Kaala 34 - mzwDBL

Bwepɛle anfala wa

¹ Korowii ŋɔ Mosis be ŋɔ, “Sɛh bwepɛle anɛ dɛ́ ɡel a do kɛŋɔ loɡla kwaa la, ásɛ n chwerɛ kwaa n fa aa chwera dawɛ anɔ la haa peɡra la dɔŋa dawɛ a ta.

² Kpɔ he te kere chɔmbibi, ásɛ dɛ ba n be Sinai Bwejen la doa.

³ Maa nyin kɛŋɔ nɛn ja he nɛɛ ba, maa nomɛlbwa sese nyin dɛ́ na bela. Kondɛɛre bɛlbwa ɡe bɛ bwejen la lɔɡa dibɔr ba.”

⁴ Asɛ Mosis sɛh bwea anɛ kɛŋɔ wubwa kwaa la ken, asɛ tɔ aa pera chɔmbibi la, o kpɔ teeh kaa bwejen la doa ɡɛ Korowii aa doo la.

⁵ Belaa Korowii kpɔ bam ta dɛ ba o ne Mosis che bela. Asɛ Korowii yerɛ o sɔndɛɛɡe waa dɔa la o be kɛ onee Korowii.

⁶ Belaa o teŋe Mosis sie ba kaa dɛ ŋɔ, “Menee Korowii, menee dɔ tedoma dɛɛ na nɛra sum. N baah aa di warawara, n nyina ne n kasinteŋ ɡe kan.

⁷ N teŋɔ dɛɛ nyin nɛra kaɡboŋa dɛ kpɔ ba wechɔɡa dɛɛ kɛ ba, dɛ kpɔ nɛra vɛɛh baa vɛɛh mɛ ne ba wechɔɡa bwa dɛɛ kɛ ba. Kɛ maa nɛra baa dɛ ɛ wechɔɡaa ɡel pɛɛ maa wola ba deŋnee tɛr. Mɛɛ koh wechɔɡa nɛra aa ɛa waa, dɛ́ tɛr ba bii ne ba naanar ne ba ɡe naanar baa ka ba la deŋnee.”

⁸ Belaa Mosis ɛ warane dɛ kpɔ o sie pi harɛ dɛ duu Korowii.

⁹ Dɛ ŋɔ, “N Naa Korowii, dɛ he sie lɛ n nɛ aa, n dɛ soŋe he ja ya nɛɛ kaa. A lole kɛ ba deŋne kpeɡri, kɛ kpɔ ya wechɔɡa kɛ yaa, ásɛ dɛ kpɔ yaa ɛ he nɛra.”

¹⁰ Belaa Korowii ŋɔ, “N ne hɛɛ fɔwɛ fɔwee. Mɛɛ ɛ nyokpowaa a dɔŋa aa wola harɛ nɔ ta bobɛlbwa chiɡe ka he bwa siwi ta. Nɛra he ne baa soɡa la ɛɛ nao ɡɛ men Korowii, we-ɛɛla maa lɔ he bini dɛɛ ɛ la aa ɔma kohona.

¹¹ Hé nyiŋi kɛrɛdɛ dɛɛ teŋɛ waa maa dɛ do heyaa a ta fini nɔ ta. Mɛɛ doŋi Amɔre ne Keenan ne Hiti ne Pɛrɛs ne Hivi dɛ Jebus tena he siwi taa dɛ́ le harɛ nɔ ta.

¹² Hé nyiŋi kɛrɛdɛ ásɛ he ne nɛra haa dɛ la ka so ba harɛ ta nɔ bɛ fɔo bɛlbwa fɔwɛ, ásɛ a ba ɛ kɛŋɔ bel bɛl, dɛ́ chɔ tɛ heya.

¹³ Hé paɡre bela baa kpoo kwaa dɛɛ tɛ ba voɡare, ne bwea baa paaɡa dɛɛ duura dɛ voɡhaah Asera dajaŋa la.

¹⁴ He bɛ voɡ bɛlbwa tomɛ ka ja men Korowii nɛ, maa nomɛlbwa nyin dɛ ja n nɛ.

¹⁵ Hé nyiŋi kɛrɛdɛ he ne ba bɛ fɔo bɛlbwa fɔwɛ, dɛkalkɛ ba kpɔ ba te tɛ ba voɡa la kɛŋɔ baa dɛ bɔ jwamane ken asɛ dɛ kpoo kwaa ɛ saraha dɛɛ tɛa, baa yerɛ heyaa ásɛ he di ane.

¹⁶ Hé nyin ba bihaahna tɛ he bibaala ba mo, asɛ baa tomɛ ba voɡa la aa, ba ken ɛɛ berɛ he bibaala la liiree le n be dɛɛ tomɛ ba voɡa la.

¹⁷ He bɛ buni bɛlbwa kpɔ ɛ voɡ dɛɛ tomɔ.

¹⁸ Hé di Paanoo Iisi Aa Wola Toole a ta Tɔpejen la. Tɔpera anuanɛɛ chɛ kɛŋɔ hé dia ɡɛ maa do heyaa la. Hé dia benanyoa bɛlbwa tɔpera maa lea cheɡ Solchɛɡɛ korobie ta dɛkalkɛ o taa he le Ijipt harɛ ta.

¹⁹ Bibanloɡle ne kondɛɛre bɛlbwa ombal waa ɛ biloɡle ɛ n kon.

²⁰ Kɛ dɛ keeɡo bie yaa, hé nyin pebie chiɡ o naa ta. He ta bɛl dɔe dɛ chiɡ o naa ta naa, hé ku keeɡo la baŋa. Hé charɛ bibanloɡle bɛlbwa ɡe nyu. Nomɛlbwa bɛ n sie ba nɔŋɡbala ne.

²¹ Hé kpɔ tɔpera anumɛl ɛ toma, ásɛ tɔpenuanɛ wee hé onɛ o ta. Dɛ kooni para saŋ kɛɛ kwaa koma saŋee yoo, a chɛ kɛ hé onɛ.

²² Hé di Koo Kondikwaa Koma Tɔpejen la he meloɡla ne, dɛ́ di Koo Kondikwaa Nyoa Boara Tɔpejen benanyoa la aa baa kaa o jaɡa la.

²³ Kera atoroo chɛ kɛ baa bɛlbwa ba n sie benanyoa bɛlbwa men Nemenɛ Korowii Israel tena aa dɛ tom mɛ la sie.

²⁴ Mɛɛ doŋi harɛre nɛra baa lɔ he siee, dɛ́ kpɔ ba harɛre ja he kon ta o berɛ do kan. Hé iro dɛɛ ba men Korowii sie kera atoro la aa, nomɛlbwa aa lii kɛŋɔ wɛɛ ba yo heyaa dɛ́ lɛ he harɛ.

²⁵ Hé dɛ ba kon kpoe ɛ saraha tɛ mɛ naa, he bɛ komɛlbwa iisi aa koo o ta kpɔ ja. He bɛ ɡel Galekaa kondikwaa haa kpɔa ba ɛ saraha la ka tɔɔ per a ta.

²⁶ Hé kpɔ he koo kondikonloɡla aa wera kohona ba tɛ men Korowii haa dɛ tom mɛ la Dea. He bɛ bombie daa o nya elnee ne.”

²⁷ Belaa Korowii ŋɔ Mosis be ŋɔ, “Chwerɛ ɡɛ waa nɔ bil, dɛkalkɛ a taa a che n ne hen dɛ Israel tena fɔwɛ fɔo.”

²⁸ Mosis soɡe Korowii be bela tɔpera fifraanaarɛ chɔɔ ne jwaana. Dɛ waa kwaa di waa nee ɡe nyɔ. Asɛ Korowii chwerɛ o fɔo waa la dawɛ bwepɛle anɛ Mosis aa sɛah la ta. O Mmara fi laanee o chwerɛ dawɛ a ta.

Mosis tuo le Sinai Bwejen doa

²⁹ Belaa Mosis kpɔ bwepɛle anɛ la dɛ tu Sinai Bwejen la. Dɛ o ta jemɛ kɛŋɔ o ne Korowii aa bol waa la, a ɡelɔ o sie ɛɛ nyɛɡle.

³⁰ Arɔn ne Israel tena bwa aa nao la, dɛ o siebɔr bwa dɛ nyɛɡle asɛ baa ɔmɛ kɛ ba la o jwɛh.

³¹ Belaa Mosis yer ba, asɛ Arɔn ne ba nomonome la berɛ ba, asɛ o bol waa ba be.

³² A habɔɔ, Israel tena bwa ba o jwɛh, asɛ o baɡle mmarare la bwa Korowii aa kpɔa tɛo Sinai Bwejen ta la waa baɡ ba.

³³ Mosis aa bol waa ba be tonɛ la, o kpɔ yachaahne bɔle o siebɔr.

³⁴ Kɛ dɛ o ba dɛ jo Korowii Dea Cheremibɔr o ne ó ka bol wa aa, ɡɛɛ o laa yal la kpɔ. O leɔ dɛ ba naa, o dɛ baɡle Israel tena waa Korowii aa ŋɔa ó bol ba be la bwa,

³⁵ asɛ ba na kɛŋɔ o siebɔr dɛ nyɛɡle. Ba nao ɡɛ naa, dɛ o berɔ kpɔ yal la tɔ o sie ka tel kɛŋɔ saŋ waa berɛ ba jo Korowii be bá ka bol waa ja.