Lewi Dea Tena 3 - mzwDBL

Deŋnesɔɔhna saraha wa

¹ Korowii berɔ ŋɔ, “Dɛ nomɛlbwa kpɔ nao ba, dɛ́ ba ɛ deŋnesɔɔhna saraha tɛ mɛ naa, ó lawɛ ombal kɛɛ onnee waa wola kirihiah bɛlbwa dii, dɛ́ kpɔ ba n sie.

² Naate la waa dɛ ba ba ɛ saraha la kpɔ o nɔn dawɛ nao la nyu ta, dɛ́ teŋe o baŋa n Dea Cheremibɔr la doonyoa bɔr bela n sie. Ásɛ Arɔn bibaala sɔfore la ɛ chal la merɛ saraha kon la baŋne anaarɛ la bwa ta.

³ Deŋnesɔɔhna saraha nao la pera haa fuh tɛ mɛ laanee o noyal bwa,

⁴ ne o kporombie dɛ noorare aa tɔ a ta bwa, ne o pwɛ bela waa wera la.

⁵ Ásɛ Arɔn bibaala la fuah ja anɔ la aa lɔ saraha kon la ta dɛɛ fuh la ta. Anɔɔ ɛ saraha ba yon fuah a sɔɔh ɛɛ do som men Korowii be.

⁶ Dɛ nomɛl lawɛ pee kɛɛ booh dɛɛ ba ba ɛ deŋnesɔɔhna saraha tɛ mɛ naa, ó lawɛ ombal kɛɛ onnee waa wola kirihiah bɛlbwa dii.

⁷ Dɛ pebie nee o ba naa, ó kpɔ ba n sie,

⁸ dɛ́ kpɔ nɔn dawɛ o nyu ta, dɛ́ teŋe o baŋa n Dea Cheremibɔr la doonyoa bɔr bela. Ásɛ Arɔn bibaala la ɛ chal la merɛ saraha kon la baŋne anaarɛ la bwa ta.

⁹ Deŋnesɔɔhna saraha pebie la haa fuh o pera tɛ mɛ laanee o no, ne o muŋɡo ne noo aa lɔ o ta bwa, dɛ o noyal la bwa,

¹⁰ ne o kporombie anɛ ne noorare aa tɔ a ta, ne o pwɛ bela waa wera, dɛ laa a ne o kporombie la bwa laa kpɔ a pɛ dɔŋa nɛ.

¹¹ Sɔfo la fuah saraha kon la ta bela kɛŋɔ mea saraha baa fuah dɛɛ tɛ mɛ.

¹² Booh ɡee naate lawɛ dɛ ba ɛ saraha aa, o kpɔ ba n sie.

¹³ Naate la kpɔ nɔn dawɛ o nyu ta, dɛ́ teŋe o baŋa n Dea Cheremibɔr la doonyoa bɔr bela. Ásɛ sɔfore la ɛ o chal la merɛ saraha kon la baŋne anaarɛ la bwa ta.

¹⁴ Booh la naate aa kpɔ ba ɛ saraha pera baa fuh tɛ mɛ laanee, o noyal ne noorare aa lɔ o tea bini bwa,

¹⁵ ne o kporombie anɛ ne noorare aa tɔ a ta, ne o pwɛ waa wera, dɛ laa o kporombie la bwa laa kpɔ a pɛ dɔŋa nɛ.

¹⁶ Sɔfo la fuah saraha kon la ta bela, kɛŋɔ mea saraha baa fuah dɛɛ tɛ men Korowii a sɔɔh ɛɛ do n som kohona la. Ol la noorare bwa ɛ n kwa, bá fuah.

¹⁷ A ɛ Mmara dɛ́ chɔ le tɛ he ne he naanar baa ka ba bwa. Bobɛlbwa haa lole bwa, a ta chɛ kɛŋɔ hé di ol noo kɛɛ o chal.”