Lewi Dea Tena 4 - mzwDBL

Wechɔɡa kpɔe dɛ́ kɛ saraha wa

¹ Korowii berɔ ŋɔ Mosis be ŋɔ

² ó ŋɔ Israel tena be ŋɔ, “Dɛ nomɛlbwa ɛ wechɔɡa dɛ jo waa maa do ba ŋɔ ba bɛ ɛ la bini bɛlbwa ta dɛ o laa saahnaa, waa aa chɛ kɛ o ɛ laanee nɔ.

³ Dɛ Sɔfonomoa ɛa aa, o ɡelɔ nɛra la bwa di bolchɔɡe. A chɛ kɛŋɔ ó lawɛ nabal waa wola kirihiah bɛlbwa dii, dɛ́ kpɔ ɛ wechɔɡa kpɔe dɛ kɛ saraha tɛ mɛ o wechɔɡa la wa.

⁴ Ó lawɛ nabal la ba n sie n Dea Cheremibɔr la doonyoa bɔr bela, ásɛ dɛ kpɔ nɔn dawɛ o nyu ta, dɛ́ teŋe o baŋa n sie.

⁵ Sɔfo nomoa la kpɔ nabal la chal ane kaa n Dea Cheremibɔr la bini,

⁶ dɛ́ kpɔ o nonii do chal la ta, dɛ́ ɛ ane merɛ pateesan waa lɔ n Tɛnte Dea la sie kera anuanɛ n sie.

⁷ Ásɛ sɔfo la ɛ chal la ane ɛ kwaa aa paaɡe kon baa dɛ fuh daawiile a sɔɔh aa soma o ta la loŋkoni ta dɛ do n sie n Dea Cheremibɔr la bini la. Chal la kar la, ó le dɛ́ ka fuɡa ta o mun ta n doonyoa bela.

⁸ Ó laa wechɔɡa kpɔe dɛ kɛ saraha nabal la noorare bwa kpɔ, o noyal ne anɔ la aa lɔ o tea bini bwa,

⁹ ne o kporombie ne noorare aa tɔ a ta, ne o pwɛ bela waa wera. Ó kpɔ o pwɛ la ne o kporombie la pɛ dɔŋa nɛ,

¹⁰ ɡɛ tenten baa laa deŋnesɔɔhna saraha nao noo dɛɛ kpɔ o ta la. Ásɛ sɔfo la fuah kon baa dɛ ɛ saraha o ta la ta.

¹¹ Kɛ nao la tɔn ne o ol la bwa, ne o nyu ne nakpale, ne o tea bini kwaa dɛ o bena te bwa,

¹² ne nao la kar te bwa chɛ kɛ sɔfo la kpɔ le kaa bela baa soɡa la dahara baa ɛo o do wer dɛ fuɡe tɔɔ kaa ta la. Ásɛ dɛ mar nii dɛ fuuh.

¹³ Dɛ Israel tena bwa ɛ wechɔɡa, dɛ jo waa maa do ba ŋɔ ba bɛ ɛ la bini bɛlbwa ta dɛ ba laa saahna, hale dɛ ba ta ɡɛ waa la nae yaa, dɛ ba di bolchɔɡe.

¹⁴ Dɛ ba berɔ ba na kɛŋɔ ba ɛ wechɔɡa aa, bá bwa pɛ dɛ lawɛ nabal ba n Dea Cheremibɔr doonyoa bɔr bela, dɛ́ kpɔ ba ɛ ba wechɔɡa kpɔe dɛ kɛ saraha.

¹⁵ Nomonome baa chɔ ba nyoo la kpɔ nɔɔra dawɛ nao la nyu ta n sie, ásɛ mɔɔ dɛ teŋe o baŋa bela.

¹⁶ Sɔfonomoa la kpɔ nao la chal la ane kaa n Dea Cheremibɔr la bini,

¹⁷ dɛ́ kpɔ o nonii do chal la ta, dɛ́ ɛ ane ta pateesan waa lɔ bela la sie kera anuanɛ n sie.

¹⁸ Sɔfo la kpɔ chal la ane ɛ kwaa aa paaɡe kon baa dɛ fuh daawiile a sɔɔh aa soma o ta la loŋkoni la ta n sie, n Dea Cheremibɔr bela. Dɛ́ fuɡe chal la kabora ka ta kon baa dɛ fuh saraha kwaa o ta la mun ta, n Dea Cheremibɔr la doonyoa bɔr bela.

¹⁹ Ó laa nao la noorare bwa kpɔ, ásɛ dɛ fuah saraha kon la ta,

²⁰ ásɛ dɛ ɛ nao nɔ ɡɛ tenten waa ɛ wechɔɡa kpɔe dɛ kɛ saraha nao la. Gɛ ŋwɛnɛ nɔ taa sɔfo la ɛɛ ba kpɔe, dɛ́ soŋe ba wechɔɡa n be ásɛ n kpɔ kɛ ba.

²¹ Ó kpɔ nao la kaa bela baa soɡa la dahara, dɛ́ ka fuuh kɛŋɔ waa fuh loɡla kon la. Anɔ ɛ wechɔɡa kpɔe dɛ kɛ saraha aa kpɔ Israel tena bwa wechɔɡa kɛ ba.

²² Dɛ nomonnyu bɛl ɛ wechɔɡa, dɛ jo waa men Korowii waa dɛ tom mɛ la aa do ba ŋɔ ba bɛ ɛ la bini bɛlbwa ta dɛ o laa saahna aa, o di bolchɔɡe.

²³ Dɛ o berɔ ba na kɛŋɔ o ɛ wechɔɡa aa, a chɛ kɛ o lawɛ bombal waa wola kirihiah bɛlbwa dii ba ɛ saraha.

²⁴ Ó kpɔ nɔn dawɛ bombal la nyu ta, dɛ́ teŋe o baŋa bela baa kpo kwaa dɛɛ fuah la bɔr n sie. Anɔ nɔ ɛ wechɔɡa kpɔe dɛ kɛ saraha.

²⁵ Ásɛ sɔfo la kpɔ o nonii do chal la ta, dɛ́ kpɔ ane ɛ kwaa aa paaɡe kon baa dɛ fuh saraha o ta la loŋkoni ta. Ásɛ dɛ fuɡe a kabora ta o mun ta.

²⁶ Ó kpɔ o noo la bwa, ásɛ dɛ fuah saraha kon la ta ɡɛ baa ɛa dɛɛ fuh deŋnesɔɔhna saraha kwaa la. Gɛɛ sɔfo la ɛɛ ba ɛɛ, dɛ́ soŋe naate la wechɔɡa n be, ásɛ n kpɔ kɛo.

²⁷ Dɛ dansaa bɛlbwa ɛ wechɔɡa, dɛ jo waa maa do ba ŋɔ ba bɛ ɛ la bini bɛlbwa ta dɛ o laa saahna aa, dɛ o di bolchɔɡe.

²⁸ Dɛ o berɔ ba na kɛ o ɛ wechɔɡa aa, a chɛ kɛ o lawɛ bohnee waa wola kirihiah bɛlbwa dii ba ɛ saraha o wechɔɡa la wa.

²⁹ Ó kpɔ nɔn dawɛ bohnee la nyu ta, dɛ́ teŋe o baŋa bela baa dɛ kpo saraha kwaa dɛɛ fuah la.

³⁰ Ásɛ sɔfo la kpɔ o nonii do chal la ta, dɛ́ ɛ ane ɛ kwaa aa paaɡe kon baa dɛ fuh saraha kwaa o ta la loŋkoni ta. Ásɛ dɛ fuɡe a kabora la ta o mun ta.

³¹ Ó laa o noo la bwa kpɔ, ɡɛ baa dɛ ɛ deŋnesɔɔhna saraha kon noo la, ásɛ sɔfo la fuah saraha kon la ta a sɔɔh do som men Korowii be. Gɛɛ sɔfo la ɛɛ ba ɛɛ, dɛ́ soŋe naate wechɔɡa la n be, ásɛ n kpɔ kɛo.

³² Dɛ pebie ɡee naate dɔ dɛ́ kpɔ ba ɛ o wechɔɡa saraha aa, ó lawɛ onnee waa wola kirihiah bɛlbwa dii.

³³ Ó kpɔ nɔn dawɛ o nyu ta, dɛ́ teŋe o baŋa bela baa kpo kwaa dɛɛ fuah la bɔr, dɛ́ kpɔ ɛ wechɔɡa kpɔe dɛ kɛ saraha.

³⁴ Ásɛ sɔfo la kpɔ nonii do chal la ta, dɛ́ ɛ ane ɛ kwaa aa paaɡe kon baa dɛ fuh saraha kwaa o ta la loŋkoni ta. Ásɛ dɛ fuɡe a kabora la ta o mun ta.

³⁵ Ó laa o noo la bwa kpɔ, ɡɛ baa dɛ ɛ deŋnesɔɔhna saraha kon noo la, ásɛ sɔfo la kpɔ ja kwaa baa kpɔa ba ɛ saraha dɛ́ fuah tɛ mɛ la ta. Gɛɛ sɔfo la ɛɛ ba ɛɛ, dɛ́ soŋe naate wechɔɡa waa ɛa n be ásɛ n kpɔ kɛo.”