Kaala 6 - mzwDBL

¹ Belaa Korowii ŋɔ Mosis be ŋɔ, “Taraken n dɛ ba ɡela he jemɛ waa maa dɛ ba kpɔe ɛ Ijipt kooro la. Aa che n kpeɡri taa ó tɛ n nɛra la ŋwɛnɛ bá kaa. Hale dɛ́ ɡel ó doŋ ba le o harɛ ta.”

Korowii yerɛ Mosis

² Korowii berɔ ŋɔ Mosis be ŋɔ, “Menee Korowii.

³ Men kpɔ n te baɡle Abraham ne Aesek dɛ Jekɔb kɛ Menee Kpeɡri Bwa Dɔɔ la. Kɛ n ta ɡelɛ ba jemɛ n sɔn waa do ɡoroŋ la te.

⁴ Asɛ n ne ba fɔwɛ fɔo kɛŋɔ mɛɛ kpɔ Keenan harɛ baa soɡe o ta kɛŋɔ hɔɔhra laanee tɛɛ ba ó ɛ ba kon.

⁵ N na wahala Israel tena aa dɛ na Ijipt tena nɔn ta baa ɛɛ ba kɛ yoma la, dɛ lii n ne ba fɔo yaa fɔwa la.

⁶ Anomanta, ŋɔ Israel tena be ŋɔ, ‘Menee Korowii. Mɛɛ lɛ heyaa le Ijipt tena hɔhɔrɔwa baa dɛ ɛ heyaa la taa. Mɛɛ che n kpeɡri ne n nyokpowe-ɛɛla taa, dɛ́ tɛr ba deŋne ásɛ dɛ lɛ heya.

⁷ Mɛɛ kpɔ heyaa ɛ n nɛra, ásɛ n ɡe ɛ Korowii haa dɛ tom mɛ. Anee dɛ́ ɡel he jemɛ kɛŋɔ menee Korowii haa dɛ tomɛ n lɛ heyaa le Ijipt tena nɔn ta.

⁸ N baɡɛ Abraham ne Aesek dɛ Jekɔb nyoa kpeɡri nɛ harɛ maa ŋɔa mɛɛ kpɔɔ tɛɛ ba la wa. Mɛɛ kpɔɔ tɛ heya ó ɛ he kon pi. Men Korowii bola.’ ”

⁹ Mosis bol ɡɛ waa nɔ baɡle Israel tena la kɛ, bambichɔɡ kohona ne ba dochɔɡa la nomanta, ba ta noɛ.

¹⁰ Belaa Korowii ŋɔ Mosis be ŋɔ,

¹¹ “La ka ŋɔ Ijipt kooro la be ŋɔ ó ɡel Israel tena la le o harɛ la ta.”

¹² Asɛ Mosis ŋɔ Korowii be ŋɔ, “Israel tena ɡba aa wola a mun noɛ nɔ, ɛrɛɛ kooro te ɛɛ ba a mun noe yɔ? N nyoa aa kpɛlɛ ń won bol waa á do som.”

¹³ Korowii berɔ bol Israel tena ne Ijipt kooro waa baɡle Mosis ne Arɔn, dɛ do ba ŋɔ bá ka kpɔ Israel tena le Ijipt harɛ ta.

Mosis ne Arɔn naawa wa

¹⁴ Rubin waa ɛ Jekɔb bibanloɡle la bibaalaa Hanɔk ne Palu ne Hɛsrɔn dɛ Kaami. Ba sɔna nɔ cheɡɔ tɛ Rubin dea sɔna.

¹⁵ Simeon ɡe bibaalaa Jɛmoɛl ne Jamin ne Ohad ne Jakin ne Soha dɛ Swaul o nya aa ɛ Keenan te. Simeon dea bii sɔnaa.

¹⁶ Lewi ɡe bibaala ɡɛ baa teŋɛ dɔŋa nɛ laanee, Gɛsɔn ne Kohat dɛ Merari. Bene lafa fifraatoro dɛ anuanɛɛ Lewi di dɛ sewɛ.

¹⁷ Asɛ Gɛsɔn bibaalaa Libni ne Simee. Ba dea sɔnaa.

¹⁸ Kohat ɡe bibaalaa Amram ne Isiha ne Hɛbrɔn dɛ Usiel. O di bene lafa fifraatoro dɛ atoro mɔɔ dɛ sewɛ.

¹⁹ Merari ɡe bibaalaa Maali ne Musi. Gɛɛ Lewi naanar teŋɛ dɔŋa nɛɛ dɛ le o dea.

²⁰ Amram kpɔ o mɛɛ nimambie Jɔkɛbɛd mo, asɛ dɛ lolɛ Arɔn ne Mosis. O di bene lafa fifraatoro dɛ anuanɛ mɔɔ dɛ sewɛ.

²¹ Isiha ɡe bibaalaa Kora ne Nɛfɛɡ dɛ Sikri.

²² Asɛ Usiel ɡe bibaala waa lol ba laanee Mesael ne Ɛlsafan dɛ Sitri.

²³ Arɔn ɡe mo haah. O sɔne Eliseba. Dɛ Aminadab bihaahnee o ɛ Naasɔn nimambie. Bibaala baa lola laanee Nadab ne Abihu ne Eliasa dɛ Itama.

²⁴ Kora ɡe bibaalaa Asir ne Ɛlkana dɛ Abiasaf. Banee Kora dea sɔna.

²⁵ Arɔn bibaa Eliasa mo Putiel bihaah bɛl, asɛ dɛ lolɛ Fenehas. Banɔɔ le Lewi luɡe ta dɛ chɔ ba deene nyoo.

²⁶ A ɡɛ Arɔn nɔ ne Mosisii Korowii ŋɔ bá ka kpɔ Israel tena le Ijipt harɛ ta la.

²⁷ Ba tentenee ŋɔ kooro be ŋɔ ó tɛ Israel tena ŋwɛnɛ bá kaa la.

Arɔn cheɡɛ Mosis naa ta dɛɛ bol wa

²⁸ Korowii aa bol waa Mosis be Ijipt harɛ ta la,

²⁹ o ŋɔ, “Menee Korowii. Bol wobɛlbwa maa bol he be baɡle Ijipt kooro la.”

³⁰ Anee Mosis chaŋe ŋɔ, “N nyoa aa wola kpɛlɛ n won bol waa a do som nɔ, wɛɛ no a munii yaa?”