Matiu 15 - mzwDBL

Naawa webaɡla

¹ Farisii tena ne Tɔnjerema bane le Jerusalam dɛ ba bɔɔ Yeesu ŋɔ,

² “Ɛrɛ waa he habɔteŋra nɔ ɛɛ jo ya kii nɛɛ nɔɔ? Sama ya naawa aa baɡle yaa ŋɔ yá samɛ nɔɔra mɔɔ dɛɛ di kwaa la, baa ɡɛ ɛ!”

³ Yeesu chaŋ ba ŋɔ, “Ɛrɛ waa he ɡee jo Korowii kii nɛɛ dɛɛ teŋɛ he ɡbaɡba webaɡla ta nɔɔ?

⁴ Korowii ŋɔ, ‘Duu he nya ne he mɛɛ, dɛ berɛ ŋɔ, Nomɛlbwa waa bol o nya ne o mɛɛ bwara wechɔɡe la, a chɛ kɛ bá kpoo.’

⁵ Kɛ he ɡe dɛ baɡle kɛ nomɛlbwa waa ŋɔ o mɛɛ ne o nya be ŋɔ ó kpɔ kwaa waa dɔ dɛ́ kpɔ cha ba la bwa tɛ Korowii,

⁶ a ta chɛɛ kɛ ó duu o mɛɛ dɛ́ chao kpa. Kenii hɛɛ chɔɡ Korowii Mmarare dɛɛ teŋɛ he ɡbaɡba webaɡla ta nɔ.

⁷ He nɛra haa nyiŋi nɛra sie mɔɔ dɛɛ ɛ wa! Korowii keame Aesaya na he waa bol kɛrɛdɛ ɡɛ waa ŋɔa ŋɔ,

⁸ ‘Nɛra nɔ te, nyoa ɡbo nee baa duu mɛ, kɛ ba tea bini te ta toe.

⁹ Nɛwɛnyini mmarare taa baa baɡle ŋɔ nɛ́ra teŋɛ, anomanta, pɛɛpɛɛ baa tom mɛ.’ ”

Kwaa nɛn aa dɛ di laa ɡela o ɛ nɛnchɔɡe

¹⁰ Yeesu yerɛ nɛnlaa la ba o be, dɛ ŋɔ ba be ŋɔ, “Hé no waa nɔ dɛ́ jemɛ kɛŋɔ

¹¹ kwaa nɛn aa dɛ di laa ɡela o ɛ nɛnchɔɡe, nemenɛ anɔ la aa dɛ le o nyoa wɛɛ bol la.”

¹² Anee o habɔteŋra la ba o be dɛ ba ŋɔ, “He jemɔ kɛŋɔ he waa nɔ haa bola nɔ jo Farisii tena nɔ bini kenɛ?”

¹³ Anee Yeesu chaŋ ba ŋɔ, “Daa te bɛlbwa n Mɛɛ waa lɔ nyundua la aa wola on due la, baa huɡruu ta.

¹⁴ He bɛ ban dawɛ le! Ba ɛ nyoŋa baa dɛ tɔ nyoŋa sie. Nyoŋe lawɛ o dɔŋ nyoŋe daa aa, ba bwa dɛ le bɔɔ ta.”

¹⁵ Asɛ Pita ŋɔ, “Chaɡle yaa waa nɔ mun.”

¹⁶ Anee Yeesu bɔɔ ba ŋɔ, “He ɡe aa a mun jemaa?

¹⁷ Haa jemɛ kɛŋɔ kwaa haa dɛ di la, tea binii aa kaa dɛɛ berɛ dahara aa?

¹⁸ Kɛ waa aa le nɛn nyoa la te, bambile binii a le. Anee yon ɡel nɛn ɛ nɛnchɔɡe.

¹⁹ Liichɔɡa ne nɛŋkpoa, ne jwamane ne ŋwɛɛ wa, ne nyosone teŋa ne nɛra ŋwala, dɛ anɔ aa jaa bwa, bambile binii a le.

²⁰ Anee ɡela nɛn ɛɛ ɛ nɛnchɔɡe. Kɛ dɛ nɛn ta nɔn samɛ ɡɛ he naawa aa chaɡle heyaa ŋɔ hɛ́ɛ ɛ mɔɔ dɛ́ɛ di kwaa la aa, a te aa won ɡel ó ɛ nɛnchɔɡe.”

Haah bɛl yarada dɔe wa

²¹ Yeesu le bela dɛ kaa bwɛjena Taaya ne Sidon pera.

²² Haah bɛl waa ɛ Keenan te dɛ do bela ba Yeesu be dɛ ba kpɔ takpeɡ ŋɔ, “Devid Naa Yeesu, na n sum! Nomoa, kwaa dɛ ir n bihaah nɛɛ dɛɛ fiiɡu, a do kpeɡri.”

²³ Yeesu ta on chaŋɛ, asɛ o habɔteŋra la ba o be dɛ soŋo ŋɔ, “Gel haah nɔ kaa kɛ waa teŋɛ ya nɛɛ dɛɛ do yaa ɡbɔɡa la!”

²⁴ Anee Yeesu chaŋe ŋɔ, “Nɛra baa do kɛŋɔ peera aa nyoɡra dɛ le Israel tena bini la ɡbo waa ba tom mɛ ŋɔ ń ba ɡaaɡe ba bɔr.”

²⁵ Haah la den ba ɡuŋi Yeesu sie dɛ ŋɔ, “Cha mɛ, Nomoa.”

²⁶ Yeesu chaŋo ŋɔ, “A chɛ kɛ bechale di kwaa vaɡre mɔɔ nyootena ɡe di. Aa were kɛ ba kpɔ bechale kondikwaa tɛ nyootena.”

²⁷ Belaa haah la ɡe sɛh ŋɔ, “Kasinteŋii, Nomoa, kɛ nyootena aa bechale kondikompuɡrere aa leera la ɡe di aa?”

²⁸ Anee Yeesu ŋɔ o be ŋɔ, “Gɛ haa dɛ yarada mɛ la kan kɛrɛdɛ! Gɛ haa dɛ nyin la, aa ɛ ɡɛɛ tɛɛ.” Buɡ la ta, bie la ɡbaŋre.

Gɛ Yeesu aa chah nɛndamanta bane

²⁹ Yeesu le bela dɛ kaa fɛrɛ Galilia Moo la nyoa, dɛ ka teeh bwejen bɛl dɛ so bela,

³⁰ asɛ nɛnlaa tenten ba o be, dɛ kpɔ weela tena ba peri aa serewa, ne nyoŋa ne boobie ne amumure, dɛ nɛra baa dɛ we weela bwa soo siwi ba bil o sie, asɛ o chaah ba.

³¹ Nɛra la nyoa kpoo kɛ baa na ɡɛ amumure aa bera won waa bola, boobie ne nɛra ba peri aa serewa won ir che dɛɛ valɛ, asɛ nyoŋa ɡe berɛ won dɛɛ na la. Anomanta, ba kpɛɛ Korowii ba Israel tena aa dɛ tomɔ la.

³² Yeesu yerɛ o habɔteŋra la dɛ ŋɔ ba be ŋɔ, “Nɛra nɔ waa dɛ domɛ n tea, dɛkalkɛ n ne baa soɡa tɔpera atoroo nɔ, taraken ba ta komɛlbwa dɔe dɛ́ di. Dɛ n ɡel ba ɡɛ ba kpɔ lɔr kaa laa, baa ɡwɛɡre ŋwɛnɛ taa.”

³³ O habɔteŋra la pɛɛro ŋɔ, “Ɛrɛɛ yaa ba ɛɛ dɛ́ dɔ paanoo tɛ nɛndamanta nɔ bwa dɔŋ kpɔɡ nɔ baah bonɔ bá di a won tel baɔ?”

³⁴ Anee Yeesu pɛɛ ba ŋɔ, “Paanoo aŋwɛnɛɛ he dɔɔ?” Anee ba ŋɔ, “Anuanɛ dɛ pɛŋejeɡre tamaa ane.”

³⁵ Anee Yeesu ŋɔ nɛnlaa la be ŋɔ bá so harɛ.

³⁶ Asɛ o kpɔ paanoo anuanɛ la ne pɛŋa la dɛ jam Korowii, dɛ mɔne do o habɔteŋra la nɔɔra ta, dɛ ŋɔ bá bɔne tɛ nɛnlaa la, ba ɡe bɔne tɛɛ ba.

³⁷ Ba bwa di kwaa la dɛ vaɡre. O habɔteŋra la tɔɔ anɔ la baa dia a ka la pɛ, asɛ a su wɛɡrɛjena anuanɛ.

³⁸ Nɛra baa di kwaa la, ba bini baala ɛɛ ɛ nɛra kaɡboŋa banaarɛɛ. Haahna ne bechale te ta jae.

³⁹ Asɛ Yeesu ta nɛra la ŋwɛnɛ, dɛ jo ɡbera bini kaa Maɡadan pera.