Amanesoma Luk Aa Chwera Tɔn 24 - mzwDBL

Yeesu seo ta ira wa

¹ Tɔɔ aa pera Kwasiara waa ɛ tɔpeloɡle la, tomun aa dɛ kpɔ la, haahna la kpɔ kwaa a sɔɔh aa soma la la bwebɔɔ la ta,

² dɛ ka na kɛŋɔ nomɛl ɡbili bwe baa kpɔa tɔ bɔɔ la le o nyoa,

³ asɛ ba jo dɛ na kɛŋɔ ba Dɔɔ Yeesu lale la toole.

⁴ Ba nyoa aa kpoa ba che bela la, dɛ baala banɛ bane baa do laalapoŋa aa nyɛɡle al-al ken denɔ ba che ba jwɛh.

⁵ Ɔmee laɡ ba taeh, asɛ ba ɡure nyuune suuɡi harɛ. Anee baala la ŋɔ ba be ŋɔ, “Ɛrɛɛ he baa nyin nɛnwee lala bɔr ɔ?

⁶ Waa o fa aa bol he be Galilia harɛ la, he soɔh kɛɛ? O toole bonɔ, o iro.

⁷ O fa ta ŋɔe ŋɔ a chɛ kɛŋɔ bá le o Nɛn Bie tɛ nɛnchɔɡa, ba kpaaro pɛl daɡaɡre ta ásɛ a tɔpetooro wee la ó ir seo ta naa?”

⁸ Belaa haahna la ta lii ɡɛ waa la.

⁹ Ba laa berɛ kaa dem, dɛ ka taa baɡle Yeesu habɔteŋra fi dɛ beŋkpoŋ la ne nɛra baa ja ba nɛɛ la.

¹⁰ Mɛɛre waa le Maɡdala la ne Joana ne Jems nya Mɛɛre dɛ haahna bane baa jaa laanee bol waa la baɡle o toroma la.

¹¹ Yeesu toroma la kpɔ waa la ɛ mola, ba ta kpɔe ɛ wobɛlbwa.

¹² Belaa Pita te kpɔ chwae dɛ la bwebɔɔ la ta, dɛ ka boŋɛ dɛ haah o bini dɛ na yapoŋ baa kpɔa baaɡe lale la ɡbo chɔe. Dɛ kpɔ nyokpoa kaa dem.

Emɛyas ŋwɛnɛ ta wa

¹³ Awola tenten la, Yeesu habɔɔ nɛra la bini banɛ bane chiɡ ŋwɛnɛ ta dɛ le Jerusalam dɛɛ kaa Emɛyas. Bela ne Jerusalam ɛɛ ɛ kwansini anuanɛɛ.

¹⁴ Dɛ ba dɛ bol waa dɔŋa be, dɛɛ baɡle dɔŋa waa aa chiɡa.

¹⁵ Baa dɛ bol waa sibeɡra ne dɛ bɔɔ dɔŋa dɛɛ kaa la, Yeesu ɡbaɡba kaa puu ba, ba ne wɛɛ kaa.

¹⁶ Ba nao, kɛ ba ta wone jemɔ.

¹⁷ Belaa Yeesu bɔɔ ba ŋɔ, “Bɔkwa waa he valɛ dɛɛ ba dɛɛ bol dɔŋa be nɔɔ?” Asɛ ba jaɡɛ che sum ne surumm ken.

¹⁸ Asɛ ba nɛra banɛ la bini bɛl baa dɛ yerɔ Kliopas la chaŋo ŋɔ, “He te ta waa aa chiɡ bonɔ tɔpera anɛ nɔ noɛ kɛɛ? Jerusalam nɛŋhɔɔhree hen kɛɛ?”

¹⁹ Anee Yeesu bɔɔ ba ŋɔ, “Bɔkwa waa yɔ?” Asɛ ba ŋɔ, “Waa aa pu Yeesu waa le Nasarɛt la waa yaa bol. O ɛ Korowii keame dɛ dɔ kpeɡri wobol ne we-ɛɛla ta, Korowii ne nɛra bwa jemɛ o wa.

²⁰ Ya Sɔfonomonome ne ya bela nomonome kpɔɔ tɛ ŋɔ bá di o wa, dɛ kpaaro pɛl daɡaɡre ta dɛ kpoo.

²¹ Kɛ ya te, ya fa dɔ hwɛɡa kɛ onee naate o fe aa dɛ ba dɛ ba lɛ Israel tena la. Waa nɔ aa chiɡa tɔpera atoroo la.

²² Anɔ la ɡe aa jaa, haahna bane baa ɛ ya bini bane la ɡelɔ ya nyoa kpo. Ba felo dɛ la bela baa huɡo,

²³ kɛ ba ta o lale nae. Asɛ ba ba dɛ ba ŋɔ ba na nɛra bane kɛŋɔ nyundua toroma ken bela, ba chaɡle kɛŋɔ Yeesu ir seo ta.

²⁴ Belaa yabala la bane baa ɛ o habɔteŋra la bane la bela baa huɡo la, dɛ ka na a ɡɛ waa la tenten, dɛ a ɛ kpela ɡɛ haahna la aa bola la. Kɛ Yeesu ɡbaɡba te, ba ta on nae.”

²⁵ Anee Yeesu ŋɔ ba be ŋɔ, “Nfɛrɛ nyaara! Ɛrɛɛ haa wola Korowii keamere waa baa bola la yarada nɔɔ?

²⁶ A ta chɛɛ kɛŋɔ Kristo la Korowii aa ŋɔa ŋɔ wɛɛ tomɔɔ ó ba lɛ yaa la na ɡɛ wahala nɔ bwa mɔɔ ásɛ dɛ dɔ Korowii Kora la di kɛɛ?”

²⁷ Asɛ Yeesu baɡ ba o bwara waa aa lɔ Korowii Tɔn la bwa bini. O pa mun le anɔ la aa lɔ Mosis Tɔne la bini dɛ baɡle kaa anɔ la aa lɔ Korowii keamere kwaa la ta.

²⁸ Baa tel bwɛɛ la baa dɛ kaa o ta la, Yeesu ɛo kɛŋɔ waa dɛ kaa sie,

²⁹ kɛ ba ta on ŋwɛnɛ tɛɛ, dɛ soŋo ŋɔ, “Wee joɔ, bɔr dɛ bir, anomanta, ba yá chɔ.” Asɛ o sɛh o ne ba ka so.

³⁰ Kondiiɡa saŋ aa tela ba ka cheme tiɡ ta la, o kpɔ paanoo dɛ jam Korowii dɛ kuuɡi do ba nɔɔra ta.

³¹ Belaa ba sie ta chole o nɛɛ kɛŋɔ Yeesuu. Buɡ la ta, o den nyoɡre ba siwi ta.

³² Asɛ ba ŋɔ, “A waa laa wɛɛ baɡle Korowii Tɔn la waa ŋwɛnɛ ta asɛ a jo ya bini ɡɛ la aa?”

³³ Buɡ la taa, ba ir dɛ berɛ kaa Jerusalam a wola jɔmɔra la ne, dɛ ka na Yeesu habɔteŋra fi dɛ beŋkpoŋ la.

³⁴ Dɛ ba ne nɛra baa jaa la pɛo so dɛɛ bol ŋɔ, “Ya Dɔɔ la iro kpela! O kpɔ o te baɡle Seemɔn!”

³⁵ Gɛ nɛra banɛ la baɡle waa aa chiɡ Emɛyas ŋwɛnɛ ta ɡɛ saŋ baa dɛ kaa asɛ Yeesu ka puu ba la bini chaɡ ba, dɛ baɡle ɡɛ aa ɛa o kuuɡi paanoo tɛɛ ba mɔɔ ba ta jemɔ.

Yeesu kpɔ o te chaɡle o habɔteŋra

³⁶ A ɡɛ saŋ nɛra banɛ la aa bol ɡɛ waa la dɛɛ baɡ ba la, buɡ la ta, dɛ Yeesu denɔ ba che ba baah ta dɛ ŋɔ, “Kórowii tɛ heyaa bosɔɔhna.”

³⁷ Ba jarɔ, ɔmee laɡ ba, ba lii kɛŋɔ lalee ba ken na.

³⁸ Asɛ o bɔɔ ba ŋɔ, “Bɔkwaa ɡela he bambile chɔɡ nɔɔ? Bɔkwa waa hɛɛ ɛ aahna aahna nɔɔ?

³⁹ Hé nyiŋi n nɔɔra ne n napaala, ásɛ dɛ jemɛ kɛŋɔ menee. Hé laɡ mɛ dɛ na, dɛkalkɛŋɔ lale ta bwadabii ne hoɡa dɔe ɡɛ haa na mɛ n che nɔ.”

⁴⁰ Yeesu bol ɡɛ waa nɔ dɛ kpɔ o nɔɔra ne o napaala baɡ ba.

⁴¹ Ba sie lɛo, kɛ dɛ ba bwara hwaoh, asɛ ba taa tɔŋle. O bɔɔ ba ŋɔ, “He dɔ kondikwaa ane bonɔ naa?”

⁴² Asɛ ba tɛo pɛŋe baa ŋwiiro pera,

⁴³ asɛ o lɛ dɛ chwe ba siwi ta.

⁴⁴ Ate, dɛ ŋɔ ba be ŋɔ, “Anɔ waa ɡɛ saŋ n ne haa lole la, n yon dɛɛ bol he be ŋɔ a chɛ kɛ n bwara wobɛlbwa baa chwera Mosis Mmara la bini ne Korowii keamere tɔne la bini ne Korowii Kpɛɛra Tɔn bini la ɛ kpela la.”

⁴⁵ Anee o kpɔ lii ba, ba no Korowii Tɔn la mun.

⁴⁶ Dɛ berɛ ŋɔ ba be ŋɔ, “Ba chwerɔ ŋɔ Kristo la chɛ kɛŋɔ ó na wahala nɛra nɔn ta bá kpoo, ásɛ o seo habɔɔ tɔpera atoro la, ó ir seo ta,

⁴⁷ ásɛ ba che o sɔn ta dɛ́ bol Amanesoma la dɛ́ ŋɔ nɛ́ra charɛ ba liire dɛ́ le wechɔɡa ta, ásɛ Korowii kpɔ ba wechɔɡa kɛ ba, dɛ pa mun le Jerusalam dɛ baɡle ɡɛ waa nɔ harɛ bobɛlbwa.

⁴⁸ Heyaa waa nɔ danseɛ tena.

⁴⁹ Kɛ hé no, n ɡbabir ɛɛ tomɛ kon n Mɛɛ aa baɡɛ heyaa nyoa laanee he be. Anomanta, hé so bwɛjen nɔ ta ka tel kɛŋɔ kpeɡri la aa le nyundua ba he be.”

Yeesu nyundua kaala

⁵⁰ Belaa o kpɔ ba le Jerusalam kaa Bɛtani dahare dɛ ka laa o nɔɔra ir dɛ soŋe Korowii tɛɛ ba.

⁵¹ O Korowii soŋa dɛ tɛɛ ba ta la, o le ba jwɛh, asɛ Korowii kpɔɔ kaa nyundua.

⁵² Ba duuru dɛ berɛ kpɔ silɛɛ kaa Jerusalam,

⁵³ dɛ yon ka jo Korowii Dea dɛɛ jam Korowii tɔpere bɛlbwa.