Kaala 4 - mzwDBL

Kpeɡri Korowii aa tɛ Mosis

¹ Anee Mosis chaŋe Korowii ŋɔ, “Dɛ ba ta men yaradae dɛ cheɡ deŋne no n be, dɛ ŋɔ he ta he te kpɔe baɡ mɛ naa, n ŋɔ ɛrɔɔ?”

² Belaa Korowii bɔɔro ŋɔ, “Bɔkwaa lɔ he nɔn ta nɔɔ?” Anee o chaŋe ŋɔ, “Daŋɡbalaa lɔ n nɔn ta.”

³ Asɛ Korowii ŋɔ, “Kpɔ ta harɛ.” Mosis aa kpɔa ta harɛ la, o berɛ harɛkon, asɛ o chwa le o jwɛh.

⁴ Ate, Korowii berɛ ŋɔ o be ŋɔ, “Tɛr nɔn lawɛ o din.” Waa lawɔ la, asɛ o berɛ daŋɡbala do o nɔn ta.

⁵ Asɛ o berɛ ŋɔ, “Gɛ aa ɛ ásɛ ba yarada kɛŋɔ Korowii ba naawa Abraham ne Aesek ne Jekɔb aa tomɔ la kpɔ o te baɡle laanee la.”

⁶ O berɔ ŋɔ o be ŋɔ, “Kpɔ he nɔn do he batakaare bini,” asɛ o ɛ ɡɛ. Waa laa nɔn kpɔ la, dɛ o lɛɡrɔ kɛŋɔ bwadabii weechɔɡa yon lawɛ nɛn la ken.

⁷ Asɛ Korowii ŋɔ, “Berɛ kpɔ he nɔn la do.” Asɛ o ɛ ɡɛ. Waa bera laa nɔn kpɔ la, dɛ o bwa kwaarɔ dɛ do kɛŋɔ o fa aa doa wubwa la.

⁸ Korowii bol o be ŋɔ, “Dɛ ba ta hen yaradae nyokpowe-ɛɛla aa tɔ sie la ta tenaa, ba ken ɛɛ yarada anɔ aa teŋa nɛɛ nɔ ta tenee.

⁹ Kɛ dɛ ba ta hen yaradae nyokpowe-ɛɛla nɔ bwa ta, kɛɛ dɛ taŋ deŋne aa, ka ɛ nee le Nael Moo ta dɛ́ fuɡa ta harɛ. Nee la ɛɛ berɛ chalee dawɛ harɛ la sie.”

¹⁰ Asɛ Mosis ŋɔ Korowii be ŋɔ, “N Naa Korowii, n nyoa aa kpɛlɛ ń won bol waa a do som. Dɛ le n bechale saŋ ne ɡɛ saŋ haa kpɔ he te baɡ mɛ bwaa n nyoa aa wola kpɛlɛ ne wobol.”

¹¹ Belaa Korowii ŋɔ o be ŋɔ, “Umee tɛ nɛn nyoa o kpɔ dɛɛ bol waɔ? Kɛɛ umee dɛɛ ɛ nɛn amumu ne deŋneɡbeŋa te, kɛɛ nɛn waa dɛ na ne onɔ la waa wola na nɔ? Men Korowii laa aa?

¹² Ir kaa, mɛɛ chae he bol wa, dɛ́ baɡle ɡɛ bwa haa bol.”

¹³ Asɛ Mosis ŋɔ, “N Naa Korowii, n dɛ soŋe amɔ he fe tomɛ nɛnfale bɛl sɛ?”

¹⁴ Belaa Korowii baah di o nɛɛ kohona asɛ dɛ ŋɔ, “He dɔɔ baa dɛ yerɔ Arɔn o ɛ Lewi dea te la sɛ? N jemɔ kɛŋɔ o te ɛɛ won bol waa kɛrɛdɛ. Hale o lɔ ŋwɛnɛ ta taraken dɛɛ ba dɛ́ ba cheme. O balɔ ba nae naa, o sie ɛɛ lɛo taeh.

¹⁵ Bol ɡɛ bwa haa dɛ nyin bola bwa do o nyoa. Mɛɛ cha heyaa he bol wa, dɛ́ baɡle heya ɡɛ bwa haa ɛ.

¹⁶ Arɔn ɛɛ dɛɛ bol waa nɛra la bee, ásɛ a ɛ kɛŋɔ henee dɛɛ bol. Aa ka ɛɔ kɛŋɔ henee ɛ Korowii, asɛ o bol he waa nɛra la be dɛɛ tɛɛ.

¹⁷ Kɛ kpɔ daŋɡbala nɔ kpoŋe, onee hɛɛ ba wona kpɔ dɛɛ ɛ nyokpowa.”

Mosis bera dɛ́ kaa Ijipt harɛ ta

¹⁸ Belaa Mosis berɛ kaa o helabaa Jetro be dɛ ka ŋɔ o be ŋɔ, “N dɛ soŋe, ɡel ń berɛ kaa n lolanar be Ijipt dɛ́ ka na kɛŋɔ ba ta lole kɛɛ.” Anee o sɛh dɛ tao ŋwɛnɛ deŋnesɔɔhna ta o kaa.

¹⁹ Mosis taa lɔ Midian harɛ ta la, Korowii ŋɔ o be ŋɔ, “Berɛ kaa Ijipt harɛ ta, dɛkalkɛ nɛra la ba fa aa dɛ nyini dɛ́ kpo la bwa serewɔ.”

²⁰ Anomanta, o kpɔ o haah ne bibaala so keeɡo ta, dɛ berɛ dɛɛ kaa Ijipt harɛ, dɛ kpɔ daŋɡbala Korowii aa bol o waa o be la kpoŋe.

²¹ Belaa Korowii berɛ ŋɔ o be ŋɔ, “Haa bera dɛɛ kaa Ijipt harɛ ta nɔ, na kɛŋɔ kpeɡri maa tɛɛ he kpɔ dɛɛ ɛ nyokpowaa la, hɛɛ ɛa Ijipt kooro siwi taa. Kɛ mɛɛ ɡeloo o deŋne do kpeɡri, waa wola ɡel n nɛra la kaa.

²² Ásɛ he ŋɔ o be ŋɔ, Israel tena do kɛŋɔ n bibanloɡle ken,

²³ asɛ n ŋɔ he be ŋɔ, he tɛ n bibaa ŋwɛnɛ ásɛ o ka tom mɛ. Kɛ he vɛoh, anomanta, mɛɛ kpo he ɡe bibanloɡlee.”

²⁴ Baa dɛ kaa la, Korowii baa cheme Mosis Ijipt ŋwɛnɛ ta, bobɛl hɔɔhra tel bela ba yon chɔ la, dɛ fe ɛɛ nyin o kpoe.

²⁵ Belaa o haah Sepora kpɔ bwepɛla o nyoa aa do kɛŋɔ kere teŋe o bie la pen, dɛ kpɔ chal la ka leɡe Mosis napaala dɛ ŋɔ, “Gɛ maa ɛa nɔ dɛ baɡle kɛŋɔ n ne he ɛ beŋkpoŋ ya soɡa nɔ bini.”

²⁶ Anomanta, Korowii ɡel Mosis kpoe.

²⁷ Anee Korowii ŋɔ Arɔn be ŋɔ, “Ir la pua hɛŋle ɡbo harɛ ta, dɛ́ ka cheme Mosis.” Asɛ o ir dɛ la ka chemo Korowii bwe waa do ɡoroŋ ta dɛ jaamo.

²⁸ Belaa Mosis bol wobɛlbwa Korowii aa tomɔ ŋɔ ó ka bol, ne nyokpowe-ɛɛla la bwa waa doo ŋɔ ó ɛ la bwa chaɡle Arɔn.

²⁹ Anomanta, o ne Arɔn bwa la Ijipt dɛ ka boa Israel nomonome la bwa nyoa,

³⁰ asɛ Arɔn chaɡle wobɛlbwa Korowii aa bola baɡle Mosis la ba be. Mosis berɔ ɛ nyokpowe-ɛɛla la ba siwi ta,

³¹ asɛ ba yaradao. Baa noa kɛŋɔ Korowii na ɡɛ baa dɛ ɛɛ ba hɔhɔrɔwa asɛ ba waa hiaoh kohona la, ba ɡuŋo dɛ duuru.