Kaala 28 - mzwDBL

Sɔfore laala wa

¹ Korowii berɔ ŋɔ Mosis be ŋɔ, “Gel bá kpɔ he dɔɔ Arɔn ne o bibaala Nadab ne Abihu ne Eliasa dɛ Itama le Israel tena bini, ásɛ ba ɛ sɔfore dɛɛ tom mɛ.

² Nyarɛ laala aa do ɡoroŋ tɛ Arɔn ó dɔ jirima ne duure.

³ Ŋɔ baala bwa maa tɛɛ ba kwaa nyara wejema la be ŋɔ, ba nyarɛ laala baa kpɔ do Arɔn baa kpɔ doo sɔfore dii ta, ásɛ o won dɛɛ tom mɛ kɛ sɔfo.

⁴ Laala haa nyarɛ laanee, kon waa dawɛ o bambile ta ne batakaarebora, ne batakaarejaŋ ne onɔ la baa sɔɔh ó do mun ta, ne yal baa kpɔ vɔwɛ nyu dɛ kiriso waa kpɔ dɛɛ vɔwɛ chara. Gɛ laala aa do ɡoroŋ nɔɔ baa ba nyara tɛ he dɔɔ Arɔn ne o bibaala, ásɛ ba ɛ toma dɛɛ tɛ mɛ kɛ sɔfore.

⁵ Gel ba kpɔ suuɡaswɛm ne jiseburum ne jisekɔl, ne jiseswɛm dɛ jisepondɛɛɡe ɛa.

Sɔfonomoa batakaarebora efɔd

⁶ Batakaarebora efɔd la, ɡel nɛn waa dɔ kwaa ɛɛ wejema kpɔ suuɡaswɛm, dɛ́ berɛ kpɔ jiseburum ne jisekɔl ne jiseswɛm ne jisepondɛɛɡe ɛo.

⁷ Bá kpɔ yal la pera nyarɛ nɔɔra á lawɛ baŋre anɛ habɔɔ yal la, dɛ́ kpɔ o vaama ta ba lawɛ o sie yal á pɛ dɔŋa.

⁸ O batakaare nyunduabɔr la chɛ kɛ ó do kɛ batakaare la ɡbaɡba bá nyara pɛ. Nɛn waa dɔ kwaa nyara wejema la kpɔ suuɡaswɛm ne jiseburum ne jisekɔl ne jiseswɛm dɛ jisepondɛɛɡe la ɛo.

⁹ Kpɔ onis bwedɛɛɡa a yoɡ aa kpeɡa anɛ, ásɛ dɛ chwerɛ Jekɔb bibaala sɔna dawɛ a ta.

¹⁰ Gɛ baa teŋɛ dɔŋa nɛɛ lola binii chɛ kɛŋɔ he chwera dawɛ. Banumɛl sɔna dɛ do beŋkpoŋ ta, ásɛ banumɛl ɡe sɔna do bɛl ɡe ta.

¹¹ Gɛ nɛn waa dɔ a wejema aa dɛ ɛa laanee chɛ kɛ he ɛ Israel bii sɔna la dawɛ bwe la ta. Ásɛ dɛ kpɔ cheɡ suuɡaswɛm kwaa ta a lawa kpoŋe,

¹² dɛ́ lawa pɛ o batakaare la vam nyuune ta dɛ́ che tɛ Israel deene. Gɛɛ sɔna nɔ ɛɛ ba Arɔn vaama ta dawa men Korowii sie, ń kpɔ dɛɛ lii ba wa.

¹³ Ɛ bwedɛɛɡa cheɡbɔra suuɡaswɛm kwaa ta a lawa kpoŋe,

¹⁴ ne suuɡaswɛm tenten jɔɡrɔre anɛ aa ɡaɡre dɔŋa dɛ́ do kɛ ŋwɛn ken, dɛ́ kpɔ lawɛ bwedɛɛɡa cheɡbɔra la ta.

Sɔfonomoa kon waa dɛ dawɛ bambile ta

¹⁵ Ɛ kon waa dawɛ Sɔfonomoa la bambile ta, ó kpɔ dɛɛ jemɛ waa aa wera dɛɛ le Korowii be, nɛn waa dɔ o wejemaa chɛ kɛ ó ɛo. Ɛo kɛŋɔ batakaarebora efɔd la siwi baa kpɔ suuɡaswɛm ne jiseburum ne jisekɔl ne jiseswɛm dɛ jisepondɛɛɡe sɔɔh la ken.

¹⁶ A chɛ kɛ he kpɛwɔ kera anɛ o jaŋne ne o paɡri bwa ɛ kɛrɛdɛ. O jaŋne ɛ nɔmpaa del o paɡri ɡe ɡɛ.

¹⁷ Bil bwedɛɛɡa a yoɡ aa kpeɡa bɔre anaarɛ á dawɛ o ta. Anɔ la aa tɔ sie la chɛ kɛŋɔ á ɛ bwe bɛl waa swɛɛra peihpeih baa yerɔ rubi, ne bweswɛm bɛl waa do kɛŋɔ solmen baa yerɔ topas, dɛ bwelwɛɛ bɛl baa dɛ yerɔ bɛrel.

¹⁸ Anɔ la aa teŋa nɛɛ la ɛ bwe burum baa dɛ yerɔ tɛɛkoes, ne bwe waa ɛ burum kohona baa yerɔ safaaya, dɛ bwe waa ɛ onlwɛɛ dɛ do ɡereŋ baa yerɔ ɛmeral.

¹⁹ Toorote la ɡe ɛ bwe burum baa dɛ yerɔ jansɛf, ne bwe waa dɛ nyɛɡle baa yerɔ aɡat, dɛ bwekɔl baa dɛ yerɔ ametes.

²⁰ Naarɛte la ɛ bwe waa ɛ solmen dɛɛ nyɛɡle baa yerɔ kresolet, ne bwelwɛɛ onis dɛ bwelwɛɛ waa dɛ nyɛɡle baa yerɔ jasepa. Cheɡa suuɡaswɛm kwaa la ta á lawa kpoŋe.

²¹ A bwa ɛ bwea fi dɛ anɛ, beŋkpoŋ che tɛ Jekɔb bibaala la bɛlbwa. Ɛ bɛlbwa sɔn dawɛ ó che tɛ o dea.

²² Kpɔ suuɡaswɛm tenten ɛ jɔɡrɔre dɛ́ ŋwɛɛra kɛŋɔ ŋwɛn ken kon waa dɛ dawɛ o bambile ta la ta.

²³ Dɛ́ kpɔ suuɡaswɛm ɛ nɔnloɡa do o loŋkoni anɛ ta.

²⁴ Suuɡaswɛm jɔɡrɔre anɛ la, kpɔa do nɔnloɡa aa lɔ o loŋkoni ta la ta,

²⁵ ásɛ dɛ kpɔ jɔɡrɔre la nyoo kar la ɡe lawɛ cheɡbɔra anɛ la ta, ɡɛ aa ɛ ó lawɛ batakaarebora efɔd la vaama ta dɛɛ ba o siebɔr.

²⁶ Berɛ kpɔ suuɡaswɛm ɛ nɔnloɡa anɛ do o loŋkoni aa lɔ o lɔɡa la bini dɛ bɛne batakaarebora efɔd la.

²⁷ Berɛ ɛ suuɡaswɛm nɔnloɡa anɛ, dɛ́ kpɔa lawɛ o nɔɔra la harɛbɔr, dɛ bɛne bela baa nyara pɛ batakaarebora efɔd la nyunduabɔr.

²⁸ Ŋwɛmburumee chɛ kɛŋɔ he kpɔ lawɛ nɔnloɡa aa lɔ kon waa dawɛ o bambile la ta dɛ́ ba nɔnloɡa aa lɔ o batakaarebora efɔd la ta, ɡɛ aa ɛ o bɛ batakaare la ta ba le.

²⁹ Saŋ bɛlbwa Arɔn aa jo Boɡoroŋ men Korowii sie la, Israel bii sɔna la ɛɛ dawɛ bambile kon la taa dɛɛ lii Korowii ba waa tɔpere bɛlbwa.

³⁰ Berɛ kpɔ Urim ne Tumim la do kon waa dawɛ Arɔn bambile ta la bini saŋ bɛlbwa waa dɛɛ ba men Korowii sie. Gɛɛ Arɔn ɛɛ ba ɛɛ saŋ bɛlbwa waa dɛɛ ba men Korowii sie.

Sɔfore laala ane ɡe wa

³¹ Batakaarejaŋ waa do ásɛ ombora la ɛɛ dawɛ o ta la, jiseburum ɡbosoroo nee chɛ kɛŋɔ he sɔɔh,

³² ásɛ dɛ pere o baah ta ó ɛ o nyu bɔr. A chɛ kɛŋɔ bá sɔh o nyu bɔr nyoa la bar kɛrɛdɛ o bɛ won kɛɛ.

³³ Kpɔ jiseburum ne jisekɔl dɛ jiseswɛm nyarɛ kwaa aa do ɡuleɡule kɛŋɔ daa bɛl nɔna baa dɛ yera pɔmeɡranet do batakaare la nyoa bar, dɛ́ ɛ suuɡaswɛm dorɔŋre saɡre a baahna ta.

³⁴ He do suuɡaswɛm dorɔŋre aa, dɛ he do konɡuleɡule la bɛl ɡe, ásɛ a do ɡɛ bar o nyoa cheme.

³⁵ Arɔn aa baa ɛ sɔfore toma men Korowii sie laanee chɛ kɛŋɔ ó do a ɡɛ batakaare nɔ. O ba dɛ ba men Korowii sie Boɡoroŋ bela dɛ berɛ dɛɛ le aa, baa no dorɔŋre la sii, ásɛ Arɔn bɛ ba sewɛ.

³⁶ Kpɔ suuɡaswɛm tenten kwaa kon waa do kpɛlɛntɛŋ dɛ́ ɛ dawɛ o ta ŋɔ, kon baa lea cheg tɛ korowii o do goroŋ.

³⁷ Kpɔ ŋwɛmburum do o ta dɛ́ kpɔ ka vɔwɛ yal baa kpɔa vɔwɛ o nyu la ta, ásɛ o do ɡbɛrɛ la sie.

³⁸ Wɛɛ dawɛ Arɔn tile taa ásɛ dɛ Israel tena kpɔ ba saraha kwaa bɛlbwa soo siwi ba tɛ mɛ dɛ ba koni a ta naa, bolchɔɡe la ba dawɛ Arɔn nɛ. Gɛɛ wɛɛ ba o tile ta dawa saŋ bɛlbwa ásɛ n lɛ ba saraha kwaa la.

³⁹ Kpɔ jisepondɛɛɡe sɔh batakaare waa doo mun ta ne o yal waa kpɔ vɔwɛ nyu la bwa. Kɛ kiriso la te chɛ kɛŋɔ nɛn waa dɔ kwaa nyara wejema nyarɛ dawɛ o ta.

⁴⁰ Nyarɛ batakaare Arɔn aa doa mun ta la siwi ne kirisopaŋa, dɛ yal tɛ Arɔn bibaala bá kpɔ vɔwɛ ba nyuune, á tɛɛ ba jirima ne duure.

⁴¹ Haa kpɔ laala nɔ do he dɔɔ Arɔn ne o bibaala tonɛ la, hé fuɡe noo do ba nyuune ta dɛ́ kpɔ ba sɔfo toma do ba nɔn ta. Ɛɛ ba bá do ɡoroŋ dɛ́ won dɛɛ ɛ n toma kɛŋɔ sɔfore.

⁴² Kpɔ yapondɛɛɡa nyarɛ yapeene baa doa mun ta, le chara ta ba hwie ta dɛɛ tɔ ba mune ta.

⁴³ Arɔn ne o bibaala chɛ kɛŋɔ báa do laala nɔ saŋ bɛlbwa baa jo n Dea Cheremibɔr bela, kɛɛ dɛ la kon baa dɛ ɛ saraha o ta dɛ́ ka tomɛ Boɡoroŋ bela, dɛ bɛ bolchɔɡe ba di dɛ́ serewe. Gɛ waa nɔɔ chɛ kɛ á chɔ le tɛ Arɔn ne o naanar saŋ bɛlbwa.”