Kaala 40 - mzwDBL

Korowii Tɛnte Dea la baŋra

¹ Anee Korowii ŋɔ Mosis be ŋɔ,

² “Baŋre n Tɛnte Dea waa ɛ n Dea Cheremibɔr la, korobiloɡle tɔpere waa tɔ sie la ta.

³ Kpɔ N Ne Nɛwɛnyina Fɔo Daka la cheɡ o bini dɛ́ kpɔ pateesan saɡɛ o sie.

⁴ Kpɔ teebur la ba cheɡ o bini, dɛ́ kpɔ o koŋkwaa bwa dawɛ o ta. Kpɔ kandea daa la ɡe ba cheɡ, dɛ́ kpɔ kandere la ba chɔŋɛ a ta.

⁵ Kpɔ suuɡaswɛm kon baa dɛ fuh daawiile o ta la cheɡ N Ne Nɛwɛnyina Fɔo Daka la sie, dɛ́ kpɔ pateesan saɡɛ o doonyoa.

⁶ Ásɛ dɛ kpɔ kon baa fuh saraha kwaa dɛɛ tɛ Korowii o ta la ba cheɡ n Dea Cheremibɔr la sie,

⁷ dɛ́ kpɔ loɡbajen la ba cheɡ Cheremibɔr bela ne saraha kon la baah ta, dɛ́ do nee o bini.

⁸ Kpɔ dachiɡri ne pateesanre ke dembaah la bar, dɛ́ kpɔ o doonyoa pateesan la ba do o ta.

⁹ Kpɔ noo baa kpɔa dɛɛ do nɛn sɔfore ta la, dɛ́ ɛ ane merɛ n Tɛnte Dea la ne o koŋkwaa bwa ta. Gɛɛ hɛɛ ba ɛɛ dɛ́ lea cheɡ á do ɡoroŋ tɛ men Korowii.

¹⁰ Ɛ noo la ane merɛ kon baa fuh saraha kwaa dɛɛ tɛ Korowii o ta la, ne o koŋkwaa bwa ta. Gɛɛ hɛɛ ba ɛɛ dɛ́ lea cheɡ á do ɡoroŋ kohona tɛ men Korowii.

¹¹ Berɛ ɛ noo la ane merɛ loɡbajen la ne kon waa chɔŋɛ o ta la ta, dɛ lea cheɡ á do ɡoroŋ tɛ mɛ.

¹² Kpɔ Arɔn ne o bibaala ba n Dea Cheremibɔr doonyoa bela, ásɛ dɛ sɔ ba ne.

¹³ Kpɔ laala aa do ɡoroŋ do Arɔn, ásɛ dɛ fuɡe noo do o nyu ta, dɛ́ leo cheɡ ó do ɡoroŋ tɛ men Korowii, dɛ́ won ɛ sɔfo dɛɛ tom mɛ kɛrɛdɛ.

¹⁴ Berɛ kpɔ o bibaala ɡe ba, dɛ́ ba do ba batakaarejaŋa la.

¹⁵ He tonaa, hé fuɡe noo do ba nyuune ta ɡɛ haa ɛ ba mɛɛ la, ásɛ ba won ɛ sɔfore dɛɛ ɛ n toma. Noo fuɡa dɛ do ba nyuune ta nɔɔ dɛɛ ba ɡela sɔfore toma do ba luɡe ta saŋ bɛlbwa dɛɛ la.”

¹⁶ Mosis ɛ wobɛlbwa ɡɛ tenten Korowii aa doo la.

¹⁷ Anomanta, ba baŋre Korowii Tɛnte Dea la bennɛɛte, korobiloɡle la tɔpere waa tɔ sie la ta.

¹⁸ Mosis ɡelɔ ba baŋre Korowii Tɛnte Dea la, dɛ kpɔ loɡa la cheɡ a chebɔra, dɛ paaɡe dachiɡri la, dɛ dawɛ doli asɛ dɛ paaɡe daa áa lawɔ kpoŋe la bwa.

¹⁹ O kpɔ kon baa kpɔ tɔɔ la paɡri bɔle o ta, dɛ kpɔ nɛɛte ɡe bɔle dawɛ ɡɛ tenten Korowii aa doo la.

²⁰ O kpɔ bwepɛle anɛ la do Korowii Ne Nɛwɛnyina Fɔo Daka la bini, dɛ kpɔ daa la su kwaa aa do kɛŋɔ nɔnloɡa la baa kpɔ dɛɛ cheo la, dɛ kpɔ o tɔ la tɔ o ta.

²¹ Belaa o kpɔ Korowii Ne Nɛwɛnyina Fɔo Daka la ba cheɡ Korowii Tɛnte Dea bela, dɛ kpɔ pateesan la saɡɛ Daka la sie ɡɛ Korowii aa do Mosis la.

²² O kpɔ teebur la ɡe ba cheɡ Korowii Tɛnte Dea bela, weekaŋle nyunduabɔr pera pateesan la sie.

²³ Dɛ kpɔ paanoo la ɡe ka dawɛ o ta Korowii sie, ɡɛ waa doo ŋɔ o ɛ la.

²⁴ Kandea daa la ɡe, o ba o ne ba cheɡ Korowii Dea Cheremibɔr la bini, asɛ o sie chaɡɛ teebur waa lɔ Korowii Tɛnte Dea la weekaŋle harɛbɔr pera,

²⁵ asɛ dɛ kpɔ kandere la chɔŋɛ o ta Korowii sie ɡɛ waa doo la.

²⁶ Mosis berɔ ɡel ba kpɔ suuɡaswɛm kon baa dɛ fuh konsɔɔhsoma o ta dɛɛ tɛ Korowii la ba cheɡ o Dea Cheremibɔr la bini pateesan la sie,

²⁷ asɛ dɛ fuh daawiile aa sɔɔh aa soma kohona o ta, ɡɛ Korowii aa doo la.

²⁸ Asɛ dɛ kpɔ pateesan la saɡɛ Korowii Tɛnte Dea la doonyoa.

²⁹ O kpɔ kon baa fuh saraha kwaa o ta dɛɛ tɛ Korowii la ɡe ba cheɡ Korowii Tɛnte Dea waa ɛ o Cheremibɔr la doonyoa bela, asɛ dɛ kpɔ saraha kwaa baa dɛ fuah ne mea saraha ba tɛ Korowii ɡɛ waa doo la.

³⁰ O kpɔ loɡbajen la cheɡ Korowii Dea Cheremibɔr la ne saraha kon la baah ta, asɛ dɛ kpɔ nee do o bini,

³¹ asɛ Mosis ne Arɔn ne o bibaala ɛɛ sarame ba nɔɔra ne nakpale o ta.

³² Saŋ te bɛlbwa baa jo Korowii Dea Cheremibɔr bela, kɛɛ dɛ la saraha kon la jwɛɛh la, ɡɛɛ ba sarame nɔɔra ne nakpale o ta, ɡɛ Korowii aa do Mosis la.

³³ O kpɔ dachiɡri ne pateesanre ke Korowii Tɛnte Dea la ne saraha kon la, asɛ dɛ kpɔ pateesan la saɡɛ dembaah la doonyoa la ta. Gɛɛ a do Mosis ɡel ba ɛ toma la bwa tonɛ.

Korowii jirima wa

³⁴ Belaa bam la ba tɔ Korowii Dea Cheremibɔr la bwa, asɛ Korowii jirima su o Tɛnte Dea la bini.

³⁵ Bam la aa tɔ bela Korowii jirima aa su o bwa nomanta, Mosis ta wone jo bela.

³⁶ Israel tena vala bwa bini la, bam la baa le Korowii Tɛnte Dea la ta naa, ɡɛɛ ba won vala.

³⁷ Kɛ dɛ bam la ta bela leɛ yaa, baa won kaa.

³⁸ Israel tena vala bwa bini la, Korowii bam la dɛ do Korowii Tɛnte Dea la nyundua baa nao, asɛ jwaana ɡe o do kɛŋɔ nii.