Amanesoma Luk Aa Chwera Tɔn 12 - mzwDBL

Jae Yeesu aa ja nɛra

¹ Aa ɛ tama la, nɛra kaɡboŋa baa cheme Yeesu sie. Baa wara nomanta, dɛ ba dɛ tiɡri dɔŋa nakpale ta. Belaa Yeesu tɔ sie bol waa o habɔteŋra la be dɛ sɛɡ ba ŋɔ, “Hé nyiŋi he te kɛrɛdɛ Farisii tena iisi wa. Nɛra sie baa nyiŋi dɛɛ ɛ wa.

² Wobɛlbwa nɛra aa tɔ a ta la ɛɛ le baŋee, ásɛ waa aa sɔah bwa ɡe le nɛra jemɛ.

³ Taraken waa haa bola biro ta la, aa le bochaah taa ba no, ásɛ waa haa sɔah bol nɛn be dea he ne o ɡbo la, baa bola nɛnlaa baahnee.

⁴ Yabala, n dɛ ŋɔ he be ŋɔ, he bɛ nɛra baa dɛ ba wona kpo heyaa baa wola won ɛ waane kpa la ɔmɛ.

⁵ Kɛ mɛɛ baɡle heyaa naate aa chɛ kɛŋɔ hɛ́ɛ ɔmɛɛ. Hɛ́ɛ ɔmɛ Korowii waa dɔ kpeɡri dɛ́ won kpo heya, dɛ́ berɛ won kpɔ heyaa kaa Bɔnsam nii ta la. Onee chɛ kɛŋɔ hé ɔmɛ.

⁶ He nao kɛ pɛtoprɛ ta yoɡ dɔe, kɛ Korowii ta beŋkpoŋ kwaraa waa soɛh.

⁷ He nyumpona kwara, Korowii jemɛ a nyoa. He bɛ dɛɛ ɔmɛ. He ta pɛtoprɛ ɡwaalɛ wobɛlbwa ta naa?

⁸ Hé ɡel ń ŋɔ he be, nomɛlbwa waa won che nɛra baah ta dɛ́ sɛh ŋɔ o ja n nɛɛ la, awola Korowii aa ba dɛ ba bol nɛra bwa waa dɛ́ pa bole la, Men Nɛn Bie la ɡee yerɛ naate sɔn nyundua toroma siee kɛ o ja n nɛ.

⁹ Nomɛlbwa ɡe waa vɛɛh mɛ nɛra baah ta, dɛ ŋɔ o ta n nɛɛ jae la, awola Korowii aa ba dɛ́ ba bol nɛra bwa waa dɛ́ pa bole la, n ɡee vɛh naatee nyundua toroma sie ŋɔ n ne o laa.

¹⁰ Nomɛlbwa waa bol waa yaɡɛ Men Nɛn Bie la, Korowii ɛɛ kpɔɔ kɛo, kɛ naate waa ɛ Korowii Domadɛɛɡe la nɛnhɛla la te, Korowii aa o wechɔɡaa kpɔ kɛo.

¹¹ Dɛ ba yerɛ heyaa ka che cheremi deene bini ne harɛ nɔ ta nomonome sie naa, he bɛ ɡel waa haa bol dɛ lɛ he te la hiah heya,

¹² dɛkalkɛŋɔ Korowii Domadɛɛɡe la ɛɛ baɡle heyaa buɡ la ta, ɡɛ haa dɛ ba bola.”

Suuɡate ɡɛne bɛl sɛɡla

¹³ Belaa baa bɛl waa ja nɛnlaa la nɛɛ ŋɔ Yeesu be ŋɔ, “Nomoa, ŋɔ n dɔɔ be ásɛ o ɡel ya bɔne kpanjoɡo ya mɛɛ aa sewa dɛ ɡel tɛ yaa a do o be la bini.”

¹⁴ Asɛ Yeesu ŋɔ o be ŋɔ, “Nɛmbaa, umee kpɔ mɛ cheɡ ŋɔ ń bol he waa dɛ́ bɔne he kapɛrɛ ɔ?”

¹⁵ O ŋɔ ba be ŋɔ, “Hé ɡel he sie chɔ harɛ he nyiŋi kɛrɛdɛ dɛ bɛ kwaa dɛɛ kam, dɛkalkɛŋɔ nɛwɛnyini kondɔɔh kohona laa o mkpa.”

¹⁶ Yeesu sɛɡ ba ŋɔ, “Suuɡa te bɛlee fa lole o koo kondikwaa ɛ taeh.

¹⁷ Belaa o so dɛ lii o nyu bini ŋɔ, ‘Ɛrɛɛ mɛɛ ba ɛɛ yɔ? Bela maa chea do la aa kanɛ.’

¹⁸ Anee o ŋɔ, ‘Mɛɛ paɡre n dɔndɔŋre nɔɔ dɛ́ ɛa a do kan, ásɛ n mea ne n kwaa bwa dɔ bɔr jo a bini.’

¹⁹ O lii waa o nyu bini dɛ ŋɔ, ‘N dɔ kwaa dɛ́ di la sie, mɛɛ diu dɛ́ lɛ n sie dɛ́ so dɛɛ onɛ.’

²⁰ Anee Korowii ŋɔ o be ŋɔ, ‘Gɛne! Fini jwaana nɔ ne hɛɛ sewɔɔ, ásɛ kwaa haa kwaara cheɡ la, lee hɛɛ ba a bɔr nae jaɔ?’ ”

²¹ Waa Yeesu aa bola dɛ kpɔ teŋe ɡɛ waa la ta laanee kɛ, “Gɛɛ aa ba nɛra baa kwaa kondɔɔh dɛɛ cheɡ ba te harɛ ta bonɔ baa wola kembɔr bɛlbwa dɔe Korowii be la nɛɛ doe.”

Hé yarada Korowii

²² Yeesu ŋɔ o habɔteŋra la be ŋɔ, “Anomanta, n dɛ ŋɔ he be ŋɔ, he bɛ ɡel he sie beɡre he soɡa bini kwaa haa di ne yale haa tɔ wa.

²³ He mkpa ɡwaa kondikwa, he bwadabii ɡe ɡwaa yal.

²⁴ Hé ta sie nyiŋi jumbii na. Aa kwaa du, aa komɛ, a ta bela aa komɛ kwaa dɛɛ do dɔe. Korowiirii dɛɛ tɛa kondikwa. He ɡwaa jumbii bam!

²⁵ He bini umee dɛ́ won kpɔ sibeɡra ŋwɛnɛ bɛl dɛ́ kpɔ tɔpebeŋkpoŋ ja o mkpa ta nɔ?

²⁶ Dɛ haa won ɛ a ɡɛ wetamaa nɔ ɡba aa, ɛrɛɛ he ɡel he sie ɛɛ beɡre anɔ la aa kaa waɔ?

²⁷ Hé ta sie nyiŋi ɡɛ kpɔɡ bini koŋkwaa dɛ fe aa, a fee yon do wer la dɛ́ na. Aa toma ɛ dɛɛ koh, aa yabi ta. Kɛ n dɛ ŋɔ he be ŋɔ, Kooro Solomɔn ɡba ne o kondɔɔh bwa, o laala ta wer doe kɛ a ɡɛ kwaa nɔ bwa.

²⁸ Kpɔɡa haa naa a do wer fini, ásɛ kere ɡbo dɛ a serewɔ ba fuah nɔ, dɛ Korowii ɡelɔ a do wer ken naa, ɛrɛɛ waa wola won tɔ heyaa yal ɡwaala ɔ? He yarada aa kanɛ kwara!

²⁹ Anomanta, he bɛ ɡel he sie beɡre hɛɛ nyin anɔ la haa di ne anɔ la haa nyɔ.

³⁰ Nɛra baa wola Juu tena ɛɛ baa wola Korowii tomɛ la liiree dɛɛ do a ɡɛ kwaa nɔ ta. He Mɛɛ waa lɔ nyundua la jemɔ kɛ he dɛ nyin anɔ bwa.

³¹ Hé ɡel he sie beɡre Korowii Kora la ta, ásɛ o kpɔ anɔ haa dɛ nyin nɔ bwa tɛ heya.”

Korowii doa kondɔɔh

³² Anee Yeesu berɛ ŋɔ, “Anomanta, Korowii toroma, haa kanɛ, kɛ he bɛ dɛɛ ɔmɛ, dɛkalkɛ a dɛ ɛ he Mɛɛ waa lɔ nyundua la silɛɛ kɛ he ja o Kora la ta.

³³ Hé yoɡ kwaa haa dɔa, ásɛ dɛ kpɔ a suuɡa la kɛ nyaara. He ɛ ɡɛ naa, hɛɛ dɔ pure aa wola chɔɡ ne kondɔɔh aa wola tonɛ bwa Korowii doa. Belaa kondɔɔh aa wola mule, dɛkalkɛ ŋwɛɛra aa won la ka ŋwɛa, kwaa ɡe aa wola won chwea.

³⁴ Bela he kondɔɔh aa lole laanee he liire ɡe do.

Bonɔɔna baa dɔ liire dɛɛ kpa

³⁵ Hé kpɔ he te dɛɛ kpa toma ɛɛ. Hé kpɔ he te dɛ́ ɡel he kandere ɛɛ hɔ,

³⁶ kɛŋɔ bonɔɔna ba dɔɔ aa kaa hanfale chema asɛ ba so kpao, ásɛ dɛ o balɔ dɛ ba lɔ ɡbera aa, buɡ la ta, ba yao la.

³⁷ Bonɔɔna baa soɡa kpa ba dɔɔ, ba ta dom chɔe o ba puu ba la, ba sie dɛ lɛ. Kasinteŋ, n dɛ ŋɔ he be, wɛɛ kpɔ o tenee dɛ́ yer ba so tiɡ ta, ásɛ dɛ tɛɛ ba kwaa ba di.

³⁸ Dɛ ba dɔɔ la balɔ jwaana kɛɛ harambaŋa dɛ ba puu ba kɛ ba soɡo kpao waa, ba sie ɛɛ lɛo.

³⁹ Hɛ́ɛ no. Dɛ dem te fe jemɛ ɡɛ saŋ ŋwɛɛ aa ba ŋwɛo waa, o fe aa ɡel ó won ba jo o dem dɛ́ ŋwɛo.

⁴⁰ Gɛɛ chɛ kɛŋɔ hé ɡe kpɔ he te, dɛ́ so kpa, dɛkalkɛ piɡraa Men Nɛn Bie la ɛɛ ba ba piɡri heya.”

Kasinteŋ te ne kasinteŋ te bɛ dɔe wa

⁴¹ Anee Pita ŋɔ, “N Dɔɔ, yanee hɛɛ sɛɡle nɔ kɛɛ nomɛlbwa jao wɔ?”

⁴² Asɛ Yeesu chaŋo ŋɔ, “Bonɔɔ waa dɔ kasinteŋ dɛ dɔ liire la nɔn taa o dɔɔ kpɔ o dem tena dɛɛ do, dɛ ŋɔ bɔr dɛ maɡre aa, ó tɛɛ ba kondikwa.

⁴³ Dɛ bonɔɔ la dɔɔ la baa puu, dɛ o dɛ ɛ ɡɛ waa kpɔa do o nɔn ta la aa, bonɔɔ la sie ɛɛ lɛo.

⁴⁴ Kasinteŋ, n dɛ ŋɔ he be, o dɔɔ la ɛɛ kpɔ o komɛlbwaa do o nɔn ta ŋɔ wɛ́ɛ nyiŋi a ta.

⁴⁵ Kɛ dɛ bonɔɔ la ta ɡɛ liire, dɛ ŋɔ, ‘N dɔɔ ŋwɛnɛ nɔ waa kaala nɔ, waa ba taraken,’ dɛ do o dɔŋa bonɔɔna la ne toli baa kaa la nɛɛ dɛɛ lɔɔ, dɛ di kwaa dɛ nyɔ sen dɛɛ dɛɛ raa, amɔ wɛɛ na waa.

⁴⁶ Tɔpebeŋkpoŋii o dɔɔ ɛɛ ba bala ba piɡru, ásɛ dɛ ba tɛr o deŋne taeh kɛŋɔ baa dɛ ɛ nɛra baa wola Korowii yarada la ken.

⁴⁷ Bonɔɔ waa jemɛ ɡɛ o dɔɔ aa dɛ nyin, kɛ dɛ vɛh o te kpɔe dɛ ɛ ɡɛ tɛo la, o dɔɔ ɛɛ ɡeloo ba lɔɔro taeh.

⁴⁸ Kɛ bonɔɔ waa wola ɡɛ o dɔɔ aa dɛ nyin jemɛ, dɛ ɛ lɔɔra waa la, baa lɔɔroo tamaa ken dɛ́ kpɔ tɛr o deŋne. Nɛn Korowii aa chao o jemɛ waa kohona la nɛɛ o kpɔ wedamanta ɛɛ dawɛ. Nɛn baa kpɔ waa do o nɔn ta kohona la bee baa bɔɔ waa kohona.

Gɛ Yeesu aa bala ásɛ nɛra baah peɡri

⁴⁹ N balɔ dɛ́ ba kpɔ nii ta harɛ nɔ ta ó fuh. Dɛ nii la fe dɔɔ dɛɛ hɔ aa, a fe ɛɛ do n somee taeh.

⁵⁰ Wahala ane chɔ n sie a chɛ kɛŋɔ bá do mɛ a ta kɛŋɔ ba dɛ sɔ nɛn Korowii ne aa, ba yon doo nee ta la. Dɛ n ta a ɡɛ wahala la nae tonaa, n bambile ta men sɔɔhnɛ.

⁵¹ He dɛ lii kɛ n ba nyopɛo ne harɛ nɔ ta kɛɛ? Akai, n balɔ ásɛ nɛra ne ba lolanar dɔm.

⁵² Le fini dɛɛ kaa, dembeŋkpoŋ nɛra banue aa lɔ o ta la, ba baah dɛ ba pera ásɛ batoro hah banɛ, ásɛ banɛ la ɡe hah batoro la.

⁵³ Mɛɛnanar dɛ ba ba bibaala haeh, ásɛ bibaala ɡe hah ba mɛɛnanar. Nyare ɛɛ hah ba bihaahnaa, ásɛ bihaahna hah ba nyare. Haahna ɛɛ hah ba bii haahnaa, ásɛ ba bii haahna hah ba.”

Waa mun jema

⁵⁴ Yeesu berɔ ŋɔ nɛnlaa la be ŋɔ, “Dɛ he na baama dɛ kaa mun ta naa, ɡɛɛ he ŋɔ bwaala dɛ ba nɛɛ, dɛ o nɛo.

⁵⁵ He jemɛ bela peu aa le dɛɛ ta he ŋɔ bɔwɔb ɛɛ bao, dɛ o balɔ kpela.

⁵⁶ Nɛra haa dɛ nyiŋi nɛn siebɔr mɔɔ dɛɛ ɛ wa, he won nyundua ne harɛ nyiŋa dɛ́ jemɛ waa aa dɛ ba chiɡa, aah ɛrɛ waa haa wola won jemɛ waa aa dɛ chiɡ taraken nɔ te mun nɔɔ?

⁵⁷ He te aa won nyiŋi dɛ́ na waa aa wera dɛɛ teŋɛ a ta naa?

⁵⁸ Dɛ he ne he dɔŋ dɔɔ, asɛ o kpɔe dɛɛ kaa kɔɔto aa, larawe naate he ne o pɛ. Dɛ ɡɛ laa, o tel he ne bela aa, kɔɔto nomoa waa dɛ pa bole la dɛ ba he kpɔe dɛ́ tɛ prosiri, ásɛ ba ka doe dea.

⁵⁹ Belaa hɛɛ ba doe ka tel kɛ haa bɔ suuɡa baa dɛ lɛɛ la bwa ka tonɛ, kapɛrɛ ɡba aa wola ka.”