Kolosi 4 - mzwDBL

¹ He banɔ la haa dɔ bonɔɔna ne toli la, hɛ́ɛ ɛɛ ba waa aa toɡra dɛ do wer, dɛkalkɛŋɔ he ɡba lɔ nomɛl lɔɡa, o do Korowii doa.

Wejaala ane ɡe wa

² Hé swɛɛ siwi dɛ́ɛ soŋe Korowii saŋ bɛlbwa, dɛ́ ɡel he sie ɡe do a ta. Hé ɡel he siwi su waa waa ɛa tɛ heyaa hɛ́ɛ jaamo.

³ Hé soŋe Korowii dɛ́ɛ tɛ ya ɡba, ásɛ o tɛ yaa ŋwɛnɛ ya won bol o Waa dɛ́ baɡle o wesɔɔhla aa ɛ Yeesu Kristo waa la. A waa ba koh do mɛ dea nɔ.

⁴ Hɛ́ɛ soŋo ń won dɛɛ bola kɛrɛdɛ ɡɛ aa chɛ kɛŋɔ ń bol a bwa a bini chaah la.

⁵ Hɛ́ɛ nyiŋi kɛrɛdɛ, dɛ́ jemɛ ɡɛ aa chɛ kɛŋɔ hɛ́ɛ ɛ nɛra baa wola asɔre tena ɛɛ la, ásɛ dɛ he dɔ ŋwɛnɛ bɛlbwa naa, hé che o ta dɛ́ won dɔɔ ba tɛ Korowii.

⁶ Hé ɡel he wobol do som dɛ́ɛ lɛ sie saŋ bɛlbwa, dɛ ba pɛɛ heyaa wobɛlbwa naa, hé won jemɛ ɡɛ aa chɛ kɛ he bol.

Kala aa ka mun

⁷ Yɔɔ, ya dɔŋ Tichikos yaa dɛ nyinu o waa dɔ kasinteŋ, wɛɛ cha yaa, ya ne o bwa ɛɛ ɛ ya Dɔɔ toma nɔ la, wɛɛ ba baɡle n waa bwa he bee.

⁸ A waa mɛɛ tomɔ he be ó ba bol ya waa bwa, ásɛ he baah sɔɔh heyaa la.

⁹ O ne ya dɔŋ Onisemɔs o wa aa dɔ kasinteŋ yaa nyinu la bwaa mɛɛ tomɛ, ásɛ ba ba bol waa aa dɛ chiɡ bonɔ bwa he be. Onisemɔs te ɛ he bwɛɛ te.

¹⁰ Aristakus baa do n ne on dea la, ne Banabas nime Mak dɛ na heya. A ɡɛ Mak nɔ waa n faa bol he be la. O ba he be naa, hé lɛo silɛɛ ne.

¹¹ Jeses baa bera dɛɛ yerɔ Jastos la ɡe dɛ na heya. Juu tena baa yarada Yeesu la bini, nɛra batoro nɔ ɡboo dɛɛ cha mɛ, n ne baa ɛ Korowii Kora la toma. Ba dɛ cha mɛ taeh.

¹² Epafras waa ɛ he bwɛɛ te la dɛ na heya. O dɛ ɛ Yeesu Kristo toma, dɛ soŋe Korowii kɛrɛdɛ ɡa dɛɛ tɛ heyaa saŋ bɛlbwa, ásɛ o ɡel he won che kiŋkiŋ dɛ́ jemɛ o waa kɛrɛdɛ ka tonɛ, ásɛ Yeesu Kristo waa bɛ heyaa aahna-aahna ɛ, he won ɛ Korowii tetoowaa bwa.

¹³ N ɡbabir na ɡɛ Epafras aa dɛ tomɛ he ne banɔ la baa lɔ Laodisia ne Heɛrapɔles la kohona.

¹⁴ Tɛɛɡa te Luk ya bwa aa dɛ nyinu la ne Demas ɡe dɛ na heya.

¹⁵ Hé ŋɔ yabala baa lɔ Laodisia la ne Nimfa ne asɔre tena baa dɛ cheme Nimfa dem la be ŋɔ n dɛ na ba.

¹⁶ Dɛ he baa kure tɔn nɔ tonaa, hé ɡel ba ka kuro baɡle asɔre tena baa lɔ Laodisia la. Tɔn maa tɛ ba ɡe la, hé lɛ dɛ́ ka kure.

¹⁷ Hé ŋɔ Akipus be ŋɔ ó do sie dɛ́ ɛ toma ya Dɔɔ Yeesu aa kpɔa tɛo la bwa kɛrɛdɛ ken.

¹⁸ Men Pɔɔl ɡbaɡbaa chwerɛ bonɔ la, n dɛ na heya. Hɛ́ɛ lii n waa kɛ ba ta aa do mɛ jɔɡrɔre n chɔ dea, dɛ́ soŋe Korowii dɛ́ɛ tɛ mɛ. Kórowii sune he nɛ dɛ́ cha heya.