Kaala 27 - mzwDBL

Kon baa fuh saraha o ta dɛɛ tɛ Korowii

¹ Korowii berɔ ŋɔ Mosis be ŋɔ, “Kpɔ akaasia daa kwaa kon baa ɛ saraha o ta dɛɛ tɛ mɛ. Gel o jaŋne ne o paɡri bwa ɛ beŋkpoŋ. O jaŋne ɛ naɡale anuanɛ ne tama, o paɡri ɡe naɡale anuanɛ ne tama. O daŋa ɡe ɛ naɡale anaarɛ ne tama.

² Sɛh o loŋkoni anaarɛ la bwa á kaa nyundua tama kɛŋɔ nyeɡlare ken. Daa beŋkpoŋii chɛ kɛ he kpɔ ɛ saraha kon la ne o nyeɡlare bwa, kpɔ ayaawa ɛ o bwara.

³ Kpɔ ayaawa ɛ o kwaa bwa, o loɡa baa kpɔ dɛɛ pa o tɔɔ, ne soofire ne loɡa baa do chal kɛɛ nee a bini dɛ ɛ dɛɛ merɛ o ta, ne bune baa kpɔ toh ola dɛ kwaa baa kpɔ dɛɛ buh nii.

⁴ Kpɔ ayaawa ɛ kafola do o ta, dɛ́ berɛ kpɔ ane ɛ nɔnloɡa do o baŋne anaarɛ bwa ta.

⁵ Kpɔ do saraha kon la bini, o baah ta.

⁶ Kpɔ akaasia daa ɛ dajaŋa haa kpɔ dɛɛ cheo, dɛ́ kpɔ ayaawa ɛ a bwara.

⁷ Kpɔ daa la su nɔnloɡa aa lɔ saraha kon la baŋne anɛ la ta bá kpɔ dɛɛ cheo.

⁸ Daa chɛ kɛ he kpɔ kwaa saraha kon la, dɛ́ ɡel o bini chɔ bɔɔ ɡɛ tenten maa chaɡle bwejen la doa la.

Korowii Tɛnte Dea dembaah wa

⁹ Ɛ dembaah ja n Tɛnte Dea la ta dɛ́ keo. O weekaŋle harɛbɔr pera bela jaŋne ɛ naɡale lafa fifraanue, ásɛ dɛ dɔ pateesanre baa kpɔ jisepondɛɛɡe sɔah kɛrɛdɛ,

¹⁰ ásɛ dachiɡri la ɛ fifraanɛ, ayaawa loɡa fifraanɛ do a mune ta. Bune aa lawɛ dachiɡri la kpoŋe la bwa chɛ kɛ he kpɔ suuɡapoŋa ɛ a bwara.

¹¹ O weekaŋle nyunduabɔr pera la ɡe chɛ kɛ o jaŋne ɛ naɡale lafa fifraanue, dɛ́ dɔ pateesanre ásɛ o dachiɡri ɛ fifraanɛ ayaawa loɡa do a mune ta. Bune aa lawɛ dachiɡri la kpoŋe la chɛ kɛ he kpɔ suuɡapoŋa ɛ a bwara.

¹² Dembaah wee cholibɔr pera chɛ kɛŋɔ o paɡri ɛ naɡale fifraanuanɛ dɛ anue dɛ́ dɔ pateesanre, ásɛ dɛ dɔ dachiɡri fi ayaawa loɡa fi do a mune ta.

¹³ Dembaah wee leebɔr ɡe chɛ kɛŋɔ o paɡri ɛ naɡale fifraanuanɛ dɛ anue.

¹⁴ Pateesanre a jaŋne aa ka tama a ɛ naɡale fifraanɛ dɛ atoro laanee chɛ kɛ a do doonyoa baŋ bɛl ta, ásɛ dachiɡri la ɡe ɛ atoro, ásɛ ayaawa loɡa atoro do a mune ta.

¹⁵ Ásɛ pateesanre a jaŋne aa ka tama á ɛ naɡale fifraanɛ dɛ atoro ɡe do o baŋ bɛl, ásɛ dachiɡri la ɛ atoro ayaawa loɡa atoro do a mune ta.

¹⁶ Dembaah doonyoa bela la chɛ kɛ ó dɔ pateesan o jaŋne aa ɛ naɡale fifraatoro, bá kpɔ jiseburum ne jisekɔl ne jiseswɛm dɛ jisepondɛɛɡe sɔɔh. Ásɛ nɛn waa dɔ kwaa nyara wejema ɛa dawɛ a ta, ásɛ dɛ dɔ dachiɡri anaarɛ loɡa anaarɛ do a mune ta.

¹⁷ Dembaah dachiɡri la bwa chɛ kɛ á dɔ suuɡapoŋ kwaa baa kpɔa lawa kpoŋe, ásɛ ayaawa loɡa do a mune ta.

¹⁸ Dembaah la jaŋne chɛ kɛ ó ɛ naɡale lafa fifraanue, ásɛ o paɡri ɡe ɛ naɡale fifraanuanɛ dɛ anue. O pateesanre chɛ kɛ bá kpɔ jisedɛɛɡa sɔah a nyundua kaala ɛ naɡale anuanɛ ne tama, ásɛ o dachiɡri loɡa la bwa ɛ ayaawa baa kpɔa ɛa.

¹⁹ N Tɛnte Dea la bini kwaa kar aa jaa ba kpɔ dɛɛ ɛ o bini toma ne kwaa baa kpɔa baŋro, ne anɔ la baa kpɔa baŋre dembaah bela bwa chɛ kɛ bá kpɔ ayaawa ɛa.

Noo baa kpɔ do kandea daa ta

²⁰ Do Israel tena bá kpɔ ɔleve nodɛɛɡa baa harama ba tɛɛ he do numoli aa lɔ kandea daa la ta la ta, ásɛ a won hɔe dɛ bɛ dɛɛ dime bwa.

²¹ N Dea Cheremibɔr pateesan waa lɔ N Ne Nɛwɛnyina Fɔo Daka la habɔɔ la, Arɔn ne o bibaalaa chɛ kɛŋɔ bá nyiŋi kandere la ta aa hɔ Korowii sie le jɔmɔra ba le chɔɔ bwa. Gɛ waa nɔ chɛ kɛ á ɛ Mmara dɛ́ chɔ le tɛ Israel tena ne ba naanar baa ka ba bwa.”