Matiu 10 - mzwDBL

Yeesu aa tomɛ o toroma fi dɛ banɛ wa

¹ Yeesu yerɛ o toroma fi dɛ banɛ la cheme dɛ tɛɛ ba kpeɡri báa kpɔ doŋi kwaa aa dɛ ir nɛra nɛ, ásɛ dɛ won chah weela bɛlbwa ɡe.

² Yeesu toroma fi dɛ banɛ la waa kpɔ ba laanee nɔ. Seemɔn waa pa o sɔn Pita la ne o nime Andriu, ne Jems ne o nime Jɔn baa ɛ Sebedii bii la,

³ Felep ne Batolomeo, ne Tɔmas ne Matiu o fa aa dɛ lɛ toɔ la, ne Jems waa ɛ Alfeɔs bie la dɛ Tadeɔs,

⁴ ne Seemɔn Sɛlɔt la dɛ Judas Eskareɔt waa le Yeesu tɛ ba kpoo la.

⁵ Yeesu aa dɛ tomɛ a ɡɛ nɛra fi dɛ banɛ nɔ la, o do ba ŋɔ, “He bɛ nɛra baa wola Juu tena ɛɛ la harɛ ta la, he bɛ Samaria bwɛɛ bɛlbwa ta la.

⁶ Hé kaa Israel tena baa do kɛŋɔ peera aa nyoɡra la be,

⁷ dɛ́ ka bol ba be ŋɔ Korowii Kora puu ba tonɛ.

⁸ Hé chah weela tena, dɛ́ chum nɛra baa serewa. Hé chah weela bwa aa dɛ chɔɡ nɛn bwadabi, dɛ́ doŋi kwaa a yon dɛɛ ir nɛra nɛɛ la le ba nɛ. N kpɔ kpeɡri nɔ kɛ heyaa pɛɛpɛɛ. Hé ɡe kpɔ chaah ba pɛɛpɛɛ.

⁹ He bɛ suuɡa te bɛlbwa kpɔ.

¹⁰ Ŋwɛnɛ haa dɛ ba kaala la, he bɛlbwa bɛ pur kpɔ, dɛ bɛ batakaani bele anɛ kpɔ, dɛ bɛ naŋɡawa bele anɛ ne daŋɡbala kpɔ, dɛkalkɛ tom-ɛɛ kembɔr chɛo.

¹¹ Bwɛɛ bɛlbwa haa tel o ta la, hé nyiŋi nɛndɛɛɡe, ásɛ dɛ so o be dɛ́ ka tel ɡɛ saŋ haa le bela.

¹² He kaa jo dem bɛlbwa ta naa, hé ŋɔ ba be ŋɔ, ‘Kórowii tɛ heyaa bosɔɔhna.’

¹³ Dɛ dem bela tena lɛ heyaa silɛɛ ne naa, baa dɔ bosɔɔhna dem belaa. Kɛ dɛ ba ta heyaa lɛɛ silɛɛ ne naa, baa bosɔɔhna dɔe ba.

¹⁴ Dɛ dem bɛl kɛɛ bwɛɛ bɛl tena ŋɔ baa heyaa lɛ, baa he waa la ɡee no aa, hé pee he nakpale teera ta bela, ásɛ a baɡle kɛŋɔ he kpɔ Korowii Waa ba ba be ba vɛah, ásɛ dɛ le bela.

¹⁵ Kasinteŋ, awola Korowii aa ba pa nomɛlbwa bole la, waa Sodom ne Gomoora tena aa naa la ɡba ɛɛ bɔ a ɡɛ bwɛɛ la tena waa.”

Gɛ nɛra aa dɛ ba Yeesu toroma nɛɛ cheɡa

¹⁶ Yeesu berɔ ŋɔ, “Hɛ́ɛ no! N dɛ tomɛ heyaa kɛŋɔ peera hé ka koo he dɔma baa do kɛ ɡboli baah ta. Hé ɡel he sie pili hɛɛ do dɛɛɡɔ kɛ harɛkwa, ásɛ dɛ do pwɛre dɛ́ man kɛ borɔnomare.

¹⁷ Hɛ́ɛ nyiŋi kɛrɛdɛ, dɛkalkɛ baa lawɛ heyaa ka cheme nomonome sie, dɛ́ lɔɔ heyaa chweremi ne cheremi deene ta.

¹⁸ Baa koh n waa yerɛ heyaa cheme Abane nomonome ne koranar siee, dɛ́ ŋɔ hé ba bol Amanesoma la baɡle ba ne nɛra baa wola Juu tena ɛɛ la.

¹⁹ Dɛ ba baa lawɛ heyaa dɛ la he ne ba sie naa, he bɛ ɡel waa haa dɛ ba bola, ne ɡɛ haa bol dɛ́ lɛ he te hiah heya. A baa tel kɛŋɔ hé bol wa aa, hɛɛ jemɛ waa haa dɛ ba bolaa.

²⁰ Waa haa dɛ ba bola la aa he bee le. Korowii Domadɛɛɡe laanee dɛɛ ba he nɛɛ cheɡa dɛ́ bol wa.

²¹ Nɛra ɛɛ le ba ɡbaɡba lolanaree tɛ bá kpoo ba, baala le ba bii tɛ bá kpoo ba, ásɛ bechale ɡe ir che ba nyare ne mɛɛnanar nɛ, dɛ́ ɡel baa kpoo ba.

²² Nɛra bwa ɛɛ koh n waa hah heya. Kɛ naate waa dɛ ba wona dɛ́ lawɛ bambile ka tonɛ la, wɛɛ dɔ o nyuu.

²³ Dɛ he la bwɛɛ bɛl ta baa ɛ heyaa hɔhɔrɔwa aa, hé chwa kaa bwɛfale ta. Kasinteŋ, haa won la Israel bwɛɛre nɔ bwa ta ka chiɡ mɔɔ Men Nɛn Bie ba.

²⁴ Nɛn waa dɛ hweli toma ta o dɔɔ ɡwaalɛ, bonɔɔ ɡe ta o nomoa ɡwaalɛ.

²⁵ Dɛ ba dɛ yerɛ dea nomoa Bɛlsebul waa ɛ sɔnchɔɡe aa, dea bii la te ta pɔeh yaa?

²⁶ Anomanta, he bɛ nɛra dɛɛ ɔmɛ. Wobɛlbwa baa tɔ a ta la ɛɛ le baŋee, ásɛ waa aa sɔah bwa ɡe le nɛra jemɛ.

²⁷ Waa maa dɛ bol he be biro ta la, hé bola webaŋa, ásɛ waa maa sɔah bol he be la, hé bola nɛnlaa baah.

²⁸ He bɛ nɛra baa dɛ ba wona kpo heya, baa wola won kpo he lileo la ɔmɛ, kɛ hɛ́ɛ ɔmɛ Korowii waa dɛ ba wona chɔɡ bwadabii ne lileo la bwa Bɔnsam nii ta la.

²⁹ He nao kɛ pɛtoprɛ ta yoɡ dɔe, kɛ beŋkpoŋ ɡba aa harɛɛ le dɛ he Mɛɛ waa lɔ nyundua aa o waa jemɛ.

³⁰ He nyumpona kwara, o jemɛ a nyoa.

³¹ Anomanta, he bɛ ɔmɛ. He ta pɛtoprɛre ɡwaalɛ wobɛlbwa ta naa?

³² Nomɛlbwa waa won che nɛra baah ta, dɛ́ sɛh ŋɔ o ja n nɛɛ la, ɡɛɛ n ɡee ba naate sɔn yera n Mɛɛ waa lɔ nyundua la sie kɛ o ja n nɛ.

³³ Nomɛlbwa ɡe waa vɛɛh mɛ nɛra baah ta, dɛ ŋɔ o ta n nɛɛ jae la, ɡɛɛ n ɡee ba o vɛɛh n Mɛɛ waa lɔ nyundua la sie, dɛ́ ŋɔ n ne o laa.

³⁴ He bɛ dɛɛ lii kɛ n ba nyopɛo ne harɛ nɔ ta. Nyopɛo ne laa n ba, yoi nee n ba.

³⁵ N balɔ ásɛ bibaa ne o mɛɛ koh n waa dɔm, bihaah ne o nya dɔm, ásɛ bihaah ne o helahaah ɡe dɔm,

³⁶ ásɛ nɛn lolanar berɛ o dɔma.

³⁷ He naate haa dɛ nyin he nya ne he mɛɛ waa ɡwaa mɛ la ta chɛɛ kɛŋɔ he teŋɛ n nɛ, asɛ he naate ɡe haa dɛ nyin he bihaah ne he bibaa waa ɡwaa mɛ la ta chɛɛ kɛŋɔ he teŋɛ n nɛ.

³⁸ He naate haa wola he te kpɔe tɛ dɛ sɛh wahala nae ne seo bwa, dɛ baa teŋɛ n nɛ kɛŋɔ nɛn waa kpɔ daɡaɡre che bá ka kpaaro pɛl o ta la ta chɛɛ kɛŋɔ he teŋɛ n nɛ.

³⁹ Nomɛlbwa o sie aa swɛɛ harɛ nɔ ta silɛɛ kwaa ta la, wɛɛ paŋɛ o nyuu, ásɛ nomɛlbwa ɡe o sie aa wola harɛ nɔ ta silɛɛ kwaa ta lɛ la, wɛɛ dɔ o nyuu.

⁴⁰ Nomɛlbwa waa nyiŋi he nɛɛ la, menee o nyiŋi la. Asɛ nomɛlbwa waa nyiŋi n nɛɛ la, naate waa tom mɛ laanee o nyiŋi la.

⁴¹ Nomɛlbwa waa nyiŋi Korowii keame nɛɛ o keamere ɛɛ nomanta la, wɛɛ dɔ Korowii keame kembɔree. Asɛ nomɛlbwa ɡe waa koh nɛndɛɛɡe dɛɡre waa dɛ nyiŋi o nɛɛ la, wɛɛ dɔ nɛndɛɛɡe kembɔree.

⁴² Kasinteŋ, dɛ nomɛlbwa koh n wa, dɛ tɛ n habɔteŋra bechale nɔ bini bɛlbwa nesɔna o nyɔ aa, waa o kembɔr paŋa ba bwa.”