Kaala 37 - mzwDBL

Korowii Ne Nɛwɛnyina Fɔo Daka kwaara

¹ Besalɛl kpɔ akaasia daa kwaa Korowii Ne Nɛwɛnyina Fɔo Daka la. O jaŋne ka tama ó ɛ naɡale anaarɛ, o paɡri ɡe ka tama ó ɡwaa naɡale anɛ. O daŋa ɡe ka ta ma ó ɡwaa naɡale anɛ.

² O kpɔ suuɡaswɛm tenten ɛ o bini ne o baŋ bwa, asɛ dɛ ɛ ane bar o nyoo ɡe cheme.

³ O berɔ ɛ suuɡaswɛm kɛŋɔ nɔnloɡa ken dɛ kpɔ marɛ o nakpale anaarɛ la ta. Anɛ lɔ o baŋ bɛl asɛ anɛ ɡe do baŋ bɛl.

⁴ O kpɔ akaasia daa kwaa dajaŋa dɛ kpɔ suuɡaswɛm ɛ a bwara.

⁵ Dɛ kpɔ dajaŋa la su nɔnloɡa aa lɔ Daka la baŋne anɛ la ta, ásɛ ba kpɔ dɛɛ cheo.

⁶ O kpɔ suuɡaswɛm tenten kwaa Daka la tɔ bela Korowii aa ba cheme o nɛra dɛ́ kpɔ ba wechɔɡa kɛ ba. O jaŋne ka tama ó ɛ naɡale anaarɛ, ásɛ o paɡri ɡe ka tama ó ɡwaa naɡale anɛ.

⁷ Asɛ dɛ kpɔ suuɡaswɛm kwaa Kerobim anɛ do daka la nyoo,

⁸ Kerobim la beŋkpoŋ chɔŋɛ o baŋ bɛl, asɛ bɛl do o baŋ bɛl la ɡe ta. Suuɡaswɛm beŋkpoŋii o kpɔ kwaa Kerobim la ne daka la tɔ bwa.

⁹ Kerobim la sie chaɡɛ dɔŋa a kena paɡri kaa nyundua dɛɛ cheme dɔŋa dɛ tɔ daka la tɔ la ta.

Teebur baa kpɔ paanoo dɛɛ dawɛ o ta

¹⁰ O berɔ kpɔ akaasia daa kwaa teebur o jaŋne ɛ naɡale atoro, o paɡri ɛ naɡale beŋkpoŋ ne tama asɛ o daŋa ɡe ka tama ó ɡwaa naɡale anɛ.

¹¹ O kpɔ suuɡaswɛm tenten ɛ o bwa, dɛ kpɔ ane ɡe bar o nyoo cheme.

¹² O ɛ kon o paɡri aa do kɛŋɔ nɔmpaa del, asɛ dɛ berɛ ɛ suuɡaswɛm dawɛ o ta bar.

¹³ O kwaa suuɡaswɛm nɔnloɡa anaarɛ do o nakpale la bɛlbwa nyundua loŋkoni ta.

¹⁴ O do nɔnloɡa la a do kon waa bar o nyundua la lɔɡa bá won kpɔ dajaŋa su a ta dɛ́ kpɔ dɛɛ cheo.

¹⁵ Akaasia daa o kpɔ kwaa dajaŋa la dɛ kpɔ suuɡaswɛm ɛ a bwara bá kpɔ dɛɛ cheo.

¹⁶ Ba kpɔ suuɡaswɛm tenten ɛ tafolabɔtɔre ne loɡa ne viine dɛ numoli baa kpɔ dɛɛ ɛ sen saraha.

Kandea daa kwaara wa

¹⁷ O kwaa kandea da. Suuɡaswɛm tenten nee o kpɔ loɡɔ le o mun ta kaa o nyundua. O ɛ numoli a do kɛŋɔ daa fee yon pili la, dɛ ɛ anɔ la aa jaa bwa dɛ do kandea daa la ta suuɡaswɛm beŋkpoŋ la ne.

¹⁸ Kpala anumɛlee lɔ kandea daa la ta. Atoro lɔ o baŋ bɛl asɛ atoro ɡe do baŋ bɛl.

¹⁹ Numoli aa do kɛŋɔ almɔn da fee la ɛ atotoro dɛ do kpale bɛlbwa ta,

²⁰ asɛ o ɛ anaarɛ ɡe do kandea daa la tenten ta.

²¹ O ɛ fee aa wola sie pile mɔɔ la beŋkpoŋ do kpala anɛ aa tɔ sie chenchema la lɔɡa, dɛ do bɛl kpala anɛ aa teŋa nɛɛ chenchema la lɔɡa, dɛ ɛ ɡɛ tenten do kpala anɛ aa teŋa tooro la ɡe chenchema lɔɡa. A bwa ɛ kpala anumɛl.

²² Suuɡaswɛm beŋkpoŋii o kpɔ loɡɛ kandea daa la ne o kpala ne o fee aa wola sie pile mɔɔ la bwa.

²³ O kwaa kandere anuanɛ ba kpɔ do o ta, ne kwaa baa kpɔa dɛɛ fee kandea ŋwɛn la doŋa ne o loɡbakorɔre bwa. Suuɡaswɛm tenten nee o ɛa.

²⁴ Suuɡaswɛm waa kpɔa kwaa kandea daa la ne o koŋkwaa bwa la tɔɡre ɛɛ ɛ kilore fifraatoro dɛ anaarɛɛ.

Kon baa dɛ fuh daawiile o ta

²⁵ Ba kpɔ akaasia daa kwaa kon baa dɛ fuh daawiile a sɔɔh aa soma o ta. O ɛ fɔɔskwɛɛ. O jaŋne ɛ naɡale beŋkpoŋ ne tama, ɡɛ tentenee o paɡri ɡe do, asɛ o daŋa ɡe ɛ naɡale atoro. Daa beŋkpoŋii o kpɔ sɛh o ne kwaa aa paaɡe o loŋkoni ta kɛŋɔ nyeɡlare la bwa.

²⁶ O kpɔ suuɡaswɛm tenten ɛ o nyundua ne o baŋne anaarɛ la bwa ta ne nyeɡlare la ta, dɛ ɛ ane ɡe bar o nyoo.

²⁷ Dɛ kpɔ suuɡaswɛm ɛ nɔnloɡa anɛ do o nyoo la lɔɡa bɔr. Anɛ lɔ baŋ bɛl asɛ anɛ ɡe do baŋ bɛl dɛ lawɛ dajaŋa baa kpɔ dɛɛ cheo la.

²⁸ Akaasia daa nee o ɛ dajaŋa la, asɛ dɛ kpɔ suuɡaswɛm ɛ a bwara.

²⁹ O ɛ noo aa do ɡoroŋ baa kpɔa dɛɛ do nɛn sɔfore ta, ne daawiile baa dɛ fuah, ɡɛ nɛn waa dɔ a wejema aa dɛ ɛa la.