Kolosi 2 - mzwDBL

¹ N dɛ nyin he jemɛ ɡɛ n siwi aa swɛɛra mɛɛ koh n te he ne Laodisia tena ne nɛra baa wola men jemɛ la wa,

² dɛ́ do he bwa ɡbemba he won nyin dɔŋa dɛ́ ɛ beŋkpoŋ, dɛ́ won jemɛ Korowii wesɔɔhla waa pili a bini tɛ heyaa la kɛrɛdɛ, he bɛ aahna-aahna tamaa bɛlbwa ɛ, dɛ́ dɔ tɔnɔ le o waa la bini kɛrɛdɛ. O waa laanee Yeesu Kristo.

³ Korowii wejema aa wola jaɡa dɔe la bwa lɔ Yeesu Kristo be. O nɛɛ ya che dɛ dɔ ɡɛ wejema nɔ.

⁴ N dɛ baɡle heyaa ásɛ nomɛlbwa bɛ won kpɔ nyotor neɡre heya.

⁵ N toole he be, kɛ n liire te lɔ he be. Anomanta, a do n som kɛ he bwa aa pɛa, asɛ dɛ lawɛ yaradae haa dɛ yarada Yeesu Kristo la bini kpoŋe kiŋkiŋ la.

Kpɔ he te pɛl Yeesu dɛ́ kpeɡ o waa la ta

⁶ Haa dɔa kpɔ he te tɛ Yeesu Kristo kɛ he Dɔɔ nɔ, hé ne o pɛ wobɛlbwa ta.

⁷ A taa aa ba cheɡa he won che kiŋkiŋ dɛ́ kpeɡ o waa la ta, dɛ́ won yarada o waa bwa kɛrɛdɛ ɡɛ baa baɡle heyaa la, dɛ́ɛ jam Korowii saŋ bɛlbwa.

⁸ Webaɡla ane lole bane ɛɛ baɡle dɛɛ yera wejema. Hé nyiŋa kɛrɛdɛ. A ɛ nyosone kɛɛ wepuu ba kpɔ dɛɛ neɡre nɛra. Nɛwɛnyini nawee waa, ne koŋkwaa aa dɛ di kpeɡri harɛ nɔ ta wejema waa baa baɡle la. Yeesu Kristo be laa a le.

⁹ Yeesu Kristo ɛ Korowii ɡbaɡba. O ba harɛ nɔ ta dɛ ba berɛ nɛwɛnyini.

¹⁰ He ne waa pɛa la, he dɔ komɛlbwa. Onee dɔ sɔn waa ɡwaa kwaa yaa wola an na bwa soo siwi sɔn.

¹¹ He ne Yeesu Kristo aa pɛa la, o teŋe he dobene la ta. O ɡe penteŋaa la. He te teŋa nɔ ta ɡɛ nɛwɛnyini aa dɛ teŋe la ɛɛ.

¹² Korowii nee ba fa aa sɔ heyaa la, anee baɡla kɛ he ne Yeesu Kristo bwaa ba pɛ huɡe. Asɛ a berɛ che yarada haa dɛ yarada Korowii ne kpeɡri waa kpɔa ir Yeesu seo ta la ta, he ne o bwa pɛ ir dɛ dɔ mkpa.

¹³ He wechɔɡa ne he dobene Korowii fa aa wola teŋe ta la ɡelɔ he fa do kɛŋɔ he serewɔ. Kɛ he ne Yeesu Kristo aa pɛa la, Korowii kpɔ he bwa wechɔɡa kɛ heya, dɛ tɛ he bwa mkpafale.

¹⁴ Teŋa haa ŋɔa ŋɔ hɛɛ teŋɛ o Mmara taa dɛ berɛ horɛ a bar heyaa la, a bwa taa o le heya. Waa a waa pɛɛ kpa. Korowii kpaa a bwa pɛl Yeesu daɡaɡre la ta a tonɛ.

¹⁵ Yeesu seo waa sewa la, o chɔɡ kwaa aa dɔ kpeɡri bwa kpeɡri, dɛ lɛ a kpeɡri dɔɔh. O ɛ ɡɛ dɛ ɡel sihiih kpoa nɛra bwa siwi ta, bá jemɛ kɛŋɔ o ɡelɔ koŋkpeɡa la bwa kpeɡri ɛ pɛɛpɛɛ.

¹⁶ Anomanta, dɛ nomɛlbwa dɛ pwah heyaa kwaa ane haa dɛ di, ne kwaa haa dɛ nyɔ, ne he tɔpejena dii benanyoa ne Korobifala Tɔpejena, ne Ona Tɔpera ta naa, he bɛ on dawɛ.

¹⁷ A ɡɛ waa nɔ fa tɔ sie chiɡ dɛɛ baɡle waa aa dɛ ba ɛɛ kerekere la kɛŋɔ nɛn lileo aa tɔ o sie, waa wola o ɡbaɡba ɛɛ la. Yeesu Kristo waa la aa bala la, anee waa la tenten.

¹⁸ Dɛ nomɛlbwa dɛ pwah heyaa ŋɔ haa ɡɛ waa teŋe nyosone ŋɔ pwɛraa wɛɛ pwɛr o te dɛɛ tomɛ nyundua toroma la ta teŋaa, he bɛ on dawɛ. Gɛ nɛn nɔ dɛ maŋkura o te kɛŋɔ o dɛ na waa deera ta, dɛɛ yerɛ o te nɛnjen, kɛ pɛɛpɛɛ. Nɛwɛnyini liire taa wɛɛ teŋɛ,

¹⁹ dɛ vɛh o te kpɔe dɛ́ do Yeesu Kristo lɔɡa. Onee ya nyu, asɛ ya ɛ o bwadabii dɛɛ dɔ bokpeɡa o be, bɛlbwa lawɛ o dɔŋ kpoŋe kɛrɛdɛ ya ne o ɛ beŋkpoŋ, dɛ́ che pɛɛ yaa pɛa la ta dɛ ɡel yaa kpeɡ ɡɛ Korowii aa dɛ nyin.

²⁰ He ne Yeesu Kristo pɛo dɛ sewɛ, anomanta, he ne koŋkwaa aa dɛ di kpeɡri harɛ nɔ ta toole wobɛlbwa bini kpa. Aah bɔkwa waa he ta kpɔ he te dɛɛ do harɛ nɔ ta kii ta dɛ ɡel a vɔrɔwe heyaa ŋɔ,

²¹ “He bɛ onɔ lawɛ, dɛ bɛ onɔ daɡɛ, dɛ bɛ onɔ leɡe” nɔɔ?

²² Gɛ kwaa nɔ ɛ kwaa dɛ he ɛa aa, dɛ a waa tonɔ. Nɛwɛnyini kii ne ba nawee waa a te.

²³ Kpela, nɛra ɛɛ dɛɛ duu nɛra baa dɛ teŋɛ ɡɛ waa nɔ ta la kɛ ba ɛ wejerema, dɛɛ lii kɛŋɔ ba Korowii toma aa swɛɛ ba siwi kohona waa baa pwɛr ba te dɛɛ ha ba bwadabii la. Kɛ a bwa ɛ pɛɛpɛɛ. Aa won ɡel nomɛlbwa lawɛ o te dɛ́ ɡel wechɔɡa ɛɛ.