Malakae 1 - mzwDBL

¹ Waa Korowii aa pila baɡle o keame Malakae chaahna ta ŋɔ ó bol baɡle Israel tena laanee nɔ.

Korowii nyina waa nyin Israel tena

² Korowii ŋɔ o nɛra Israel tena be ŋɔ, “Men Korowii, saŋ bɛlbwaa mɛɛ nyin heya.” Kɛ he dɛ bɔɔ ŋɔ, “Bɔkwaa chaɡla kɛ he dɛ nyin yaa ɔ?” Asɛ Korowii chaŋe ŋɔ, “Jekɔb dɔɔree Esɔ, kɛ n nyin Jekɔb ne o naanar,

³ dɛ hah Esɔ ne o naanar baa ɛ Edom tena. A habɔɔ Esɔ aa baa dɔ deŋɡarere harɛ ta so la, asɛ n chɔɡ bela bwa o berɛ kalampoŋare sobɔr.”

⁴ Edom tena la ŋɔ, “A lole kɛ Korowii chɔɡ ya harɛ te, kɛ yaa berɔ kwaa vɔrɔwe bwɛɛre la.” Asɛ Koranar Bwa Kooro ŋɔ, “Ba ken ɛɛ won berɛ vɔrɔwe bwɛɛre la te, kɛ mɛɛ chɔɡaa ja. Baa yerɛ harɛ la ‘Nyubinikpeɡ Tena Harɛɛ’, n bandia aa o nɛra nɛɛ le bwa.”

⁵ Israel tena siwi ɛɛ na ɡɛ waa nɔɔ dɛ́ ŋɔ, “Korowii kan, hale dɛɛ di kpeɡri harɛfala aa bar Israel harɛ bwa!”

Saraha kwaa aa di kirihiah

⁶ Koranar Bwa Kooro ŋɔ sɔfore la be ŋɔ, “Bie dɛɛ tɛ o mɛɛ jirima, asɛ bonɔɔ ɡe ɛɛ tɛ o nomoa duure. Menee he mɛɛ, ɛrɛɛ haa wola jirima kpɔe dɛɛ tɛ mɛ nɔ? N ɛ he dɔɔ, ɛrɛɛ haa wola duure kpɔe dɛɛ tɛ mɛ nɔ? He sɔfore, heyaa wola duure kpɔe dɛɛ tɛ n sɔn, kɛ he dɛ bɔɔ ŋɔ, ‘Ɛrɛɛ yaa wola duure kpɔe dɛɛ tɛ he sɔn ɔ?’ ”

⁷ Korowii ŋɔ, “He kpɔ kondikwaa aa kah doŋa dɛɛ ba n saraha kon ta. He berɔ ŋɔ, ‘Ŋwɛnɛ besoo taa ya kpɔ doŋa kah he saraha kon laɔ?’ He ŋɔ Korowii saraha kon la ta jirima kon ɛɛ.”

⁸ Koranar Bwa Kooro ŋɔ, “He kpɔ kondɛɛra aa nyoŋa, ne anɔ la aa wola won valɛ, dɛ anɔ la bwara aa dɛ wea ba ɛ saraha tɛ mɛ naa, a ta wechɔɡa ɛɛ yaa? He kpɔ ɡɛ kwaa nɔ ka tɛ he harɛ nomoa aa, aa do o somee yaa? O sie ɛɛ lɛ he nɛɛ dɛ ɛ he wesoŋa tɛ heya aa?

⁹ Taraken, dɛ he sɔfore dɛ soŋ mɛ ŋɔ ń kpɔ kɛ heya aa, mɛɛ no he wesoŋaa yaa? Maa he wesoŋaa no. Men Koranar Bwa Kooroo bola.”

¹⁰ O berɔ ŋɔ, “N dɛ nyin kɛ he sɔfore la bini bɛl fee tɔɔɡe men Korowii Dea ɡbeni, bela haa joa dɛ kaa ɛ saraha la, ásɛ he bɛ won jo ka choŋi nii saraha kon la ta ɛ sarahasale. N sie aa he nɛɛ lɛ, maa he nɔn ta saraha kon bɛlbwa ɡee lɛ.

¹¹ Harɛre nɛra ɛɛ duu mɛ kohonaa, le wee leebɔr ba kaa wee cholibɔr. Baa fuh daawiile a sɔɔh aa somaa, dɛ́ kpɔ saraha kwaa aa wera le harɛ bɛlbwa ta ba, dɛ́ kpɔ dɛɛ duu mɛ.

¹² Kɛ he sɔfore dɛ chɔɡ n sɔn dɛ ŋɔ n saraha kon la kah doŋa. He ŋɔ kondikwaa baa kpɔa dɛɛ ba o ta la ɡe ta jirima dɔe, dɛ ɛ konsale.

¹³ He ŋɔ he mee leɔ, dɛ laa sie kpɔ saraha kwaa aa wera kɛŋɔ he kpɔ baa tɛ mɛ la ta. Kɛ he kpɔ kondɛɛra bola aa lɔ a nɛ, ne anɔ la aa wola won valɛ kɛɛ weela tena ba ɛ saraha dɛɛ tɛ mɛ. Mɛɛ lɛa yaa?

¹⁴ Nomɛlbwa waa dɔ pedɛɛɡe do o peera bini, dɛ baɡ mɛ nyoa ŋɔ wɛɛ kpɔɔ ba tɛ mɛ, dɛ berɛ kpɔ onɔ la waa di kirihiah ba ɛ saraha tɛ mɛ la, o neɡ mɛ. Nyotaahna lɔ o nɛ. N ɛ koojen, a chɛ kɛ harɛre nɛra bwa ɛɛ ɔm mɛ.”