Saduki tena iisi wa.”

⁷ Ba ta o sɛɡla la mun noɛ, dɛɛ pɛɛ dɔŋa ŋɔ, “Amɔ yaa wola paanoo kpɔe waa wɛɛ bol ɡɛ naa?”

⁸ Yeesu aa no waa baa dɛ pɛɛ dɔŋa la, o pɛɛ ba ŋɔ, “Ɛrɛ waa hɛɛ pɛɛ dɔŋa paanoo bɛ dɔe waa nɔɔ? Haa men yarada kwara!

⁹ Saŋ la bwa haa waa mun no mɔɔ naa? Maa mɔne paanoo anue tɛ nɛra kaɡboŋa banue ba di ka la, a kabora haa paa la, wɛɡrɛ dela aŋwɛnɛɛ he dɔ laɔ?

¹⁰ Paanoo anuanɛ la maa tɛ nɛra kaɡboŋa banaarɛ ba di la, wɛɡrɛ dela aŋwɛnɛɛ ɡee he dɔ laɔ?

¹¹ Ɛrɛ taa a che he ta wone jemɛ kɛŋɔ paanoo waa laa mɛɛ bol he be nɔɔ? Hɛ́ɛ nyiŋi he te kɛrɛdɛ Farisii tena ne Saduki tena iisi la wa.”

¹² Name o habɔteŋra la ta no waa la mun kɛ iisi baa kpɔa dɛɛ ɛ paanoo waa laa wɛɛ ja ba la, kɛ Farisii tena ne Saduki tena webaɡla la taa wɛɛ ja ba.

Gɛ Pita aa baɡle Yeesu nɛnsoo

¹³ Yeesu la Sisaaria Felepae bwɛɛre ane ta. Belaa o pɛɛ o habɔteŋra la ŋɔ, “Nɛn besoo nɛra ɛɛ lii Men Nɛn Bie nɔɔ?”

¹⁴ Anee ba ŋɔ, “Bane ŋɔ Jɔn o fa aa dɛ sɔ nɛra Korowii nee laanee hen, bane ŋɔ Elaejaa hen. Bane ɡe ŋɔ Jeremia laa hen aa, amɔ te, Korowii keamebena la bɛlee hen.”

¹⁵ Anee Yeesu berɛ pɛɛ ba ŋɔ, “Asɛ he ɡe sɛ, nɛn besoo hɛɛ lii mɛ nɔ?”

¹⁶ Seemɔn Pita chaŋo ŋɔ, “Henee Kristo la, Korowii waa lole saŋ bɛlbwa la Bie la.”

¹⁷ Yeesu ŋɔ, “Jɔn bie Seemɔn, he na som kɛŋɔ nomɛlbwa aa wola hen waa nɔ baɡlɛ asɛ he jemɛ nɔ. N Mɛɛ waa lɔ nyundua laanee baɡle.

¹⁸ Anomanta, n ŋɔ he sɔne Pita, o munii Bwe. Gɛ bwe nɔ taa mɛɛ ba n dea doe chɔŋɛ. N habɔteŋraa n dea la. Hale seo kwara aa wola won pɔ ba nɛɛ bwa.

¹⁹ Mɛɛ kpɔ Korowii Kora la safoonee do he nɔn ta, ásɛ waa haa wola sɛɛh harɛ nɔ ta la, nyundua ɡe Korowii aa sɛh, kɛ anɔ haa sɛah harɛ nɔ ta la, nyundua ɡe Korowii ɛɛ sɛah.”

²⁰ Anee Yeesu kah ba ŋɔ ba bɛ o waa bol baɡle nomɛlbwa kɛ onee Kristo la.

Gɛ Yeesu aa bol o wahala nae ne o seo wa

²¹ Le ɡɛ saŋ la, Yeesu bol waa chasee ken dɛɛ baɡle o habɔteŋra la, dɛ ŋɔ, “A chɛ kɛŋɔ ń kaa Jerusalam, dɛ́ ka na wahala bela nomonome ne Sɔfonomonome ne Tɔnjerema nɔn ta, ásɛ ba kpo mɛ, ásɛ a tɔpetooro wee la, ń ir seo ta.”

²² Anee Pita lawɔ le bokɛre dɛ kaoh ŋɔ, “Aa! N Dɔɔ, Korowii ɛɛ la a ne bojaŋ. Aa he nɛɛ ɡɛɛ ba bwa.”

²³ Belaa Yeesu laa o te berɛ dɛ kɔr Pita ŋɔ, “Le n jwɛh, Bɔnsam! He dɛ neɡ mɛ ń ɛ wechɔɡa, dɛkalkɛ haa anɔ la Korowii aa dɛ nyin la lii, nemenɛ nɛra tetoowa.”

²⁴ Asɛ Yeesu ŋɔ o habɔteŋra la be ŋɔ, “Dɛ nomɛlbwa dɛ nyin kɛ ó teŋɛ n nɛ aa, ó ɡel o tetookwaa nyina dɛ́ kpɔ o te kɛ wɛɛ sɛh wahala nae ne seo bwaa, dɛ́ ba teŋɛ n nɛɛ kɛŋɔ nɛn waa kpɔ daɡaɡre che bá ka kpaaro pɛl o ta la,

²⁵ dɛkalkɛ nomɛlbwa o sie aa swɛɛ harɛ nɔ ta silɛɛ kwaa ta la, wɛɛ paŋɛ o nyuu. Ásɛ nomɛlbwa ɡe o sie aa wola harɛ nɔ ta silɛɛ kwaa ta swɛɛ la, wɛɛ dɔ o nyuu.

²⁶ Dɛ nɛn dɔ harɛ nɔ ta kwaa bwa dɛ nyoɡre o nyu aa, bɔkwa tɔnɔɔ wɛɛ ba dɔe yɔ? Bɔkwaa nɛwɛnyini ɛɛ ba wona kpɔ dɛ́ charɛ o nyu ɔ?

²⁷ Men Nɛn Bie nɔ ɛɛ kpɔ n Mɛɛ jirima laanee, n ne n nyundua toroma le nyundua ba, dɛ́ ba bɔ nomɛlbwa kem ɡɛ o toma aa doa.

²⁸ Kasinteŋ, a ɡɛ saŋ Men Nɛn Bie aa ba di kora la, he bini bane ɛɛ so lee, dɛ́ na mɛ.”