Lewi Dea Tena 12 - mzwDBL

Doŋa laa dɛ́ kpɔ haah waa lola nɛ

¹ Korowii berɔ ŋɔ Mosis be ŋɔ,

² ó ŋɔ Israel tena be ŋɔ, “Haah kpoŋe tea dɛ lolɛ bibaa laa, dɛ o kah doŋa tɔpera anuanɛ ɡɛ tenten o yon kah doŋa o bochɔɡa saŋ la.

³ Tɔpenuatoro wee la, bá teŋe bie la pen.

⁴ Doŋa ɛɛ do haah la nɛɛ tɔpera fifraatoro dɛ atoroo mɔɔ ba laa doŋa kpɔ o nɛ. A ta chɛ kɛ ó leɡe komɛlbwa waa do ɡoroŋ, kɛɛ dɛ́ jo Korowii Dea bela ka tel kɛŋɔ doŋa bɛlbwa aa le o nɛɛ mɔɔ.

⁵ Dɛ bihaah ɡee o lolɛ aa, yawanyoa anɛɛ wɛɛ ba doŋa kaeh kɛŋɔ o bochɔɡa saŋ la. Wɛɛ berɔ kah doŋa tɔpera fifraanumɛl dɛ anumɛl mɔɔ ba laa o doŋa la kpɔ o nɛ.

⁶ Tɔpere baa laa doŋa kpɔ o nɛɛ habɔɔ la, dɛ bibaalee kɛɛ bihaahnee yaa, haah la ɛɛ kpɔ pebie waa di benanyoa ba tɛ sɔfo n Dea Cheremibɔr doonyoa bela, ásɛ o kpɔ ɛ saraha baa dɛ fuah tɛ men Korowii, kɛɛ dɛ wechɔɡa kpɔe dɛ kɛ saraha ɡe yaa, ó kpɔ borɔnoma kɛɛ kulukuku ba.

⁷ Sɔfo la ɛɛ kpɔ naate saraha kwaa laanee ba n sie, dɛ́ ba fuah soŋe o wechɔɡa tɛo, ásɛ o chal aa fuɡo doŋa la bwa le o nɛ. Anɔɔ ɛ waa aa chɔ le dɛ tɛ haah bɛlbwa waa lolɛ baa kɛɛ haah la kɛŋɔ o ɛ.

⁸ Dɛ haah la aa won dɔ pebie aa, ó nyin borɔnomare anɛ kɛɛ kulukukure anɛ dɛ́ kpɔ bɛl ɛ saraha baa fuh tɛ mɛ, dɛ́ berɛ kpɔ onɔ la ɡe ɛ wechɔɡa kpɔe dɛ kɛ saraha. Gɛɛ sɔfo la ɛɛ ba ɛɛ dɛ́ soŋe naate wechɔɡa n be, ásɛ o doŋa bwa le o nɛ.”