Lewi Dea Tena 5 - mzwDBL

¹ Korowii berɔ ŋɔ, “Dɛ nomɛl dɔ waane, asɛ bɛl jemɛ a bini ba yerɔ ŋɔ o ba di danseɛ o ta waa waa naa kɛɛ dɛ jemɛ la bolaa, dɛ o ɛ wechɔɡa dɛ chɛ deŋnetɛra.

² Dɛ nomɛlbwa berɔ leɡe ol waa wola chɛɛ kɛŋɔ ba diu lale, dɛ kpɔɡ bini ol kɛɛ dem kon, ne anɔ la aa dɛ tuuɡi tea ta ne anɔ la aa dɛ huuh bɛlbwa dɛ o ta nae yaa, o kah doŋa dɛ di bolchɔɡe.

³ Nomɛlbwa leɡe doŋa aa dɛ le nɛn bwara ta, komɛlbwa aa ɡela doŋa do naate nɛɛ dɛ o ta nae, a habɔɔ dɛ berɛ ba na naa, dɛ o di bolchɔɡe.

⁴ Kɛɛ nomɛlbwa piɡro ŋwɛɛ kɛŋɔ wɛɛ ɛ waanee, wedɛɛɡa kɛɛ wechɔɡa, kɛɛ anɔ la bɛlbwa waa piɡra ŋwɛɛ dɛ berɛ ba lii la, dɛ o di bolchɔɡe.

⁵ Nomɛlbwa waa di ɡɛ waa nɔ bini bɛlbwa bolchɔɡe la, ó bol ɡɛ wechɔɡa la nɛra baah ta,

⁶ dɛ́ lawɛ pelor kɛɛ bohlor le o kondɛɛra bini ba ɛ wechɔɡa kpɔe dɛ kɛ saraha, ásɛ sɔfo la kpɔ soŋe naate wechɔɡa n be, ásɛ n kpɔ kɛo.

⁷ Dɛ waa pee laanee dɔ aa, ó nyin kulukuku bii anɛ kɛɛ borɔnoma bii anɛ, dɛ́ kpɔ ba ɛ saraha bɔ o wechɔɡa la kem. Beŋkpoŋ che tɛ wechɔɡa kpɔe dɛ kɛ saraha, ásɛ beŋkpoŋ ɡe che tɛ saraha baa fuah dɛɛ tɛ mɛ la.

⁸ Ó kpɔa ba tɛ sɔfo la, ásɛ o tɔ sie kpɔ wechɔɡa kpɔe dɛ kɛ saraha kon la ɛ mɔɔ. Ó menɛ o baŋa dɛ bɛ o nyu la tor le,

⁹ ásɛ dɛ kpɔ chal la ane ɛ saraha kon la keŋkeŋ. Ásɛ dɛ fuɡe chal la kabora la ta saraha kon la mun ta. Anɔɔ ɛ wechɔɡa kpɔe dɛ kɛ saraha.

¹⁰ Sɔfo la berɛ kpɔ onɔ la ɡe dɛ ɛa ŋwɛnɛ baa kpɔ o ta dɛɛ ɛ saraha baa dɛ fuah la ta, dɛ́ soŋe naate wechɔɡa waa ɛa la tɛo, ásɛ n kpɔ kɛo.

¹¹ Dɛ waa won dɔ kulukuku bii anɛ kɛɛ borɔnoma bii anɛ la aa, ó kpɔ men baa nama a kper kɛrɛdɛ dɛ ɛ kuruwa del ba ɛ o wechɔɡa kpɔe dɛ kɛ saraha. O bɛ noo kɛɛ daawiile a sɔɔh aa soma ane bɛlbwa do a ta, dɛkalkɛ a ɛ wechɔɡa kpɔe dɛ kɛ saraha.

¹² Ó kpɔ ba tɛ sɔfo la ásɛ o ɛ men la nɔn del á baɡle kɛŋɔ n lɛ a bwa. Ásɛ dɛ fuah saraha kon la ta ja saraha kwaa baa kpɔa ba tɛ mɛ la ta. Anɔɔ ɛ wechɔɡa kpɔe dɛ kɛ saraha.

¹³ Gɛɛ sɔfo la ɛɛ ba ɛɛ dɛ́ kpɔ soŋe ɡɛ wechɔɡa nɔ bini bɛlbwa naate aa ɛa la, ásɛ n kpɔ kɛo. Men la kar ɛ sɔfo la kwa ɡɛ baa dɛ ɛ mea saraha la.”

Bolchɔɡe dii saraha wa

¹⁴ Korowii ŋɔ Mosis be ja ŋɔ,

¹⁵ “Dɛ nomɛlbwa ɛ wechɔɡa o ta kwaa a fe aa chɛ kɛŋɔ ó kpɔ ba ɛ saraha tɛ mɛ ɡɛ aa chɛa dɛ o laa saahna aa, ó lawɛ pebal waa wola kirihiah bɛlbwa dii ba ɛ saraha, dɛ́ kpɔ bɔ o wechɔɡa kem. O yoɡ chɛ kɛ ó do ɡɛ baa maɡa bil Korowii Dea la aa doa. O ɛ bolchɔɡe dii saraha.

¹⁶ A chɛ kɛ ó bɔ wubwa kwaa waa wola ɛɛ la, ásɛ dɛ berɛ bɔne anɔ la waa ɛa la dɔŋa bini anue, dɛ́ kpɔ bɔrbeŋkpoŋ ja a ta. Dɛ́ kpɔ a bwa ka tɛ sɔfo. Ásɛ sɔfo la kpɔ pebal la ɛ naate bolchɔɡe dii saraha, dɛ́ kpɔ soŋe o wechɔɡa, ásɛ n kpɔ kɛo.

¹⁷ Dɛ nomɛlbwa jo waa maa do ba ŋɔ ba bɛ ɛ la bini bɛlbwa ta hale dɛ o ta nae yaa, dɛ o di bolchɔɡe dɛ chɛ deŋnetɛra.

¹⁸ Naate lawɛ pebal waa wola kirihiah bɛlbwa dii, o yoɡ do ɡɛ baa maɡa la dɛ́ kpɔ ka tɛ sɔfo la, ásɛ o kpɔ ka ɛ naate la bolchɔɡe dii saraha. Gɛɛ sɔfo la ɛɛ ba ɛɛ dɛ soŋe naate wechɔɡa waa wola saahnɛ ɛ la ásɛ n kpɔ kɛo.

¹⁹ Anɔɔ ɛ bolchɔɡe dii saraha. Naate la ɛ wechɔɡa dɛ jo men Korowii nɛɛ dɛ di bolchɔɡe.”