Kaala 7 - mzwDBL

¹ Asɛ Korowii ŋɔ Mosis be ŋɔ, “Dɛɛ no. N dɛ ba ɡela he do kɛŋɔ men Korowii ken Ijipt tena kooro sie, ásɛ he dɔɔ Arɔn ɛ keame dɛɛ bol waa o be.

² Ka ŋɔ wobɛlbwa maa dɛ bol he be nɔ baɡle Arɔn ó ŋɔ kooro be ó tɛ Israel tena la ŋwɛnɛ ba le o harɛ ta.

³ Kɛ mɛɛ ɡeloo kooro la deŋne do kpeɡri dɛ bɛ he be no, ásɛ dɛ n ɛ nyokpowaa kohona harɛ la ta kwaraa naa, waa he bee no.

⁴ Waa wola he bee no nomanta, mɛɛ kpɔ deŋnetɛraa ba harɛ la ta dɛ́ do ba sibeɡra kohona dɛ́ lawɛ n nɛra Israel tena bwa le bela.

⁵ Mɛɛ baɡle n kpeɡri Ijipt harɛɛ, dɛ́ chɔɡ ba, dɛ́ lawɛ n nɛra Israel tena le, ásɛ Ijipt tena bwa jemɛ kɛŋɔ menee Korowii.”

⁶ Asɛ Mosis ne Arɔn ɛ ɡɛ Korowii aa bol ba be bwa.

⁷ Baa kaa bol waa la kooro be la, dɛ Mosis di bene fifraanuatoro, asɛ Arɔn ɡe di fifraanuatoro dɛ atoro.

Arɔn daŋɡbala waa berɛ harɛkon wa

⁸ Korowii berɔ ŋɔ Mosis ne Arɔn be ŋɔ,

⁹ “Dɛ Ijipt kooro dɛ nyin kɛ he ɛ nyokpo waane o na naa, he ŋɔ Arɔn be ŋɔ ó kpɔ o daŋɡbala ta kooro sie. Wɛɛ berɛ harɛkonee.”

¹⁰ Anee ba la Ijipt kooro be dɛ ka ɛ ɡɛ Korowii aa ŋɔa ba ɛ la bwa. Asɛ Arɔn kpɔ o daŋɡbala la ta kooro ne o nomonome sie o berɛ harɛkon.

¹¹ Ijipt kooro yerɛ Ijipt wejerema ne dobodobo tena cheme, asɛ dobodobo tena ɡe ɛ ba wa.

¹² Bɛlbwa kpɔ o daŋɡbala ta harɛ o berɛ harɛkon, kɛ Arɔn kon la wono lawɛ ba kwaa la liɡli.

¹³ Anɔ bwa habɔɔ, dɛ Ijipt kooro deŋne ta kpeɡri o ŋɔ waa ba waa la munii no ɡɛ Korowii aa bola la.

Nael Moo ne neerare bwa chal bera wa

¹⁴ Belaa Korowii ŋɔ Mosis be ŋɔ, “Ijipt Kooro deŋne kpeɡri o vɛh nɛra la ŋwɛnɛ tae ba kaa kenɛ?

¹⁵ La o be chɔɔbɔr, hɛɛ nao kɛŋɔ waa dɛ kaa Nael Moo ta. Ka che nee la nyoa kpao dɛ́ kpɔ daŋɡbala o fa aa berɛ harɛkon la kpoŋe.”

¹⁶ Kenii chɛ kɛ he ŋɔ o be, “Korowii Hibru tena aa dɛ tomɔ laanee tom mɛ he be ŋɔ he ta o nɛra Israel tena ŋwɛnɛ bá kaa, dɛ́ won ka tomɔ pua hɛŋle ɡbo harɛ ta. Kɛ, ba le saŋ nɔ he ta o be noɛ.”

¹⁷ Anomanta, o ŋɔ, “Anɔɔ hɛɛ ba kpɔe dɛ́ jemɛ kɛŋɔ onee Korowii. N dɛ ba daŋɡbala nɔ kpɔe lɔ nee nɔ sie, ásɛ o bwa berɛ chal.

¹⁸ Pɛŋa aa lɔ o bini bwa ɛɛ serewoo, ásɛ o do sɔɔh kohona Ijipt te bɛlbwa aa wola won nyɔ o ne.”

¹⁹ Korowii berɔ ŋɔ Mosis be ŋɔ, “Ŋɔ Arɔn be ó tɛr o daŋɡbala dɛ́ kpɔ pa Ijipt neerare bwa ta, nenabɔɔne ne taama dɛ buli bwa, ásɛ a berɛ chal. Chal ɛɛ perɛ harɛ la ta bobɛlbwaa. Hale komɛlbwa nee aa lɔ o bini bwa.”

²⁰ Asɛ Mosis ne Arɔn ɛ ɡɛ Korowii aa do ba la. Arɔn kpɔ o daŋɡbala la lɔ nee la Ijipt kooro ne o nomonome sie, asɛ nee la bwa berɛ chal.

²¹ Pɛŋa aa lɔ Nael Moo ta bwa serewɔ, dɛ do sɔɔh kohona Ijipt te bɛlbwa ta wone nyɔ o ne. Asɛ chal perɛ harɛ la ta bwa.

²² Belaa Ijipt dobodobo tena ba ɛ ba wa dɛ ɡe ɛ ɡɛ tenten. Dɛ kooro ta lɔ o deŋnekpeɡ la ta, o ta ba waa la ta noɛ ɡɛ Korowii aa bola la.

²³ O berɔ kaa o koodem, dɛ ka laa o liire kpɔ waa waa naa la bwa ta.

²⁴ Ijipt tena bwa ka dɛ kwi bɔɔne Nael Moo nyoa dɛɛ nyin nee ba nyɔ, dɛkalkɛ dɛ baa won ba nee la nyɔ kpa.

Sapone ane wa

²⁵ Korowii aa ɡela nee la berɛ chal la, a yawanyoa habɔɔ o berɛ bol waa Mosis be.