Lewi Dea Tena 10 - mzwDBL

Nadab ne Abihu seo wa

¹ Arɔn bibaala Nadab ne Abihu kpɔ ba ɡbaɡba kwaa baa dɛ fuh daawiile a sɔɔh aa soma a bini ba buh nii, dɛ fuah tɛ Korowii dɛ jo Korowii kii nɛ kɛŋɔ baa wola an aŋwɛnɛ ta ɛɛ la.

² Anomanta, Korowii ɡelɔ nii le buɡ la ta, o sie bela dɛ ba fuuh ba, ba bwa serewe.

³ Ate, Mosis ŋɔ Arɔn be kɛŋɔ anɔ waa Korowii fa bol ŋɔ, “Nɛra baa dɛ ba n sie bwa la mɛɛ ɡeloo ba jemɛ kɛŋɔ n do ɡoroŋ. Baa dɛɛ duu mɛ nɛra la bwa siwi taa.” Asɛ Arɔn hel.

⁴ Belaa Mosis yerɛ baala banɛ bane baa dɛ yer ba Mesael ne Ɛlsafan. Arɔn mɛɛ bie Usiel biirii ban. O ŋɔ ba be ŋɔ, “Hé ba bonɔ dɛ́ ba che he nimanar le Korowii Dea sie bonɔ, dɛ́ kaa bane bela yaa soɡa nɔ dahara ka ta.”

⁵ Dɛ ba sɔfore batakaani ta lɔ ba bwara ta, asɛ ba ba kpɔ ba le kaa dahara ɡɛ Mosis aa bola la.

⁶ Belaa o ŋɔ Arɔn ne o bibaala Eliasa ne Itama be ŋɔ, “He bɛ he batakaani kɛɛ á baɡle kɛŋɔ he dɛ ɛ lwe. Hé lee he nyuune. He ɛ ɡɛ naa, hɛɛ serewoo ásɛ Korowii baah di nɛra nɔ bwa nɛ. Kɛ he lolanar ne Israel tena te bwa dɔ ŋwɛnɛ kɛŋɔ ba ɛ lwe, nii Korowii aa ɡela a ba kpoo ɡɛ nɛra nɔ wa.

⁷ He bɛ Korowii Dea Cheremibɔr doonyoa bela le kaa bobɛlbwa, ásɛ dɛ ba serewe. Dɛkalkɛ Korowii noo aa do ɡoroŋ ba fuɡe do he nyuune ta dɛ do heyaa sɔfore ta la lɔ he nɛ.” Anomanta, ba ɛ ɡɛ Mosis aa bola la.

⁸ Korowii ŋɔ Arɔn be ŋɔ,

⁹ “He ne he bibaala nɔ bɛlbwa ta chɛ kɛŋɔ hé nyɔ seŋkpeɡa dɛ́ kpɔ ba n sie n Dea Cheremibɔr nɔ bini. He ɛ ɡɛ naa, serewaa hɛɛ ba serewa. Gɛ waa nɔ chɔ le tɛ he ne he naanar baa ka ba saŋ bɛlbwa bwa dɛɛ la.

¹⁰ A chɛ kɛŋɔ hé pere kwaa aa do ɡoroŋ le anɔ la aa wola ɡoroŋ doe ta, ne kwaa doŋa bɛlbwa aa wola toole o ta le anɔ la doŋa aa lɔ o ta,

¹¹ ásɛ dɛ chaɡle Israel tena mmarare maa cheɡɛ Mosis nɛɛ dɛ kpɔ tɛɛ ba la bwa ta.”

¹² Ate, Mosis ŋɔ Arɔn ne o bibaala Eliasa ne Itama baa kaa la be ŋɔ, “Hé kpɔ mea saraha baa fuh ane tɛ Korowii la kar ɛ kondikwa, dɛ bɛ iisi a ta do ásɛ dɛ dia saraha kon la keŋkeŋ, dɛkalkɛ a do ɡoroŋ kɛrɛdɛ.

¹³ Bela waa do ɡoroŋee chɛ kɛ hé dia, dɛkalkɛ anee ɛ he ne he bibaala bɔr haa dɔa dɛɛ le saraha kwaa baa fuah dɛɛ tɛ Korowii la ta. Gɛɛ Korowii do mɛ ŋɔ ń ŋɔ he be.

¹⁴ Kɛ he ne he bibaala ne bihaahna ɛɛ won di saraha kon bambile haa ɡɔɔro nyundua dɛ viiɡu Korowii sie la ne o hwii la. Hé dɛ ba dii yaa, bela waa do ɡoroŋee chɛ kɛ hé dia. A ɛ he ne he bii dibɔr haa dɔa dɛ le deŋnesɔɔhna saraha kwaa Israel tena aa baa ɛ la ta.

¹⁵ Bá kpɔ o hwii ne o bambile la ja a noorare bɔra baa fuah la ta, dɛ́ ɡɔɔra nyundua dɛ́ viiɡa Korowii sie, anee dɛ́ ɛ he ne he bibaala dibɔra saŋ bɛlbwa ɡɛ Korowii aa bola la.”

¹⁶ Mosis pɛɛ booh baa kpɔa ba ɛ wechɔɡa kpɔe dɛ kɛ saraha la wa, asɛ dɛ no kɛŋɔ ba fuuh. Belaa o baah di Arɔn bibaala Eliasa ne Itama baa kaa la nɛ dɛ bɔɔ ba ŋɔ,

¹⁷ “Ɛrɛɛ he ta wechɔɡa kpɔe dɛ kɛ saraha kon la ka dii Korowii Dea nɔɔ? O do ɡoroŋ kohona ba kpɔ tɛ heyaa kɛŋɔ hé kpɔ soŋe nɛra la wechɔɡa Korowii sie ó kpɔ ba wechɔɡa kɛ ba.

¹⁸ Haa wola dɔe kpɔ o chal la ba jo Korowii Dea Boɡoroŋ la ta nɔ, a chɛ kɛ he fee bá dia bela ɡɛ maa do heyaa la.”

¹⁹ Asɛ Arɔn chaŋe Mosis ŋɔ, “Fini baa baa ɛ ba wechɔɡa kpɔe dɛ kɛ saraha ne saraha baa fuah tɛ Korowii asɛ ɡɛ waa nɔ puu mɛ nɔ, dɛ n di wechɔɡa kpɔe dɛ kɛ saraha kwaa nɔ ane fini naa, a fe ɛɛ do Korowii somee kenɛ?”

²⁰ Mosis aa no ɡɛ la, o baah sɔɔhnɔ.