Lewi Dea Tena 7 - mzwDBL

Bolchɔɡe dii saraha wa

¹ Korowii berɔ ŋɔ, “Ŋwɛnɛre aa chɔ le tɛ bolchɔɡe dii saraha ɡee nɔ. A do ɡoroŋ kɛrɛdɛ.

² A chɛ kɛ ba teŋe kon la baŋa bela baa dɛ teŋe saraha kwaa baŋa dɛɛ fuah la, ásɛ dɛ ɛ chal la ane merɛ saraha kon la baŋne anaarɛ la bwa ta.

³ O noorare la bwa chɛ kɛ bá kpɔ tɛ mɛ. O muŋɡo noo la ne o noyal waa lɔ o tea bini bwa,

⁴ ne o kporombie anɛ ne a noorare aa ja a ta, dɛ o pwɛ bela waa wera. Bá laa o pwɛ bela waa wera la ne o kporombie anɛ la laa kpɔ a pɛ dɔŋa nɛ.

⁵ Sɔfo la fuh noorare la saraha kon la ta ɡɛ baa fuh saraha kwaa dɛɛ tɛ mɛ la. A ɛ bolchɔɡe dii saraha.

⁶ Baa te bɛlbwa waa le sɔfore dea la te won a dii. Kɛ bɔr waa do ɡoroŋee chɛ a dii, a do ɡoroŋ kɛrɛdɛ.

⁷ Webeŋkpoŋii lɔ bolchɔɡe dii ne wechɔɡa kpɔe dɛ kɛ saraha ta. Sɔfo waa kpɔ a ɡɛ kwaa la ka soŋe naate la wechɔɡa n be laanee dɔ a kar la.

⁸ Kondɛɛre bɛlbwa sɔfo la aa kpɔ fuh ɛ saraha tɛ nomɛl la, o tɔn la ɛ sɔfo la kon.

⁹ Mea saraha bɛlbwa baa wɔɔra kɛɛ dɛ daala, dɛ hala ɡee ba hala aa, a ɛ sɔfo la waa kpɔ ɛ saraha tɛ mɛ la kwa.

¹⁰ Asɛ mea saraha te bɛlbwa aa ɛ men baa kpɔ noo koo a ta, kɛɛ dɛ noo toole a ta noo, a ɛ Arɔn bibaala baa ɛ sɔfore la bwa kwa, a chɛ kɛŋɔ bá bwa bɔna kɛrɛdɛ.

Deŋnesɔɔhna saraha wa

¹¹ Ŋwɛnɛre aa chɔ le tɛ deŋnesɔɔhna saraha aa chɛ kɛ ba kpɔ tɛ mɛ laanee nɔ.

¹² Dɛ jam sarahaa yaa, naate kpɔ men baa kpɔ noo koo a ta iisi aa wola toole a ta dɛ́ wɔɔra. Dɛ biskeeti ɡee yaa, bɛ iisi a ta do dɛ́ kpɔ noo fɔɡa, dɛ́ kpɔ men baa nama a kper kɛrɛdɛ noo koo a ta, dɛ́ charama kɛrɛdɛ dɛ́ kpɔ a bwa ba jam saraha kon la ta.

¹³ Ó berɛ kpɔ paanoo baa do iisi a ta ja deŋnesɔɔhna saraha waa kpɔ ba jam mɛ la ta.

¹⁴ Naate la kpɔ kwaa la bɛlbwa bini beŋkpoŋ aa chɛ kɛŋɔ ó kpɔ ba tɛ men Korowii la ba ɛ saraha tɛ mɛ. Sɔfo la waa kpɔ deŋnesɔɔhna saraha chal merɛ laanee dɔa.

¹⁵ Deŋnesɔɔhna saraha ol la ta chɛ kɛ tɔɔ per o ta, bá diu awola tenten baa kpoo la.

¹⁶ Kɛɛ dɛ saraha la ɛ nyobaɡa saraha kɛɛ o ɡbabir bambile ta saraha aa, bá dia awola tenten. Dɛ ane kao tɔɔ per a ta naa, ba won a dii.

¹⁷ Deŋnesɔɔhna saraha ol bɛlbwa waa chɔ ka tel tɔpera atoro la te chɛ kɛ ba fuuh.

¹⁸ Nomɛlbwa waa di ɡɛ saraha ol waa di tɔpera atoro nɔ la, maa o saraha waa baa ɛ la lɛɛ ba. Dɛ aa were dɛɛ su men Korowii siwi kpa. N kia. Waa naate aa koh a waa ba ɛ saraha la berɔ dawɛ o nɛ. Nomɛlbwa waa di ɡɛ ol nɔ la ɛɛ dɔ deŋnetɛraa.

¹⁹ Dɛ ol la leɡe komɛlbwa waa kah doŋa aa, he bɛ di. A chɛ kɛ ba fuuh. Ol waa wola wera ne dii la, nomɛlbwa waa wola doŋa kaeh la te won dii.

²⁰ Kɛ dɛ nɛn kah doŋa dɛ di deŋnesɔɔhna saraha baa ɛa tɛ men Korowii nɔ naa, ba bɛ on kure ja o nɛra nɛɛ kpa.

²¹ Nomɛlbwa berɔ leɡe doŋa kon bɛlbwa, dɛ nɛwɛnyini be pera doŋa bɛlbwaa kɛɛ ola aa wola were ne dii kɛɛ anɔ la baa kia dɛ ba di n deŋnesɔɔhna saraha ol la bɛl la, ba bɛ on kure ja o nɛra nɛɛ kpa.”

²² Korowii ŋɔ Mosis be ja ŋɔ

²³ ó bol Israel tena be ŋɔ, “He bɛ nae, ne peera kɛɛ boohna noorare dɛɛ di.

²⁴ Ol bɛlbwa waa sewa ta baŋa kɛɛ kpɔɡ bini olchɔɡe aa kpoo la, baa won kpɔ o noo la ɛ wepɛɛ ane, kɛ he bɛ di.

²⁵ Nomɛlbwa waa di ol baa kpɔ ba ɛ saraha dɛ fuh tɛ mɛ noo la, bá pero le o nɛra bini.

²⁶ Bobɛlbwa haa ka so bwa, he bɛ jumbie kɛɛ ol bɛlbwa chal di.

²⁷ Nomɛlbwa waa di chal la chɛ kɛ bá pero le o nɛra bini.”

²⁸ Korowii berɔ ŋɔ Mosis be ŋɔ

²⁹ ó ŋɔ Israel tena be ŋɔ, “Nomɛlbwa dɛ ba deŋnesɔɔhna saraha ɛɛ tɛ mɛ naa, o bobɛla ɡboo dɛ́ ɛ n kwa.

³⁰ Naate ɡbaɡba kpɔ kon la noo ne o bambile ba tɛ mɛ. Ó kpɔ ba che saraha kon la sie, dɛ́ ɡɔɔ o bambile la dɛ́ viiɡu nyundua n sie.

³¹ Sɔfo la fuh noo la saraha kon la ta, kɛ o bambile la te, Arɔn ne o bibaala konee.

³² O nadiɡ hwii la ɛ sɔfo la dibɔr waa dɔa deŋnesɔɔhna saraha la ta.

³³ Sɔfo waa kpɔ chal la ne noo la ɛ saraha laanee chɛ kɛŋɔ o dɔ o diɡ hwii la.

³⁴ Deŋnesɔɔhna saraha Israel tena aa ɛ bwa la, n le o bambile maa ŋɔa baa ɡɔɔro nyundua dɛ viiɡu n sie, ne o hwii la cheɡ á ɛ Arɔn ne o bibaala dibɔr saŋ bɛlbwa dɛɛ la Israel tena saraha kwaa ta.”

³⁵ Gɛ bɔra nɔɔ ɛ Arɔn ne o bibaala dibɔra dɛ le saraha kwaa baa fuah tɛ Korowii, awola baa den fuɡe noo do ba nyuune ta dɛ́ do ba sɔfore ta.

³⁶ Awola tenten baa fuɡe noo do ba nyuune ta laanee Korowii ŋɔ Israel tena be ŋɔ bá kpɔ ɡɛ bɔra la dɛɛ tɛɛ ba. A ɛ waa aa chɛ kɛŋɔ á chɔ le saŋ bɛlbwa dɛɛ la, ba naanar baa ka ba te bwa bini.

³⁷ Waa aa chɔ le tɛ saraha kwaa baa dɛ fuah, ne mea saraha ne wechɔɡa kpɔe dɛ kɛ saraha, ne bolchɔɡe dii saraha, ne nɛn sɔfore ta doe saraha, dɛ deŋnesɔɔhna saraha laanee la.

³⁸ Sinai Bwejen pua hɛŋle ɡbo harɛ ta belaa Korowii kpɔ ɡɛ waa nɔ tɛ Mosis awola tenten waa do Israel tena ŋɔ bá kpɔ ba saraha kwaa baa tɛo la.