Maeka 7 - mzwDBL

Israel tena suna dii

¹ N waa sum kohona! N do kɛŋɔ nɛn waa ɡaaɡa dɛɛ nyin daa nɔna lɔmɔɡa saŋ, waa wola daa bɛlbwa nɔn waa ka o ta kɛɛ ɡrepo nɔna o daa ta nae dɛ́ di. Ba tɔɔ ɡrepo nɔna, ne fiɡ daa nɔna aa soma la bwa.

² Ba doŋi nɛra baa dɛ duu Korowii bwa le harɛ la ta, nomɛlbwa ta kae o waa toɡre kpa. Nɛra bwa chɔɔ dɛɛ kpa kɛŋɔ bá kpoo nɛra, bɛlbwa dɛ harɛ o dɔŋ bel dɛ́ dɔɔ lawɛ.

³ Ba bwa hweli wechɔɡa dɛ jema kɛrɛdɛ. Nɛra baa bol waa dɛɛ pa bole, ne ba nomonome bwa dɛ nyin kɛ baa yaɡ ba sen. Ba ne nɛnjena kpɔ wejema ŋwɛnɛ lɛ kwaa dɛɛ le ba be.

⁴ Ba bini nɛndɛɛɡe kwaraa do kɛŋɔ jabalnadaŋɛ. Onɔ la o wa aa toɡra ɡe do kɛŋɔ sɔɔh daa ken. Tɔpere telo kɛŋɔ Korowii tɛr ba deŋne ɡɛ waa cheɡɛ keamere baa dɛ daah ba nɛɛ kah ba la, ba wilo taraken kwara.

⁵ Dɛɛ berɛ he dɔŋ yaradae ka tonɛ, bɛ he dam ɡba nɛɛ hwɛɡɛ. Hale he haah he ne waa pɛa dɛɛ chɔ kalaŋ ta, dɛɛ nyiŋi he nyoa wobol ta kɛrɛdɛ.

⁶ Bibaa ne o mɛɛ ɛɛ dɔmoo, bihaah ne o nya dɔm, ásɛ bihaah ne o helahaah ɡe dɔm, ásɛ nɛn lolanar berɛ o dɔma.

⁷ Kɛ n te, n dɛ hwɛɡɛ dɛɛ nyiŋi Korowii ŋwɛnɛ. Korowii waa ɛ n Lɛɛ laanee mɛɛ kpa, wɛɛ no n bee.

Israel ɛɛ iruu

⁸ Ya dɔma, he bɛ ɡel he sie lɛ. A lole kɛ ya cholo te, yaa iruu. Ya lɔ biro ta te, Korowiirii dɛ́ do kɛ kandea dɛɛ chaah yaa bɔr.

⁹ Ya ɛ wechɔɡa dɛ jo Korowii nɛ, anomanta, a chɛ kɛ yá na o bandia tama mɔɔ. Wɛɛ lɛ yaa dɛ́ le chɔɡre baa kpɔa ɛ yaa la ta. Wɛɛ lawɛ yaa ba bɔchaah ta, ásɛ ya na toɡra o wa aa toɡra.

¹⁰ Belaa ya dɔma ɛɛ ba a nae ásɛ sihiih kpo ba. Banee fa muɡli ya baah ŋɔ, “Leperaa Korowii haa dɛ tomɔ la dɔɔ tenɔ?” Yaa soo dɛ́ na ba chola, baa tiɡri ba nɛɛ kɛŋɔ baa dɛ tiɡri kpechɛɡre ta ken fɔɡbaahna.

¹¹ Jerusalam tena, tɔpere bɛl dɛ ba ásɛ he berɛ kwaa ma he bwɛjen danjwɛɛre la, dɛ́ paɡri he harɛ jwɛhre kaa sie.

¹² Awola tɔpere la, nɛra ɛɛ le Asiiria ne Ijipt bwɛjena taa ba, hale dɛ́ kpoŋe le Ijipt kaa Yufretis Moo wee leebɔr, dɛ́ berɛ le Ijipt kaa weekaŋle harɛ bɔr, dɛ́ le mpore ta harɛjaɡa ba kaa bwejena dor.

¹³ Kɛ harɛ bwa ɛɛ chɔɡoo, o nɛra we-ɛɛla wa, dɛ́ do kɛŋɔ pua hɛŋle ɡbo harɛ ta ken.

Korowii suna waa sune Israel tena nɛ

¹⁴ Ya Naa Korowii, nyiŋi he nɛra nɛɛ kɛŋɔ peteɡre aa dɛ nyiŋi peera, nɛra haa lee ba tɛ he te la. Ya do kɛ peera aa pere a te, dɛ ka do kpɔɡbaah dɛɛ di. Gel he nɛra ka do harɛpare ondɛɛɡe kɛŋɔ Basan ne Gelead ta, dɛɛ di kɛ saŋ la.

¹⁵ Gel ya na he nyokpowe-ɛɛla, ɡɛ haa ɛa dɛ fa le ya ne Ijipt harɛ ta ba la.

¹⁶ Harɛre nɛra ɛɛ nao sihiih kpo ba, ba kpeɡri bwa ɛ pɛɛpɛɛ. Ba bwara ɛɛ yɔroo, bá kpɔ nɔɔra tɔ nyoo, dɛ́ tɔɔɡe ba deŋna.

¹⁷ Baa di teeraa kɛŋɔ harɛkon, kɛŋɔ kwaa aa dɛ tuuɡi tea ta ken. Baa le ba dekpeɡa taa bochela ne ɔmee ne, dɛ́ berɛ ba hen Korowii yaa dɛ tomɛ sie.

¹⁸ N Naa Korowii yaa dɛ tomɛ, nomɛlbwa ta do kɛŋɔ hen, he kpɔ he nɛra baa kaa wechɔɡa dɛɛ kɛ ba, he nɛra baa ɛ he kapɛrɛ nɛra la. He baah diu waa, aa biɡri, he sie dɛ lɛ kɛ hɛɛ na ya sum.

¹⁹ Hɛɛ berɔɔ dɔ tedoma ya nɛ, dɛ́ kpɔ naa tire ya wechɔɡa ta, dɛ́ kpɔa ka ta mpo vile ta.

²⁰ Hɛɛ teŋɛ kasinteŋ ne he nyina aa wola jaɡa dɔe taa, dɛ́ sune Jekɔb ne Abraham naanar nɛ, ɡɛ haa baɡɛ ya naawa nyoa saŋ la.