Kaala 29 - mzwDBL

Sɔfore lee cheɡ bá do ɡoroŋ

¹ Korowii berɔ ŋɔ Mosis be ŋɔ, “Kenii hɛɛ ba ɛɛ dɛ́ le Arɔn ne o bibaala cheɡ bá do ɡoroŋ, ásɛ dɛɛ ɛ n toma kɛŋɔ sɔfore. Lawɛ nabale ne pebala anɛ aa wola kirihiah bɛlbwa dii,

² kpɔ mea aa kpera kɛrɛdɛ iisi aa wola toole a ta ɛ paanoo, ne anɔ la baa do noo a ta dɛ anɔ la aa do kɛ biskeeti ken mɔɔ dɛ do noo a ta.

³ Kpɔa do wɛɡrɛ bini dɛ́ lawɛ kondɛɛre la ja dɛ́ kpɔ ba ɛ saraha tɛ mɛ.

⁴ Ásɛ dɛ kpɔ Arɔn ne o bibaala la ba n Dea Cheremibɔr doonyoa bela dɛ́ sɔ ba ne.

⁵ Do Arɔn o sɔfore laala la. Batakaare waa doo mun ta ne batakaarejaŋ, ne batakaarebora efɔd la ne kon waa dawɛ o bambile ta. Ásɛ dɛ kpɔ kiriso baa sɔh kwaa do o ta kɛrɛdɛ la vɔwɛ batakaarebora la ta.

⁶ Kpɔ ɡbɛrɛjen la piu, ásɛ dɛ kpɔ suuɡaswɛm kon waa do ɡoroŋ la vɔwɛ o ta.

⁷ Ásɛ dɛ fuɡe noo baa kpɔa dɛɛ do ba sɔfore ta la ane do o nyu ta.

⁸ Do o bibaala la batakaarejaŋ la dɔŋa,

⁹ dɛ́ pi ba ɡbɛrɛre. Ásɛ dɛ kpɔ kirisore vɔwɛ Arɔn ne o bibaala la. Ba ne ba naanar ɛɛ ɛ sɔfore, dɛɛ tom mɛ saŋ bɛlbwa dɛɛ la. Gɛɛ hɛɛ ba ɛɛ dɛ́ le Arɔn ne o bibaala dɛ́ kpɔ ba toma do ba nɔn ta.

¹⁰ Lawɛ nabale la ba n Dea Cheremibɔr la doonyoa bela, ásɛ Arɔn ne o bibaala kpɔ nɔɔra dawɛ o nyu ta.

¹¹ Teŋe o baŋa men Korowii sie n Dea Cheremibɔr doonyoa bɔr bela.

¹² Ásɛ dɛ kpɔ noni ɛ nao la chal la ane ɛ kwaa aa paaɡe saraha kon la loŋkoni ta la ta, dɛ́ fuɡe a kar ta saraha kon la mun ta.

¹³ Laa o noyal bwa ne o pwɛ bela waa wera, ne o kporombie anɛ la dɛ a noorare bwa kpɔ, dɛ́ fuah saraha kon la ta.

¹⁴ Nao la te bwa la, fuh o ol ne o tɔn ne o tea bini kwaa bwa bela baa soɡa la dahara. O ɛ wechɔɡa kpɔe dɛ́ kɛ saraha kon.

¹⁵ Lawɛ pebal la beŋkpoŋ ba, ásɛ Arɔn ne o bibaala kpɔ nɔɔra dawɛ o nyu ta.

¹⁶ Teŋe o baŋa ásɛ dɛ ɛ o chal la ta saraha kon la baŋne bwa ta.

¹⁷ Mɔne a bini dɛ́ yaɡle o tea bini kwaa ne o nakpale, dɛ́ kpɔa ja o nyu ne anɔ la aa kaa la bwa ta.

¹⁸ Ásɛ dɛ fuh o bwa saraha kon la ta. A ɛ saraha kon baa dɛ fuh o bwa o sɔɔh ɛɛ do som n be.

¹⁹ Berɛ kpɔ penɛɛte la ɡe ba, ásɛ Arɔn ne o bibaala kpɔ nɔɔra dawɛ o nyu ta.

²⁰ Teŋe o baŋa dɛ ɛ o chal la ane leɡe Arɔn ne o bibaala diɡ deŋna nyoo, ne ba diɡ nonibala dɛ ba diɡ nanibala ta. Ásɛ dɛ ɛ chal la ta saraha kon la baŋne la bwa ta.

²¹ Berɛ kpɔ chal la aa lɔ saraha kon la ta la ane, ásɛ dɛ fuɡe noo baa kpɔa dɛɛ do ba sɔfore ta la ane do Arɔn nyu ne o laala ta, dɛ́ berɛ do ane o bibaala la ɡe nyuune ta, dɛ́ ɛ merɛ ba ɡe laala ta. Gɛɛ dɛ ɡel o ne o bibaala la ne ba laala bwa do ɡoroŋ.

²² Kpɔ pee la no ne anɔ la aa lɔ o muŋɡo ta bwa, ne o noyal ne o pwɛ bela waa wera, ne o kporombie anɛ ne noorare aa ja a ta bwa dɛ o nadiɡ hwi.

²³ Kpɔ paanoo beŋkpoŋ le wɛɡrɛ baa do paanoo baa wola iisi a ta doe dɛ che men Korowii sie la bini ne paanoo baa do noo a ta mɔɔ dɛ wɔɔra ne biskeeti.

²⁴ Kpɔa do Arɔn ne o bibaala nɔɔra ta, ásɛ ba ɡɔɔra nyundua dɛ́ viiɡa men Korowii sie.

²⁵ Berɛ lɛ saraha kwaa la ba be, ásɛ dɛ kpɔ ja anɔ la baa fuah la ta, dɛ́ fuah saraha kon la ta. A ɛ saraha baa fuh a bwa a sɔɔh ɛɛ do som n be.

²⁶ Haa kpɔ pebal la bambile dɛ kpɔ ɛ we-ɛɛle ba do Arɔn sɔfore toma ta tonɛ la, ɡɔɔro nyundua dɛ́ viiɡu men Korowii sie, ásɛ o berɛ he dibɔr.

²⁷ Ɛ pebal ola la peri baa ɛ ane we-ɛɛle dɛ do Arɔn ne o bibaala sɔfore ta la a do ɡoroŋ. O bambile baa ɡɔɔro nyundua dɛ viiɡu men Korowii sie la ne o hwii baa kpɔa ba la.

²⁸ Anee ɛ dibɔra aa chɛ kɛŋɔ saŋ bɛlbwa Israel tena kpɔ baa tɛ Arɔn ne o bibaala. A ɛ bɔra aa chɛ kɛŋɔ bá kpɔ ba tɛ men Korowii dɛ le deŋnesɔɔhna saraha kwaa ta.

²⁹ Dɛ Arɔn baa sewaa, o naanar la bɛlbwa waa ba chiɡ o naa ta la, wɛɛ won do laala aa do ɡoroŋ la bá ɛo we-ɛɛla dɛ́ doo sɔfore toma ta.

³⁰ O bibaa bɛlbwa waa ba chiɡ o naa ta dɛ ɛ sɔfo la chɛ kɛ ó do laala la tɔpera anuanɛ mɔɔ bá ɛo we-ɛɛla o won jo n Dea Cheremibɔr la bini ka ɛ toma Boɡoroŋ bela.

³¹ Kpɔ pebal la baa kpɔ doo sɔfore toma ta la, dɛ́ daalo bɔr waa do ɡoroŋ.

³² N Dea Cheremibɔr doonyoa belaa chɛ kɛŋɔ Arɔn ne o bibaala la chwe pee la ol la ne paanoo aa lɔ wɛɡrɛ bini la.

³³ Bá di ɡɛ saraha kwaa baa kpɔa ɛ we-ɛɛla dɛ soŋe ba wechɔɡa dɛ lee ba cheɡ ba ɛ sɔfore dɛ do ɡoroŋ la. A ta chɛ kɛŋɔ nɛmpɛɛ bɛlbwa dia, dɛkalkɛ a do ɡoroŋ.

³⁴ Dɛ ol la kɛɛ paanoo baa kpɔa ɛ we-ɛɛla nɔ ane kao tɔɔ per a ta naa, a ta chɛ kɛ bɛlbwa dia, hé fuah dɛkalkɛ a do ɡoroŋ.

³⁵ Hé ɛ wobɛlbwa maa do heyaa nɔ tɛ Arɔn ne o bibaala la, dɛ́ kpɔ tɔpera anuanɛ ɛ we-ɛɛla do ba sɔfore toma ta.

³⁶ Teŋe nabal baŋa ɛ wechɔɡa kpɔe dɛ kɛ saraha tɔpere bɛlbwa tɔpera anuanɛ, dɛ́ kpɔ soŋe he wechɔɡa. Ɛ ɡɛ dɛ laa doŋa bɛlbwa kpɔ saraha kon la ta, ásɛ dɛ ɛ ɔleve noo la ane do o ta o do ɡoroŋ.

³⁷ Tɔpera anuanɛɛ he kpɔ laa doŋa kpɔ saraha kon la ta ó do ɡoroŋ. Gɛɛ hɛɛ ba ɛɛ ó won do ɡoroŋ kɛrɛdɛ, ásɛ komɛlbwa waa leɡo la ɡe do ɡoroŋ.

Tɔpere bɛlbwa sarahare

³⁸ Kwaa haa lawɛ ba saraha kon la ta ba ɛ saraha tɛ mɛ tɔpere bɛlbwa laanee pebiiri anɛ, a bɛlbwa aa di benanyoa.

³⁹ Lawɛ beŋkpoŋ ɛ saraha tɛ mɛ chɔɔ, ásɛ wee aa baa jo la, he kpɔ bɛl la ɡe ɛ tɛ mɛ.

⁴⁰ Pebie waa tɔ sie he kpɔ ɛ saraha la, kpɔ mea aa kpera kɛrɛdɛ kuruwa beŋkpoŋ, ne ɔleve no pɛrɛntoa beŋkpoŋ ne fah, ásɛ sen ɡe pɛrɛntoa beŋkpoŋ ne fah, dɛ́ fuɡe ɛ sen saraha.

⁴¹ Teŋe penɛɛte la ɡe baŋa ɛ saraha wee aa baa jo la, dɛ́ kpɔ mea saraha ne sen saraha dɛ ɔleve noo ja o ta ɡɛ tenten fuh ɛ saraha tɛ mɛ. A ɛ saraha baa fuh a bwa a sɔɔh ɛɛ do som n be.

⁴² Gɛɛ dɛ chɔ le tɛ naanar baa ka ba la baa fuh a ɡɛ saraha kwaa nɔ tɔperee bwa n Dea Cheremibɔr doonyoa bela men Korowii sie. Belaa mɛɛ ba heyaa chema, dɛ́ bol waa he be.

⁴³ Bela tentenee mɛɛ ba n cheme Israel tena, ásɛ n jirima tɔ bela bwa, dɛ́ ɡel o do ɡoroŋ.

⁴⁴ Gɛɛ mɛɛ ba ɛɛ n Dea Cheremibɔr la ne saraha kon la do ɡoroŋ, dɛ́ ɛ Arɔn ne o bibaala ɡe ba do ɡoroŋ dɛ́ ɛ sɔfore dɛ́ɛ tom mɛ.

⁴⁵ Mɛɛ do he Israel tena binii, ásɛ dɛ ɛ Korowii haa dɛ tom mɛ.

⁴⁶ Baa jemɔɔ kɛŋɔ menee Korowii baa dɛ tom mɛ, n kpɔ ba le Ijipt harɛ n ne ba so. Menee Korowii baa dɛ tom mɛ la.”