Kaala 25 - mzwDBL

Saraha kwaa baa ɛa Korowii Tɛnte Dea bela

¹ Korowii berɔ ŋɔ Mosis be ŋɔ,

² “Ŋɔ Israel tena la be bɛ́lbwa ɛ saraha tɛ mɛ. Henee chɛ kɛ he lɛ saraha kwaa la ɡɛ bɛlbwa bambile aa lawa kɛ ó kpɔ tɛ mɛ.

³ Koŋkɛɛla haa lɛ le ba be laanee suuɡaswɛm ne suuɡapoŋa dɛ ayaawa,

⁴ ne jiseburum ne jisekɔl ne jiseswɛm ne yadɛɛɡa ampoŋa dɛ booh pona,

⁵ ne pebala tɔne baa doa konswɛɛma, ne mpo nae tɔne dɛ akaasia daa,

⁶ ne ɔleve noo baa kpɔ do kandea ta, ne konsɔɔhsoma baa kpɔ koo noo baa kpɔa dɛɛ do nɛn sɔfore ta, ne anɔ la baa kpɔ koo daawiile ta dɛ́ fuah,

⁷ ne bwedɛɛɡa ane baa dɛ yera onis, ne anɔ la baa kpɔ dawɛ Sɔfonomoa batakaarebora efɔd la vaama ta, dɛ kon waa dawɛ o bambile ta la ta.

⁸ Gel ba ɛ Tɛnte Dea waa do ɡoroŋ tɛ mɛ, ásɛ n ba so ba bini.

⁹ Gɛ maa baɡle heyaa hé ɛ Tɛnte Dea ne o dor ne o bini kwaara la, ɡɛ tentenee chɛ kɛŋɔ he ɛo.

Korowii Ne Nɛwɛnyina Fɔo Daka

¹⁰ Hé kpɔ akaasia daa kwaa Korowii Ne Nɛwɛnyina Fɔo Daka o jaŋne ka tama ó ɛ naɡale anaarɛ, o paɡri ɡwaa naɡale anɛ, ásɛ o daŋa ɡe ɡwaa naɡale anɛ.

¹¹ Hé kpɔ suuɡaswɛm tenten ɛ o bini ne o baŋ bwa, dɛ́ berɛ ɛ suuɡaswɛm bar o nyoo.

¹² Ɛ suuɡaswɛm kɛŋɔ nɔnloɡa ken, dɛ́ kpɔ marɛ o nakpale anaarɛ la ta, anɛ do o baŋ bɛl, ásɛ anɛ ɡe do baŋ bɛl.

¹³ Kpɔ akaasia kwaa dajaŋa, dɛ́ kpɔ suuɡaswɛm ɛ a bwara.

¹⁴ Kpɔ daa la su nɔnloɡa aa lɔ Daka la baŋne anɛ la ta bá won kpɔ dɛɛ cheo.

¹⁵ Daa la chɛ kɛŋɔ á den do nɔnloɡa la ta, a ta chɛ kɛ nomɛlbwa laa kpɔ.

¹⁶ Ásɛ he kpɔ bwepɛle anɛ me Mmarare la aa dawɛ a ta mɛɛ ba kpɔe tɛɛ la, do Daka la bini.

¹⁷ Kpɔ suuɡaswɛm tenten ɛ daka la tɔ bela maa ba cheme heyaa dɛ kpɔ he wechɔɡa kɛ heyaa la, o jaŋne ka tama ó ɛ naɡale anaarɛ, ásɛ o paɡri ɡe ɡwaa naɡale anɛ.

¹⁸ Berɛ kpɔ suuɡaswɛm kwaa Kerobim la do o tɔ la nyoo.

¹⁹ Kerobim la beŋkpoŋ chɔŋɛ o baŋ bɛl, ásɛ bɛl ɡe do baŋ bɛl. Kombeŋkpoŋii chɛ kɛ he kpɔ kwaa Kerobim la ne daka la tɔ la bwa.

²⁰ Kerobim la chɛ kɛŋɔ á sie ɡba dɔŋa daka la doa, a kena paɡri kaa nyundua dɛɛ cheme dɔŋa dɛɛ tɔ o tɔ la ta.

²¹ Kpɔ bwepɛle anɛ maa kpɔ tɛɛ la do Daka la bini dɛ́ kpɔ o tɔ la tɔ.

²² N ne he Danseɛ Daka la doa Kerobim la baah taa mɛɛ ba he chema, dɛ́ kpɔ me Mmarare bwa tɛɛ hé kpɔ tɛ Israel tena.

Teebur baa kpɔ paanoo dawɛ o ta Korowii sie

²³ Kpɔ akaasia daa kwaa teebur, dɛ́ ɡel o jaŋne ɛ naɡale atoro, o paɡri ɛ naɡale beŋkpoŋ ne tama, ásɛ o daŋa ɡe ka tama ó ɡwaa naɡale anɛ.

²⁴ Kpɔ suuɡaswɛm tenten ɛ o bwa, dɛ́ berɛ ɛ ane bar o nyoo.

²⁵ Ɛ kon o paɡri del aa do kɛŋɔ nɔmpaa del baro, dɛ́ ɛ suuɡaswɛm dawɛ o ɡe ta bar.

²⁶ Ɛ suuɡaswɛm kɛŋɔ nɔnloɡa anaarɛ, dɛ́ kpɔ marɛ o loŋkoni ta o nakpale la bɔr bela.

²⁷ Nɔnloɡa la chɛ kɛŋɔ á do kon waa bar o nyoo la ta, bá won kpɔ dajaŋa su a ta, dɛ́ kpɔ dɛɛ cheo.

²⁸ Kpɔ akaasia kwaa dajaŋa, dɛ́ kpɔ suuɡaswɛm ɛ a bwara bá kpɔ dɛɛ che teebur la.

²⁹ Berɛ kpɔ suuɡaswɛm tenten kwaa loɡbakorɔre ne dompaane, ne numoli dɛ loɡa baa kpɔ dɛɛ fuɡe sen saraha kwaa la.

³⁰ Kpɔ paanoo haa kpɔ baa tɛ mɛ la dɛɛ dawɛ teebur nɔ ta saŋ bɛlbwa.

Kandea daa wa

³¹ Berɛ kpɔ suuɡaswɛm tenten loɡɛ kandea da. Le o mun ta kaa o nyundua chɛ kɛŋɔ ó ɛ suuɡaswɛm beŋkpoŋ. Ɛ o numoli á do kɛŋɔ daa fee yon pili la, dɛ́ ɛ anɔ la aa jaa bwa do kandea daa la ta suuɡaswɛm beŋkpoŋ la ne.

³² Ɛo ó dɔ kpala anumɛl. Atoro do baŋ bɛl ásɛ atoro ɡe do baŋ bɛl.

³³ Numoli do kɛŋɔ daa baa dɛ yerɔ almɔn fee dɛ ɛ atotoro, dɛ́ do kpale bɛlbwa ta.

³⁴ Ásɛ anaarɛ ɡe do kandea daa la tenten ta.

³⁵ Ɛ anɔ la aa wola sie pile mɔɔ la beŋkpoŋ do kpala anɛ aa tɔ sie chenchema la lɔɡa, dɛ́ do bɛl kpala anɛ aa teŋa nɛɛ chenchema la lɔɡa, dɛ́ ɛ ɡɛ tenten do kpala anɛ aa teŋa tooro la ɡe chenchema la lɔɡa. Á bwa ɛ kpala anumɛl.

³⁶ Kandea daa la ne o kpala ne o fee la bwa chɛ kɛŋɔ hé kpɔ suuɡaswɛm beŋkpoŋ la kwaara.

³⁷ Ásɛ dɛ ɛ kandere anuanɛ dɛ́ kpɔa chɔŋre kandea daa la ta aa chaah bela o sie aa chaɡa.

³⁸ O kon baa kpɔ dɛɛ fee ŋwɛn la doŋa ne o loɡbakorɔre bwa chɛ kɛŋɔ á ɛ suuɡaswɛm tenten.

³⁹ Suuɡaswɛm o tɔɡre aa ɛ kilore fifraatoro dɛ anaarɛɛ chɛ kɛ he kpɔ kwaa kandea daa la ne o konjeɡre bwa.

⁴⁰ Nyiŋi kɛrɛdɛ dɛ́ ɛa ɡɛ tenten maa baɡle bwejen la doa la.”