Maeka 4 - mzwDBL

Korowii Kora dii harɛ nɔ ta bwa deŋnesɔɔhna ne

¹ Tɔpera ane dɛ ba, ásɛ Korowii Bwejen Dea aa chɔŋɛ o ta la do jaŋne ɡwaa bwejena bwa. Wɛɛ kpeɡuu ɡwaa deŋɡarere bwa, ásɛ nɛra warɛ le harɛre ta dɛɛ ba o ta.

² Harɛre nɛra ɡalɡa ɛɛ bao dɛ́ ba ŋɔ, “Hé ba ya kaa Korowii Bwejen la ta, Korowii Israel tena aa dɛ tomɔ la Dea. Wɛɛ chaɡle yaa o ŋwɛnɛree, ásɛ ya won dɛɛ kpɔ a ta.” Korowii Mmara ɛɛ le Saayɔn Bwejen taa, ásɛ o kpɔ bol waa o nɛra be Jerusalam.

³ Wɛɛ bol harɛre nɛra waa dɛ́ pa bole, dɛ́ kwaa harɛre nɛra baa kpeɡa baah. Baa beɡre ba kerii a ɛ para, dɛ́ beɡre ba lampeare ɡe ɡoori. Harɛre nɛra aa dɔŋaa yo, a ba ɛ kɛŋɔ baa hweli laa waa kpa.

⁴ Bɛlbwa ɛɛ so deŋnesɔɔhna taa, asɛ daa kooni ne fiɡ daa kooni baro cheme, nomɛlbwa aa wola won ba aah ba kpa. Koranar Bwa Kooroo bola.

⁵ Harɛre nɛra ɛɛ dɛɛ tomɛ ba voɡaree, kɛ ya te, Korowii yaa dɛ tomɔ waa taa yaa ba teŋa saŋ bɛlbwa dɛɛ la.

Korowii liire waa dɔa

⁶ Korowii ŋɔ, “Tɔpere bɛl dɛ ba, ásɛ n boa nɛra maa tɛr ba deŋne nyoa, nɛra maa ɡela ba laɡ ba laa ta kaa bojaŋ harɛfala ta la.

⁷ Mɛɛ ɡeloo boobie ka, dɛ́ le nɛra baa doŋ ba le harɛfale ta ba la, berɛ warɛ kohona dɛ́ do kpeɡri. Men Korowii ɛɛ di kora ba nɛɛ le awola, ne saŋ bɛlbwa dɛɛ la Saayɔn Bwejen waa lɔ Jerusalam.”

⁸ Kɛ hen Saayɔn Bwejen haa lɔ Jerusalam, belaa Korowii do kɛ peteɡre dɛɛ nyiŋi o nɛra nɛ, hɛɛ berɔɔ ba ɛ bwɛjen nyu tenten, ɡɛ he fa aa doa wubwa la.

⁹ Bɔkwa waa bala hɛɛ dooɡe lɔŋɔre nɔɔ? He ta kooro dɔe kpa kɛɛ? Nɛn waa bol waa dɛɛ ja heyaa sewɔ, a kpɔ weweele ta he nɛɛ hɛɛ pɛmɛ kɛŋɔ haah loltea aa lɔɔ waa?

¹⁰ Jerusalam tena, hé ɡbaɡre dɛ́ɛ pɛmɛ kohona, kɛŋɔ haah loltea aa lɔɔ. A chɛ kɛ he le bwɛjen nɔ ta, dɛ́ ka so kpɔɡ bini. A chɛ kɛ he dɔma lawɛ heya kaa bojaŋ harɛ Babelɔn, ásɛ mɔɔ Korowii ba lɛ heyaa le ba nɔn ta.

¹¹ Taraken, harɛre nɛra pɛ nyoa dɛ́ ba yo heya. Ba ŋɔ, “A chɛ kɛ Jerusalam paɡre dɛ́ berɛ dimɡbia, ásɛ ya sie lɛ a wa.”

¹² Kɛ baa Korowii liire jemɛ, baa jemɛ kɛŋɔ o boa ba nyoa dɛ́ tɛr ba deŋne, kɛŋɔ ba yon boa mea nyoa dɛɛ ba a lɔe la.

¹³ Korowii ŋɔ, “Jerusalam tena, hé ir ka yo he dɔma, mɛɛ ɡeloo he do kpeɡri kɛŋɔ nabal waa dɔ bune nyeɡlare, o nafikokore ɡe do kɛŋɔ ayaawa ken. Hɛɛ yo harɛre ɡalɡa nɛraa, dɛ́ pɔ ba nɛ, ásɛ dɛ kpɔ kondɔɔh baa yo nɛra dɛ lɛa la, ba tɛ men Korowii maa ɛ harɛ nɔ bwa dɔɔ la.”