Kaala 26 - mzwDBL

Korowii Tɛnte Dea

¹ Korowii berɔ ŋɔ Mosis be ŋɔ, “Kpɔ jisepondɛɛɡe ne jiseburum ne jisekɔl dɛ jiseswɛm sɔh pateesanre fi, dɛ́ ɡel nɛn waa dɔ kwaa sɔeh wejema ɛ Kerobim dawɛ a ta, dɛ́ kpɔ kwaa Tɛnte Dea waa ɛ n dobɔr tɛ mɛ.

² Pateesanre la bwa chɛ kɛŋɔ á ɛ kɛrɛdɛ. A jaŋne ɛ naɡale fifraanaarɛ dɛ anɛ, ásɛ a paɡri ɡe ɛ naɡale anumɛl.

³ Nyarɛ a bini anue pɛ dɔŋa, ásɛ dɛ ɛ anue la ɡɛ tenten.

⁴ Kpɔ yakwara waa ɛ burum, dɛ́ ɛ tora do pateesanre anue baa nyara pɛ la bɛl nyoa, ásɛ dɛ ɛ ane do onɔ la ɡe nyoa ta.

⁵ Tora fifraanuee chɛ kɛ he do baŋ bɛl ta, ásɛ dɛ berɛ do tora fifraanue onɔ la ɡe ta a bwa sie chaɡɛ dɔŋa.

⁶ Kpɔ suuɡaswɛm ɛ kwaa fifraanue haa doa tora a sie aa chaɡɛ dɔŋa la pɛ, á ɡel n Tɛnte Dea la bwa ɛ beŋkpoŋ.

⁷ Kpɔ booh pona sɔh pateesanre dɛ́ kpɔ bɔle n Tɛnte Dea, a bwa ɛ pateesanre fi dɛ beŋkpoŋ.

⁸ A ɡɛ pateesanre fi dɛ beŋkpoŋ la bwa chɛ kɛ á ɛ kɛrɛdɛ. A jaŋne ɛ naɡale fifraanaarɛ dɛ anue, a paɡri ɡe ɛ naɡale anumɛl.

⁹ Kpɔ pateesanre la anue pɛ dɔŋa á ɛ beŋkpoŋ, ásɛ dɛ pɛ anumɛl la kar la ɡe á ɛ beŋkpoŋ. Kpɛwɛ pateesan numɛlte la ó do Tɛnte Dea la doonyoa bela.

¹⁰ Do tora fifraanue pateesan baa nyara pɛ dɔŋa la baŋ bɛl ta, ásɛ dɛ berɛ do tora fifraanue onɔ la ɡe ta ɡɛ tenten.

¹¹ Berɛ kpɔ ayaawa ɛ kwaa fifraanue baa doa tora, a sie chaɡɛ dɔŋa la pɛ, á ɡel Tɛnte Dea la bwa ɛ beŋkpoŋ.

¹² Kɛ pateesan baa kpɛwɔ la chɛ kɛ ó vah n Tɛnte Dea la habɔɔ.

¹³ Pateesanre la baa kpɔ booh pona sɔah la jaŋne ɛɛ ɛ naɡale beŋkpoŋ ne tama dɛ ɡwaa anɔ la baŋre anɛ la bwa ta. Anɔ la aa ɡwaa bwa laanee dɛ́ saɡɛ dɛ́ tɔ n Tɛnte Dea la.

¹⁴ Kpɔ pebal tɔne baa doa konswɛɛma tɔ tɛnte la, ásɛ dɛ kpɔ mpo nae tɔne bɔlo ja.

¹⁵ Kpɔ akaasia daa ɛ dachiɡri dɛ́ kpɔ kwaa n Tɛnte Dea la.

¹⁶ Dachiɡe bɛlbwa jaŋne chɛ kɛ ó ɛ naɡale fi dɛ anue, ásɛ o bare ɡe ka tama ó ɡwaa naɡale anɛ,

¹⁷ dɛ́ sɛh o mun, ó dɔ naa anɛ ásɛ a bwa ɛ beŋkpoŋ. Gɛɛ chɛ kɛŋɔ he ɛ daa aa lɔ n Tɛnte Dea la bɛlbwa ta.

¹⁸ Ɛ dachiɡri fifraanɛ paaɡe o weekaŋle harɛbɔr pera,

¹⁹ ásɛ dɛ ɛ suuɡapoŋa loɡa fifraanaarɛ do a mune, o nakpale anɛ la bɛlbwa dɔ beŋkpoŋ.

²⁰ Berɛ paaɡe dachiɡri fifraanɛ ɡe o weekaŋle nyunduabɔr pera,

²¹ dɛ́ ɛ suuɡapoŋa loɡa fifraanaarɛ do a mune. O nakpale anɛ la bɛlbwa dɔ beŋkpoŋ.

²² Paaɡe dachiɡri anumɛl o wee cholibɔr bela,

²³ ásɛ dɛ paaɡe dachiɡri anɛ o loŋkoni anɛ ta, wee cholibɔr bela.

²⁴ O loŋkoni anɛ dachiɡri nɔ chɛ kɛŋɔ bɛlbwa lawɛ o dɔŋ le mun ta, dɛ́ ka su nɔnloɡ beŋkpoŋ ta nyundua. Gɛɛ chɛ kɛŋɔ he ɛ anɛ la bwa.

²⁵ Gɛɛ dɛ́ ɡel dachiɡri la ɛ anuatoro ne suuɡapoŋa loɡa fi dɛ anumɛl, ásɛ suuɡapoŋa loɡa anɛ do daa bɛlbwa mun ta.

²⁶ Berɛ kpɔ akaasia daa ɛ doli anue dawɛ dachiɡri la aa lɔ n Tɛnte Dea la baŋ bɛl ta,

²⁷ ásɛ dɛ kpɔ anue dawɛ dachiɡri aa lɔ baŋ bɛl ɡe ta, ásɛ anue ɡe dawɛ dachiɡri aa lɔ wee cholibɔr baŋ bɛl la ɡe ta.

²⁸ Dola haa dawɔ baah ta la chɛ kɛŋɔ ó won le o baŋ bɛl ba kaa baŋ bɛl nyoa ta.

²⁹ Kpɔ suuɡaswɛm ɛ dachiɡri la bwara, dɛ́ kpɔ ane ɛ nɔnloɡa á lawɛ doli la kpoŋe. Kpɔ suuɡaswɛm ɛ doli la ɡe.

³⁰ Gɛ maa chaɡle bwejen la doa laanee chɛ kɛŋɔ he baŋre n Tɛnte Dea la.

³¹ Gel nɛn waa dɔ kwaa nyara wejema kpɔ jiseburum ne jisekɔl ne jiseswɛm dɛ jisepondɛɛɡe nyarɛ pateesan, dɛ́ ɡel nɛn waa jemɛ kwaa sɔeh ɛ Kerobim dawɛ o ta.

³² Kpɔ saɡɛ suuɡaswɛm bune aa paaɡe akaasia daa anaarɛ haa kpɔ suuɡaswɛm ɛ a bwara a ta su suuɡapoŋa loɡa ta la ta.

³³ Kpɔ paateesan la saɡɛ bune la ta, dɛ́ kpɔ N Ne Nɛwɛnyina Fɔo Daka la ba cheɡ o habɔɔ. Pateesan laanee dɛ́ pere Boɡoroŋ la le Boɡoroŋ Tenten la ta.

³⁴ Kpɔ N Ne Nɛwɛnyina Fɔo Daka tɔ waa ɛ bela maa lole dɛ kpɔ he wechɔɡa dɛɛ kɛ heyaa la tɔ o ta Boɡoroŋ Tenten la ta.

³⁵ Kpɔ teebur la ba cheɡ pateesan waa lɔ weekaŋle nyunduabɔr pera n Tɛnte Dea la, ásɛ dɛ kpɔ kandea daa la ɡe cheɡ o baŋ bɛl weekaŋle harɛbɔr.

³⁶ Korowii Tɛnte Dea doonyoa bela la, kpɔ jiseburum ne jisekɔl ne jiseswɛm dɛ jisepondɛɛɡe nyarɛ pateesan, dɛ́ ɡel nɛn waa dɔ kwaa sɔeh wejema ɛ kwaa dawɛ o ta, dɛ́ kpɔ saɡɛ o ta.

³⁷ Ɛ suuɡaswɛm bune aa lawɛ pateesan nɔ kpoŋe, dɛ́ ɛ akaasia dachiɡri anue haa kpɔ suuɡaswɛm ɛa, ásɛ dɛ ɛ ayaawa loɡa anue haa kpɔ do a mune ta.”