Amanesoma Luk Aa Chwera Tɔn 2 - mzwDBL

Yeesu Kristo lola wa

¹ A ɡɛ saŋ la Rom Koojen bɛl baa dɛ yerɔ Ɔɡɛstas la do mmara ŋɔ bá kure nɛra baa lɔ harɛ bobɛlbwa.

² A ɡɛ nɛra kura nɔɔ tɔ sie. Dɛ Kwiriniosii dɛɛ nyiŋi Siiria harɛ ta a ɡɛ saŋ.

³ Anomanta, dɛ nomɛlbwa dɛ kaa o bwɛɛ dɛ́ ka chwerɛ o sɔn.

⁴ Anee Josef le Nasarɛt waa lɔ Galilia harɛ ta la, dɛ chiɡ ŋwɛnɛ ta kaa Bɛtlɛham waa ɛ Devid bwɛɛ dɛ do Juda harɛ ta la, dɛ ka chwerɛ o sɔn, dɛkalkɛŋɔ belaa ɛ o naa Devid bwɛ.

⁵ Josef ne Mɛɛre ba bwa nɛra aa sɛah ŋɔ bá so la bwaa la Bɛtlɛham sɔna chwera la ta. Dɛ Mɛɛre kpoŋe tea ɡɛ saŋ.

⁶ Baa lɔ bela la, lol lɔɔ,

⁷ asɛ o lolɛ o binyoa, o ɛ bibaa. O kpɔ yal fɔrɔwo dɛ kpɔɔ bil kon jaɡre aa dɛ di kwaa o bini la bini, dɛkalkɛŋɔ dɛ bɔr toole bela hɔɔhra aa dɛ chɔ bwɛɛ la ta la kwara bá chɔ.

Peteɡra ne nyundua toroma wa

⁸ A ɡɛ saŋ la, dɛ peteɡra bane teɡɛ ba peera kaa dibɔr, asɛ bɔr jo, asɛ ba chɔ bela dɛɛ daah ba peera la.

⁹ Belaa Korowii nyundua torome bɛl forɛ le ba nɛ, asɛ Korowii jirima chaah bela. Ɔmee laɡ ba taeh.

¹⁰ Anee nyundua torome la ŋɔ ba be ŋɔ, “Hɛ́ɛ berɛ ɔma! Amanesoma aa dɛ ba silɛɛ ne bala ba tɛ nɛra bwa la nee n ba.

¹¹ Jwaana nɔ ne, ba lolɛ he Lɛɛ. He Dɔɔ Kristo Korowii aa baɡɛ nyoa ŋɔ wɛɛ tomɔɔ ó ba lɛ heyaa laanee ba lole Devid bwɛɛ la.

¹² Waa haa che a ta jemɔ laanee nɔ. Hɛɛ na bie laanee kɛŋɔ baa kpɔ yal fɔrɔwo o chɔ kon jaɡre aa dɛ di kwaa o bini la bini.”

¹³ Buɡ la ta, dɛ Korowii dɔm bane baa wara denɔ ba ja onɔ la nɛ, dɛ ɡo yela dɛɛ kpɛɛ Korowii, dɛɛ ŋɔ,

¹⁴ “Hé tɛ Korowii waa lɔ nyundua la sɔn, ásɛ dɛ ɡel nɛwɛnyina baa lɔ harɛ ta Korowii siwi aa su ba la ɡe dɔ bosɔɔhna.”

¹⁵ Nyundua toroma la aa le peteɡra la be dɛ kaa nyundua la, ba ŋɔ dɔŋa be ŋɔ, “Hé ɡel ya la Bɛtlɛham dɛ́ ka na waa aa chiɡ bela, asɛ N Naa Korowii che nyundua toroma nɔ nɛɛ dɛ ba bol ya be nɔ.”

¹⁶ Ba chiɡ ŋwɛnɛ ta dɛ la bela warane, dɛ ka na Mɛɛre ne Josef, dɛ na bie la ɡe kɛ waa chɔ kon jaɡre aa dɛ di kwaa o bini la bini.

¹⁷ Belaa peteɡra la aa na bie la la, ba bol nɛra baa cheme bela la be ɡɛ nyundua torome la aa baa bol bie la waa ba be la.

¹⁸ Nɛra baa cheme bela aa no waa nɔ la, ba bwa nyoa kpo waa peteɡra la aa bola la ta.

¹⁹ Asɛ Mɛɛre kpɔ waa la bwa do o nyu bini dɛɛ kari.

²⁰ Peteɡra la berɔ dɛɛ kaa. Gɛ nyundua torome la aa bol ba be la tentenee ba ka na. Anomanta, ba ɡo yela dɛɛ kpɛɛ Korowii.

Yeesu lolanar kpɔɔ la Korowii Dea

²¹ Bie la aa dɔ yawanyoa la, ba teŋe o pen, dɛ pa o sɔn Yeesu, ɡɛ tenten nyundua torome la aa ŋɔa mɔɔ o nya kpoŋe o tea la.

²² Tɔpere aa tela kɛŋɔ Mɛɛre sɔ o lola doŋa ta ɡɛ Mosis Mmara la aa baɡla la, o ne Josef kpɔ ba bie Yeesu ja ba nɛɛ dɛ la Korowii Dea Jerusalam dɛ kpɔɔ ka baɡle Korowii,

²³ ɡɛ Mmara la aa baɡla kɛ bibanloɡle bɛlbwa chɛ kɛ bá kpɔɔ tɛ Korowii la.

²⁴ Ba laŋɔ asɛ dɛ ka ɛ saraha tɛ Korowii ɡɛ Mmara la aa baɡla ŋɔ bá kpɔ borɔnomare anɛ, kɛɛ kulukukure anɛ la Korowii Dea dɛ́ ka jaamo la.

²⁵ A ɡɛ saŋ la dɛ baa bɛl lɔ Jerusalam baa yerɔ Simeon. O ɛ nɛndɛɛɡe, dɛɛ ɔmɛ Korowii, dɛ o dɛ nyiŋi naate waa dɛ ba ó ba lɛ Israel tena ŋwɛnɛ. Dɛ Korowii Domadɛɛɡe ir o nɛ,

²⁶ dɛ ɡel o jemɛ kɛŋɔ o siwi ɛɛ na Kristo la Korowii aa baɡɛ nyoa ŋɔ wɛɛ tomɔɔ ó ba lɛ Israel tena la mɔɔ dɛ́ sewɛ.

²⁷ Awola tɔpere la, Korowii Domadɛɛɡe la kpɔ Simeon kaa Korowii Dea, asɛ Josef ne Mɛɛre ɡe kpɔ Yeesu la bela, ásɛ ba ɛo ba we-ɛɛla ɡɛ Mmara la aa baɡla la.

²⁸ Baa joa la, Simeon kaa kpɔ Yeesu pɛl o bambile dɛ jam Korowii dɛ kpɛɛro, dɛ ŋɔ,

²⁹ “N Naa Korowii, he teŋɛ he nyobaɡa ta, name te hɛɛ wonoo ɡel men maa ɛ he bonɔɔ sewɛ sɔnɔnɔɔ,

³⁰ dɛkalkɛŋɔ n siwi na ya Lɛɛ,

³¹ haa leo tɛ yaa ŋɔ nɛra bwa nao la.

³² On dɛɛ ba he waa kpɔe dɛ́ baɡle nɛra baa wola Juu tena ɛɛ, ásɛ he nɛra Israel tena dɔ jirima la.”

³³ Gɛ Simeon aa bol Yeesu waa la kpo Yeesu nya ne o mɛɛ nyoa.

³⁴ Simeon soŋe andɛɛɡa tɛ Yeesu nya ne o mɛɛ, dɛ ŋɔ o nya be ŋɔ, “Hé no waa nɔ! Bie nɔ cheɡɔ tɛ Israel tena bane kwaara ne bane chɔɡa. Wɛɛ berɔɔ che tɛ Korowii, ásɛ nɛra bol waa yaɡɔ,

³⁵ ásɛ nomɛlbwa bambile bini waa chɔ baŋ. Gɛ baa dɛ ba o ɛɛ la, aa we he nɛɛ kɛŋɔ baa kpɔ kere dɛɛ tɔɡɛ he bambile ken.”

³⁶ A ɡɛ saŋ la, dɛ luhaah bɛl lole dɛ ɛ Korowii keame, baa yerɔ Hana. Dɛ Fanoɛl bihaahnee on, asɛ o le Aasa dea. Dɛ o hwɛɛhrɔ. O yalɔ o toli saŋ, o ne o jaa so bene anuanɛ asɛ o jaa la ba sewɛ.

³⁷ O ta yalɛ kpa, dɛ ba di bene fifraanuatoro dɛ anaarɛ. O ta o Korowii toma kpɔe bil harɛ. Chɔɔ ne jwaana dɛ o lɔ Korowii Dea, dɛ yon dɛɛ vɔwɛ nyoa dɛɛ soŋe Korowii.

³⁸ Buɡ la ta, Yeesu nya ne o mɛɛ aa lɔ Korowii Dea la, Hana ɡe jo bela dɛ ka che ba jwɛh, dɛ kpɔ jam ne kpɛɛra tɛ Korowii, dɛ bol Yeesu waa baɡle nɛra baa soɡa dɛɛ kpa Korowii kɛ ó ba lɛ Jerusalam tena ta la.

³⁹ Josef ne Mɛɛre aa tona ɡɛ Korowii Mmara la aa baɡla la, ba berɔ kaa ba bwɛɛ Nasarɛt waa lɔ Galilia harɛ ta la.

⁴⁰ Yeesu kpeɡo, dɛ do kpeɡri, dɛ dɔ liire, asɛ Korowii chao wɛɛ ɛ wedɛɛɡa.

Yeesu aa lɔ Korowii Dea wa

⁴¹ Bena nyoa bɛlbwaa Yeesu nya ne o mɛɛ la Jerusalam dɛ kaa di ba tɔpejen baa dɛ yerɔ Galekaa la.

⁴² Gɛ saŋ Yeesu aa di bene fi dɛ anɛ la, o ne o nya ne o mɛɛ la Jerusalam dɛ ka di a ɡɛ tɔpere la, ɡɛ ba yon dɛɛ ɛ wubwa la.

⁴³ Baa di tɔpere la tonɛ dɛ berɛ dɛɛ kaa ba bwɛɛ la, Yeesu pere o te le ba nɛ, dɛ ka mun so Jerusalam, dɛ o nya ne mɛɛ ta jemɛ.

⁴⁴ Dɛ ba dɛ lii kɛŋɔ o lɔ nɛra baa pɛa dɛɛ kaa la bini. Anomanta, ba valɔ tɔpebir mɔɔ dɛ ta kaa nyin o bɔr ba lolanar ne ba jerema be.

⁴⁵ Baa nyin o bɔr kahonɛ la, ba berɔ la Jerusalam dɛ kaa ɡaaɡe o bɔr.

⁴⁶ A tɔpetooro wee la, ba kaa nao Korowii Dea, dɛ o ne Juu tena baa dɛ baɡle Korowii waa soɡo, wɛɛ no ba wa, dɛɛ bɔɔ ba wa.

⁴⁷ Nɛra baa lɔ bela dɛɛ no waa la bwa nyoa kpo ɡɛ waa jemɛ waa kohona, ne ɡɛ baa dɛ bɔɔro waa asɛ o won dɛɛ baɡle a bini kɛrɛdɛ la ta.

⁴⁸ O nya ne o mɛɛ aa nao la, ba nyoa kpoo, anee o nya bɔɔro ŋɔ, “N bidɛɛɡe, bɔkwa waa he ɛ yaa ken? N ne he mɛɛ bwa siwi swɛɛrɔ, ya kpɔ sibeɡra dɛɛ ɡaaɡe he bɔr.”

⁴⁹ Belaa o ŋɔ ba be ŋɔ, “Ɛrɛɛ he ɡaaɡe dɛɛ nyin n bɔr nɔɔ? He ta wone jemɛ kɛŋɔ n Mɛɛ Korowii deemii n do kɛɛ?”

⁵⁰ Waa ŋɔ ɡɛ la, ba ta a mun noɛ.

⁵¹ Belaa Yeesu ir ba chiɡ ŋwɛnɛ ta dɛ kaa Nasarɛt. Waa lɔ o nya ne o mɛɛ be la, dɛ o dɛ no ba deŋna wa. O nya kpɔ waa la bwa do o nyu bini dɛɛ kara.

⁵² Dɛ Yeesu dɛ kpeɡ dɛɛ jemɛ wa, asɛ o we-ɛɛla ɛɛ lɛ Korowii ne nɛra sie.