Matiu 14 - mzwDBL

Jɔn waa dɛ sɔ nɛra Korowii nee nyu teŋa

¹ Kooro Hɛrɔd waa dɛ nyiŋi Galilia harɛ ta ɡɛ saŋ la no Yeesu wa,

² asɛ dɛ ŋɔ o bonɔɔna be ŋɔ, “Jɔn o fa aa dɛ sɔ nɛra Korowii nee laanee la. O weero le seo ta. A waa o won nyokpowaa nɔ ɛɛ la.”

³ Kooro Hɛrɔd nɔ fa ɡelɔ ba lawɛ Jɔn, dɛ doo kpɛɛ dɛ kpɔɔ ka do dea. Kooro nɔ nime Felep haah Hɛrɔdeas waa o koh ɛ Jɔn ɡɛ la,

⁴ dɛkalkɛ kooro la moo, asɛ Jɔn ŋɔ o be ŋɔ o ta an aŋwɛnɛ ta ɛɛ kɛ waa mo Hɛrɔdeas la.

⁵ Asɛ kooro la fe ɛɛ nyin Jɔn dɛ́ kpo. Kɛ dɛ o dɛ ɔmɛ Juu tena la, dɛkalkɛ ba te bwa ŋɔ Jɔn ɛ Korowii keame.

⁶ Awola bɛlee kooro la ɛɛ di o lola tɔpere, asɛ Hɛrɔdeas bihaah ba sa baɡle nɛra la bwa. O sae la ɡelɔ kooro la sie lɛ.

⁷ O ŋɔ tolo la be ŋɔ, “N ŋwɛɛrɔ kɛ komɛlbwa haa dɛ nyin la, mɛɛ kpɔɔ tɛɛ.”

⁸ O la ka ŋɔ o nya be. O nya ɡel o la dɛ ka ŋɔ kooro la be ŋɔ, “N dɛ nyin kɛ he kpɔ Jɔn waa dɛ sɔ nɛra Korowii nee la nyu dawɛ korɔ ta ba tɛ mɛ taraken.”

⁹ Waa nɔ we kooro la nɛɛ kɛrɛdɛ, kɛ o ntam waa ŋwɛɛra la ne nɛra baa soɡe bela dɛ no la nomanta, waa nyin kɛ ó to o ntam la, asɛ dɛ sɛh,

¹⁰ dɛ ɡel ba la dea bela baa do Jɔn la, dɛ ka teŋe o nyu,

¹¹ dɛ kpɔ dawɛ korɔ ta ba tɛ tolo la, asɛ o ɡe kpɔ ka tɛ o nya.

¹² Jɔn habɔteŋra la balɔ dɛ ba kpɔ lale la ka huɡe, asɛ dɛ ka taa baɡle Yeesu.

Yeesu tɛ nɛra kaɡboŋa banue kondikwaa ba di

¹³ Yeesu aa no ɡɛ waa nɔ la, o le nɛra baah dɛ ka kpɔ ɡbera dɛ kaa bela nomɛlbwa aa wola toole. Nɛra no ɡɛ waa la, dɛ le ba bwɛɛre ta dɛ kpɔ naa ta dɛ tiu.

¹⁴ Yeesu aa le ɡbera la bini, dɛ nɛnlaa tenten lɔ bela. Ba waa domɛ o tea, asɛ o chah ba bini weela tena.

¹⁵ Bɔr aa dɛ jo la, o habɔteŋra la baa ŋɔ o be ŋɔ, “Nomoa, bonɔ ɛ kpɔɡ baah, bɔr ɡe dɛ jo. Anomanta, ŋɔ ba be bá kaa bwɛɛre nɔ aa bar bonɔ nɔ ta, dɛ́ ka yawɛ kwaane di.”

¹⁶ Yeesu chaŋ ba ŋɔ, “Ba ta chɛɛ kɛ ba kaa. Hé ɡe nyin kwaa tɛɛ ba bá di.”

¹⁷ Anee ba ŋɔ, “Paanoo anue ne pɛŋa anɛ ɡboo ya dɔ bonɔ.”

¹⁸ Anee Yeesu ŋɔ, “Hé kpɔ ba tɛ mɛ.”

¹⁹ O ɡel nɛra la bwa so harɛ kpɔɡlor la ta, asɛ dɛ kpɔ paanoo anue la ne pɛŋa anɛ la, dɛ ha sie nyiŋi nyundua dɛ jam Korowii, dɛ mɔne paanoo la do o habɔteŋra la nɔɔra ta dɛ ŋɔ bá bɔne tɛɛ ba,

²⁰ asɛ nɛra la bwa di dɛ vaɡre. O habɔteŋra la aa tɔɔ paanoo ne pɛŋa baa dia a ka la pɛ la, a su wɛɡrɛjena fi dɛ anɛ.

²¹ Nɛra baa di kwaa la, ba baala ɡbo ɛɛ ɛ kaɡboŋa banue. Haahna ne bechale te ta jae.

Yeesu valɛ nee sie

²² Belaa Yeesu ɡel o habɔteŋra la jo ɡbera bini dɛ tɔ sie kaa moo la baŋ, asɛ o ɡe ɡel nɛra la ɛɛ peɡre.

²³ Nɛra la aa kaala la, o teehnɔ kaa bwejen bɛl doa, dɛ ka soŋe Korowii bela. Bɔr aa baa ɡarɛ bwa, dɛ o ɡbo ta lɔ bela.

²⁴ Gɛ saŋ nɔ bwa dɛ ɡbera la lɔ mobaah ta asɛ nehɛma ɛɛ beɡro, dɛkalkɛ dɛ peu bɛl tao dɛɛ chem ba.

²⁵ Jabal loɡla sii saŋ la, Yeesu valɔ kpɔ nee la sie dɛɛ kaa ba be.

²⁶ Baa nao o valɛ nee sie dɛɛ ba la, ba ɔmɔ dɛ dooɡe lɔŋɔre ŋɔ, “Lalee yoo!”

²⁷ Yeesu den ŋɔ, “Hé lawɛ bambile. Menee! He bɛ ɔmɛ!”

²⁸ Anee Pita ŋɔ, “N Dɔɔ, dɛ henee yaa, ɡel ń ɡe won valɛ nee sie ba he be.”

²⁹ Anee Yeesu ŋɔ, “Ba.” Belaa Pita den le ɡbera bini tu nee sie dɛ valɛ dɛɛ kaa o be.

³⁰ Waa na ɡɛ peu la aa dɛ ta la, o berɔ ɔmɛ dɛ den dɛɛ morɛ, asɛ dɛ do lɔŋɔ ŋɔ, “N Dɔɔ, lɛɛ mɛ!”

³¹ Buɡ la ta, dɛ Yeesu tel bela dɛ lawɔ dɛ ŋɔ, “He yarada aa kanɛ kwara! Ɛrɛɛ he berɛ di tɔŋla nɔɔ?”

³² Baa jo ɡbera la bini la, peu la ɡel tae.

³³ Yeesu habɔteŋra baa lɔ ɡbera la bini la ɡuŋu dɛ ŋɔ, “Kasinteŋ, henee Korowii Bie la kpela.”

³⁴ Ba tawɔ ka chuɡe moo la baŋ bɛl Gɛnɛsarɛt harɛ ta.

³⁵ Bela tena la aa jemɔ la, ba kaa yerɛ baah bela tena ba bwara aa dɛ wee ba bwa ba Yeesu be.

³⁶ Ba soŋo ŋɔ ó ɡel weela tena la leɡe o batakaare nyoa ɡbo ásɛ dɛ ɡbaŋre. Asɛ banɔ baa leɡe o batakaare nyoa la bwa ɡbaŋre.