Amanesoma Luk Aa Chwera Tɔn 13 - mzwDBL

Liire chara dɛ́ le wechɔɡa ta dɛ bɛ sewɛ

¹ Gɛ saŋ la dɛ nɛra bane lɔ bela dɛ ŋɔ Yeesu be ŋɔ Galilia tena bane fa kpoo kwaa dɛɛ tɛ Korowii, asɛ Paelet kpoo ba, asɛ ba chal koo kwaa baa kpoa tɛ Korowii la chal ta.

² Anee Yeesu chaŋ ba ŋɔ, “He dɛ lii kɛŋɔ waa aa pu a ɡɛ Galilia tena nɔ dɛ́ baɡle kɛ ba wechɔɡa ɡwaa Galilia tena baa kaa la kwaa kɛɛ?

³ N dɛ ŋɔ he be ŋɔ, ɡɛ laa a do. Dɛ he ta he liire charɛ le he wechɔɡa ta naa, he bwa ɡee serewoo.”

⁴ Yeesu berɔ ŋɔ, “Asɛ nɛra fi dɛ banuatoro bane dejaŋ bɛl aa kua chole ba nɛɛ Siloam ba bwa serewe la ɡeɔ? He liire dɛ ɛ heyaa kɛ ba wechɔɡa ɡwaa nɛra baa lɔ Jerusalam bwa kwaa kɛɛ?

⁵ N dɛ ŋɔ he be ŋɔ, ɡɛ laa a do. Dɛ he ta he liire charɛ dɛ le wechɔɡa ta naa, he bwa ɡee serewoo.”

Fiɡ da waa wola nɔnɛ sɛɡla

⁶ Yeesu sɛɡ ba ŋɔ, “Baa bɛlee fa lole dɛ ɛ bodɛɛɡe dɛ du daa bɛl o ta. O laŋɔ ŋɔ ó ka nyin o nɔna toɡri, o ta nɔn beŋkpoŋ kwaraa dɔe o ta.

⁷ Anee o ŋɔ nɛn waa kpɔɔ wɛɛ nyiŋi bodɛɛɡe waa du daa la ta la be ŋɔ, ‘Na, bene atoroo nɔ maa dɛ ba bonɔ dɛ baa nyin daa nɔ nɔna, kɛ maa ane dɔ. Anomanta, teŋo ta! Ɛrɛɛ o che bonɔ dɛ lɛ bɔr dɛɛ ɛɔ?’

⁸ Asɛ nɛn waa dɛ nyiŋi bodɛɛɡe baa du daa o ta la ŋɔ, ‘N Dɔɔ, ɡel o che benanyoa beŋkpoŋ ja yá na. Mɛɛ kwi o munii dɛ́ che nabena do o mun ta.

⁹ Dɛ benanyoa chemo o nɔnaa, amɔ te dɛ anee. O ta wone nɔnɛ ɡe aa, ásɛ he teŋo ta.’ ”

Yeesu chah haah bɛl waa ɡura Ona Tɔpere ta

¹⁰ Awola Ona Tɔpere bɛl, dɛ Yeesu dɛ baɡle waa ba cheremi dea bɛl ta.

¹¹ Dɛ haah bɛl kwa aa dɛ ir o nɛɛ dɛ kpɔ weela ta o nɛɛ bene fi dɛ anuatoro, dɛ ɡuro waa wola won pee o te kwaraa lɔ bela.

¹² Yeesu aa nao la, o yerɔ dɛ ŋɔ o be ŋɔ, “Haah, le fini dɛɛ kaa, he weela kaalɔ, aa ba kpa.”

¹³ Yeesu kpɔ nɔɔra dawɛ haah la nɛ, asɛ buɡ la ta, o won pee o te, dɛ jam Korowii.

¹⁴ Cheremi dea bela nomoa la baah diu kɛ Yeesu aa chah nɛn Ona Tɔpere ta la, dɛ ŋɔ nɛra la aa lɔ bela la be ŋɔ, “Tɔpera anumɛlee chɛ kɛŋɔ yá kpɔ dɛɛ ɛ toma. Anomanta, a ɡɛ tɔpera la taa chɛ kɛ hé baa chah he weela, kɛ Ona Tɔpere te ta laa!”

¹⁵ Anee Yeesu ŋɔ, “Nɛra haa dɛ nyiŋi nɛn siebɔr mɔɔ dɛɛ ɛ wa! Haa he nae ne keeɡore yae dɛɛ ta Ona Tɔpere dɛ teɡa la nee ta a kaa nyɔ ne aa?

¹⁶ Haah nɔ, Abraham naa on. Bene fi dɛ anuatoroo la Bɔnsam aa soɡe o nɛɛ dɛ chɔɡo, aah aa were kɛ bá doŋi Bɔnsam la le o nɛɛ Ona Tɔpere dɛ́ lɛo ta aa?”

¹⁷ Yeesu aa bol ɡɛ la, sihiih kpo o dɔma la. Kɛ nɛnlaa baa kaa la te sie lɛ nyokpowaa waa ɛa la ta.

Mastad bi sɛɡla

¹⁸ Anee Yeesu berɛ ŋɔ, “Ɛrɛ tenee Korowii Kora waa la doɔ? Bɔkwa konee mɛɛ ba o kpɔe dɛ maɡɔɔ?

¹⁹ O waa tamaa bɛlbwa won yɛɛra kɛŋɔ baa bɛl aa ira dɛ kpɔ mastad bii waa do jeɡaa ɡwaa daa bɛlbwa bi, dɛ kpɔ ka du, asɛ o le dɛ ɛ da, jumbii sɔh kɔne do o kpala ta.”

Iisi sɛɡla

²⁰ Yeesu berɔ ŋɔ, “Bɔkwa konee ń berɛ kpɔ Korowii Kora waa la maɡɛ jaɔ?

²¹ A do kɛŋɔ haah bɛl aa ira dɛ kpɔ iisi tama ka koo men loɡbaa del ta, asɛ a won ɡel men la bwa uɡe.”

Doonyoa waa do feelɔɔ

²² Yeesu chiɡ ŋwɛnɛ ta dɛɛ kaa Jerusalam. Waa dɛ kaa la, o kpɔ bwɛjena ne bwɛjeɡre ta dɛɛ baɡle nɛra wa.

²³ Anee nomɛl bɔɔro ŋɔ, “N Dɔɔ, nɛra tama kenii Korowii ɛɛ ba lɛɛ yaa?” Asɛ Yeesu ŋɔ ba be ŋɔ,

²⁴ “Hé takapɔ dɛ́ kpɔ doonyoa waa do feelɔɔ o ta joe do kpeɡri la ta, dɛ́ jo ka ja Korowii Kora la ta, dɛkalkɛŋɔ nɛra ɛɛ warɔɔ dɛ́ɛ nyin dɛ́ jo bela, kɛ baa won dɔ bɔr jo.

²⁵ Dem te la ɛɛ iruu dɛ́ ba laa ɡbera la tɔ, a ka heyaa che baŋ, ásɛ hɛɛ lɔ ɡbera dɛɛ soŋo ŋɔ, ‘N poori, nomoa! Laa ɡbera ya yaa ásɛ ya jo.’ Ásɛ o ŋɔ he be ŋɔ, ‘Maa heyaa jemɛ bobɛlbwa.’

²⁶ Belaa hɛɛ ba ŋɔe ŋɔ, ‘Ya ne he fa pɛ nɔn di kwa, asɛ he bol waa baɡle yaa ya bwɛɛ ka.’

²⁷ Ásɛ o berɛ ŋɔ he be ja ŋɔ, ‘N ŋɔ maa heyaa jemɛ bobɛlbwa. Hé le n nɛɛ kaa, nɛnchɔɡa bane!’

²⁸ Bela la, hɛɛ na Abraham ne Aesek ne Jekɔb dɛ Korowii keamere la bwa Korowii Kora la taa, ásɛ Korowii doŋi he te ta. Belaa aa ba he nɛɛ wee, ásɛ hɛɛ wi.

²⁹ Nɛra ɛɛ le wee leebɔr ne wee cholibɔr ne weekaŋle nyunduabɔr, dɛ weekaŋle harɛbɔree dɛ́ ba ja Korowii Kora la ta, ásɛ dɛ pɛ nɔn di kwaa dɛ́ lɛ sie.

³⁰ Hé jemɛ kɛŋɔ muŋkaala ɛɛ ba tɔ siee, ásɛ sitɔɔla berɛ ba ka mun.”

Gɛ Yeesu aa dɛ nyin Jerusalam

³¹ Yeesu taa cheɡɛ buɡ la ta la, Farisii tena bane ba o be dɛ ba ŋɔ o be ŋɔ, “A chɛ kɛ he le bonɔ dɛ kaa bobɛl, dɛkalkɛŋɔ Kooro Hɛrɔd dɛ nyini dɛ́ kpoe.”

³² Anee Yeesu ŋɔ ba be ŋɔ, “Hé ka ŋɔ baradeɛre te la be ŋɔ, ‘Mɛɛ so lee dɛɛ doŋi kwaa aa dɛ ir nɛra nɛ, dɛɛ chah weela tena tɔpera anɛ mɔɔ dɛ́ tonɛ n toma.’

³³ Mɛɛ sewɔɔ te, kɛ a chɛ kɛ ń valɛ ŋwɛnɛ tɔpera anɛ dɛ́ kaa Jerusalam. Bela laa baa kpoo Korowii keamere aa?

³⁴ Oo, Jerusalam tena! Korowii tomɛ o keamere he be naa, ɡɛɛ he kpoo ba, o tomɛ toroma he be naa, ɡɛɛ he foɡ ba bwea. Saŋ bɛlbwaa mɛɛ nyin kɛ ń kpɔ nɔn tɔ he nɛɛ kɛ jal aa lawɛ o bii dɛɛ do o kena lɔɡre la, kɛ haa nyin kɛ ń lawɛ heyaa pɛ.

³⁵ Taraken te, Korowii ta he waa tɛ heya. Kasinteŋ, n dɛ ŋɔ he be, haa men na kpa ka tel ɡɛ saŋ maa ba ja, asɛ he ŋɔ, ‘Woowo! Korowii swee naate waa valɛ o sɔn ta dɛɛ ba nɔ andɛɛɡa!’ ”