Kaala 3 - mzwDBL

Mosis ne dawii ane aa dɛ fuh wa

¹ Awola bɛl, Mosis kpɔ o helabaa Jetro waa ɛ Midian sɔfo la kondɛɛra kaa di bɔr. O teɡa ka ɡarɛ pua hɛŋle ɡbo harɛ ta, dɛ ka le bwe waa do ɡoroŋ baa yerɔ Sinai la ta.

² Belaa Korowii nyundua torome bɛl kpɔ o te baɡlo dawii ane aa dɛ lawɛ nii baah ta. Mosis nao kɛŋɔ nii dɛ le bela, kɛ dɛ dawii la ɡe aa fuh.

³ Anomanta, o lii o nyu bini ŋɔ, “Waa nɔ te ɔma. Mɛɛ suuhnu tel, dɛ́ na ɡɛ aa ɛa dawii nɔ aa wola fuh nɔ.”

⁴ Korowii aa naa kɛŋɔ o ba sie dɛ́ ba na la, o yerɔ dawii la bini ŋɔ, “Mosis! Mosis!” Asɛ o chaŋe ŋɔ, “N Naa Korowii, menee nɔ.”

⁵ Anee Korowii ŋɔ, “Bɛ suuh tel. Foo he naŋɡawa, dɛkalkɛ bela haa cheɡa la ɛ boɡoroŋ.

⁶ Menee Korowii he nabaala Abraham ne Aesek dɛ Jekɔb aa tom mɛ la.” Belaa Mosis kpɔ sie sɔh dɛkalkɛ dɛ o dɛ ɔmɛ kɛ ó nyiŋi Korowii.

⁷ Anee Korowii ŋɔ, “N na sibeɡra kohona baa dɛ do n nɛra baa lɔ Ijipt. N no ba wii, dɛ le ba dɔɔranar tonchɔɡa baa dɛ do ba la ta, anomanta, ba waa hiah mɛ kohona.

⁸ N tuo ba dɛ́ ba lɛɛ ba le Ijipt tena nɔn ta, ásɛ dɛ berɛ kpɔ ba ba harɛpare ondɛɛge ta. O do som Keenan ne Hiti ne Amɔre ne Pɛrɛs ne Hivi dɛ Jebus tena harɛ baa soɡe o ta la ta.

⁹ Taraken Israel tena wii la tel n be, asɛ n na ɡɛ Ijipt tena la aa dɛ ɛɛ ba hɔhɔrɔwa.

¹⁰ N dɛ tomɛ Ijipt kooro be, ásɛ he tɔ n nɛra sie ba won le o harɛ la ta.”

¹¹ Anee Mosis ŋɔ Korowii be ŋɔ, “Umee n ɡe kɛŋɔ ń won la Ijipt kooro be dɛ́ ka ŋɔ ń kpɔ Israel tena le o harɛ ta bela ɔ?”

¹² Asɛ Korowii chaŋo ŋɔ, “Mɛɛ ja he nɛɛ, ásɛ dɛ he baa kpɔ n nɛra le Ijipt harɛ ta ba naa, bá baa tom mɛ bwejen nɔ ta. Anee dɛɛ ba baɡla kɛŋɔ menee tomɛ.”

¹³ Belaa Mosis chaŋo dɛ ŋɔ, “Amɔ dɛ n la Israel tena be dɛ ka ŋɔ, Korowii ba naawa aa tomɔ laanee tom mɛ ba be, asɛ ba bɔɔ mɛ o sɔn aa, bɔkwa waa ń bol ba be nɔ?”

¹⁴ Anee Korowii ŋɔ o be ŋɔ, “Menee Men. Kenii chɛ kɛ he ŋɔ ba be kɛŋɔ naate baa dɛ yerɔ, ‘Menee Men laanee tom mɛ he be.’ ”

¹⁵ Korowii berɔ ŋɔ Mosis be ŋɔ, “Ŋɔ Israel tena be ŋɔ, ‘Men Korowii ba nabaala Abraham ne Aesek dɛ Jekɔb aa tomɔ laanee tomɛ ba be.’ A ɡɛ sɔn nɔɔ dɛ́ ɛ n sɔn saŋ bɛlbwa dɛɛ la. Ásɛ naanar baa ka ba bwa ɡe ɛɛ yer mɛ ɡɛ.

¹⁶ La ka cheme Israel nomonome dɛ́ ŋɔ ba be ŋɔ, ‘Korowii he naawa Abraham ne Aesek ne Jekɔb aa tomɔ la ba n be dɛ ba ŋɔ, o nyiŋo, dɛ na ɡɛ baa dɛ ɛ heyaa hɔhɔrɔwa Ijipt harɛ.

¹⁷ Anomanta, o ŋɔ, wɛɛ lawɛ heyaa le Ijipt harɛ bela baa dɛ ɛ heyaa hɔhɔrɔwa kohona la, dɛ́ kaa he ne harɛpare ondɛɛɡe ta. Bela Keenan ne Hiti ne Amɔre ne Pɛrɛs ne Hivi dɛ Jebus tena aa soɡa la.’

¹⁸ Nomonome la ɛɛ no he waa haa bol ba be laanee, ásɛ he ne ba la Ijipt kooro be dɛ́ ka ŋɔ o be ŋɔ, ‘Korowii Hibru tena aa dɛ tomɔ la kpɔ o te chaɡle yaa. Anomanta, tɛ yaa ŋwɛnɛ yá ka ɡaaɡe tɔpera atoro pua hɛŋle ɡbo harɛ ta, dɛ́ ka kpoo kwaa ɛ saraha tɛ Korowii yaa dɛ tomɔ.’

¹⁹ N jemɔ kɛŋɔ Ijipt kooro aa sɛh ŋɔ he kaa nemenɛ wekpeɡa ane aa puu mɔɔ.

²⁰ Anomanta, mɛɛ che n kpeɡri taa dɛ́ ɡel Ijipt tena na n nyokpowe-ɛɛla maa dɛ́ ba ɛɛ ba bini la, mɔɔ ó ɡel he kaa.

²¹ Mɛɛ ɡeloo ba siwi su heya, ásɛ dɛ he ba dɛ kaa laa, he bɛ nɔŋɡbala kpɔ kaa.

²² Israel haah bɛlbwa la o dɔŋ Ijipt handɔŋ be, ne banɔ la bane baa pɛa so deremi ta ka soŋe kwaa baa kpɔ suuɡaswɛm ne suuɡapoŋa ɛa dɛ yale, dɛ́ kpɔ do he bibaala ne bihaahna. Ásɛ ba laala la berɛ kwaa haa kaa paa laa ta.”