Matiu 13 - mzwDBL

Mea dui sɛɡla

¹ Awola tenten Yeesu le dem bela dɛ ka so moo nyoa dɛɛ baɡle nɛra wa.

² Nɛnlaa la aa wara nomanta, o jo ɡbera ta ka so, asɛ nɛnlaa la bwa che baŋ.

³ Asɛ o kpɔ sɛɡla bol waa chaɡ ba ŋɔ, “Baa bɛlee ira dɛ kaa merɛ mea o koo ta.

⁴ Waa dɛ merɛ mea la, ane lee ŋwɛnɛ nyoa, asɛ jumbii ba tɔɔ di.

⁵ Ane lee bwetala ta bela teera aa wola toole kohona. Teera la aa dawɛ bwetala la ta la aa kanɛ, a ta biɡre bɛlbwa mea la le.

⁶ Kɛ a lune ta wone kaa bini. Anomanta, wee aa lɔa la, a jwalɔ dɛ serewe.

⁷ Mea la ane ɡe lee sɔɔhne baah, asɛ sɔɔhne la kpeɡ dɛ lawa, a ta wone ɛ.

⁸ Kɛ anɔ la aa lee harɛdɛɛɡe ta la te leɔ, asɛ dɛ ma kohona. Ane ma lafare, ane ma fifraanunumɛla, asɛ ane ɡe ma fifraatotoro.”

⁹ Yeesu aa bol a ɡɛ waa nɔ tonɛ la, anee o ŋɔ, “Nomɛlbwa waa dɛ nyin dɛ́ no la, ó no.”

Yeesu baɡle mea dui sɛɡla mun

¹⁰ Asɛ o habɔteŋra la la o be ka pɛɛro ŋɔ, “Ɛrɛ waa he yon kpɔ sɛɡla dɛɛ bol waa nɛra nɔ be nɔɔ?”

¹¹ Anee Yeesu chaŋ ba ŋɔ, “He te dɔ Korowii Kora ne a wejema a fa aa sɔah bwa dɛ jemɛ. Kɛ ba te ta dɔe.

¹² Anomanta, naate waa dɔa la, baa jao anee ó dɔ kohona. Kɛ naate waa wola komɛlbwa dɔe la, tama kwaraa waa dɔa la ɛɛ le o nɔn taa.

¹³ Waa aa bala n kpɔ sɛɡla dɛɛ bol waa ba be laanee nɔ. ‘Ba dɔ sibie, kɛ baa na, dɛ dɔ deŋna, kɛ baa waa no, baa waa mun jemɛ.’

¹⁴ Ba waa Korowii keame Aesaya faa bol la. O bolɔ ŋɔ, ‘Nɛra nɔ ɛɛ noo kohona, kɛ baa a mun jema ba, baa nyiŋuu kohona, kɛ baa a jema ba,

¹⁵ dɛkalkɛ ba bambile kpeɡri, ba kpɔ nɔɔra tɔɔɡe deŋna, dɛ tɔɔɡe ba sibie ɡe. A waa laa aa, ba sie fe ɛɛ nao, ásɛ ba deŋna no, ásɛ ba jemɛ a mun, dɛ́ charɛ ba liire, ásɛ n lɛɛ ba.’

¹⁶ Kɛ he te, he nyu som taeh. He sibie dɛ na, he deŋna ɡee no wa.

¹⁷ Kasinteŋ, Korowii keamere kɛrɛdɛ ne nɛra ba wa aa dɛ su Korowii siwi kɛrɛdɛ fe dɛ nyin kɛ ba na anɔ haa dɛ na nɔ, ba ta dɔe na, dɛ fe ɛɛ nyin dɛ no anɔ haa dɛ no nɔ, ba ta dɔe no.

¹⁸ Hé cheɡ deŋna dɛ́ no baa waa merɛ mea la waa la mun.

¹⁹ Nɛra baa dɛ no Korowii Kora nɔ waa baa wola a mun jemɛ laanee do kɛ mea la aa lee ŋwɛnɛ nyoa la. Bɔnsam balaa, dɛ o baa laa waa baa noa la bwa kpɔ le ba nyu bini.

²⁰ Mea aa lee bwetala ta la ɡe cheɡɔ tɛ nɛra baa no waa nɔ, dɛ ba sie lɛo la.

²¹ Kɛ waa la aa wola ban jooɡe la ɡelɔ aa won ba nyu bini ka. A cheɡɛ Korowii waa ta waane puu ba, asɛ nɛra ɡe ɛɛ ba hɔhɔrɔwa aa, dɛ ba horɔ.

²² Mea la aa lee sɔɔhne baah la cheɡɔ tɛ nɛra baa no waa nɔ, asɛ harɛ nɔ soɡa liire ne harɛ nɔ kondɔɔh waa beɡre ba sie, ba ta ɡelɛ waa la dɔ tɔnɔ.

²³ Asɛ mea la aa lee harɛdɛɛɡe ta la ɡe cheɡɔ tɛ nɛra baa no Korowii Waa la dɛ lawɛ a bini, a dɔ tɔnɔ tɛɛ ba kɛŋɔ mea la aa ɛa kɛrɛdɛ, ane ma lafare, ane ma fifraanunumɛla, ane ma fifraatotoro la.”

Kpɔɡchɔɡa aa dɛ lawɛ koo kwaa sɛɡla

²⁴ Yeesu kpɔ sɛɡla bol waa chaɡ ba ja dɛ ŋɔ, “Kenii Korowii Kora la do. Baa bɛlee ira dɛ ka merɛ mea o koo ta.

²⁵ Jwaana bɛl nɛra bwa aa chɔa la, o dɔm bɛl ɡe iro dɛ ka merɛ kpɔɡchɔɡa ane mea koo la ta, dɛ ir chwa.

²⁶ Kwaa la bwa aa lea dɛ kpeɡ la, a bie ɛɛ taa ba che jemɛ kɛ kpɔɡchɔɡa koo mea la ta.

²⁷ Baa la bonɔɔna baa bɔɔro ŋɔ, ‘Nomoa, kɛ mea ɡboo he merɛ koo nɔ ta laɔ? Lee kpɔɡchɔɡa nɔ ɡe le dɛ ba koo a ta nɔɔ?’

²⁸ Anee nomoa la chaŋ ba ŋɔ, ‘N dɔm bɛlee ɛ ɡɛ la.’ Asɛ o bonɔɔna la berɛ pɛɛro ŋɔ, ‘He dɛ nyin kɛ yá ka parɛ kpɔɡchɔɡa la ta kɛɛ?’

²⁹ Anee baa la ŋɔ, ‘Kai. Dɛ he ŋɔ he para ta taraken aa, hɛɛ parɛ mea la anee ja a ta.

³⁰ Hé ɡel a bwa pɛ che dɛ́ kpeɡ. A koma ta la, mɛɛ ŋɔ nɛra baa dɛ ba a koma la bee bá tɔ sie kɛ kpɔɡchɔɡa la, dɛ́ vɔrɔwa, dɛ́ che ka ta nii ta dɛ́ fuah, mɔɔ dɛ́ ba komɛ mea tenten la, dɛ́ pa ka do mɛ n dɔndɔŋ bini.’ ”

Mastad bii sɛɡla

³¹ Yeesu kpɔ sɛɡla bol waa chaɡ ba ja dɛ ŋɔ, “Kenii Korowii Kora la do. Baa bɛlee ira dɛ kpɔ daa bɛl baa dɛ yerɔ mastad bii dɛ ka du.

³² Kwaa bie baa dɛ du bwa bini onjeɡaa. Kɛ dɛ o leɔ dɛ kpeɡ aa, o dɛ ɡwaa konduula bwa, dɛ́ yon kpeɡ dajen, ásɛ jumbii ɡba ba sɔh a kɔne o kpala ta.”

³³ Yeesu kpɔ sɛɡla bol waa chaɡ ba ja dɛ ŋɔ, “Kenii Korowii Kora la do. O do kɛŋɔ haah bɛl aa ira dɛ kpɔ iisi tama ka koo men loɡbaa del ta, asɛ a won ɡel men la bwa uɡe.”

³⁴ Waa nɔ bwa Yeesu aa bola dɛɛ baɡle nɛnlaa la bwa la, dɛ sɛɡla nee wɛɛ bol. Webeŋkpoŋ ɡba toole o wobol ta waa wola sɛɡla kpɔe bol.

³⁵ Gɛ waa ɛa nɔ ɡelɔ waa Korowii keame la fa aa bola la ɛ kpela. O fa ŋɔ, “Mɛɛ kpɔ sɛɡlaa bol wa chaɡle heya. Waa nomɛlbwa aa wola jemɛ bwa le harɛ nɔ mumpar la, mɛɛ bol ba bee.”

Kpɔɡchɔɡa sɛɡla la mun

³⁶ Yeesu aa le nɛnlaa la baah la, o kaa jo dea, asɛ o habɔteŋra la ba o be dɛ ba ŋɔ o be ŋɔ, “Chaɡle yaa kpɔɡchɔɡa baa la dɔm la aa kaa merɛ koo mea la ta la mun.”

³⁷ Anee Yeesu ŋɔ, “Men Nɛn Bie laanee merɛ mea tenten la.

³⁸ Harɛ ta bonɔɔ ɛ koo la. Mea tenten laanee nɛra baa ja Korowii Kora la ta la, asɛ kpɔɡchɔɡa la ɡe che tɛ nɛra baa lɔ Bɔnsam be pera.

³⁹ Baa la dɔm la waa kaa merɛ kpɔɡchɔɡa koo mea tenten la ta la cheɡɔ tɛ Bɔnsam. Kwaa la koma la cheɡɔ tɛ waa bwa jaɡa saŋ, asɛ nɛra baa koma la cheɡɔ tɛ nyundua toroma la.

⁴⁰ Gɛ baa vɔrɔwe kpɔɡchɔɡa la dɛ che ka do nii ta a fuh la, ɡɛɛ waa bwa jaɡa saŋ ɛɛ ba doe.

⁴¹ Men Nɛn Bie la ɛɛ tomɛ n nyundua toromaa ba n kora nɔ ta, bá ba kpɔ nomɛlbwa waa dɛ do nɛra wechɔɡa ta ne wechɔɡ-ɛɛra bwa,

⁴² dɛ́ kpɔ ba ka ta ninlao ta, belaa wii ne weweele do.

⁴³ Ásɛ name nɛra baa dɛ ɛ wedɛɛɡa ba wa ɛɛ su Korowii siwi la chaah kɛŋɔ wee ken ba Mɛɛ Kora la ta bela. Nomɛlbwa waa no la, ó no.”

Kondɔɔh kwaane aa sɔah sɛɡla

⁴⁴ Yeesu berɔ ŋɔ, “Korowii Kora la waa ane ɡee la ja. A do kɛŋɔ baa bɛl aa kaa kpaah kondɔɔh kwaane baa kpɔa sɔh harɛ bɛl ta. Asɛ o ɡe berɛ kwaa sɔh dɛ kpɔ kwaa la silɛɛ, dɛ ka yoɡ komɛlbwa waa dɔa, dɛ kpɔ suuɡa la ka yawɛ a ɡɛ harɛ la.

⁴⁵ Korowii Kora la tenten berɔ do kɛŋɔ bonadii bɛl waa dɛ ɡaaɡe lwedɛɛɡa ane a yoɡ aa kpeɡa dɛ́ yawɛ.

⁴⁶ Asɛ awola bɛl, o ka na lwedɛɛɡe tenten bɛl o yoɡ aa kpeɡa taeh, dɛ ka yoɡ o kondɔɔh bwa, dɛ kpɔ ka yawɛ ɡɛ lwee la.

Dɔɔh kpɔe dɛ́ lawɛ pɛŋa sɛɡla

⁴⁷ Korowii Kora la dor bɛl ɡee nɔ. Nɛra bane baa dɛ ɛ nee toma kaa ta dɔɔh moo ta, dɛ lawɛ pɛŋe te bɛlbwa siwi.

⁴⁸ Dɔɔh la aa su pɛŋa la, ba tɛr ba hɛŋle ta, asɛ dɛ soŋni harɛ dɛ chale a bini, dɛ pa pɛŋedɛɛɡa la do loɡbaa bini, asɛ dɛ pa anɔ la aa wola were la ka ta.

⁴⁹ Gɛɛ waa bwa jaɡa saŋ ɛɛ ba doe. Nyundua toroma ɛɛ bao dɛ́ ba chale nɛnchɔɡa le nɛndɛɛɡa bini,

⁵⁰ ásɛ dɛ kpɔ nɛnchɔɡa la ka ta ninlao ta. Belaa wii ne weweele do.”

⁵¹ Yeesu pɛɛ ba ŋɔ, “He dɛ no waa nɔ mun te naa?” Asɛ ba ŋɔ, “Ɔɔh.”

⁵² Anee Yeesu berɛ ŋɔ, “Amɔ nomɛlbwa waa jemɛ Mosis Mmara la, dɛ berɛ ba hweli Korowii Kora nɔ waa la do kɛŋɔ nomɛl aa dɔ o dem, dɛ dɔ konfala ne kombena, dɛ won a bini bɛlbwa waa dɛ nyin kpɔe dɛ́ le bela waa dɛ cheɡ o kwa.”

Korowii keame waa wola sɔn dɔe o bwɛɛ wa

⁵³ Yeesu aa kpɔ sɛɡla bol waa baɡle nɛra la tonɛ la, o le bela,

⁵⁴ dɛ berɛ kaa o ɡbaɡba bwɛ. O baɡle nɛra waa ba cheremi dea ta, asɛ nɛra baa no o webaɡla la bwa nyoa kpo, baa pɛɛ dɔŋa ŋɔ, “Leperaa o le ɡɛ wejema nɔ ne nɔɔ? Asɛ nyokpowaa waa dɛ ɛ nɔ ɡeɔ?

⁵⁵ Kapenta te la bie la laa kɛɛ? O nya laa Mɛɛre aa? O nimanar laa Jems ne Josef ne Seemɔn dɛ Judas kɛɛ?

⁵⁶ Bwɛɛ nɔ ta laa o nimambii bwa do aa? Leperaa o le a ɡɛ wejema nɔ ne nyokpowaa ɛɛ nɔ bwa ne nɔ?”

⁵⁷ Anomanta, ba siwi ta on sui. Asɛ Yeesu ŋɔ ba be ŋɔ, “Korowii keame dɔ sɔn bobɛlbwa. Kɛ o ɡbaɡba bwɛɛ tena ne o lola ɡboo wola on duu.”

⁵⁸ Baa wola on yaradae nomanta, nyokpowaa waa ɛa bela ta warɛ.