Amanesoma Luk Aa Chwera Tɔn 1 - mzwDBL

¹ Nomoa Teɔfelɔs, nɛra warɔ dɛ takapɔ ŋɔ baa chwerɛ waa aa chiɡ ya binii.

² Ba chwerɛ waa yaa noa dɛ le nɛra baa kpɔ siwi naa mumpar la, dɛ faa ɛ a toma dɛɛ bol Korowii Waa la.

³ Nomoa, n ɡbaɡba nyiŋi a ɡɛ waa nɔ bini kɛrɛdɛ dɛ le mumpar, anomanta, n liiro kɛ aa maɡroo kɛ n chwerɛ dɛ baɡle a bini ɡɛ aa teŋa beŋkpoŋa beŋkpoŋa dɛ tɛɛ,

⁴ ásɛ he won jemɛ waa baa bol he be la bini kasinteŋ bwa kɛrɛdɛ.

Jɔn waa dɛ sɔ nɛra Korowii nee lola wa

⁵ Gɛ saŋ Hɛrɔd aa ɛ kooro Juda harɛ la, dɛ Sɔfo bɛl lole baa yerɔ Sekaria, asɛ o ɛ Abija be pera sɔfore la bɛl. Dɛ o haah sɔne Ɛlesabɛt. Dɛ sɔfore deene la bɛl biee o ɡe.

⁶ Dɛ ɡɛ nɛra banɛ nɔ bwa ɛ nɛndɛɛɡa ba waa aa su Korowii siwi, baa no Korowii wa, dɛɛ teŋɛ a bwa ta kɛrɛdɛ.

⁷ Sekaria moo, ba bwa ba hwɛɛh, kɛ dɛ ba ta bie dɔe, dɛkalkɛŋɔ dɛ Ɛlesabɛt ɛ hambara.

⁸ Awola bɛl, Abia be pera sɔfore toma telo, asɛ Sekaria do Korowii Dea dɛɛ ɛ o Sɔfo toma.

⁹ Gɛ sɔfore yon dɛɛ ɛ la, ba ta chacha mɔɔ dɛ leo ŋɔ ó jo Korowii Dea dɛ́ ka fuh daawiile a sɔɔh aa soma.

¹⁰ O jo bela, asɛ nɛnlaa la bwa che buse dɛɛ soŋe Korowii ásɛ o fuh daawiile a sɔɔh aa soma la tonɛ.

¹¹ Belaa Korowii nyundua torome forɛ le ba Sekaria be Korowii Dea bela, dɛ ka che bela waa dɛ fuh daawiile a sɔɔh aa soma la diɡ bɔr.

¹² Sekaria aa na nyundua torome la la, a ɛo anebɛlbwa, asɛ ɔmee lawɔ.

¹³ Anee nyundua torome la ŋɔ o be ŋɔ, “Sekaria, dɛɛ berɛ ɔma! Korowii no he wesoŋa. He haah Ɛlesabɛt ɛɛ lolɛ bibaalee tɛɛ, ásɛ he pa o sɔn Jɔn.

¹⁴ Dɛ o lolaa, he bambile ɛɛ sɔɔhnee he sie lɛ, nɛra sie lɛ pirim, bá hɛɡre.

¹⁵ Wɛɛ ɛ nɛnjen Korowii bee. Waa sen kɛɛ kwaa aa dɛ dɛɛ te bɛlbwa nyɔe ba. Waa lɔ o nya tea bini kwaraa la, Korowii Domadɛɛɡe la dɛ ba o nɛɛ soɡa kpeɡri nɛ.

¹⁶ Wɛɛ ɡeloo Israel tena charɛ ba liire, dɛ́ ba N Naa Korowii be.

¹⁷ Wɛɛ dɔ Korowii Domadɛɛɡe ne kpeɡrii kɛŋɔ Korowii keame Elaeja ken, dɛ́ tɔ ya Dɔɔ sie, dɛ́ ɡel eehnanar ne ba bii nyoa pɛ, dɛ́ berɛ deŋnekpeɡ tena liire ba nɛra ba wa aa dɛ su Korowii siwi ŋwɛnɛ ta. Gɛɛ wɛɛ ba ɛɛ dɛ́ nyin nɛra cheɡ ya Dɔɔ, ásɛ o balaa, ba won lɛo dɛ́ tomɔ.”

¹⁸ Belaa Sekaria bɔɔ nyundua torome la ŋɔ, “Ɛrɛɛ hɛɛ ba ɛɛ n jemɛ kɛ ɡɛ waa nɔ ɛ kpela ɔ? Dɛkalkɛŋɔ n ne n haah bwa hwɛɛhrɔ.”

¹⁹ Anee nyundua torome la chaŋo ŋɔ, “Menee Gebreɛl maa dɛ che Korowii sie la. Onee tom mɛ ŋɔ ń ba bol Amanesoma nɔ he be.

²⁰ Kɛ haa wola n waa nɔ yaradae dɛɛ tɔŋ mɛ nomanta, hɛɛ berɛ amumuu dɛ́ ka tel kɛŋɔ waa nɔ bwa aa ɛa dɛ ɛ kpela mɔɔ he won bol wa. Jemɛ kɛŋɔ waa nɔ maa bola nɔ saŋ telaa, a bwa ɛɛ ɛo kɛrɛdɛ ken.”

²¹ Gɛ saŋ Sekaria aa lɔ Korowii Dea bela la, dɛ nɛra cheɡɛ buse dɛɛ kpao. A ɛɛ ba nyokpoa kɛ waa biɡri bela la.

²² Waa le Korowii Dea bela dɛ ba buse la, o ta wone bol waa nɛra la be. Anomanta, ba nao kɛŋɔ o na komɛl deera ta bela. Anee ɡela waa wola won waa bol dɛ kpɔ nɔɔra ne nyu dɛɛ baɡle waa la.

²³ Sekaria toma aa tonɛ Korowii Dea bela ɡɛ saŋ la, o kaa o bwɛ.

²⁴ Waa nɔ habɔɔ la, Sekaria haah Ɛlesabɛt jo tea, dɛ kpɔ o te sɔh dem korobie anue.

²⁵ Ɛlesabɛt cheɡɛ a ɡɛ waa nɔ ta, dɛ ŋɔ, “Name te N Naa Korowii laa sihiih kpɔ n sie ta, ásɛ n won jo nɛra bini.”

Nyundua torome baa bol Yeesu lola wa

²⁶ Ɛlesabɛt tea la korobie anumɛl ta la, Korowii nyundua torome baa dɛ yerɔ Gebreɛl la le Korowii be dɛ ba bwɛɛ bɛl baa dɛ yerɔ Nasarɛt waa lɔ Galilia harɛ ta la ta.

²⁷ Tolo bɛl waa wola baa jemɛ bwa baa yerɔ Mɛɛre bee o ba. Dɛ Mɛɛre dɛ ba Josef yala ɡɛ saŋ. Kooro Devid deaa Josef le.

²⁸ Nyundua torome la ba Mɛɛre be dɛ ba ŋɔ, “Korowii nɛnnyini, jam. N Naa Korowii cheɡɛ he habɔɔ.”

²⁹ Waa nyundua torome la aa baa bol Mɛɛre be la ɛo anebɛlbwa, asɛ o lii o nyu bini ŋɔ, “Bɔkwa waa nɔɔ?”

³⁰ Belaa nyundua torome la ŋɔ o be ŋɔ, “Dɛɛ berɛ ɔma, kɛ Korowii tɛɛ hɛɛra.

³¹ Hɛɛ kpoŋe tea dɛ́ lolɛ bibaa, ásɛ dɛ pa o sɔn Yeesu.

³² Wɛɛ ɛ nɛnjenii, ásɛ baa yerɔ Nemenɛ Korowii Bie. N Naa Korowii dɛ ba on o naa Devid kora la dɔŋ cheɡa ó di.

³³ Wɛɛ ɛ Jekɔb naanar bwa sekwaraa kooro o kora aa wola jaɡa dɔe ba.”

³⁴ Anee Mɛɛre ŋɔ nyundua torome la be ŋɔ, “Maa wola baa jemɛ mɔɔ nɔ, ɛrɛɛ waa nɔ ɛɛ ba ɛɛ dɛ́ won maɡre ɔ?”

³⁵ Belaa nyundua torome la ŋɔ, “Korowii Domadɛɛɡe ɛɛ ba he bee, ásɛ Nemenɛ Korowii kpeɡri tɔ he nɛ, ásɛ he kpoŋe tea. Anɔ taa aa ba cheɡa bie haa dɛ ba lola la ɛ nɛn o wa aa do ɡoroŋ, ásɛ baa yerɔ Korowii Bie.

³⁶ Dɛɛ no! He lole Ɛlesabɛt baa dɛ lii kɛŋɔ o hwɛɛhrɔ ŋɔ waa lolɛ la, taraken o jo tea. Korobie anumɛlee nɔ, kɛ o ɡe fe ɛ hambara.

³⁷ Na, wobɛlbwa ta Korowii ɛɛ tele.”

³⁸ Anee Mɛɛre ŋɔ, “N Naa Korowiirii dɔɔ mɛ, anomanta, ó ɛɛ mɛ ɡɛ bwa haa ŋɔa nɔ.” Asɛ nyundua torome la le Mɛɛre be dɛ kaa.

Mɛɛre laŋɔ ka chɔɔ Ɛlesabɛt

³⁹ A ɡɛ waa nɔ ta la, Mɛɛre iro dɛ kpɔ yɔra chiɡ ŋwɛnɛ ta ka le Juda deŋɡarere harɛ bobɛl dɛ kaa Sekaria bwɛ,

⁴⁰ dɛ ka jo Sekaria dem dɛ ka chɔɔ Ɛlesabɛt.

⁴¹ Ɛlesabɛt aa no Mɛɛre taa la, anee bie la aa lɔ o tea bini la lɔ kpeɡri nɛ, asɛ Korowii Domadɛɛɡe ba so Ɛlesabɛt nɛ.

⁴² Belaa o kpɔ takpeɡ bol waa ŋɔ, “Korowii sweere andɛɛɡa ɡwaa haahna bwa, dɛ swee he bie waa lɔ he tea bini la ɡe andɛɛɡa.

⁴³ N ɡee umeo n Dɔɔ nya ɛɛ ba ba chɔɔ mɛ nɔɔ?

⁴⁴ Buɡ la ta, he wobol aa chole n deŋna ta la, bie waa lɔ n tea bini la den kpɔ silɛɛ ne hɛɡra dɛ lɔ.

⁴⁵ He na som kɛ haa no n Naa Korowii wobol dɛ yarada kɛŋɔ ɡɛ waa la ɛɛ ɛo nɔ.”

Mɛɛre yel waa ɡoa kpɛɛ Korowii

⁴⁶ Anee Mɛɛre ŋɔ, “N dɛ kpɛɛ Korowii n bambile bwa ne.

⁴⁷ N sie lɛ Korowii waa ɛ n Lɛɛ la nɛ.

⁴⁸ O nyiŋi n ɡe maɡa nɔ dɔŋ maa ɛ nɛŋɡwɛɡre nɔ nɛ, dɛ ɡel nomɛlbwa ɛɛ ba taraken lee dɛɛ bol n waa ŋɔ n na som,

⁴⁹ dɛkalkɛ Nemenɛ Korowii ɛ wejena tɛ mɛ. O chɛ duura.

⁵⁰ Nɛra te bwa baa dɛ ɔmɔ la, o dɛ na ba sum, dɛɛ na ba biirere sum, dɛɛ na ba ɡe biirere ne ba naanar bwa sum.

⁵¹ O chaɡle o kpeɡri dɛ doŋi nɛra baa dɛ lii ba te nɛnjena la ba peɡre.

⁵² O ir kpeɡnɛra ba kora ta, dɛ ɡɔɔ nɛŋɡwɛɡra baa di kpeɡri.

⁵³ O tɛ nyaara kondɛɛɡa ba di, dɛ doŋi dɔɔhna ba kpɔ nɔŋɡbala kaa.

⁵⁴ O lii nyobaɡa waa baɡɛ ya naawa la, dɛ lawɛ o bonɔɔna Israel tena bini kpoŋe wobɛlbwa ta, dɛɛ sune ba nɛ,

⁵⁵ ɡɛ tenten waa baɡɛ Abraham ne o naanar nyoa kɛ wɛɛ na ba sumii saŋ bɛlbwa la.”

⁵⁶ Belaa Mɛɛre so Ɛlesabɛt be dɛ ɛ korobie atoro mɔɔ dɛ kaa o bwɛ.

Jɔn waa dɛ sɔ nɛra Korowii nee lola wa

⁵⁷ Ɛlesabɛt lola aa tela la, o lolɛ bibaa.

⁵⁸ O nɛra ne o bala aa no ɡɛ Korowii aa na o sum dɛ ɛ wedɛɛɡa tɛo la, o ne ba bwa sie lɛo.

⁵⁹ Bie la aa dɔ yawanyoa la, ba balɔ ŋɔ ba ba teŋe o pen, dɛ fe ɛɛ nyin bá kpɔ o mɛɛ Sekaria sɔn pao.

⁶⁰ Anee o nya Ɛlesabɛt ŋɔ, “Akai! A chɛ kɛ yá pao Jɔn!”

⁶¹ Belaa ba ŋɔ o be ŋɔ, “Aah, he lole bɛlbwa ta ɡɛ sɔn nɔ dii yɔ!”

⁶² Asɛ ba kpɔ nɔɔra dɛ baɡle waa Sekaria be, dɛ bɔɔro sɔn waa dɛ nyin kɛŋɔ ba kpɔ pa o bie la.

⁶³ Belaa Sekaria ɡel ba nyin dapɛɡa tɛo, asɛ o chwerɛ o ta dɛ baɡle kɛŋɔ, “Bie la sɔne Jɔn.” Nɛra baa lɔ bela la ŋɔ ba ta nyokpowaa nɔ dɔŋa nae bwa.

⁶⁴ Buɡ la ta la, Sekaria o fa aa wola won bol waa la nyoa chaarɔ, o won bol wa, dɛɛ kpɛɛ Korowii kɛŋɔ waa ɛ wejena tɛo la.

⁶⁵ Belaa ɔmee lawɛ nɛra baa lɔ bela la bwa, asɛ ba kpɔ ɡɛ waa nɔ perɛ Juda deŋɡarere harɛ bwɛɛre la bwa ta.

⁶⁶ Nomɛlbwa waa no waa nɔ la, o liira o nyu bini ŋɔ, “Ɛrɛɛ ɡɛ bie nɔ ɛɛ ba doe yɔ?” Ba nao kɛŋɔ Korowii teŋɛ bie la nɛ.

Sekaria yel waa ɡoa kpɛɛ Korowii

⁶⁷ Jɔn mɛɛ Sekaria ɡe la, Korowii Domadɛɛɡe baa so o nɛ, asɛ o won bol waa aa dɛ ba bala kerekere, dɛ ŋɔ,

⁶⁸ “Hé ɡel ya kpɛɛ Korowii Israel tena aa dɛ tomɔ, dɛkalkɛŋɔ o cha o nɛra dɛ lɛ yaa le wahala ta.

⁶⁹ O tɛ yaa nɛnjen o le o bonɔɔ Devid dea, dɛ ŋɔ ó ba lɛ yaa.

⁷⁰ O cheɡɛ o keamere la nɛɛ dɛ bol wubwa

⁷¹ ŋɔ wɛɛ lɛ yaa le ya dɔma ne nɛra baa hah yaa bwa sekwaraa nɔn taa,

⁷² dɛ́ na ya sum ɡɛ waa baɡɛ ya naawa nyoa la, dɛ́ lii o fɔo o ne baa fɔwa la.

⁷³ O ne ya naa Abrahamee fɔwɛ fɔo la, asɛ o ŋwɛɛ ntam baɡlo

⁷⁴ kɛŋɔ wɛɛ lɛ yaa le ya dɔma nɔn taa ásɛ ya tomɔ yaa wola ɔmɛ,

⁷⁵ ásɛ ya ɛ nɛndɛɛɡa ya waa do ɡoroŋ o sie ya soɡa bini bwa.”

⁷⁶ Anee Sekaria bol waa o bie la be ŋɔ, “N bie, baa yerɛɛ Nemenɛ Korowii keamee, dɛkalkɛŋɔ hɛɛ tɔ ya Dɔɔ siee, dɛ́ kwaa bɔr tɛo ásɛ o ba,

⁷⁷ ásɛ dɛ ŋɔ o nɛra be ŋɔ, dɛ ba charɛ ba liire dɛ le ba wechɔɡa ta naa, wɛɛ kpɔɔ kɛ ba dɛ́ lɛɛ ba.

⁷⁸ N Naa Korowii tea aa dɛ domɛ nɛn nɛɛ kohona nomanta, wɛɛ ɡeloo o wee ɛɛ chaah yaa,

⁷⁹ ásɛ dɛ chaah ya banɔ la yaa lɔ biro ta dɛɛ ɔmɛ seo la, dɛ́ chaɡle yaa deŋnesɔɔhna ŋwɛnɛ.”

⁸⁰ Kenii a do asɛ Jɔn kpeɡ, dɛ dɔ nomonliire. O soɡe pua hɛŋle ɡbo harɛ, dɛ ka tel kɛŋɔ tɔpere waa pa o toma mun Israel tena bini aa tela.