Kolosi 1 - mzwDBL

¹ Men Yeesu Kristo torome Pɔɔl ne ya dɔŋ Timotii chwerɛ tɔn nɔ. Korowii tetooraa o tɛ yaa toma nɔ.

² Ya chwerɔ dɛɛ tɛ yabala haa lɔ Kolosi dɛ ɛ Korowii nɛra, asɛ he ne Yeesu Kristo pɛ, hɛɛ teŋɛ o nɛɛ kasinteŋ ne la. Ń Naa Korowii cha heya, dɛ́ tɛ heyaa bosɔɔhna.

Korowii jaama ne wesoŋa

³ Ya dɛ jam ya Dɔɔ Yeesu Kristo Mɛɛ Korowii he waa ya wesoŋa bini saŋ bɛlbwa,

⁴ dɛkalkɛŋɔ ya noɔ kɛŋɔ he dɛ yarada Yeesu Kristo kɛrɛdɛ dɛ kpɔ he te tɛo, dɛɛ nyin Korowii nɛra ba wa aa toɡra bwa ɡe.

⁵ Amanesoma aa ɛ kasinteŋ la aa ba he be loɡla la, he no hwɛɡa aa dɛ tɛ la wa. He yarada ne nɛnnyin la le kwaa haa dɛ hwɛɡɛ a ta la ta. Korowii ɡe kwaa a bwa cheɡ heyaa Korowii doa kɛrɛdɛ ken.

⁶ Amanesoma la perɔ, nɛra ɛɛ noa harɛ nɔ ta bobɛlbwa, aa ba hɛɛra ne. Gɛ tentenee aa ba hɛɛra ne he be dɛ le awola haa noa Korowii pili he sie he jemɛ suna waa sune he nɛɛ dɛ cha heyaa la.

⁷ Epafras bee he no Amanesoma la le. Ya ne o bwaa pɛa dɛɛ ɛ toma nɔ. O ɛ Yeesu Kristo bonɔɔ o wa aa dɔ kasinteŋ yaa nyinu kɛrɛdɛ. Ya naa taa o che dɛɛ cha heya.

⁸ O bol ya be ɡɛ Korowii Domadɛɛɡe aa cha heyaa asɛ hɛɛ nyin dɔŋa.

⁹ Anomanta, ya le awola yaa no he waa dɛ soŋe Korowii dɛɛ tɛ heyaa kɛŋɔ ó Domadɛɛɡe baɡle heyaa o wobɛlbwa kɛrɛdɛ, dɛ́ berɛ dɛɛ pili he sie hé won jemɛ wobɛlbwa aa ɛ Korowii tetoora la,

¹⁰ dɛ́ won do ɡɛ aa chɛ kɛ ya Dɔɔ torome do, he wobɛlbwa won su o siwi, he won dɛ́ɛ ɛ wedɛɛɡa bwa soo siwi, dɛ́ won jemɛ Korowii kohona,

¹¹ dɛ́ won dɔ kpeɡri kɛrɛdɛ dɛ́ le o ɡbaɡba kpeɡri waa do kan dɛ dɔ jirima kɛrɛdɛ la ta. N dɛ soŋe Korowii ó cha heyaa ɡɛ hé won lawɛ bambile wobɛlbwa ta,

¹² dɛ́ won kpɔ silɛɛ dɛ́ɛ jaamo waa ɛ ya Mɛɛ la wa. Onee ɡela ya chɛ kɛ ya ne o nɛra ba wa aa toɡra bwa won dɔ kondɛɛɡa waa dɔa tɛ o bii baa ja o Kora waa ɛ Bochaah Kora la ta.

¹³ O lɛ yaa le biro ta dɛ kpɔ yaa ka ja o Bie waa dɛ nyinu la Kora ta.

¹⁴ O Bie laanee lɛ yaa le Bɔnsam nɔn ta dɛ kpɔ ya wechɔɡa ɡe kɛ yaa la.

Yeesu Kristo ɛ nomoa komɛlbwa nɛ

¹⁵ Yaa won Korowii na. Gɛ Korowii aa doa la, ɡɛɛ o Bie ɡe do. O Bie la lole mɔɔ o ta komɛlbwa.

¹⁶ O Bie la nɛɛ o che dɛ ta komɛlbwa waa lɔ harɛ ta ne komɛlbwa waa lɔ nyundua, anɔ la yaa dɛ naa ne anɔ la yaa wola an na kɛŋɔ nyundua toroma ne konchɔɡa aa dɛ di kpeɡri bwa soo siwi. O Bie la nɛɛ o che dɛ taa, asɛ a do le tɛo.

¹⁷ Gɛ saŋ a bɛlbwa fa aa wola toole la, dɛ o te lole. Onee lawɛ komɛlbwa kpoŋe, a ta do le ba le fini nɔ la.

¹⁸ Onee asɔre tena bwa nyu, ba ɡee o bwadabi. Onee tɔ sie komɛlbwa nɛ, dɛ tɔ sie ir seo ta nomɛlbwa nɛ, dɛkalkɛŋɔ on chɛ kɛ ó ɛ nomoa komɛlbwa nɛ.

¹⁹ Korowii tetooraa o Bie Yeesu ɛ o ɡbaɡba.

²⁰ O ɛ ɡɛ dɛ che o Bie la nɛɛ dɛ kwaa o ne kwaa aa lɔ nyundua ne harɛ bwa baah. O ɡelɔ o Bie sewɛ daɡaɡre la ta o chal kwaa wobɛlbwa.

²¹ He fa aa Korowii jemɛ dɛ ɛ o dɔma, dɛkalkɛŋɔ he fa dɛ lii liichɔɡa, dɛɛ ɛ wechɔɡa.

²² Kɛ name Yeesu Kristo aa baa ɛ nɛn dɛ sewɛ la, Korowii cheɡɛ o seo la ta dɛ kwaa he ne o baah, dɛ ɡel he won do kaih doŋa bɛlbwa aa wola toole he nɛ, nomɛlbwa aa wola he waa dɔe ba dɛ bol awola haa ba che Korowii sie la.

²³ Dɛ he ta kpoŋe waa haa dɛ yaradaa la bini, he ta habɔɔ leɛ, dɛ dɔ hwɛɡa le Amanesoma la baa bola baɡle heyaa he no la ta kɛŋɔ nomɛlbwa aa won chɔɡ he liire he bɛ dɛɛ hwɛɡɛ kpa aa, amɔ hɛɛ wonoo che o sie. Ba dɛ bol Amanesoma nɔ bobɛlbwa. N ɡbabir dɛ bola, dɛkalkɛŋɔ Korowiirii lee mɛ.

Gɛ Pɔɔl aa ɛ toma tɛ asɔre tena

²⁴ Taraken a do n som kɛ maa lɛ he wahala dɛɛ na. Wahala lole ń che Yeesu Kristo naa ta dɛ́ na tɛ asɔre tena baa ɛ o bwadabii la. Anomanta, a do n som kɛ maa dɛ ba wona na wahala aa kaa la ane, ásɛ a won tonɛ.

²⁵ N ɛ toma dɛɛ tɛ o asɔre tena. Korowiirii koh he chae waa dɛ tɛ mɛ a ɡɛ toma nɔ, dɛ ŋɔ mɛɛ baɡle o waa la bwa ásɛ nɛra bwa no.

²⁶ Korowii waa la fa sɔɔh saŋ la bwa, nɛra ta a mun jemɛ. Kɛ taraken te, o pili a bwa bini dɛ tɛ o nɛra ba wa aa toɡra,

²⁷ bá na dɛ́ jemɛ ɡɛ waa dɛ nyin kɛ ó ɛ nɛra baa wola Juu tena ɛɛ la baah. O waa waa pili a bini la ɛ wedɛɛɡa aa ɛ wejena dɛɛ kpo nyoa. Anee kɛ Yeesu Kristo Doma soɡe he nɛ, he dɔ hwɛɡa o be kɛ tɔpebɛl hɛɛ dɔ jirima o bee.

²⁸ Ya waa yaa dɛ baɡle bwaa Yeesu Kristo la. Ya dɛ ja nomɛlbwa, dɛɛ baɡle nɛra bwa wejema bwa ne, ásɛ dɛ ba won kpɔ bɛlbwa ba Korowii be kɛ ba kpeɡ Yeesu Kristo waa ta, pɛɛ ba ne waa pɛa la nomanta.

²⁹ A waa ɡela n swɛɛ siwi dɛ takapɔ dɛɛ ɛ toma la. Yeesu Kristoo tɛ mɛ kpeɡri ɡa n won dɛɛ ɛ ɡɛ toma la.