Maeka 1 - mzwDBL

¹ Baa bɛl sɔne Maeka dɛ le Mɔresɛt. Korowii pili waane aa dɛ ba bwɛjena Samaria ne Jerusalam chiɡa baɡlo. Dɛ ɡɛ saŋee Juda koranar bane baa dɛ yer ba Jotam ne Ahas dɛ Hɛsɛkea di kora teŋɛ dɔŋa nɛɛ Juda harɛ ta.

² Hé no, nɛra haa lɔ harɛ nɔ ta bwa, ne komɛlbwa waa lɔ harɛ nɔ ta. Nemenɛ Korowii le o Dea waa do ɡoroŋ nyundua dɛɛ ba dɛ́ ba bol waa bɔ heya.

Korowii bol Samaria ne Jerusalam chɔɡa wa

³ Hé na! Korowii le o dobɔr waa do ɡoroŋ, dɛ tu baa valɛ bwejena dor.

⁴ Asɛ bwejena bwa mwɛɛ o lɔɡa, kɛŋɔ tohkel aa chɔŋɛ nii ta, dɛ palɛ dɛɛ jo fɛlembɔjena bini kɛŋɔ bɔchuubu ken.

⁵ Israel tena baa ɛ Jekɔb naanar wechɔɡa baa ɛ Korowii waa a bwa ba ɡɛ. Bamewaa ɡela Israel tena ɛ deŋnekpeɡ ɔ? Samaria koobwɛɛ nɛra laa aa? Bamewaa dɛ́ di bolchɔɡe voɡa baa dɛ tomɛ Juda harɛ ta waɔ? Jerusalam tenaa.

⁶ Anomanta, Korowii ŋɔ, “Mɛɛ ɡeloo Samaria berɛ dimɡbia, baa parɛ ɡrepo daa koonii, dɛ́ kpɔ a nɔna dɛɛ ɛ sen bela, dɛ́ taɡɛ o danjwɛɛ bwea bwa ka do fɛlembɔjen ta, ásɛ o mumpar bwea bwa chɔ baŋ.

⁷ Samaria tena voɡa bwa ɛɛ paɡroo burbur ken, ásɛ nii fuh saraha kwaa bwa aa lɔ bela. Mɛɛ chɔɡ ba voɡa bwaa. Baa lɛ kwaa haahna aa bɔ jwamane dɛ dɔ, dɛ boa a nyoa nomanta, ba dɔma ɛɛ paa ka tɛ jwamane tena bane ɡe bobɛl.”

Wii ne suna dii

⁸ Men Maeka ŋɔ, “Anɔ nomanta mɛɛ wiu dɛɛ dooɡe lɔŋɔre, á baɡle kɛ n dɛ di suna. Mɛɛ valɛ nakpapɛɛ ne mumɡbalee, dɛ́ si kɛŋɔ kalampoŋa, dɛɛ si kɛŋɔ kwiu ken.

⁹ Baa do Samaria tena bolaa baa wola won chah, Juda tena ɡe dɛ ba a dɔŋa nae. A tel bwɛjen Jerusalam doonyojen tenten bela n nɛra aa soɡa.”

¹⁰ He bɛ a waa bol baɡle ya dɔma Gat tena, hé bɛ wi kwaraa ɡe. Hé ɡbili bomboɡ ta Bɛt Ofra, á baɡle kɛ he bambile chɔɡɔ.

¹¹ Safir tena, hé valɛ ba kaa bojaŋ harɛ ta mumɡbal ne sihiih ne. Bwɛjen Saanan tena ɡe, hé bɛ lii ŋɔ hɛɛ le o taa. He baa no kɛŋɔ Bɛt Ɛsɛl tena dɛ wi aa, he jemɛ kɛŋɔ he ta sɔɔhbɔr ba be bela dɔe.

¹² Marɔt tena, he lɔ bonyɛɡa ta, dɛɛ kpa kɛŋɔ he dɔ bosɔɔhna, dɛkalkɛŋɔ Korowii kpɔ chɔɡa ba ta he nɛ, hale a tel bwɛjen Jerusalam doonyojen tonɛ.

¹³ Lakes tena ɡe, hé vɔrɔwe kwaa aa do kɛŋɔ torɔɡore pɛl jaɡre. He chaa Israel tena wechɔɡa baa ɛa, a che a ta Jerusalam tena ɡe ɛ wechɔɡa.

¹⁴ Juda harɛ tena, hé kal Mɔresɛt Gat tena dɛ́ le bwɛɛ la ta, Israel koranar aa chae bɛlbwaa dɔ le Aksib tena be.

¹⁵ Mɛɛ ɡeloo dɔm ba yo he nɛra haa lɔ Maresa, dɛ́ pɔ he nɛ. Ásɛ Israel nomonome chwa ka sɔh Adulam bwebɔɔ bini.

¹⁶ Juda tena, hé fonɛ he nyuune, á baɡle kɛ he dɛ di suna, dɛ́ wi tɛ he bii haa dɛ nyin ba la. Hé paa he nyuune, á do kɛŋɔ kɔkɔsaki nyu, dɛkalkɛŋɔ baa laɡ baa le he be kaa bojaŋ harɛfale ta.