Amanesoma Luk Aa Chwera Tɔn 15 - mzwDBL

Penyoɡre bɛl sɛɡla

¹ Awola bɛl, toɔ lɛɛra baa dɛ bɔ apoo ne wechɔɡ-ɛɛra teŋɔ dɛ ba bar Yeesu cheme dɛ́ no o wa.

² Anee Farisii tena ne Tɔnjerema bane ŋwalɔ dɛ ŋɔ, “Gɛ baa nɔ dɛ lɛ wechɔɡ-ɛɛra o ne ba yon pɛ nɔn dɛɛ di kwa.”

³ Belaa Yeesu sɛɡ ba ŋɔ,

⁴ “He bini umee dɛ dɔ peera lafa, ásɛ beŋkpoŋ nyoɡraa, waa wola o bɔree ɡaaɡe ɔ? Wɛɛ ɡel fifraanuanaarɛ dɛ anuanaarɛ laanee a dibɔr tama, dɛ́ ka ɡaaɡe beŋkpoŋ waa nyoɡra la bɔr ka tel kɛŋɔ waa nao.

⁵ Dɛ naate na a ɡɛ pee nɔ naa, silɛɛ kohona nomanta, wɛɛ kpɔɔ dawɛ vam ba dem.

⁶ O ba dem aa, wɛɛ ŋɔ o daamanar ne nɛra o ne baa soɡa bwa bee ŋɔ, ‘N sie lɛo kohona kɛŋɔ maa na n pee waa nyoɡra nɔ. Anomanta, hé ba yá lɛ ya sie.’

⁷ Kasinteŋ, ɡɛɛ aa ba Korowii doa ɡe doe. Wechɔɡ-ɛɛ beŋkpoŋ charɛ o liire dɛ le o wechɔɡa ta naa, Korowii ne o nyundua toroma sie ɛɛ lɛ o nɛɛ dɛ́ ɡwaa nɛra fifraanuanaarɛ dɛ banuanaarɛ baa dɛ lii kɛ ba ɛ nɛndɛɛɡa baa wola chɛɛ kɛŋɔ ba charɛ ba liire dɛ le ba wechɔɡa ta.

Suuɡa nyoɡre bɛl sɛɡla

⁸ Gɛ laa ɡe aa, haah besoo lole dɛ dɔ suuɡapoŋa fi, asɛ dɛ beŋkpoŋ nyoɡraa, waa wola niinii choŋi dɛ chaa o dea dɛ ɡaaɡe o bɔr sibeɡra ne ka tel kɛŋɔ waa nao wɔ?

⁹ O nao waa, wɛɛ yerɛ o daamanar ne nɛra o ne baa soɡa laanee dɛ ŋɔ, ‘N sie lɛo kohona kɛŋɔ maa na n suuɡapoŋ waa nyoɡra nɔ. Anomanta, hé ba yá lɛ ya sie.’

¹⁰ Kasinteŋ, ɡɛɛ aa ba Korowii doa ɡe doe. Wechɔɡ-ɛɛ beŋkpoŋ charɛ o liire dɛ le o wechɔɡa ta naa, Korowii ne o nyundua toroma sie ɛɛ lɛ o nɛɛ taeh.”

Binyoɡre bɛl sɛɡla

¹¹ Yeesu berɔ sɛɡ ba ŋɔ, “Baa bɛl fa dɔ bibaala banɛ.

¹² O bii la bini ombechala la ŋɔ o be ŋɔ ó bɔne o kpanjoɡo bini, ásɛ dɛ tɛo o bɔr. Asɛ baa la bɔne o kpanjoɡo la bini tɛ o bii la, dɛ kpɔ o bie bechala la bɔr tɛo.

¹³ A ta tɔpere bɛl dii, o bie bechala la yoɡ o te kwaa la bwa, dɛ kpɔ o suuɡa jo pua bojaŋ kaa. Waa laŋa la, o kaa ɛ suuɡa la saɡasaɡa ken.

¹⁴ Waa baa di suuɡa la bwa la, a ta tɔpere bɛl dii, asɛ lɔrjen bɛl chole harɛ la ta bela waa lole la, dɛ o ta suuɡa dɔe, o ta kondikwaa ɡe dɔe dɛ́ di.

¹⁵ Aa do ɡɛ la, o kpɔ o te ka pɛl bela te bɛl, asɛ o ɡel o kaa nyiŋi o parakooni nɛ.

¹⁶ Lɔr la nyoa baa do kpeɡri kohona, asɛ o baa pɛlɛ parakooni la kondikwaa kwaraa ta, kɛ nomɛlbwa ɡe ta on komɛlbwa tɛɛ.

¹⁷ Asɛ o sie aa baa ba harɛ la, o soɡo dɛ lii o mɛɛ waa dɛ ŋɔ, ‘N mɛɛ bonɔɔna kwaraa baa lɔ o sie la di kwaa dɛɛ ka, asɛ n do bonɔ lɔr ɛɛ kpo mɛ la.

¹⁸ Mɛɛ iruu, dɛ́ la n mɛɛ be dɛ́ ka ŋɔ, “N mɛɛ, n ɛ wechɔɡa dɛ jo he ne Korowii bwa nɛ.

¹⁹ N ta chɛɛ kɛŋɔ he yer mɛ he bie kpa. Kɛ n poori, lɛɛ mɛ dɛ́ kpɔ mɛ ɛ he bonɔɔna la bɛl.” ’

²⁰ Bie la aa lii ɡɛ la, o iro chiɡ ŋwɛnɛ ta dɛɛ kaa o mɛɛ be. Waa dɛ kaa o mɛɛ be la, o mɛɛ lɔ dem dɛ nao bojaŋ, asɛ o tea domɔ, o chwa chemo dɛ ka ɡbaaro pɛl o bambile.

²¹ Belaa bie la ŋɔ, ‘N mɛɛ, n jo he ne Korowii nɛ. N ta chɛɛ kɛŋɔ he yer mɛ he bie kpa.’

²² Bie la nyoa ta lee mɔɔ dɛ o mɛɛ yerɛ o bonɔɔna ŋɔ, ‘Hé chwa ka nyiŋi n yale la bwa bini ondɛɛɡe ba tɛo ó tɔ, dɛ́ kpɔ noniseɡdɛɛɡe ba doo, dɛ́ nyin naŋɡawa ba tɛo ó do.

²³ He tonaa, hé ka lawɛ nabie la bwa bini ondɛɛɡe dɛ́ ba kpo, ásɛ ya di kwa, dɛ́ lɛ ya sie,

²⁴ dɛkalkɛŋɔ n fa liiro kɛŋɔ n bie nɔ sewɔ, asɛ o berɛ ba nɔ. O fa aa nyoɡra la, taraken te n nao.’ Ate, ba ɛ kondikwaare dɛɛ di dɛɛ lɛ ba sie tenten.

²⁵ Waa nɔ bwa aa dɛ ɛ la, dɛ binomoa la le koo dɛɛ ba. Waa dɛ tel ba dem la, o no ɡboŋri ne yela ne sae ɡbɔɡa dem bela.

²⁶ Anee o yerɛ o mɛɛ bonɔɔna la bɛl dɛ bɔɔro ŋɔ, ‘Bɔkwa waa chiɡ deemɔ?’

²⁷ Anee o ŋɔ, ‘He nime la waa joa kaa la, onee bala, asɛ he mɛɛ ɡel ya kpo nabie la bwa bini ondɛɛɡe la dɛ ɛ kondikwaa dɛ di dɛɛ lɛ ya sie, dɛkalkɛŋɔ wobɛlbwa ta on ɛɛ.’

²⁸ Asɛ binomoa la baah di, o kire ŋɔ waa deemii jo. Asɛ o mɛɛ ba larawo ŋɔ ó ba dem.

²⁹ Belaa bie la ŋɔ o mɛɛ be ŋɔ, ‘N mɛɛ, n ɡe aa dena dɛɛ tomɛ saŋ la bwa, n ta he toma vɛɛh bwa, bɔkwa konee he tɛ mɛ nɔ? He ta bombie kwaraa lawɛ tɛ mɛ ŋɔ ń kpo n ɡe ne n daamanar kpɔ lɛ sie bwa.

³⁰ Kɛ he bie nɔ waa kaa chɔɡ o suuɡa haahna nɛɛ dɛ ba nɔ, he berɔ ɡarɛ kpo nabidɛɛɡe tɛo.’

³¹ Anee baa la ŋɔ, ‘N bidɛɛɡe, n ne haa lole nɔ, n komɛlbwa maa dɔa la, hen dɔa.

³² He nime nɔ aa nyoɡra dɛ berɛ ba nɔ, a chɛ kɛŋɔ yá ɡel ya sie lɛ, dɛkalkɛŋɔ ya ŋɔ o sewɔ, o berɛ ba nɔ, ya ŋɔ o nyoɡrɔ, kɛ taraken ya nao.’ ”