Kaala 31 - mzwDBL

Besalɛl ne Oholiab

¹ Korowii ŋɔ Mosis be ŋɔ,

² “N le Uri bibaa Besalɛl waa ɛ Hur naa dɛ le Juda dea tena bini,

³ dɛ ɡel n Doma so o nɛ, dɛ tɛo wejema waa kpɔa dɛɛ sɛh kwaa ne kwaa sɔeh dɛ anɔ la aa jaa dɛ do ken bwa,

⁴ wejema waa won kpɔ suuɡaswɛm ne suuɡapoŋa dɛ ayaawa dɛɛ ɛ kwaa á do wer.

⁵ Bwedɛɛɡa sɛɛh dɛ́ cheɡa suuɡaswɛm ta, ne daa kpɔe dɛ́ sɛh koŋkwaa dɛ anɔ la aa do ken bwa soo siwi.

⁶ N berɔ le Ahisamak bibaa Oholiab, dɛ le Dan dea ŋɔ ó baa chao. Dɛ berɛ tɛ tom-ɛɛra bwa wejema bá won ɛ komɛlbwa maa doe a ta la bwa.

⁷ Koŋkwaa kɛŋɔ n Dea Cheremibɔr, ne N Ne Nɛwɛnyina Fɔo Daka la ne o tɔ bela maa kpɔ he wechɔɡa dɛɛ kɛ heya, dɛ koŋkwaa aa ja Tɛnte Dea la ta bwa,

⁸ ne teebur la ne o konjeɡre, ne kandea daa waa ɛ suuɡaswɛm ɡbo la ne o koŋkwaare, dɛ kon baa dɛ fuh daawiile a sɔɔh aa soma o ta,

⁹ ne kon baa dɛ fuh saraha kwaa o ta ne o koŋkwaa bwa, dɛ loɡbajen ne kon waa chɔŋɛ o ta,

¹⁰ ne sɔfore laala baa sɔah a do ɡoroŋ tɛ Arɔn ne o bibaala, baa doa dɛ kpɔ dɛɛ ɛ sɔfore toma,

¹¹ ne noo baa kpɔa fuɡe dɛɛ do sɔfore nyu ta, dɛ daawiile a sɔɔh aa soma baa fuah Boɡoroŋ bela. Bá ɛa ɡɛ tenten maa doe la.”

Ona Tɔpere wa

¹² Belaa Korowii bol Mosis be ŋɔ,

¹³ “Ŋɔ Israel tena be ŋɔ a chɛ kɛŋɔ báa di n Ona Tɔpera. Anee dɛ́ ɛ danseɛ kon n ne ba baah dɛɛ lii ba, hale dɛ ka tel ba naanar baa ka ba bwa nɛ, ásɛ he jemɛ kɛŋɔ men Korowiirii le heyaa tɛ n te hé ɛ n nɛra.

¹⁴ Hɛ́ɛ di Ona Tɔpere la, dɛkalkɛ o do ɡoroŋ dɛ tɛ heya. He bini bɛlbwa waa chɔɡ tɔpere nɔ la chɛ kɛ bá kpoo. Nomɛlbwa ɡe waa ɛ toma o ta chɛ kɛ bá teŋo le o nɛra bini.

¹⁵ Tɔpera anumɛlee chɛ kɛŋɔ bɛlbwa kpɔ ɛ o toma, kɛ tɔpenuanɛ wee la ɛ Ona Tɔpere. O ɛ tɔpere waa do ɡoroŋ dɛ tɛ men Korowii. Nomɛlbwa waa ɛ toma o ta la chɛ kɛŋɔ bá kpoo.

¹⁶ Israel tena chɛ kɛŋɔ báa di Ona Tɔpere nɔ, o ɛ fɔo dɛ chɔ le saŋ bɛlbwa tɛ naanar baa ka ba bwa.

¹⁷ Onee dɛ́ do n ne Israel tena baah dɛɛ lii yaa saŋ bɛlbwa, dɛkalkɛ tɔpera anumɛlee men Korowii kpɔ ta nyundua ne harɛ, asɛ dɛ ɡel toma ɛɛ dɛ onɛ tɔpenuanɛ wee la ta.”

¹⁸ Korowii aa bol waa chaɡle Mosis Sinai Bwejen ta tonɛ la, o kpɔ bwepɛle anɛ o ɡbabir aa kpɔ o nɔn ɛ o Mmarare dawɛ a ta la tɛo.