Maeka 6 - mzwDBL

Korowii ne Israel tena dɔe wa

¹ Israel tena, hé no waa Korowii aa dɛ bol. “Hé ir, dɛ́ kpɔ he waa ka bil bwejena ne deŋɡarere sie.

² Bwejena ne kwaa bwa haa le saŋ la bwa do le dɛ lawɛ harɛ kpoŋe ɡe, hé no. Korowii ne o nɛra Israel tena dɔɔ, wɛɛ ba ba waa bola dɛ́ pa bole.

³ N nɛra Israel tena, bɔkwa waa n ɛ heya ɔ? N ɛ heyaa waane dɛ jo he nɛɛ kɛɛ? Hé chaŋ mɛ.

⁴ He fa ɛ yoma Ijipt harɛ ta, asɛ n lawɛ heyaa le bela. N tomɛ Mosis ne Arɔn dɛ Miriam, bá ba tɔ he sie.

⁵ N nɛra, hé lii wechɔɡa Moab Kooro Balak fa aa vɔrɔwa, asɛ Beɔ bibaa Balam chaŋo la wa. Hé berɛ lii ŋwɛnɛ haa vala le Sitim dɛ ba Gelɡal, dɛ́ na ŋwɛnɛre maa cheɡɛ a ta lɛ heya.”

⁶ Bɔkwaa mɛɛ ba kpɔe ba Korowii waa dɛ di kora nyundua sie ba tomɔ wɔ? Ń kpɔ nabiiri aa di benanyoa ba fuah ɛ saraha o sie naa?

⁷ Ń kpɔ pebala kaɡboŋa ne ɔleve noo aa wara dɛɛ palɛ kɛŋɔ moo ba tɛ Korowii aa? O sie ɛɛ lɛ n nɛɛ yaa? Kɛɛ ń lawɛ n biloɡle, ba bɔ n wechɔɡa maa ɛa kem ɔ?

⁸ Akai, waa aa weraa Korowii chaɡle yaa, wáa waa dɛ nyin dɛ́ le ya be laanee kɛŋɔ, ya di kasinteŋ dɛɛ sune dɔŋa nɛ, dɛ́ pwɛr ya te tɛo.

Israel tena bolchɔɡe dii ne deŋnetɛra wa

⁹ A ɛ wejemwa kɛŋɔ hɛɛ ɔmɛ Korowii. O dɛ yerɛ nɛra baa lɔ bwɛjen Jerusalam ŋɔ, “Hé no, he nɛra haa baa cheme bwɛjen la bini!

¹⁰ Mɛɛ won soh he nyubinikpeɡ tena kondɔɔh haa cheɡa ka su deene, ne kwaa haa kpɔa maɡɛ kwaa dɛɛ faah nɛra n haah la wa aa?

¹¹ Mɛɛ won kpɔ nɛra baa maɡɛ kwaa dɛɛ faah nɛra bwara kɛ ba aa?

¹² He nɛra haa dɔ suuɡa dɛɛ ɛɡre nyaara, nyosonteŋna ɡe ɡboo he bwa.

¹³ Anomanta, n pa mun dɛ́ chɔɡ heya, he wechɔɡa haa ɛa la wa.

¹⁴ Hɛɛ di kwaa kɛ haa vaɡɛ, a do kɛ he ta komɛlbwa dii. Hɛɛ dɛɛ cheɡ kwaa, kɛ aa le he nɔn taa, dɛkalkɛ men Korowii ɛɛ ɡeloo ba chea laa ta kaa.

¹⁵ Hɛɛ du koo kwaa kɛ haa komɛlbwaa na komɛ, hɛɛ harame ɔleveree dɛ dɔ a no, kɛ haa dɔ ɛ wobɛlbwa, dɛ harame ɡrepo nɔna ɛ sen, haa dɔ nyɔ.

¹⁶ He teŋɛ Kooro Omri mmarare, ne o bibaa Kooro Ahab dem tena wedoŋa baa ɛa ta, ba we-ɛɛla la taa hɛɛ teŋɛ. Anomanta, mɛɛ chɔɡ heyaa, ásɛ harɛre nɛra mamɛ heya.”