Malakae 3 - mzwDBL

¹ Koranar Bwa Kooro bolɔ ŋɔ, “Hé no, mɛɛ tomɛ n toromee ó tɔ n sie dɛ́ kwaa ŋwɛnɛ tɛ mɛ ń ba. Ásɛ Dɔɔ haa dɛ nyiŋu ŋwɛnɛ la ba piɡri heyaa o Dea, onee hɛɛ nyiŋi ŋwɛnɛ ó ba dɛ́ ba baɡle fɔo la wa.”

² Umee dɛ́ won che o sie o bala tɔpere la ta nɔ? Umee dɛ́ won le a nyoa ɔ? Wɛɛ ɛo kɛŋɔ nii baa kpɔa dɛɛ mwɛɛ bune dɛ laa doŋa dɛɛ kpɔ a ta, kɛɛ simina waa nyɛɡa ken.

³ Wɛɛ ba sɔ Lewi dea tena doŋaa ta kɛŋɔ ba yon mwɛɛ suuɡapoŋ ne suuɡaswɛm dɛ laa doŋa kpɔ a ta la ken. Gɛɛ Korowii ɛɛ ba nɛra ba wa aa toɡra dɔe, ásɛ ba kpɔ saraha kwaa aa wera baa tɛo,

⁴ mɔɔ Korowii sie lɛ dɛ́ lɛ Juda ne bwɛjen Jerusalam nɛra saraha kwaa baa kpɔ baa tɛo la, ɡɛ a fa aa doa saŋ la.

⁵ Men Koranar Bwa Kooro ŋɔ, “Mɛɛ bao warane dɛ́ ba bol he waa dɛ́ pa bole. Mɛɛ ba bol voɡra ne nɛra baa dɛ chɔɡ yal, ne dansewea tena ne nɛra baa dɛ faah ba tom-ɛɛra ba kembɔr ta, ne nɛra baa dɛ fiiɡi luhaahna ne bilalbii, ne nɛra baa wola nɛŋhɔɔhra waa bolɛ dɛɛ tɛɛ ba aŋwɛnɛ ta, baa wola men ɔmɛ bwa waa.”

⁶ Korowii ŋɔ, “Menee Korowii, maa charɛ bwa, a waa ɡela he Jekɔb naanar ta do le la.

⁷ He ne he naawa bwaa berɛ habɔɔ kpo mɛ, dɛ vɛh me Mmarare ta teŋa. Hé berɛ ba n be, ásɛ n ɡe do sie he be. Kɛ he dɛ bɔɔ ŋɔ, ‘Ɛrɛɛ ya ɛ dɛ́ berɛ won ba he be nɔ?’

⁸ N dɛ bɔɔ heyaa ŋɔ a wer kɛŋɔ nɛn ŋwɛ men Korowii aa? Kɛ he dɛ ŋwɛɛ mɛ. He dɛ bɔɔ ŋɔ, ‘Bɔkwa taa yaa ŋwɛɛ nɔ?’ Kwaa haa bɔne a bini bɔre fi, dɛ kpɔ bɔrbeŋkpoŋ baa tɛ mɛ, ne saraha kwaa taa hɛɛ ŋwɛɛ mɛ.

⁹ Nyotaahna lawɛ he Israel tena bwa, dɛkalkɛ he dɛ ŋwɛɛ mɛ.

¹⁰ Kwaa haa bɔne a bini bɔre fi la, hé kpɔ bɔrbeŋkpoŋ ba tɛ men Korowii n Dea, ásɛ kondikwaa warɛ n Dea bela. Hé daah mɛ ɡɛ waa nɔ ta dɛ́ na, ásɛ n ɡel bwaala nɛ kohona, dɛ́ swee heyaa andɛɛɡa, dɛ́ ɡel kondikwaa warɛ he deremi kohona.

¹¹ Maa ɡel kwaa ba chɔɡ he koo kondikwaa kpa, dɛ́ ɡel he ɡrepo daa ɡe nɔnɛ kohona.

¹² Anee dɛ́ ɡel harɛre ta nɛra bwa yerɛ heyaa bosɔɔhna tena, dɛkalkɛ he soɡe harɛdɛɛɡe ta. Men Koranar Bwa Kooroo bola.”

Kasinteŋ tena kembɔr

¹³ Korowii ŋɔ, “He bol wedoŋa tɛ mɛ. Kɛ he berɔ bɔɔ ŋɔ, ‘Wedoŋa besoo ya bol tɛɛ nɔ?’

¹⁴ He bolɔ ŋɔ, ‘Korowii toma ɛ wepuu. Tɔnɔ besoo ya dɔ dɛɛ le waa waa kpɔa tɛ yaa ŋɔ yaa teŋɛ a ta, asɛ a berɛ do kɛŋɔ ya tea bini chɔɡɔ Koranar Bwa Kooro sie nɔɔ?

¹⁵ Kɛ taraken nɔ, ya dɛ yerɛ nɛra baa dɛ ɛ jenu bosɔɔhna tena. Kasinteŋ, waa wechɔɡ-ɛɛra aa dɛ ɛ la, a dɛ do wer dɛɛ chiɡ ba kɛrɛdɛ, hale banɔ la baa dɛ tɔŋle Korowii dɛ vɛh o waa la aa deŋnetɛra bɛlbwa dɔ.’ ”

¹⁶ Kɛ banɔ la baa dɛ ɔmɛ Korowii bol waa dɔŋa be, asɛ Korowii do deŋne ba be, dɛ no waa bwa baa bola. Nɛra baa dɛ ɔmɔ dɛɛ tɛ o sɔn jirima la, ba chwerɛ ba sɔna do tɔn bini bil o sie, dɛ kpɔ dɛɛ lii ba wa.

¹⁷ Koranar Bwa Kooro ŋɔ, “Awola maa ɛ a ɡɛ waa nɔ la, mɛɛ kpɔ baa ɛ n bii maa dɛ nyin ba kohona. N tea ɛɛ domɛ ba nɛɛ ń lɛɛ ba, kɛŋɔ mɛɛ yon dɔ tedoma tɛ o bie waa dɛ tomɔ dɛɛ lɛo la ken.

¹⁸ Hɛɛ berɔ na ɡɛ nɛra ba wa aa toɡra waa aa korɛ banɔ la ba nyu bini aa kpeɡa waa ta, ne ɡɛ nɛra baa dɛ tomɛ men Korowii waa aa korɛ banɔ la baa wola men tomɛ waa ta.”