Lewi Dea Tena 16 - mzwDBL

Wechɔɡa Soŋa Korowii Be Ó Kpɔ Kɛ Tɔpejen

¹ Korowii berɔ bol waa Mosis be ɡɛ saŋ Arɔn bibaala banɛ aa wola ŋwɛnɛdɛɛɡe ta cheɡɛ ba Korowii sie dɛ serewe la habɔɔ.

² O ŋɔ, “Ŋɔ he dɔɔ Arɔn be kɛŋɔ, o bɛ pateesan waa tɔ Boɡoroŋ Tenten la habɔɔ jo kaa bela N Ne Nɛwɛnyina Fɔo Daka tɔ la aa lole la warawara, dɛ́ ba sewɛ. Dɛkalkɛ Daka la tɔ doa belaa n che dɛɛ ba he be bam ta.

³ Dɛ wɛɛ won jo Korowii Dea belaa, atane ó kpo nabale dɛ́ ɛ wechɔɡa kpɔe dɛ kɛ saraha, ne pebal dɛ́ ɛ saraha baa fuuh tɛ mɛ la mɔɔ.

⁴ A chɛ kɛ ó do sɔfo laala aa do ɡoroŋ baa kpɔ yapondɛɛɡe nyara. O yapebora waa lawɛ o bwadabi, ne batakaare baa dɛ doo mun ta ne o kiriso, dɛ o yal waa kpɔ vɔwɛ nyu. A do ɡoroŋ nomanta, a chɛ kɛ ó sɔ nee mɔɔ dɛ́ doa.

⁵ Israel tena la chɛ kɛŋɔ bá tɛ Arɔn bombala anɛ ó kpɔ ɛ wechɔɡa kpɔe dɛ kɛ saraha, dɛ pebal waa kpɔ ɛ saraha baa fuah la.

⁶ Árɔn tɔ sie kpɔ nabale la ba ó ɛ wechɔɡa kpɔe dɛ kɛ saraha, dɛ́ kpɔ soŋe o ne o dem tena wechɔɡa, ásɛ n kpɔ kɛ ba.

⁷ Ásɛ dɛ lawɛ boohna anɛ la ba n Dea Cheremibɔr doonyoa bela n sie.

⁸ Dɛ́ bil daa ásɛ beŋkpoŋ ɛ n kon, nɛɛte la ɡe ɛ onɔ la baa kpɔ nɛra la bwa wechɔɡa dawɛ o nyu ta.

⁹ Árɔn kpo booh baa bil daa o ɛ n kon la, dɛ́ kpɔ ɛ wechɔɡa kpɔe dɛ kɛ saraha.

¹⁰ Ásɛ booh baa bil daa dɛ lawɔ ba kpɔ nɛra la bwa wechɔɡa dawɛ o nyu ta la, bá lawɛ o ne o siwi ba n sie, dɛ́ kpɔɔ ka ta pua hɛŋle ɡbo harɛ ta.

¹¹ Arɔn chɛ kɛ ó lawɛ nabale la waa kpɔ ba ɛ o ɡbabir wechɔɡa kpɔe dɛ kɛ saraha, dɛ́ soŋe o ne o dem tena wechɔɡa name, dɛ́ teŋe o baŋa, dɛ́ kpɔ ɛ wechɔɡa kpɔe dɛ kɛ saraha la.

¹² Ó kpɔ kon buh nii le saraha kon la ta n sie, dɛ́ ɛ daawiile a sɔɔh aa soma ba nama a kper kɛrɛdɛ nɔndela anɛ, dɛ́ kpɔ jo ba Boɡoroŋ Tenten pateesan la habɔɔ.

¹³ Ó kpɔ daawiile la do nii la ta n sie bela, ásɛ a chuu la bɔle N Ne Nɛwɛnyina Fɔo Daka tɔ la ta, ásɛ o bɛ o tɔ la na dɛ́ ba sewɛ.

¹⁴ Ó kpɔ nonii ɛ nao la chal la ane merɛ N Ne Nɛwɛnyina Fɔo Daka tɔ la ta o sie, dɛ́ berɛ merɛ ane ɡe o sie tenten kera anuanɛ.

¹⁵ A habɔɔ la, ó kpɔ booh la, dɛ́ kpo ɛ wechɔɡa kpɔe dɛ kɛ saraha tɛ nɛra la, dɛ́ kpɔ o chal la ba pateesan la habɔɔ, dɛ́ ɛa ɡɛ tenten waa ɛ nao la chal la. Ó merɛ ane N Ne Nɛwɛnyina Fɔo Daka tɔ la ta, dɛ́ merɛ ane ɡe o sie bela.

¹⁶ Gɛɛ wɛɛ ba ɛɛ, dɛ́ fee doŋa ne deŋnekpeɡ, ne wechɔɡa bɛlbwa soo siwi Israel tena aa ɛa bwa ta Boɡoroŋ Tenten bela. A chɛ kɛ ó ɛ ɡɛ tenten n Dea Cheremibɔr la bini ɡe, waa cheɡɛ a baah ta nomanta, a bwaa kah doŋa.

¹⁷ Arɔn aa ka jo Boɡoroŋ Tenten bela dɛ ka soŋe o ne o dem tena, ne Israel tena bwa wechɔɡa la, nomɛlbwa ta chɛ kɛ ó do n Dea Cheremibɔr la bini ka tel kɛŋɔ waa ba le mɔɔ.

¹⁸ Wɛɛ berɔɔ le ba saraha kon la ta bela n sie, dɛ́ ba laa doŋa bɛlbwa kpɔ o ta. A chɛ kɛ ó kpɔ nao la chal la ane ne booh la chal ane, dɛ́ kpɔ ɛ kwaa aa paaɡe saraha kon la loŋkoni bwa ta.

¹⁹ Ó kpɔ o nonii ɛ chal la ane merɛ saraha kon la ta kera anuanɛ, dɛ́ laa doŋa kpɔ o ta. Gɛɛ chɛ kɛŋɔ ó ɛ dɛ laa Israel tena wedoŋa bwa kpɔ saraha kon la ta, dɛ́ leo cheɡ o do ɡoroŋ.

Booh waa lɛ Israel tena wechɔɡa dawɛ o nɛɛ kaa wa

²⁰ Arɔn laa ba doŋa kpɔ Boɡoroŋ Tenten bela, ne n Dea Cheremibɔr la bini dɛ saraha kon la ta tonaa, a chɛ kɛ ó kpɔ booh la o siwi aa lole la ba che n sie.

²¹ Ó kpɔ nɔɔra dawɛ booh la nyu ta, ásɛ dɛ bol Israel tena chɔɡre, ba wechɔɡa ne ba deŋnekpeɡ bwa baa ɛa dɛ ta o nyu ta, dɛ́ kpɔ do nomɛl nɔn ta, ásɛ o teɡɔ kaa pua hɛŋle ɡbo harɛ ta.

²² Naate la ɛɛ kpɔɔ ka ta harɛ nomɛlbwa aa wola toole o ta, ásɛ ba wechɔɡa bwa dawɛ booh la nɛ ó kpɔ kaa.

²³ Arɔn tonaa, ó berɛ jo n Dea Cheremibɔr la bini, dɛ́ ka foo sɔfo laala waa kpɔa do mɔɔ dɛ jo Boɡoroŋ Tenten bela la bil.

²⁴ A chɛ kɛ ó ka sɔ nee bɔr waa do ɡoroŋ, dɛ́ berɛ kpɔ laalafala do. Ásɛ dɛ le ka kpɔ o ne Israel tena saraha kwaa baa fuah la fuh, dɛ́ soŋe o ne Israel tena bwa wechɔɡa, ásɛ n kpɔ kɛ ba.

²⁵ Ó berɛ kpɔ ol waa kpɔa ɛ saraha la noo ɛ wechɔɡa kpɔe dɛ kɛ saraha, dɛ́ fuah saraha kon la ta.

²⁶ Naate la ɡe waa kpɔ booh la kaa ka ta pua hɛŋle ɡbo harɛ ta la chɛ kɛ ó chɛɡɛ o laala dɛ́ sɔ nee mɔɔ dɛ́ ba bela baa soɡa la.

²⁷ Nabale la ne booh baa kpɔa ɛ wechɔɡa kpɔe dɛ kɛ saraha, dɛ kpɔ a chal ba Boɡoroŋ Tenten bela ba soŋe wechɔɡa la, a ɡe chɛ kɛ bá chea le bela baa soɡa la dahara dɛ́ ka fuah. A tɔne ne ola, dɛ a tea bini kwaa bwa chɛ kɛŋɔ bá fuah.

²⁸ Naate waa fuah la chɛ kɛ ó chɛɡɛ o laala dɛ́ sɔ nee mɔɔ dɛ́ berɛ ba bela baa soɡa la.

²⁹ A ɡɛ Mmarare nɔ chɛ kɛŋɔ á chɔ le tɛ heyaa saŋ bɛlbwa dɛɛ la. Korobinuanɛ te la tɔpera fi ta, a chɛ kɛ hé vɔwɛ nyoa dɛ bɛ toma bɛlbwa ɛ, Israel te kɛɛ hɔɔh bɛlbwa waa soɡe he binii yoo,

³⁰ dɛkalkɛ awola tɔpere laanee baa ba he wechɔɡa bwa soŋa, ásɛ dɛ laa he doŋa kpɔ he nɛ. Gɛɛ dɛɛ ba ɡela wechɔɡa bɛlbwa aa he nɛɛ do kpa men Korowii sie.

³¹ O ɛ tɔpere haa onɛ o ta dɛɛ vɔwɛ nyoa. Á ɛ Mmara dɛ́ chɔ tɛ heyaa saŋ bɛlbwa dɛɛ la.

³² Nɛn baa fuɡe noo do o nyu ta, dɛ doo sɔfore toma ta o ba chiɡ o mɛɛ naa ta kɛŋɔ Sɔfonomoa laanee chɛ kɛŋɔ ó soŋe tɛ nɛra. Ó kpɔ sɔfo laala baa kpɔ yapondɛɛɡa nyara la do,

³³ dɛ́ ɛ we-ɛɛla Boɡoroŋ Tenten bela ne n Dea Cheremibɔr bini dɛ saraha kon la ta, dɛ́ laa sɔfore la ne Israel tena la wechɔɡa bwa kpɔ ba nɛ.

³⁴ Mmarare nɔ chɛ kɛŋɔ hɛ́ɛ teŋɛ a ta saŋ bɛlbwa dɛɛ la. Bena bɛlbwa, kerabeŋkpoŋii chɛ kɛ bá soŋe Israel tena wechɔɡa bwa ń kpɔ kɛ ba.” Asɛ ba ɛ a bwa ɡɛ Korowii aa do Mosis ŋɔ ba ɛ la.