Lewi Dea Tena 6 - mzwDBL

¹ Korowii berɔ ŋɔ Mosis be ŋɔ,

² “Dɛ nomɛl kpɔ komɛl tɛ o dɔŋ ŋɔ o kpɔ cheɡ, asɛ naate neɡro dɛ kpɔ berɛ o kon kɛɛ dɛ ŋwɛo, kɛɛ dɛ faahro waa, o ɛ wechɔɡa dɛ jo n nɛ.

³ Kɛɛ dɛ komɛl ɡe nyoɡrɔ o kpaah o ta kasinteŋ dii, kɛɛ dɛ ŋwɛɛ pɛɛpɛɛ waane ta, kɛɛ dɛ wechɔɡa aa do kɛŋɔ anɔ bini bɛlbwaa yoo,

⁴ dɛ o di bolchɔɡe. A chɛ kɛ o berɛ kwaa waa ŋwɛa, kɛɛ dɛ faah nɛra, ne anɔ la waa kpɔa tɛo ŋɔ o cheɡ kɛɛ anɔ la aa nyoɡra o kpaah la,

⁵ kɛɛ waane waa ŋwɛɛ a ta pɛɛpɛɛ. Awola waa kpɔ o bolchɔɡe dii saraha ka tɛ sɔfo la, a chɛ kɛ o berɛ kwaa la bwa tɛ naate, dɛ́ bɔne anɔ la waa bera tɛ la dɔŋa bini anue, dɛ́ bɔ bɔrbeŋkpoŋ ja a ta.

⁶ A chɛ kɛ naate lawɛ pebal waa wola kirihiah bɛlbwa dii o yoɡ do ɡɛ baa maɡa la ba tɛ sɔfo la, ásɛ o kpɔ ba ɛ bolchɔɡe dii saraha tɛ men Korowii dɛ́ kpɔ bɔ o wechɔɡa la kem.

⁷ Gɛɛ sɔfo la ɛɛ ba ɛɛ dɛ́ soŋe a ɡɛ wechɔɡa nɔ bɛlbwa naate aa ɛa dɛ di bolchɔɡe n be la ásɛ n kpɔ kɛo.”

Saraha kwaa baa dɛ fuah wa

⁸ Korowii berɔ ŋɔ Mosis be ŋɔ,

⁹ “Do Arɔn ne o bibaala kɛŋɔ ŋwɛnɛre aa chɔ le tɛ saraha kwaa baa dɛ fuah laanee nɔ. A chɛ kɛ kwaa la dawɛ kafola waa lɔ saraha kon la ta awola la bwa tɔɔ ba per, dɛ́ ɡel nii la ɛɛ hɔ dɛ bɛ dime bwa.

¹⁰ Ásɛ sɔfo la kpɔ o yapepoŋ waa doo mun ta ne o batakaarejaŋ ompoŋ do, dɛ́ laa tɔɔ la pa le saraha kon la bini bil o keŋkeŋ.

¹¹ Dɛ berɛ ka laa laala waa doa la foo bil dɛ́ kpɔ anfala do, ásɛ dɛ ba kpɔ tɔɔ la le ka ta bela baa soɡa la dahara bela baa ɛo o do wer.

¹² A chɛ kɛ ba ɡel nii la ɛɛ hɔ saraha kon la ta dɛ bɛ dime bwa. Chɔɔ bɛlbwa la, a chɛ kɛ sɔfo la pa daa do nii la ta, ásɛ dɛ kpɔ saraha kwaa baa dɛ fuah la dawɛ a ta, dɛ́ kpɔ deŋnesɔɔhna saraha noorare la ɡe ja a ta fuh.

¹³ Nii la chɛ kɛ aa hɔ saraha kon la ta saŋ bɛlbwa dɛ bɛ dime bwa.”

Mea saraha wa

¹⁴ Korowii berɔ ŋɔ Mosis be ŋɔ, “Ŋwɛnɛre aa chɔ le tɛ mea saraha la ɡee nɔ. Arɔn bibaala la chɛ kɛŋɔ bá kpɔ ba n sie saraha kon la sie ba tɛ mɛ.

¹⁵ Sɔfo la bɛl ɛ men baa nama a kper kɛrɛdɛ noo ja a ta nɔndel, dɛ́ kpɔ daawiile a sɔɔh aa soma dawɛ mea saraha kwaa la bwa ta, dɛ́ fuah saraha kon la ta, á baɡle kɛŋɔ a bwa ɛ n kwa a sɔɔh ɛɛ do men Korowii som.

¹⁶ Arɔn ne o bibaala di anɔ la aa kaa la. Kɛ a chɛ kɛ ba dia bobɛl waa do ɡoroŋ n Dea Cheremibɔr la dembaah, dɛ́ bɛ iisi a ta do.

¹⁷ Anee n kpɔ tɛ sɔfore kɛŋɔ ba dibɔr dɛ le saraha kwaa baa fuah dɛɛ tɛ mɛ la ta. A do ɡoroŋ kɛrɛdɛ kɛŋɔ wechɔɡa kpɔe dɛ kɛ saraha, ne bolchɔɡe dii saraha ken.

¹⁸ Anɔ ɛ waa dɛ chɔ tɛ Arɔn bibaala ne o naanar bibaala baa ka ba saŋ bɛlbwa. Banee dɔ dibɔr saraha kwaa baa kpɔ ba fuah la ta. Nɛmpɛɛ kɛɛ komɛlbwa waa kpɔ o te leɡa la, dɛ o dɔ wa.”

¹⁹ Korowii berɔ ŋɔ Mosis be ja ŋɔ,

²⁰ “Awola baa fuɡe noo do Arɔn nyu ta dɛ ɛo Sɔfonomoa la, o ne o bibaala kpɔ ɡɛ kwaa nɔ ba tɛ mɛ. Men baa nama a kper kɛrɛdɛ dɛ ɛ kuruwa del ba ɛ mea saraha tɛ mɛ, ɡɛ baa dɛ ɛa tɔperee te bwa la. Bá kpɔ a pera ɛ chɔɔbɔr, dɛ́ kpɔ a kar ɡe ɛ jɔmɔra.

²¹ Bá kpɔ noo koo a ta ásɛ dɛ hala, dɛ́ mɔne a bini dɛ́ kpɔ ba ɛ mea saraha a sɔɔh aa soma kohona dɛɛ lɛ men Korowii sie.

²² O bibaa bɛlbwa waa ba chiɡ o naa ta dɛ ɛ Sɔfonomoa la chɛ kɛ wɛɛ ɛa. A ɛ n kwa saŋ bɛlbwa, a chɛ kɛ ba fuh a bwa sekwaraa.

²³ Mea saraha bɛlbwa sɔfo aa ɛ tɛ mɛ la ta dii doe, fuih chɛ kɛ ba fuh a bwa.”

Wechɔɡa kpɔe dɛ kɛ saraha wa

²⁴ Korowii ŋɔ Mosis be ja ŋɔ,

²⁵ “Ŋɔ Arɔn ne o bibaala be ŋɔ, ŋwɛnɛre aa chɔ le tɛ wechɔɡa kpɔe dɛ kɛ saraha laanee nɔ. Wechɔɡa kpɔe dɛ kɛ saraha kon la chɛ kɛ ba teŋe o baŋa n sie, bela baa kpo kwaa dɛɛ fuah la. O ɛ saraha waa do ɡoroŋ kɛrɛdɛ.

²⁶ Sɔfo waa kpɔ saraha kon tɛ Korowii la, onee dɛ́ diu. A chɛ kɛ o diu bela waa do ɡoroŋ n Dea Cheremibɔr la dembaah.

²⁷ Nɛmpɛɛ kɛɛ komɛlbwa leɡe ol la aa, o dɔ wa. O chal ɡe ta yal kon ta naa, naate chɛ kɛ o chɛɡɔ bela do ɡoroŋ.

²⁸ Dɛ vii nee ba daa ol la aa, bá paɡro. Dɛ buni kon ɡee yaa, bá kwiu kɛrɛdɛ dɛ́ kpɔ nee yaɡlo.

²⁹ Baa bɛlbwa waa le sɔfore dea la dɔ ŋwɛnɛ kɛŋɔ o di ane. A do ɡoroŋ kɛrɛdɛ.

³⁰ Kɛ wechɔɡa kpɔe dɛ kɛ saraha komɛlbwa baa kpɔ o chal jo n Dea Cheremibɔr, dɛ́ kpɔ soŋe wechɔɡa n be Boɡoroŋ bela la te ta chɛ kɛ ba dia. Fuih chɛ kɛ ba fuah.”