Amanesoma Luk Aa Chwera Tɔn 23 - mzwDBL

Ba lawɛ Yeesu ba che Paelet sie

¹ Nɛra la taɡɛ ba kane ta dɛ ir, dɛ kpɔɔ la harɛ nomoa Paelet be,

² dɛ ka haŋɛ o nyoa ŋɔ, “Ya lawɛ baa nɔ kɛ waa dɛ chɔɡ ya harɛ. O dɛ do nɛra dochɔɡa ŋɔ ba bɛ toɔ bɔ dɛɛ tɛ Rom Koojen Siisa kpa, dɛ berɛ dɛɛ ɛ o te ya Juu tena kooro Kristo la Korowii aa baɡɛ yaa nyoa ŋɔ wɛɛ ɡeloo o ba ba lɛ yaa la.”

³ Anee Paelet bɔɔ Yeesu ŋɔ, “Henee Juu tena kooro ɛ?” O ŋɔ, “Anee he bol la.”

⁴ Asɛ Paelet ŋɔ Sɔfonomonome ne nɛnlaa baa cheme o sie la be ŋɔ, “N ta wechɔɡa baa nɔ aa ɛa nae.”

⁵ Dɛ nɛra la nyoa ta kpeɡri, ba bol ane dɛɛ dawɛ Yeesu ŋɔ, “O kpɔ o webaɡla dɛɛ chɔɡ nɛra liire Juu tena harɛ bwa ta taraken. Galilia harɛ taa o pa mun, dɛ kpɔ ba le bonɔ!”

Ba la Yeesu ne Hɛrɔd sie

⁶ Paelet aa no ɡɛ la, o bɔɔ ba ŋɔ, “Galilia tee yaa?”

⁷ Baa bola ŋɔ Galilia tee la, dɛ Hɛrɔd waa ɛ Galilia kooro ɡɛ saŋ la ba Jerusalam, asɛ o ɡel ba kpɔɔ la o be.

⁸ Waa na Yeesu la, dɛ o sie lɛo taeh. Waa no o waa dɛ fe ɛɛ nyinu o ɛ nyokpowaa ó na biɡro, anomanta, dɛ o dɛ nyinu dɛ́ na.

⁹ Kooro Hɛrɔd bɔɔro waa taeh, asɛ o mwaa o ne.

¹⁰ Belaa Sɔfonomonome ne Tɔnjerema la bol waa takpeɡ ne dɛɛ dawɛ o nɛ.

¹¹ Asɛ Kooro Hɛrɔd ne o soojare ɛɛ muɡli o baah dɛɛ mamɔ, dɛ ka kpɔ koowur ba doo dɛ berɛ kpɔɔ ka tɛ Paelet.

¹² Dɛ Kooro Hɛrɔd ne Paelet fa aa somɛ, kɛ le awola tɔpere la, ba kpɔ darame.

Ba ŋɔ a chɛ kɛ bá kpo Yeesu

¹³ Paelet yerɛ bela tena ne Sɔfonomonome ne bwɛɛ nomonome ba cheme,

¹⁴ dɛ ŋɔ ba be ŋɔ, “Heyaa lawɛ baa nɔ ba n be dɛ ŋɔ o dɛ do nɛra dochɔɡa ŋɔ bá lɛ ɡaeh harɛ nɔ ta. N bɔɔro a bini he bwa siwi ta bonɔ dɛ na kɛŋɔ o ta wechɔɡa ɛɛ. Kpɔe he kpɔ waa la dɛɛ dawɔ.

¹⁵ Gɛɛ Kooro Hɛrɔd ɡe aa wola wechɔɡa bɛlbwa o nɛɛ nae dɛ berɛ kpɔɔ ba tɛ yaa. Wobɛlbwa ta baɡlɛ kɛŋɔ yá kpoo.

¹⁶ Kɛ mɛɛ ɡeloo bá lɔɔro bampɔrɔ ŋwɛɛra ne dɛ́ kpɔɔ ta.”

¹⁷ Dɛ ɡɛ ba tɔpejen baa dɛ yerɔ Galekaa la we-ɛɛla aa doa la, o telaa, ba yon le wechɔɡ-ɛɛra baa do ba dea la beŋkpoŋ ta ó kaa.

¹⁸ Belaa nɛnlaa la bwa kpɔ takpeɡ ŋɔ, “Kpoo! Le Barabas ta ó kaa!”

¹⁹ Gɛ Barabas nɔ ɛ nomɛl waa ja waane ba fa aa ir a ne bwɛjen la ta, dɛ vuuɡi Rom Koojen nomonome ba fa aa dɛ nyiŋi ba harɛ la ta, asɛ dɛ kpoo nɛra ɡe ja, asɛ ba lawɔ ka do dea.

²⁰ Paelet bambile bini la, dɛ o dɛ nyin kɛ o ɡel Yeesu o kaa, asɛ o berɛ bol waa baɡle nɛnlaa la ja.

²¹ Ane a bwa, ba ta noɛ, dɛ kpɔ takpeɡ ŋɔ, “Kpaaro pɛl daɡaɡre ta! Kpaaro pɛl daɡaɡre ta!”

²² O bɔɔ ba toorotena ŋɔ, “Wechɔɡa besoo o ɛɔ? N ta wechɔɡa waa ɛa a chɛ kɛ ba kpoo nae! Mɛɛ ɡeloo bá lɔɔro chweema ne dɛ́ kpɔɔ ta.”

²³ Dɛ ɡɛ baa dɛ bol la taa ba ta do, dɛ kpɔ takpeɡ dɛɛ ŋɔ o chɛ kpaara pɛl daɡaɡre ta. Ba nyoa baa ɡwaa Paelet nɛ,

²⁴ asɛ o sɛh ɡɛ baa dɛ nyin tɛɛ ba, dɛ kpɔ waa la dawɛ Yeesu nɛ.

²⁵ Paelet le baa la waa ja waane ba fa aa ir a ne dɛ vuuɡi Rom Koojen nomonome, dɛ kpoo nɛra ba doo dea la ta o kaa, asɛ dɛ kpɔ Yeesu tɛɛ ba ŋɔ bá ka ɛo ɡɛ bwa baa dɛ nyin.

Ba kpaa Yeesu pɛl daɡaɡre ta

²⁶ Soojare la aa kpɔɔ dɛɛ kaa dɛ́ ka kpoo la, ba kaa cheme Seemɔn. Sairini tee. Dɛ o le koo dɛɛ ba, asɛ soojare la lawɔ dɛ lɛ daɡaɡre Yeesu aa cheɡɔɔ la, dɛ ɡel Seemɔn cheo teŋɛ Yeesu nɛ.

²⁷ Dɛ nɛnlaa tenten teŋɛ o nɛ, ba bini bane ɛ haahna dɛ kpɔ nɔɔra dawɛ nyu dɛɛ dooɡe lɔŋɔre dɛ wi dɛɛ tɛo.

²⁸ Asɛ Yeesu berɛ o te dɛ ŋɔ, “Jerusalam haahna, he bɛ wi tɛ mɛ. He wi tɛ he te ne he bii,

²⁹ dɛkalkɛŋɔ tɔpere bɛl dɛ ba bala ásɛ he ŋɔ, nɛra baa wola lolɛ bwa ne banɔ la baa wola bii ɔrɛ bwa la na som.

³⁰ A ɡɛ saŋ nɛra ɛɛ ŋɔ bwejena ne deŋɡarere bee ŋɔ, ‘Hé choɡli tɔ ya nɛ.’

³¹ Da-lwɛɛ dɛ fuh aa, dahole te ta pɔeh yaa?”

³² Soojare la kpɔ wechɔɡ-ɛɛra banɛ bane ja Yeesu nɛɛ dɛɛ la ka kpoo ba.

³³ Ba kaa tel bobɛl baa dɛ yerɛ bela Nyuhoɡ Bɔr. Belaa ba kpaa Yeesu pɛl daɡaɡre ta, dɛ kpaa wechɔɡ-ɛɛra la ɡe pɛl daɡaɡra ta, dɛ kpɔ bɛl pa Yeesu diɡ ta, bɛl ɡe pa o ɡal.

³⁴ Yeesu ŋɔ, “N Mɛɛ, kpɔ ba wechɔɡa kɛ ba. Baa waa baa dɛ ɛ nɔ jemɛ.” Soojare la kpɔ o laala bil dɛɛ ta chacha ŋɔ naate waa di la, ó kpɔ onɔ la waa dɛ nyin.

³⁵ Nɛnlaa cheɡɛ bela dɛɛ nyiŋu. Juu tena nomonome muɡli o baah ŋɔ, “Kɛ he wono lɛ bane oo? Dɛ he ŋɔ henee Kristo la Korowii aa leo la aa, lɛ he te yá na!”

³⁶ Gɛɛ soojare la ɡe mamɔ dɛ muɡli o baah, dɛ tuuh tel o jwɛh, dɛ kpɔ sennyɛɡa tɛo ŋɔ ó nyɔ,

³⁷ dɛ ŋɔ, “Dɛ he ŋɔ henee Juu tena kooro la aa, lɛ he te!”

³⁸ O nyunduabɔr daɡaɡre la ta la, ba chwerɔ ka pɛl bela ŋɔ, juu tena kooro laanee la.

³⁹ Wechɔɡ-ɛɛra baa ja o nɛɛ la bɛl bol waa yaɡɔ ŋɔ, “He laa Kristo la kɛɛ? Lɛ he te dɛ́ lɛ ya ɡeo.”

⁴⁰ Asɛ nɛɛte la aa jaa la kaoh ŋɔ, “Jamɔ haa Korowii ɔmɛ kɛɛ? Gɛ baa ɛ yaa nɔ, ɡɛɛ ba ɛ o ɡe.

⁴¹ O te kwara wechɔɡa bɛlbwa toole o nɛ. Kɛ ya te, waa yaa ɛa la, kenii a chɛ kɛ ya na.”

⁴² Dɛ ŋɔ Yeesu be ŋɔ, “Yeesu, he baa di he kora aa, ásɛ he lii n wa.”

⁴³ Anee Yeesu chaŋo ŋɔ, “Kasinteŋ, hale fini, hɛɛ ja n nɛɛ nɛndɛɛɡa silɛɛ bwɛɛ nyundua belaa.”

Yeesu seo wa

⁴⁴ Wee aa baa che nyubaah la, bɔr biro jumaa ken dɛ ka tel wekee saŋ,

⁴⁵ asɛ yal baa kpɔa teŋe Korowii Dea bini la baah pere anɛ.

⁴⁶ Yeesu kpɔ takpeɡ do lɔŋɔ dɛ ŋɔ, “N Mɛɛ, he nɔn taa n lileo do!” Waa bol ɡɛ tonɛ la, o doma le, o sewɛ.

⁴⁷ Sooja nomoa waa lɔ bela dɛ na waa aa chiɡa la, o ŋɔ, “Kpelaa, wechɔɡa toole baa nɔ nɛ,” dɛ kpɛɛ Korowii.

⁴⁸ Nɛra baa bala dɛ ba nyiŋi la loo kuu, ba kpɔ nɔɔra dawɛ nyu dɛ kaa dem.

⁴⁹ Kɛ nɛra baa jemɔ kɛrɛdɛ la ne haahna baa teŋɛ o nɛɛ dɛ le Galilia harɛ la te ta cheɡɛ bojaŋ dɛɛ nyiŋu.

Yeesu huɡa wa

⁵⁰ Dɛ baa bɛl sɔne Josef, o ɛ Juu te dɛ le Arimatea. Dɛ o ja nomonome baa bol Yeesu waa la nɛ, dɛ o dɛ ɔmɛ Korowii dɛ ɛ nɛndɛɛɡe,

⁵¹ dɛɛ kpa saŋ la Korowii aa di Kora dɛ́ lɛɛ ba la. O te fe ta sɛɛh teŋɛ ba nɛɛ kɛ bá kpo Yeesu.

⁵² Gɛ baa la la Paelet be dɛ ka soŋe Yeesu lale,

⁵³ dɛ lao kpɔ le daɡaɡre la ta, dɛ kpɔ yapoŋ baaɡo dɛ kpɔɔ ka bil bwebɔɔ baa komɔ kɛŋɔ dea bini. Dɛ ba ta lale kpɔe do o bini bwa.

⁵⁴ Dɛ awola ɛ Fiara, asɛ baa kpɔ ba te dɛ́ di Ona Tɔpere la.

⁵⁵ Haahna baa teŋɛ Yeesu nɛɛ le Galilia harɛ la, la bwebɔɔ la ta, dɛ ka na bela ne ɡɛ baa kpɔ lale la bil bɔɔ la bini.

⁵⁶ Asɛ ba berɛ kaa dem, dɛ ka ɛ kwaane a sɔɔh aa soma dɛɛ ba kpɔe ka ɛ lale la. Ona Tɔpere la, ba onɔ ɡɛ Mmara la aa baɡla la.