Amanesoma Luk Aa Chwera Tɔn 22 - mzwDBL

Yeesu kpoe vɔrɔwa wa

¹ Aa ka tama ba tɔpejen baa dɛ yerɔ Galekaa baa kpɔ Paanoo Iisi Aa Wola Toole a ta dɛɛ diu la tel la,

² dɛ Sɔfonomonome ne Tɔnjerema la dɛ nyin ŋwɛnɛ bɛl dɛ́ che o ta kpo Yeesu, kɛ dɛ ba dɛ ɔmɛ bela tena la.

Judas sɛoh kɛ wɛɛ le Yeesuu tɛ

³ Belaa Bɔnsam ba so Judas baa dɛ yerɔ Eskareɔt la nɛ. Dɛ o ɛ Yeesu habɔteŋra fi dɛ banɛ la bɛl.

⁴ O la Sɔfonomonome ne nɛra baa dɛ daah Korowii Dea bela la nomonome be, o ne ba ka vɔrɔwe ɡɛ waa dɛ ba ɛɛ dɛ́ le Yeesu tɛɛ ba.

⁵ Ba sie lɛo taeh, ba baɡɔ nyoa ŋɔ dɛ o wono ɡel ba dɔɔ waa, baa tɛo suuɡaa.

⁶ O sɛh dɛɛ nyin saŋ waa wera nɛnlaa la aa wola Yeesu be do ásɛ o leo tɛɛ ba.

Yeesu ne o habɔteŋra Galekaa dii

⁷ Paanoo Iisi Aa Wola Toole a ta tɔpere la ba yon dɛɛ kpoo Galekaa pebiiri aa tela la,

⁸ Yeesu tomɛ Pita ne Jɔn dɛ ŋɔ ba be ŋɔ, “Hé kaa dɛ́ ka ɛ Galekaa kondikwaa ásɛ ya ba di.”

⁹ Anee ba bɔɔro ŋɔ, “Leperaa hɛɛ nyin kɛŋɔ ya ɛa cheɡ ɔ?”

¹⁰ O ŋɔ ba be ŋɔ, “Haa dɛɛ jo bwɛjen la ta la, hɛɛ nao kɛŋɔ baa bɛl cheɡɛ vii ne ne. Hé teŋɛ o nɛɛ kaa dem waa dɛ kaa o ta la ta,

¹¹ ásɛ dɛ ka ŋɔ dem te la be ŋɔ, ‘Ya nomoa ŋɔ dea haa dɛ ba kpɔe tɛ o ne o habɔteŋra ásɛ ba ba so o bini dɛ́ di Galekaa kondikwaa la sɛ?’

¹² Wɛɛ baɡle heyaa abrɔsane doa dea bɛl waa kwaa o bini dɛ kpɔ kane ne teeburre cheɡ bela. Belaa hɛɛ ba kwaa la ɛɛ cheɡ.”

¹³ Pita ne Jɔn laŋɔ dɛ ka na wobɛlbwa ɡɛ tenten Yeesu aa ŋɔ ba be la, asɛ ba ɛ kondikwaa la cheɡ bela.

Kondikwaa baa dia dɛ kpɔ dɛɛ lii Yeesu

¹⁴ Bɔr aa maɡra kɛŋɔ bá di Galekaa kondikwaa la, Yeesu ne o toroma la kaa so dɛɛ ba kwaa dii.

¹⁵ Belaa Yeesu ŋɔ o habɔteŋra la be ŋɔ, “A ɡɛ Galekaa kondikwaa nɔ waa fa lɔ n bambile bini wubwa, asɛ mɛɛ nyin kɛ n ne he dia mɔɔ ba ɛɛ mɛ hɔhɔrɔwa.

¹⁶ N ɡelɔ hɛɛ no kɛŋɔ maa a ɡɛ kondikwaa nɔ anee di kpa, nemenɛ waa Galekaa nɔ aa cheɡa tɛ la aa ɛa Korowii Kora la ta.”

¹⁷ Belaa Yeesu kpɔ numol ne sen dɛ jam Korowii dɛ kpɔ tɛ o habɔteŋra la ŋɔ, “Hé nyɔ ka tɛ dɔŋa.”

¹⁸ Waa ŋɔ ɡɛ la, o ŋɔ ba be ŋɔ, “Fini habɔɔ, maa sen nɔ anee nyɔ kpa ka tel ɡɛ saŋ Korowii aa ba di kora.”

¹⁹ Asɛ o berɛ kpɔ paanoo dɛ jam Korowii o wa, asɛ dɛ mɔne tɛɛ ba, dɛ ŋɔ, “Anɔ cheɡɔ tɛ n bo-ol maa kpɔa dɛ tɛ heya. Hɛ́ɛ ɛ ɡɛ dɛ́ kpɔ dɛɛ lii mɛ.”

²⁰ Gɛ tentenee baa di kwaa la tonɛ la, o kpɔ numol ne sen la tɛɛ ba dɛ ŋɔ, “Sen nɔɔ cheɡa tɛ n chal maa dɛ ba he waa koeh dɛ fuɡe ta. Aa ɛ fɔofalee dɛ́ chɔ Korowii ne nɛwɛnyini baah ta.”

²¹ O berɔ ŋɔ ba be ŋɔ, “Hé no! Naate waa lee mɛ tɛ la lɔ bonɔ n ne o pɛ nɔn dɛɛ di kwa.

²² Gɛ Korowii aa baɡla la taa aa ba cheɡa Men Nɛn Bie la sewɛ, kɛ naate waa lee mɛ tɛ ba kpo mɛ la, ó bwɛɛlɛ.”

²³ Ate, dɛ ba dɛ bɔɔ dɔŋa ŋɔ, “Ya bini umee su baah dɛɛ ba ó ɛ ɡɛ waa nɔ nɔɔ?”

Nɛnjen ɛɛ webeɡra

²⁴ Webeɡra berɔ ba chole o habɔteŋra la baah ta kɛ ba bini umee ɛ ba bwa nomoa ɔ?

²⁵ Anee Yeesu ŋɔ ba be ŋɔ, “Nɛra baa wola Juu tena ɛɛ la, ba koranaree yon dɛɛ nyin kɛŋɔ baa di kpeɡri ba nɛra nɛ, ba nomonjena ɡee nyin baa yer ba nomonjena.

²⁶ He te ne ɡɛ waa la jaŋne. He bini nomoa la, ó ɛ o te kɛ bechala, ásɛ onɔ la waa dɛɛ nyiŋi he nɛɛ la ɡe ɛ o te kɛŋɔ nɛn waa dɛ di somanjiri.

²⁷ Nɛn waa soɡa o dɔŋ ɛɛ bɔne kwaa ne naate waa dɛ bɔne kwa, ba bini umee ɛ nomoa ɔ? Naate waa soɡa la laa aa? Kɛ n te aa lɔ he bini nɔ, n ɛ n te kɛ maa dɛ di somanjiri.

²⁸ Heyaa ja n nɛɛ n wahala bwa bini.

²⁹ Anomanta, n dɛ tɛ heyaa kora hé di, ɡɛ n Mɛɛ aa tɛ mɛ la.

³⁰ N ne hɛɛ pɛ nɔnee di kwaa n kora ta, ásɛ he so kookane ta dɛ bol Israel deene fi dɛ anɛ la bwa waa dɛ́ pa ba bole.”

Pita tɔɔh ŋɔ waa Yeesu jemɛ

³¹ Yeesu berɔ ŋɔ, “Seemɔn, no! Bɔnsam soŋe Korowii ŋwɛnɛ dɛ́ daah heyaa na, kɛŋɔ haah yon palɛ mea dɛ laa a haahra kpɔ a ta la ken.

³² Kɛ n soŋe Korowii tɛɛ ásɛ he yarada nyoa bɛ sɔɔh. Dɛ he berɔ berɛ he liire ba n be naa, hé lawɛ he bala la bá do wɔrɔbe.”

³³ Anee Pita chaŋo ŋɔ, “N Dɔɔ, n cheɡɔ kɛ bá do n ne hen dea. Seo kwaraa yaa, n ne hɛɛ sewɔɔ.”

³⁴ Belaa Yeesu ŋɔ, “Ai, Pita! Jabal loɡle ne sii fini dɛ he tɔɔh kera atoro ŋɔ haa men jemɛ.”

³⁵ Asɛ Yeesu bɔɔ o habɔteŋra la ŋɔ, “N fa aa tomɛ heyaa ŋɔ hé ka bol Amanesoma la, dɛ ŋɔ he bɛ suuɡa kpɔ, he bɛ pure ne naŋɡawa kpɔ la, komɛl nya heya aa?” Asɛ ba ŋɔ, “Komɛlbwa sese ta yaa nyae.”

³⁶ Anee Yeesu ŋɔ, “Name te nomɛlbwa waa dɔ suuɡa kɛɛ bone la, ó kpɔ, ásɛ nomɛlbwa waa wola dɔmkon dɔe la ɡe yoɡ o yal dɛ́ kpɔ yawɛ bɛl.

³⁷ Ba chwerɛ Korowii Tɔn bini ŋɔ, ‘Ba kuro ja wechɔɡ-ɛɛra nɛ.’ N waa baa chwera la bwa dɛ ba chiɡa taraken.”

³⁸ Belaa o habɔteŋra la ŋɔ, “Ya Dɔɔ, tokobie anɛɛ la.” Anee Yeesu ŋɔ, “A maɡrɔ.”

Yeesu la Ɔlevere Bwejen ta ka soŋe Korowii

³⁹ Yeesu le bwɛɛ la ta dɛ kaa Ɔlevere Bwejen la ta, ɡɛ o yon dɛɛ ɛ la, asɛ o habɔteŋra la teŋɛ o nɛɛ kaa.

⁴⁰ Baa tel bela la, o ŋɔ ba be ŋɔ, “Hɛ́ɛ soŋe Korowii ásɛ Bɔnsam bɛ won neɡre heya.”

⁴¹ Waa ŋɔ ɡɛ la, o le ba jwɛɛh dɛ kaa sie tama, dɛ ka ɡuŋi dɛɛ soŋe Korowii,

⁴² dɛ ŋɔ, “N Mɛɛ, hɛɛ sɛoh waa, bɛ ɡel n na a ɡɛ wahala haa ŋɔa ń na nɔ. Kɛ ɛ he tetoora dɛ́ ɡel n tetoora.”

⁴³ Asɛ nyundua torome den ba o be dɛ ba doo ɡbemba.

⁴⁴ O tea bini aa chɔɡa kohona la, o soŋe Korowii siswɛm ne, asɛ bɔwɔb le o nɛɛ dɛ kor dɛɛ lee kɛŋɔ chal ken.

⁴⁵ Waa soŋe Korowii tonɛ dɛ berɛ la o habɔteŋra la be la, lokua kohona nomanta, dɛ ba chɔɔɡe doromi.

⁴⁶ Anee o ŋɔ ba be ŋɔ, “Ɛrɛɛ he chɔɔɡe nɔɔ? Hé ir dɛ́ soŋe Korowii ásɛ Bɔnsam bɛ won neɡre heya.”

Yeesu lawa wa

⁴⁷ Yeesu nyoa ta aa lɔ waa ta wɛɛ bol la, dɛ Judas waa ɛ o habɔteŋra la bini bɛl kaa tɔ nɛnlaa bane sie, dɛ ba ba ne Yeesu be dɛ́ fe ɡbaaro pɛl o bambile dɛ́ mo o lwɛɛma.

⁴⁸ Anee Yeesu ŋɔ o be ŋɔ, “Lwɛɛma moe nee hɛɛ ba Men Nɛn Bie la lee dɛ́ tɛ aa?”

⁴⁹ O habɔteŋra o ne baa lɔ bela la aa na waa aa dɛ ba bala la, ba ŋɔ o be ŋɔ, “Nomoa, yá kpɔ ya tokobie nɔ ya ne ba yo aa?”

⁵⁰ Asɛ ba bini bɛl kpɔ o kere dɛ ŋwɛnɛ Sɔfonomoa la bonɔɔ diɡ deŋne dɛ laa cha.

⁵¹ Anee Yeesu ŋɔ, “Hé ɡel,” dɛ kpɔ nɔn ka leɡe bonɔɔ la deŋne la, buɡ la ta, dɛ chaoh.

⁵² Belaa Yeesu bɔɔ Sɔfonomonome, ne nɛra baa dɛ daah Korowii Dea nomoa, ne ba bwɛɛ nomonome baa bala dɛ́ ba lawɔ la ŋɔ, “Ŋwɛɛree men he kpoŋe tokobie ne ɡule dɛ ba laɡ mɛ naa?

⁵³ N ne haa lɔ Korowii Dea tɔpere bɛlbwa la, ɛrɛɛ haa wola men lawɛ bela ɔ? Taraken nɔ bɔr aa bira nɔ he dɔ ŋwɛnɛ kɛ he ba laɡ mɛ.”

Pita tɔɔh ŋɔ waa Yeesu jemɛ

⁵⁴ Ba lawɛ Yeesu dɛ kpɔɔ dɛɛ kaa Sɔfonomoa dem, dɛ Pita ne ba baah tɛrɔ, asɛ o teŋɛ ba nɛ.

⁵⁵ Dɛ ba mar nii dem baah bela, asɛ Pita ka pu ɡɛ nɛra la so a jwɛh.

⁵⁶ Pita aa soɡe nii la jwɛɛh la, Sɔfonomoa la tolo bɛl nao, dɛ nyiŋu jeiih ken, dɛ ŋɔ, “Yeesu habɔteŋree baa nɔ.”

⁵⁷ Anee Pita tɔh pelepele ken dɛ ŋɔ tolo la be ŋɔ, “Maa on jemɛ kwara!”

⁵⁸ Aa bera la sie tama ken la, baa bɛl na Pita dɛ ŋɔ o be ŋɔ, “Ba bini bɛlee he ɡba!” Anee o ŋɔ, “Akai, n ta ba nɛɛ jae!”

⁵⁹ A habɔɔ dɛ ɛ dɔŋhwere beŋkpoŋ la, baa bɛl ɡe berɔ dalwe Pita jae waa ja Yeesu nɛɛ la ta ja, dɛ ŋɔ, “Galilia tee baa nɔ, anomanta, tɔŋla bɛlbwa toole kɛŋɔ o ta Yeesu nɛɛ jae!”

⁶⁰ Belaa Pita ŋɔ baa la be ŋɔ, “Maa waa haa dɛ bol nɔ bini jemɛ!” O nyoa ta aa lɔ waa la ta wɛɛ bol la jabal den si.

⁶¹ Asɛ Yeesu ke nyiŋi Pita siwi ta, asɛ o lii waa Yeesu fa aa ŋɔ o be ŋɔ jabal loɡle ne sii dɛ o tɔɔh kera atoro ŋɔ waa on jemɛ la.

⁶² Ate, Pita le buse dɛ ka wi kɛrɛdɛ.

Ba muɡli Yeesu baah dɛ lɔɔro

⁶³ Nɛra baa lawɛ Yeesu la muɡli o baah dɛ lɔɔro.

⁶⁴ Ba kpɔ kon vɔwɛ o sie dɛɛ tɔɔ kande dɛ ŋɔ, “Dɛɛ jemɛ, umee lɔe nɔɔ?”

⁶⁵ Dɛ boloo nɛnhɛlwaa kohona.

Ba la Yeesu ne Juu tena nomonome sie

⁶⁶ Tɔ aa pera la, ba kpɔ Yeesu ka cheme Juu tena nomonome baa dɛ bol waa dɛɛ pa bole ne Sɔfonomonome ne Tɔnjerema sie,

⁶⁷ dɛ ŋɔ o be ŋɔ, “Dɛ henee Kristo Korowii aa baɡɛ nyoa ŋɔ wɛɛ tomɔɔ ó ba lɛ yaa la aa, bol ya no!” Anee o ŋɔ ba be ŋɔ, “Dɛ n ŋɔ he be ɡɛ noo, haa men yarada,

⁶⁸ n berɔ bɔɔ heyaa waane ɡe oo, haa men chaŋe.

⁶⁹ Le taraken dɛɛ kaa la, Men Nɛn Bie la ɛɛ so Korowii Waa Ɛ Kpeɡnɛn diɡ taa.”

⁷⁰ Asɛ ba bwa ŋɔ, “Amɔ he ɛ Korowii Bie kɛɛ?” Anee Yeesu ŋɔ, “Anee he bol la.”

⁷¹ Belaa ba ŋɔ, “Amɔ o ɡbaɡba aa bola nɔ, danseɛ besoo yá berɛ dɛɛ nyin jaɔ?”