Amanesoma Luk Aa Chwera Tɔn 20 - mzwDBL

Ba pɛɛ Yeesu kpeɡri waa dɔa

¹ Awola bɛl, dɛ Yeesu lɔ Korowii Dea dɛɛ baɡle nɛra wa, dɛɛ bol Amanesoma la, asɛ Sɔfonomonome ne Tɔnjerema ne bela nomonome la ba o be,

² dɛ ba bɔɔro ŋɔ, “Umee tɛɛ ŋwɛnɛ ŋɔ hé ɛ ɡɛ waa nɔ haa dɛ ɛ nɔɔ? Umee tɛɛ kpeɡri kwaraa te nɔ?”

³ Anee Yeesu ŋɔ ba be ŋɔ, “Hé ɡel n bɔɔ heyaa webeŋkpoŋ. Hé baɡ mɛ,

⁴ Jɔn kpeɡri waa dɔa dɛ kpɔ dɛɛ sɔ nɛra nee la, Korowiirii tɛo waa, kɛ nɛnee?”

⁵ Waa bɔɔ ba ɡɛ la, dɛ ba ɡbo dɛ tɔŋle dɔŋa ŋɔ, “Ɛrɛɛ yaa ba ŋɔe yɔ? Dɛ ya ŋɔ a le Korowii be naa, wɛɛ bɔɔ yaa waa aa bala ya ta Jɔn yaradae.

⁶ Dɛ ya berɔ ŋɔ nɛn bee a le ɡe aa, nɛra nɔ baa lɔ bonɔ nɔ bwa ɛɛ foɡre yaa bwea dɛ́ kpoo yaa, dɛkalkɛŋɔ ba te bwa jemɔ kɛŋɔ Jɔn fa ɛ Korowii keame.”

⁷ Anee ba ŋɔ, “Yaa jemɛ bela kpeɡri la aa lea.”

⁸ Asɛ Yeesu ŋɔ, “N ɡe aa kpeɡri maa dɔa dɛ kpɔ dɛɛ ɛ waa nɔ leebɔree baɡle he be.”

Nɛra baa dɛ daah koo sɛɡla

⁹ Yeesu kpɔ sɛɡla bol waa baɡle nɛra la, dɛ ŋɔ, “Baa bɛlee fa lole dɛɛ parɛ daa ane baa kpɔ a nɔna dɛɛ daa sen. O kpɔ nɛra baa ɛ koo la toma, a koma telaa, ba dɔ ba bɔr. A habɔɔ la, o kpɔ koo la tɛɛ ba bá nyiŋi o ta dɛɛ tɛo, dɛ kaa harɛ bɛl ta, dɛ ka biɡri.

¹⁰ Kwaa la koma saŋ aa baa tel la, o tomɛ o bonɔɔ bɛl ŋɔ ó ka lɛ o dibɔr ba tɛo. Belaa nɛra la lɔɔ bonɔɔ la dɛ doŋu, ba ta on komɛlbwa tɛɛ o kaa.

¹¹ Belaa koo te la berɛ tomɛ bonɔn-nɛɛte, asɛ ba lɔɔ o ɡe dɛ ɛo wilewile ken, dɛ doŋu o kaa, ba ta on komɛlbwa tɛɛ.

¹² Anee koo te la berɛ tomɛ o bonɔn-tooro te ja, asɛ nɛra la do o ɡe bol, dɛ kpɔɔ ta koo la baŋ.

¹³ Belaa koo te la ŋɔ, ‘Ɛrɛɛ ń ɛ jaɔ? Mɛɛ tomɛ n bibeŋkpoŋ maa dɛ nyin o waa nɔɔ. O te ba nao baa heehroo!’

¹⁴ Nɛra la aa na o bie la, ba den ŋɔ, ‘Yoowa, baa la ɡbaɡba bie la. O mɛɛ toole naa, on dɛɛ ba o kpanjoɡo dii. Hé ɡel ya kpoo, ásɛ dɛ o mɛɛ baa sewaa, dɛ kwaa la ɛ ya kwa.’

¹⁵ Anee ba lawɛ bie la dɛ kpoo dɛ kpɔɔ viɡri koo la baŋ.” Asɛ Yeesu bɔɔ ba ŋɔ, “Ɛrɛɛ hɛɛ lii kɛŋɔ a ɡɛ koote nɔ ɛɛ ɛɔ wɔ?

¹⁶ Wɛɛ ba kpoo a ɡɛ nɛra laanee, dɛ́ kpɔ koo la do nɛnfala nɔn ta.” Nɛra la aa no ɡɛ la, ba ŋɔ, “Korowii ɛɛ la a ne bojaŋ!”

¹⁷ Yeesu nyiŋ ba dɛ bɔɔ ba ŋɔ, “Amɔ ɛrɛ tenee hɛɛ no Korowii Tɔn bini waa mun ɔ? ‘Bwe la mamaala aa vɛoh dɛ liiru konsala laanee bera ba lawɛ dea la kpoŋe la.’

¹⁸ Nomɛlbwa waa chole Bwe la waa lawɛ dea la kpoŋe la ta la, wɛɛ kuuɡuu. O berɔ le ba le nomɛlbwa nɛɛ ɡe aa, wɛɛ pweremoo.”

Toɔ bɔe wepɛɛre

¹⁹ Dɛ Tɔnjerema la ne Sɔfonomonome la siwi swɛɛrɔ kɛŋɔ baa lawɔɔ buɡ la ta, dɛkalkɛŋɔ dɛ ba jemɔ ŋɔ banee o sɛɡle. Kɛ dɛ ba dɛ ɔmɛ nɛnlaa la.

²⁰ Anomanta, ba sie lɔ o nɛɛ baa kpaahno dɛ dɔɔ. Ba tɛ nɛra bane suuɡa, dɛ tom ba ŋɔ bá ka haɡre Yeesu bela webɔɔre ne, a do kɛŋɔ siswɛm waa baa bɔɔ, ásɛ dɛ dɔɔ lawɛ, dɛ́ kpɔɔ do Rom nomoa waa dɛ di ba harɛ la kpeɡri nɔn ta.

²¹ A ɡɛ nɛra la ba Yeesu be dɛ ba ŋɔ o be ŋɔ, “Nomoa, ya jemɔ kɛŋɔ he dɛ bol kasinteŋ. Haa nɛra sie nyiŋe mɔɔ dɛɛ bol wa. Korowii ŋwɛnɛɛ hɛɛ baɡle nɛra kasinteŋ ne, ásɛ ya won jemɛ ɡɛ waa dɛ nyin kɛŋɔ ya ɛ.

²² Webeŋkpoŋii yaa nyin kɛŋɔ ya jemɛ. Onee kɛŋɔ ya mmarare dɛ tɛ yaa ŋwɛnɛ kɛ ya bɔ toɔ dɛɛ tɛ Rom Koojen Siisa kɛɛ ya bɛ dɛɛ bɔɔ?”

²³ Dɛ Yeesu jemɛ ba webɔɔre la mun, dɛ ŋɔ,

²⁴ “Hé kpɔ suuɡa bwe ba n na.” Anee ba kpɔ bɛl ba, asɛ o bɔɔ ba ŋɔ, “Ume nyu ne o sɔnee dawɛ o ta nɔ?”

²⁵ Asɛ ba chaŋe ŋɔ, “Koojen Siisaa.” Anee Yeesu ŋɔ ba be ŋɔ, “Oo. Amɔ hé kpɔ kwaa aa ɛ Koojen Siisa kwaa tɛo, dɛ́ kpɔ kwaa aa ɛ Korowii kwaa la tɛ Korowii.”

²⁶ Ba ta wone dɔ wobɛlbwa dɛ che a ta lawɔ nɛra siwi ta, asɛ ba nyoa kpo ba che surumm ken.

Seo ta ira wepɛɛre

²⁷ Belaa Saduki tena bane ba Yeesu be. Dɛ baa yarada kɛŋɔ nɛn sewaa, wɛɛ berɔɔ ir ja.

²⁸ Ba baa bɔɔ Yeesu ŋɔ, “Nomoa, Mosis fa chwerɛ Mmara bɛl tɛ yaa ŋɔ, dɛ baa sewɔ ɡel o haah dɛ ba ta bii dɔe yaa, a chɛ kɛŋɔ o nime kɛɛ o dɔɔ kpɔ haah la mo dɛ́ loɡle bii, ásɛ a ɡɛ bii la ɛ lale la bii.

²⁹ Hahbeŋkpoŋ bibaala banuanɛɛ fa lole, asɛ binomoa la mo haah dɛ sewɛ, dɛ o ta bie dɔe.

³⁰ Asɛ onɔ la waa teŋɛ binomoa la nɛɛ la kpɔ haah la mo dɛ ba sewɛ, dɛ o ɡe ne o ta bie lolɛ.

³¹ Asɛ bitoorote la ɡe mo haah la dɛ sewɛ, dɛ o ta bie dɔe. Gɛ tentenee ba bwa mo haah la ka lɔ nyoa ta dɛ ba serewe, dɛ ba ta bii dɔe.

³² A habɔɔ la, haah la ɡe baa sewɛ.

³³ Aah taraken dɛ nɛra bwa seo ta ira tɔpere la baa tel asɛ bibaala la bwa ir aa, ba bini umee dɛɛ ba haah la jaa ɛɛ yɔ?”

³⁴ Anee Yeesu chaŋ ba ŋɔ, “Fini nɔɔ baala ne haahna ɛɛ mo dɔŋa nɔ,

³⁵ kɛ nɛra baa dɛ ba seo ta ira dɛ won dɔ bɔr ja Korowii Kora la ta la te aa haahna moe ba, baa jaranar ɡe yala ba.

³⁶ Baa sewɛ kpa bwa. Baa doo kɛŋɔ nyundua toroma, dɛ ɛ Korowii bii, dɛkalkɛŋɔ ba iro le seo ta.

³⁷ Mosis ɡba fa bol seo ta ira nɔ waa kaih ken. Hé nyiŋi bela waa chwerɛ dawii fuih wa, dɛ bol Korowii waa ŋɔ onee Korowii Abraham ne Aesek dɛ Jekɔb aa tomɔ la.

³⁸ Lala laa dɛɛ tomɛ Korowii, weeraa dɛɛ tomɔ. Korowii te be, nomɛlbwa ɛ wee.”

³⁹ Asɛ Tɔnjerema la bane ŋɔ, “Nomoa, he bola aŋwɛnɛ ta!”

⁴⁰ Ba ta wone bɔɔro wobɛlbwa kpa.

Kristo la wepɛɛre

⁴¹ Yeesu bɔɔ ba ŋɔ, “Ɛrɛ waa ba ŋɔ Devid naa dɛ ɛ Kristo la nɔɔ?

⁴² Aah Devid ɡbabir bol waa Korowii Yela Tɔn la bobɛl ŋɔ, ‘N Naa Korowii ŋɔ n Dɔɔ be ŋɔ so nomombɔr n diɡ ta

⁴³ ka tel kɛŋɔ maa ba he dɔma ne harɛ ásɛ he tiɡri ba nɛ.’

⁴⁴ Devid fa aa dɛ yerɔ o Dɔɔ nɔ, aah dɛ ɛrɛɛ Kristo la berɛ ɛ dɛ ɛ Devid naa ɔ?”

Gɛ Yeesu aa ja nɛra Tɔnjerema we-ɛɛla ta

⁴⁵ Yeesu cheɡɛ nɛra la bwa siwi ta dɛ ŋɔ o habɔteŋra la be ŋɔ,

⁴⁶ “Hɛ́ɛ nyiŋi Tɔnjerema la kɛrɛdɛ. Ban yon do laalajena ásɛ nɛra bwa na ba dɛɛ ɡuŋ ba harɛ yawa ta la. Ba dɛ nyin nomombɔra soɡa cheremi deene ne bela nɛra aa chema dɛɛ di tɔpejena.

⁴⁷ Ba sie beɡre kwa, dɛ yon kpɔ Korowii soŋa wobojaŋa ne tɔ sie dɛɛ kam kwaa luhaahna deremi. Korowii ɛɛ tɛr ba deŋnee taeh.”