Kaala 39 - mzwDBL

Sɔfore laala wa

¹ Jiseburum ne jisekɔl ne jiseswɛmee ba kpɔ sɔh laaladɛɛɡa baa doa dɛɛ ɛ Korowii Dea la bini toma, dɛ sɔh laala aa do ɡoroŋ tɛ Arɔn ɡɛ Korowii aa do Mosis la.

² Ba kpɔ jiseburum ne jisekɔl ne jiseswɛm ne jisepondɛɛɡe dɛ kpɔ suuɡaswɛm ja nyarɛ batakaarebora efɔd la.

³ Suuɡaswɛmee ba lɔɡɛ dɛ teŋna kɛŋɔ jise dɛ kpɔa ja jiseburum ne jisekɔl ne jiseswɛm dɛ jisepondɛɛɡe ta nyarɔ. Nɛn waa dɔ a nyara wejema laanee nyarɔ.

⁴ Ba kpɔ yal la pera nyarɛ a nɔɔra lawɛ baŋne anɛ habɔɔ yal la ta, dɛ kpɔ vaama ta ba lawɛ o sie yal la a pɛ dɔŋa.

⁵ Gɛɛ baa kpɔ jiseburum ne jisekɔl ne jiseswɛm ne jisepondɛɛɡe dɛ kpɔ suuɡaswɛm ja nyarɛ batakaarebora efɔd la. Kon siwi beŋkpoŋii ba kpɔ sɔh kiriso la ɡe. Gɛ Korowii aa do Mosis laanee ba ɛo.

⁶ Ba cheɡ onis bwedɛɛɡa la suuɡaswɛm kwaa ta a lawa kpoŋe, dɛ ɛ Jekɔb bibaala sɔna dawɛ a ta. Nɛn waa dɔ a ɡɛ wejemaa ɛa.

⁷ Ba kpɔa do o batakaarebora efɔd la vam nyuune ta, ásɛ Korowii ɛɛ lii ba wa ɡɛ waa do Mosis la.

Kon waa dɛ dawɛ sɔfore bambile ta

⁸ Ba ɛ kon waa dawɛ Arɔn bambile ta. Kwaa baa kpɔa nyarɛ batakaarebora efɔd la nee ba ɛo. Ba nyarɔ kɛrɛdɛ ɡɛ nɛn waa dɔ a wejema aa dɛ nyara la,

⁹ dɛ kpɛwɔ kera anɛ asɛ o jaŋne ne o paɡri bwa ɛ kɛrɛdɛ. O jaŋne ɛ nɔmpaa del asɛ o paɡri ɡe ɡɛ.

¹⁰ Ba kpɔ bwedɛɛɡa bil jaŋne nɛ bɔre anaarɛ o ta. Anɔ la aa tɔ sie la ɛ bweswɛm rubi ne topas waa ɛ solmen dɛ bwelwɛɛ bɛrel.

¹¹ Anɔ la aa teŋa nɛɛ la ɛ bweburum peihpeih tɛɛkoes, ne bweburum kohona safaaya, dɛ bwelwɛɛ ɡereŋ emirad.

¹² Toorote la ɡe ɛ bweburum jansɛf, dɛ bwe waa dɛ nyɛɡle aɡat,

¹³ naarɛte la ɛ solmen waa dɛ nyɛɡle kresolet, ne bwelwɛɛ onis dɛ bwelwɛɛ waa dɛ nyɛɡle jasepa. Ba cheɡa suuɡaswɛm kwaa ta a lawa kpoŋe.

¹⁴ A bwa ɛ bwea fi dɛ anɛ, bɛlbwa che tɛ Jekɔb bibaala la, asɛ bɛlbwa sɔn dawɛ o ta o che tɛ o dea.

¹⁵ Ba kpɔ suuɡaswɛm tenten ɛ jɔɡrɔre dɛ ŋwɛɛra kɛŋɔ ŋwɛn ken, dɛ́ kpɔ do kon waa dɛ dawɛ o bambile ta la ta.

¹⁶ Ba kpɔ suuɡaswɛm ɛ kwaa aa lawɛ kwaa dɛɛ kpoŋe anɛ ne nɔnloɡa anɛ do o loŋkoni anɛ ta.

¹⁷ Ba kpɔ jɔɡrɔre anɛ la do nɔnloɡa anɛ la baa kpɔa do o loŋkoni anɛ ta la ta.

¹⁸ Dɛ berɛ kpɔ jɔɡrɔre la nyoo anɛ la kar ɡe ba lawɛ bwea cheɡbɔra anɛ aa lɔ batakaarebora efɔd vaama ta, dɛ ba o sie la ta.

¹⁹ Ba berɔ kpɔ suuɡaswɛm ɛ nɔnloɡa anɛ dɛ kpɔ do o loŋkoni anɛ aa lɔ o lɔɡa la bini dɛ bɛne batakaarebora efɔd la.

²⁰ Dɛ berɛ ɛ nɔnloɡa anɛ, dɛ kpɔa lawɛ o nɔɔra la harɛbɔr, dɛ bɛne bela baa nyara pɛ batakaarebora efɔd la nyunduabɔr.

²¹ Ba kpɔ ŋwɛmburum lawɛ nɔnloɡa aa lɔ kon waa lɔ kon waa dawɛ o bambile la ta dɛ ba nɔnloɡa aa lɔ batakaarebora efɔd la nyundua la, ɡɛ aa ɛ o bɛ batakaare la ta ba le ɡɛ Korowii aa do Mosis la.

Sɔfore laala ane ɡe wa

²² Arɔn batakaarejaŋ waa do ombora la dɛɛ dawɛ o ta la, jiseburum ɡbosoroo nee ba sɔɔh. Nɛn waa dɔ kwaa sɔeh wejemaa sɔɔh,

²³ asɛ dɛ pere o baah ta ó ɛ o nyu bɔr. O sɔh o nyu bɔr la bar kɛrɛdɛ ásɛ o bɛ won kɛɛ.

²⁴ Dɛ kpɔ jiseburum ne jisekɔl ne jiseswɛm dɛ jisepondɛɛɡe nyarɛ kwaa aa do ɡuleɡule kɛŋɔ daa nɔna baa dɛ yera pɔmeɡranet bar o nyoo cheme.

²⁵ Asɛ dɛ kpɔ suuɡaswɛm tenten kwaa dɔrɔŋre do kon ɡuleɡule la baahna ta.

²⁶ Ba do suuɡaswɛm dɔrɔŋ aa, dɛ ba do kon ɡuleɡule la bɛl ɡe, asɛ a do ɡɛ bar o nyoa cheme. Sɔfo nomoa la chɛ kɛŋɔ ó doa dɛ́ kpɔ ɛ Korowii toma, ɡɛ Korowii aa do Mosis la.

²⁷ Nɛn waa dɔ kwaa sɔeh wejemaa kpɔ jisepondɛɛɡe sɔh batakaarejaŋa Arɔn ne o bibaala aa dɛɛ doa mun ta,

²⁸ ne Arɔn ɡbɛrɛjen ne o bibaala ɡe yale baa kpɔ vɔwɛ ba nyuune dɛ yapebora waa dɛɛ doo mun ta.

²⁹ Ba pɛrɛ kiriso la, nɛn waa dɔ kwaa nyara dɛ dawɛ kon ta wejemaa kpɔ jisepondɛɛɡe ne jiseburum ne jisekɔl dɛ jiseswɛm ɛo ɡɛ Korowii aa do Mosis la.

³⁰ Suuɡaswɛm tentenee ba kpɔ ɛ kon waa do kpɛlɛntɛŋ o do ɡoroŋ dɛ do Arɔn ɡbɛrɛjen la sie dɛ ɛ dawɛ o ta ŋɔ, “kon baa lea cheg tɛ korowii o do goroŋ.”

³¹ Asɛ dɛ kpɔ ŋwɛmburum do o ta dɛ́ kpɔ lawɛ Arɔn ɡbɛrɛ la sie ɡɛ tenten Korowii aa do Mosis la.

Korowii Tɛnte Dea la toma tona wa

³² Gɛɛ a do Israel tena tonɛ toma aa lɔ Korowii Tɛnte Dea waa ɛ o Dea Cheremibɔr bela bwa, ɡɛ Korowii aa do Mosis la.

³³ Ba kpɔ Korowii Tɛnte Dea laala baa kwaara la bwa ba Mosis sie. Anee kɛŋɔ, Korowii Tɛnte Dea la ne o koŋkwaa baa kpɔ kwaa o bini, ne kwaa baa doa tora a sie chaɡɛ dɔŋa, ne daa ne doli bwa soo siwi, dɛ dachiɡri ne a loɡa,

³⁴ ne pebal tɔne baa doa konswɛɛma baa kpɔ tɔɔ, ne mpo nae tɔne baa kpɔ tɔɔ dɛ pateesan baa kpɔ saɡɛ boɡoroŋ tenten la sie.

³⁵ Korowii Ne Nɛwɛnyina Fɔo Daka ne o dajaŋa baa kpɔ dɛɛ cheo ne o tɔ, bela Korowii aa cheme o nɛra dɛ́ kpɔ ba wechɔɡa kɛ ba,

³⁶ ne teebur la ne o konjeɡre, ne paanoo baa kpɔa baa bil Korowii sie,

³⁷ ne kandea da waa ɛ suuɡaswɛm tenten la, ne o kandere dɛ o koŋkwaa bwa, dɛ noo baa kpɔ do o ta,

³⁸ ne suuɡaswɛm kon baa dɛ fuh daawiile a sɔɔh aa soma o ta, ne noo baa kpɔa dɛɛ do nɛra sɔfore ta, ne konsɔɔhsoma, dɛ pateesan baa kpɔ saɡɛ tɛnte la doonyoa,

³⁹ ne saraha kon baa kpɔ ayaawa ɛ o ne o kafola, ne o dajaŋa baa kpɔa dɛɛ cheo ne o koŋkwaa bwa, ne loɡbajen dɛ o kon waa chɔŋɛ o ta,

⁴⁰ ne pateesanre aa bar Korowii Tɛnte Dea la, ne o Dea Cheremibɔr dachiɡri, ne loɡa aa lɔ a mune ta, ne pateesan waa lɔ dembaah doonyoa la ta, ne ŋwɛɛra ne kwaa baa kpɔa baŋre dembaah dachiɡri, dɛ koŋkwaa bwa baa kpɔ kwaa bela bwa,

⁴¹ ne laala baa sɔah sɔfore doa dɛɛ ɛ toma Korowii Dea bela, ne Sɔfonomoa Arɔn laala aa do ɡoroŋ la ne o bibaala ɡe laala baa doa dɛ kpɔ dɛɛ ɛ sɔfore toma.

⁴² Israel tena la ɛ toma la bwa ɡɛ tenten Korowii aa do Mosis la.

⁴³ Mosis kaa na toma la, dɛ ba ɛa kɛrɛdɛ ɡɛ tenten Korowii aa do ba la, asɛ o soŋe andɛɛɡa Korowii be tɛɛ ba.