Lewi Dea Tena 1 - mzwDBL

Saraha kwaa baa dɛ fuah

¹ Korowii yerɛ Mosis le o Dea Cheremibɔr la bini dɛ ŋɔ o be ŋɔ,

² “Ŋɔ Israel tena la be ŋɔ, dɛ nomɛlbwa ŋɔ o ɛ saraha tɛ mɛ naa, ó kpɔ nao, pee kɛɛ booh le o kondɛɛra bini.

³ Dɛ nawee wɛɛ ba kpɔe dɛ ɛ saraha baa fuh tɛ mɛ naa, ó lawɛ ombal waa wola kirihiah bɛlbwa dii. N Dea Cheremibɔr doonyoa belaa ó che dɛ́ kpɔ ba tɛ mɛ ásɛ n lɛ.

⁴ Náate kpɔ nɔn dawɛ saraha kon baa fuuh la nyu ta, ásɛ kon la che o naa ta lɛ o wechɔɡa waa dɛ soŋ mɛ tɛo.

⁵ Ó teŋe nabal la baŋa n sie bela, ásɛ Arɔn bibaala sɔfore la ɛ chal la merɛ saraha kon waa lɔ n Dea Cheremibɔr doonyoa la bɔr la ta. Bá ɛ merɛ o baŋre anaarɛ la bwa ta.

⁶ Náate swe ol la tɔn ásɛ dɛ kpero.

⁷ Ásɛ sɔfore la kpɔ daa do nii aa lɔ kon baa dɛ ɛ saraha o ta la ta,

⁸ dɛ́ kpɔ ola la do nii la ta, dɛ́ kpɔ o nyu ne o noo ɡe ja.

⁹ Naate yaɡle ol la tea bini kwa ne o nakpale la, ásɛ sɔfo la fuh a bwa nii la ta. Anɔɔ ɛ saraha ba yon fuh o bwa o sɔɔh ɛɛ do som men Korowii be.

¹⁰ Dɛ nomɛlbwa saraha kon ɛ kondɛɛre kɛŋɔ pee, kɛɛ booh naa, o ɛ ombal waa wola kirihiah bɛlbwa dii.

¹¹ Naate la teŋe o baŋa saraha kon weekaŋle nyunduabɔr pera n sie. Ásɛ Arɔn bibaala baa ɛ sɔfore la ɛ chal la merɛ saraha kon la baŋne anaarɛ la bwa ta.

¹² Naate kpero dɛ́ kpɔ o nyu ne o noo ja, ásɛ sɔfo la kpɔa do nii aa lɔ kon baa dɛ ɛ saraha o ta la ta.

¹³ Ó yaɡle o tea bini kwa ne o nakpale, ásɛ sɔfo la fuh a bwa nii la ta. Anɔɔ ɛ saraha ba yon fuh o bwa o sɔɔh ɛɛ do som men Korowii be.

¹⁴ Dɛ saraha kon baa fuuh la ɛ kena te aa, naate kpɔ kulukuku kɛɛ borɔnoma.

¹⁵ Sɔfo la kpɔ kon la kaa saraha kon la ta, dɛ́ tor o nyu ta nii la ta ó fuh, ásɛ dɛ kpoŋo o chal la bwa hwaah ta saraha kon la baŋ bɛl.

¹⁶ Ó laa o cheɡpɔrɔ la kpɔ viɡri saraha kon wee leebɔr bela baa pa tɔɔ dɛɛ ta la.

¹⁷ Ásɛ dɛ lawɛ o kena dɛ́ pere o bini anɛ, dɛ bɛ ɡel o cha ta. Ásɛ sɔfo la fuuh nii la ta. Anɔ nɔɔ ɛ saraha ba yon fuh o bwa o sɔɔh ɛɛ do som n be.”