Amanesoma Luk Aa Chwera Tɔn 4 - mzwDBL

Gɛ Bɔnsam aa daah Yeesu na wa

¹ Yeesu aa le o Korowii nee sɔe la bɔr Jɔɔdan Moo ta dɛɛ kaa dem la, Korowii Domadɛɛɡe la ir o nɛ, dɛ kpɔɔ kaa pua hɛŋle ɡbo harɛ ta, asɛ o ka do bela tɔpera fifraanaarɛ.

² Asɛ Bɔnsam ka daahno na a ɡɛ tɔpera nɔ ta. Dɛ waa komɛlbwa di, anomanta, a habɔɔ la, dɛ lɔr lawɔ.

³ Bela la, Bɔnsam ŋɔ o be ŋɔ, “Dɛ henee Korowii Bie la kpela aa, ɡel bwe nɔ berɛ paanoo hé di.”

⁴ Anee Yeesu chaŋo ŋɔ, “Korowii Tɔn baɡlɔ ŋɔ, ‘Kondikwaa ɡbo laa dɛɛ tɛ nɛn mkpa.’ ”

⁵ Asɛ Bɔnsam berɛ kpɔɔ ka chɔŋɛ bobɛl waa do kɛŋɔ bwejen bɛl doa, dɛ baɡlo harɛ nɔ ta bela bwa kora dii aa lole ɡale o sie ta,

⁶ dɛ ŋɔ o be ŋɔ, “Dɛ he kpɔ duure tɛ mɛ naa, mɛɛ kpɔ a kpeɡri ne a kondɔɔh bwaa tɛɛ, dɛkalkɛŋɔ a bwa sekwaraa lɔ n nɔn ta. Nɛn maa dɛ nyin laanee n kpɔ dɛɛ tɛ.

⁷ Dɛ he kpɔ duure tɛ mɛ naa, a bwa dɛ ba he kwaa ɛɛ, he di a kpeɡri.”

⁸ Anee Yeesu ŋɔ o be ŋɔ, “Korowii Tɔn baɡlɔ ŋɔ, ‘Dɛɛ duu N Naa Korowii dɛɛ tomɛ o ɡbo.’ ”

⁹ Belaa Bɔnsam kpɔɔ kaa bwɛjen Jerusalam, dɛ kpɔɔ ka cheɡ Korowii Dea la nyundujaɡla, asɛ dɛ ŋɔ o be ŋɔ, “Dɛ henee Korowii Bie la kpela aa, che bonɔ dɛ́ jah le harɛ,

¹⁰ dɛkalkɛ Korowii Tɔn baɡlɔ ŋɔ, ‘Korowii ɛɛ ɡeloo o nyundua toroma ɛɛ nyiŋi he nɛɛ kɛrɛdɛ.

¹¹ Baa lawɛɛ haa wola nakpala kwaraa lɔ.’ ”

¹² Anee Yeesu chaŋo ŋɔ, “Korowii Tɔn baɡlɔ ŋɔ, ‘Bɛ N Naa Korowii daah na.’ ”

¹³ Bɔnsam aa daah Yeesu ŋwɛnɛ bɛlbwa ta kɛ ó fe ɛ wechɔɡa dɛ kahonɛ la, o ɡelo dɛ kaa tama mɔɔ.

Yeesu toma mun pae Galilia harɛ ta

¹⁴ Dɛ Korowii Domadɛɛɡe kpeɡri lɔ Yeesu nɛ, asɛ o berɛ la Galilia harɛ. Belaa o waa perɛ baah bela bwɛɛre la bwa ta.

¹⁵ O la ba cheremi deene bini dɛ ka bol Korowii Waa nɛra be, ba bwa kpɛɛro.

¹⁶ O ba Nasarɛt bela baa dɛɛro la, asɛ ɡɛ o yon dɛɛ ɛ Ona Tɔpere bɛlbwa la, o la cheremi dea, dɛ ir che ŋɔ ó kure Korowii Tɔn la.

¹⁷ Asɛ ba kpɔ Korowii keame Aesaya tɔn la ba do o nɔn ta. O pili tɔn la, dɛ na bela baa chwera ŋɔ,

¹⁸ “Korowii Domadɛɛɡe la ir n nɛ, dɛ lee mɛ ŋɔ ń ba bol Amanesoma baɡle nyaara, dɛ́ ŋɔ nɛra baa laɡ ba yoma, ne nɛra baa do ba dea be ŋɔ ba Lɛɛ balɔ, dɛ́ ɡel nyoŋa sibie pili ba won dɛɛ na, dɛ́ lɛ nɛra baa dɛ ɛɛ ba hɔhɔrɔwa la le ba dɔma nɔn ta,

¹⁹ asɛ dɛ ɡel nɛra bwa jemɛ kɛ tɔpere Korowii aa dɛ ba o nɛra Lɛɛ la telo.”

²⁰ Ate, Yeesu kure tɔn la tonɛ dɛ laa tɔ, dɛ kpɔ do nɛn waa dɛ nyiŋi cheremi dea bela la nɔn ta, dɛ so harɛ. Asɛ nɛra baa lɔ cheremi dea bela la bwa kpɔ sie pa o nɛɛ dɛɛ nyiŋu fuuu ken.

²¹ O berɔ ŋɔ ba be ŋɔ, “Fini, waa haa noa le Korowii Tɔn bini nɔ chiɡo ɡɛ Korowii aa bola ŋɔ aa ɛo la.”

²² Belaa nɛra la bwa kpɛɛro. Ba nyoa kpo ɡɛ o nyoa ne wobol aa soma la, asɛ ba ŋɔ, “Josef bie la laa nɔ naa?”

²³ Anee Yeesu ŋɔ ba be ŋɔ, “N jemɔ kɛŋɔ hɛɛ sɛɡ mɛɛ ŋɔ, ‘Tɛɛɡa te, chah he te. Gɛ yaa noa kɛ he ɛ Kapeeneɔm la, ɛ ane he ɡbaɡba bwɛɛ bonɔ ɡe.’ ”

²⁴ Dɛ ŋɔ ba be ŋɔ, “Kasinteŋ, Korowii keame ta sɔn dɔe o ɡbaɡba bwɛ.

²⁵ N dɛ ŋɔ he be ŋɔ, ɡɛ saŋ Korowii keame Elaeja fa aa lole hwel che bene atoro korobie anumɛl bwaala aa wola nɛ, asɛ lɔr chole harɛ la bwa ta la, dɛ luhaahna warɔ dɛ do Israel tena bini,

²⁶ kɛ Korowii ta Elaeja tomɛ ba bini bɛlbwa be. Luhaah bɛl waa lɔ Sidon harɛ bwɛɛ bɛl baa yerɔ Sarefat la ɡbo bee o tomɔ.

²⁷ Gɛ saŋ Korowii keame Elaesa fa aa lole la, dɛ Israel tena weechɔɡa ane aa chɔɡ ba bwadabii warɔ. Kɛ o ta ba bɛlbwa chaeh. Siiria harɛ baa Naaman ɡboo o chah.”

²⁸ Nɛra baa lɔ cheremi dea bela la aa no waa nɔ la, dɛ bwaawee laɡ ba.

²⁹ Dɛ ba bwɛɛ la chɔŋɛ bwe ta. Ba iro dɛ tɛɡre Yeesu le bwɛɛ la ta, dɛ kpɔɔ ka che bwe la doa bobɛl waa wila su, dɛ́ fee taɡɔ ta, ásɛ o nyu ba yaɡɛ harɛ.

³⁰ Anee o valɛ jo nɛra la baah, dɛ valɛ o tetoora kaa.

Baa bɛl kwaa aa dɛ ir o nɛ

³¹ Yeesu la Galilia harɛ bwɛɛ bɛl baa dɛ yerɔ Kapeeneɔm la ta, dɛ kaa baɡ ba Korowii Waa Ona Tɔpere ta,

³² asɛ ɡɛ waa dɛ baɡle Korowii Waa la ɛ ba bwa nyokpoa, dɛkalkɛŋɔ dɛ o dɛ bol waa kpeɡri ne.

³³ Cheremi dea bela la, dɛ baa bɛl lɔ bela, kwaa ɛɛ ir o nɛ, asɛ o do lɔŋɔ ŋɔ,

³⁴ “Aa! Yeesu Nasarɛt te, bɔkwaa hɛɛ nyin ya be nɔ? Ya chɔɡaa he ba kɛɛ? N jemɛ he nɛnsoo. Henee Korowii Biɡoroŋ waa ŋɔa ŋɔ o dɛ ba bala la.”

³⁵ Anee Yeesu kɔr kwaa la aa lɔ baa la nɛɛ la ŋɔ, “Hé tɔ nyoa dɛ́ le o nɛ!” Belaa a lɔ baa la bil nɛra la siwi ta. A ta on wobɛlbwa ɛɛ, dɛ le o nɛɛ dɛ kaa.

³⁶ Nɛra baa lɔ bela la bwa nyoa kpoo, ba ŋɔ dɔŋa be ŋɔ, “Bɔkwa waa nɔɔ! Hé na ɡɛ baa nɔ aa kpɔ kpeɡri bol waa baɡle kwaa aa dɛ ir nɛra nɛɛ asɛ a kaa!”

³⁷ Anomanta, Yeesu waa perɛ baah bela bwɛɛre la bwa ta.

Yeesu chah nɛndamanta bane

³⁸ Yeesu le cheremi dea bela dɛ la Seemɔn dem, dɛ Seemɔn helahaah bwara wɔrɔbɔ tenten, asɛ ba bol o waa Yeesu be ŋɔ ó chaoh.

³⁹ Belaa o la weela te la be o chɔɔbɔr, dɛ ka che o jwɛh, dɛ kɔr o weela la, asɛ a le o nɛ o bwara sɔɔhno, buɡ la ta, o ir dɛ daa kwaa tɛɛ ba.

⁴⁰ Wee aa dɛ jo la, nɛra baa dɔ chamene tena baa we weela bwa soo siwi la kpɔ ba ba Yeesu be, asɛ o kpɔ o nɔɔra dawɛ ba nɛɛ dɛ chah ba bwa sekwaraa.

⁴¹ Kwaa aa dɛ ir nɛra nɛɛ la le ba nɛɛ pirim. Aa dɛ le dɛ a dɛ dooɡe lɔŋɔre dɛɛ ŋɔ, “Henee Korowii Bie la!” Yeesu kah kwaa la, o ta ɡelɛ a bol wa, dɛkalkɛŋɔ a jemɔ kɛŋɔ onee Kristo la Korowii aa baɡɛ nyoa ŋɔ wɛɛ tomɔɔ ó ba lɛ o nɛra la.

Yeesu Korowii waa bola cheremi deene bini

⁴² Bɔr aa dɛ chaah la, Yeesu le bwɛɛ la ta, dɛ ka so bela nomɛlbwa aa wola toole. Dɛ nɛra iro dɛɛ nyin o bɔr. Baa nao la, ba ta on ŋwɛnɛ tɛɛ kɛ o kaa bobɛlbwa, dɛ ŋɔ o be ŋɔ ó ɡel ba ne o so.

⁴³ Anee o ŋɔ ba be ŋɔ, “A chɛ kɛŋɔ ń bol Korowii Kora Amanesoma la bwɛɛre ane ɡe ta, dɛkalkɛŋɔ anee Korowii tom mɛ ŋɔ ń ba ɛ.”

⁴⁴ Anomanta, o valɔ dɛɛ bol Amanesoma la dɛɛ baɡle nɛra cheremi deene bini Juda harɛ bwa.